प्रकाशितवाक्य 3 - नोयरी नोवलू नियम

सरदिस-मोअली कलीसिया

¹ सर्दीसच्या मंडलीओ स्वर्गदूतोहो लेखे ज्याआ जागे परमेश्वरोओ सात आत्मा अने सात तारे होय तोओ कोयु होय का आयताआ कामा कोअता ओळखीत्लू तू जीवित ते कोवात्लू, पण होय मोल्यू.

² जागतू ओव अने तियाअ सामानोअ जे उरिलो होय जे सेलाये होय, तियाहा दृढ को; काहाके का आयताआ कोडला कामाकोता आपाआ परमेश्वरोओ जागे पुरो नाहा पहीले.

³ याआ याकोअता स्मरण को का तू केहलो शिक्षण जोडयो कोल्यु अने होमल्यु ओते, अने त्याज ओत रो अने मोन फिरव केधी तू जागतू नाहा रोही ताहा आय बांड सारखू आविलो जाइलो, अने तू कदाचित नाहा ओलखुहू सेकेहे का आय कोडला वेळेला तापो आविलो पोडी.

⁴ पोन होय, सर्दीस मध्ये ताआ जागे किबी एहलो मांहे होय जिये आपाआ कापडे अशुद्ध नाहा कोयु, ते धवले कापडे पेआडील्यो माआआरी फिरेह, काहाके का ते आव योग्य होय.

⁵ जो जय मिलवीही तियाहा याआ प्रकारे धवले कापडे काल्ये जाइअलो, अने तो तियाआ नाव जीवनाआ पुस्तकामेहे कोडला रीतीवाही नाहा फूसील नाहा पण तियाआ नाव आपाआ बाह्हू अने तियाआ स्वर्गदूताआ एक सारखो मानीत उवे.

⁶ ज्याआ कान होय तो होमलीत लेय का आत्माआ मंडलीही कि कोत्लू.

फिलदिलफिया-विश्वासयोग्य कलीसिया

⁷ फिलादेल्फिया मंडलीई स्वर्गदूतोहो लेखे जो पवित्र अने खोरो होय अने जो दाविदाआ किल्ली मेकोहो, ज्याआ उघाडल्य कोडु बंद नाहा कोहू शकत अने बंद कोअल्याहा कोडु उघाडेहे शकत नाहा, तोओ कोत्लू का

⁸ आयताआ कामोहो ओलखीत्लू; पाला, आय ताआगाडी एक दरवाजू उगाडीत मेक्ल्ये होय, ज्याहा कोडु बंद नाहा कोहू शकत ताआ सामर्थ्य थोडोज ताहा होय, तेबी पण तू माआ वचनाआ पालीत कोल्यु होय अने माआ नावाआ नकार नाहा आप्यू.

⁹ पाला आय शैतानाआ तियाअ सभावालाहा ताआ वश माय कोईत देही जे यहुदी बोणीत बोह्ये होय, पण होय नहाते ठोग्त्लू गोगत्ले, पाला आय एहलो कोअही का ते आवीत ताआ दण्डवत कोइत, अने ओ ओलखीत लेणारे का आय तापो प्रेम मेकल्ये होय.

¹⁰ तू माआ धीराचे वचन उबेराखेहे होय, याकोअता आय पण ताहु परीक्ष्याच्या तियाअ वेले वासाडीत न मेक्ल्ये जो धोरती उपो रोणारे पारखिलो याकोअता आखा जुगोपो आविलो होय.

¹¹ आय लागेज आविलो होय; जे किबी तापो होय तियाहा थांबित मेका का कोडु ताआ मुगुट साडाळीते न घेवो.

¹² जो जय मिलवीही तियाहा आय आपाआ परमेश्वरोओ मंदिराम माय एक खांबु बोनाविही, अने तो फासाडी केधी बारथे नाहा नीही; अने आय आपाआ परमेश्वरोओ नाव अने आपाआ परमेश्वरोओ नगर अर्थात नवो यरुशलेम तियाआ नाव, जो माआ परमेश्वराच्या जागेरोत होर्गामरोत उतरीही होय, अने आपाआ नवो नाव तियापो लिखिलो.

¹³ ज्याआ कान होय तो होमलित लेते आत्माआ मंडळीही कि कोयु होय.

लोवदिकिया-गुनगुनी कलीसिया

¹⁴ लौदीकिया याआ मंडलीच्या स्वर्गदूतोहो लेखे जो आमेन अने खोरो विश्वासयोग्य होय, अने खरू साक्षी होय अने परमेश्वरोओ सृष्टीचे मूळ काहाके होय, तोओ कोत्लू का

¹⁵ आयताआ कामा कोअता ओलखीत्लू का तू नाहा थंडू होय नाहा गरम हाजो ओतलू का तू थंडू निते गरम रोतू.

¹⁶ याकोअता का तू गुणगुणू होय, अने नि थंडू होय अने नाहा गरम, आय ताहु उखलीलो पोओ होय

¹⁷ तो कोत्लू का आय मालक होय अने धनवान उवनारा गोल्यू होय अने किबी वस्तूअ कोम नाहा; अने ओ नाहा मालुम का तू अभागू अने तुच्छ अने कंगाल अने आंदलू अने नागरू होय.

¹⁸ याकोअता आय ताहु सम्मति आपोहो आग माय शुद्ध कोयु हुनो माआ त्यापोरोत वेसातो ले का तू धनवान उवनारा जाय अने धवले कापडे लेत ले का पेईत ताहु आपाआ भोंगळे पणाची लाज नाहा ओवो, अने आपाआ डोंआ माय लागळा याकोअता सुरमा लेत ले का तू पालुहू जोओवे.

¹⁹ आय ज्याआ ज्यापो प्रेम कोअत्लू, तियाअ आखाहा अपराध तियाआ पोदर कालीत शिक्षाम कोअत्लू याआ आरी आशा तो अने मोन फिराव को.

²⁰ पाला, आय बाअनापो उबुरोत खटखटवतुलू; केधी कोडु माआ शब्द होमलित बायणो उघाडीलो, ताहा आय तियाआ जागे माय आवीत तियाआ आरी रोटू खाही अने तो माआआरी.

²¹ जो जय मिलवीही तियाहा आय माआआरी माआ सिहासनापो बोहाडे, जेहलो आय पण जय मिलवीत आपाआ बाह्हा आरी तियाआ सिहासनापो बोहित गोल्यो.

²² ज्याआ कान होय तो होम्लाडित घेवो का आत्माआ मंडली कि कोयु होय.