प्रकाशितवाक्य 5 - नोयरी नोवलू नियम

मुहरबंद पुस्तक कोडू उगाडित सेक्त्लू?

¹ जो सिहासनापो बोहीतरोल्यु ओतु, आय तियाआ हाजला आथे माय एक पुस्तक पालील्यो जे विसमे अने बारथेरोत लेखाल्या ओते, अने ते सात शिक्के लागाडीत बंद कोअल्यो गोये ओते.

² फासाडी आय होमला बोनावत्लू स्वर्गदूतो पालील्यो जो उचो शब्दामे ओ प्रचार कोईत ओतु, “आव पुस्तकामेहे उघाडल्यो अने तियाआ शिक्के तोडीलो ताहा कोडू होय?”

³ पोन नाहा होर्गाम, नाहा धरतीपो, नाहा धोरती निसे कोडू तिया पुस्तकाला उघाडीलो नाहा तियापो नजर टाकीला योग्य निघाल्यू.

⁴ ताहा आय जाअखो रोडहू लाग्यू काहाके का तियाअ पुस्तक मेहे उघडवीलो नाहा ताहा तियाअ पुस्तकापोअ नजर टाकीला योग्य कोडूच नाहा जोडयेहे.

⁵ यापो तिया प्राचीनाम रोत एक जोउ माहु कोयु, “मा रोडीही; पाला, यहुदाआ वाडवडील तो सिह जो दाविदाआ मुळ होय, तियाअ पुस्तकाला उघाडीलो अने तियाआ सात शिक्के तोडनारु याकोअता जय ओवयू होय”

⁶ अने आय तिया सिहासन अने चारू प्राणी अने तिया प्राचीनों मानीत ल्या एक वध कोअयु गोल्यो कोकरा उबु पाल्यू तियाआ सात हिंगे अने सात मुंडको ओते; ते परमेश्वरोओ सात आत्मा होय जी आखे धोरती उपो मोकलीलो गोयी ओती.

⁷ तिये आवीत तियाआ हुदा आथोप रोत कोईत जो सिहासनोप बोहयु ओतु ते पुस्तक लेत लेधलो ओते.

⁸ जाहा तिये पुस्तक लेत लेधलो, ताहा ते चारू प्राणी अने चोवीशे प्राचीन तियाअ कोकऱ्याच्या आगाडी पोडीत गोये तियाआ मायरोत आखाआ आथोमेहे विना, अने धूप, जी पवित्र लोकांची प्रार्थना होय, बोल्या बेनाआ धुपाटनी ओती.

⁹ ते ओ नवो गीत गावुहू लागाडीत, “तू या पुस्तकाला लेईलो, अने तियाआ शिक्के उघाडल्यो योग्य होय; काहाके का तू वध लेत आपाआ रक्तावहि प्रत्येक जात अने भाषा अने मांहे अने जाती मायरोत परमेश्वरा कोअता मांहोहो वेसातो लेधलो होय,

¹⁰ अने तियाहा आमा परमेश्वरा कोअता एक राज्य अने याजक बोनाडल्ये; अने ते धोरतीपो राज्य कोए.”

स्वर्गोदुतो द्वारा मेंडाआ प्रशंसा

¹¹ जांहा आय देख्यू, ताहा तियाअ सिहासन अने तियाअ जोनावारोह अने तियाअ प्राचीनांन तियाआ सोमकीर अने जाअखो एहलो स्वर्गदूतांचे शब्द होमल्यु, जिया मोजीओ लाख अने कोरडो होस ओती,

¹² अने ते उचो शब्दामे कोयो ओते, “वध कोईलो कोकराचे सामर्थ्य अने धन अने ज्ञान अने शक्ती अने सन्मान अने गौरव अने धन्य वादाआ योग्य होय.”

¹³ ताहरू आय स्वर्ग माय अने धोरतीपो अने धरती निसे अने समुद्राआ आखे वस्तूहू, अने आखे कोढाबी जे तियाआ माय होय, ओ कोत्ले ताहा होमल्यु, “जो सिहासनापो बोहयु होय तिया अने कोकऱ्याचा धन्यवाद अने सन्मान अने गौरव अने राज्य कायम रोय.”

¹⁴ अने चारू प्राणी आमेन कोया, अने डाये उपडे पोडीत नमन कोअयु.