प्रकाशितवाक्य 22 - नोयरी नोवलू नियम

जीवनो पाअयोओ नदी

¹ ताहरू तिये माहु बिल्लोर झळकिनारु, जीवनाआ पअयोओ नदी देखाओल्यी, जो देव अने कोकऱ्याच्या सिहासन वरून निहित

² तियाअ नगराआ वाटेने विसमे वोहती ओती खाडीइ आव सेटे अने तियाअ सेटे जिवनाआ साड ओतु, तीयाम बारा प्रकारोओ फोल लागित ओते, अने ते हर एक मोयनाम पाक्योहो ओते; अने तियाअ साळ पाने जाती-जातीही मांहे हाजो उवनारा ओते.

³ फासाडी शापित नाहा उवे, अने देव अने कोकऱ्याआ राजासन तियाअ नगरामे उवे अने तियाआ दास तियाआ उपासना कोअनारू.

⁴ ते तियाआ सोब पालनारू, अने तियाआ नाव तियाआ आथोपो लेखिलो होय

⁵ अने ताहरू रात नाहा उवे, तियाहा दिवाआ अने दिह उजवोडाआ गोरोज नाहा होय, काहाके प्रभू परमेश्वर तियाहा प्रकाश आपी, अने ते कायम राज्य कोअनारू.

येशु मसीहाआ पुनरागमन

⁶ ताहरू तिये माहु कोयु, “आव गोठी विश्वासाआ योग्य अने खोरो होय प्रभूनी, जो संदेष्टाआ आत्माआ परमेश्वर होय, आपाआ स्वर्गदूताला यकोअता मोक्ल्यीत का आपाआ दासाहा तियाअ गोठी, ज्याआ वेगु पुरो उवे अवश्य होय, देखाडूलो”

⁷ “पाला, आय वेगु आविलो होय धन्य होय तो, जो आव पुस्तकामेहे भविष्यवाणीच्या गोठी मोनोहो”

⁸ आय तोज योहान होय, जो आव गोठी मानत्लू अने पालीत ओतु जांहा आय होमल्यु अने देख्यू, ताहा ते स्वर्गदूत माहु आव गोठी देखाडीत ओते आय तियाआ गुडापो नमन कोइला कोअता पडिलो.

⁹ पोन तो माहु कोयु, “पाला, एहलो नाहा कोहू; काहाके आयताआ, अने ताआ पाही संदेष्टाहा, अने आव पुस्तका कोत गोठीही मानणाराहा हेगातीई दास होय देवो होस उपासना को”

¹⁰ फासाडी तिये माहु कोयु, आव पुस्तका कोत भविष्यवाणीच्या गोठीही बंद नाहा कोहू; काहाके वेल जागे आवयी होय.

¹¹ “जो अन्याय कोअत्लू, तो अन्यायच कोअत्लू; अने जो मलीन होय, तो घानुच रोय; अने जो पवित्र होय; तो पवित्र बोणीत रोय, अने जो धर्मी होय तोओ धर्मी बोनीत रोय.”

येशु मसीह कलीसिया कोअता गवाह

¹² “पाला, आय मामार आवनारू होय; अने हर एक कानोओ नुसार बदलू आपलो कोअता वेतन मांही होय.”

¹³ “आय अल्फा अने ओमेगा, पहीले अने पासाडित, प्रारंभ अने आखिर होय.”

¹⁴ धन्य होय जो, जो आपाआ कापडे तुवीत लेहो, काहाके तियाहा जीवनाआ साडो जागे आवीला अधिकार जोडे, अने ते फाटकोहिरोते नगरामे प्रवेश कोअनारू.

¹⁵ पोन कुत्रे, अने टोन्हो, अने व्यभिचार, अने मअनारे अने मूर्ती पुजारो, अने हर एक ठोगोहो आवाडाविलो दोनाराआ अने ठग कोअनारू बारथे रोही.

¹⁶ “माहु येशु आपाआ स्वर्गदूताला यकोअता मोक्ल्यीत का तुमाआ आगाडी मंडली विषयामे आव गोठीई साक्ष आप. आय दाविदाआ अंकुर अने पोऱ्ये, अने वेगरयु तेजस्वी तारू होय.”

¹⁷ आत्माआ अने लाडी बेनो कोअता, “आव” अने होम्लिनारो पण कोअही, “आव” जो तिहलू होय तो आव, अने ज्या कोडाआ जोवे तो जिविलो पाई फुकट ले.

चेतावनी

¹⁸ आय हर एक जनाला, जो यी पुस्तका भविष्यवाणी गोठी होमलित, साक्ष आपोहो जर कोडु मांहु आव गोठीमेहे किबी बोडावे ताहा परमेश्वर तियाअ पिडाहा, जो आव पुस्तकाम लेखिलो होय, तियापो लेतावे.

¹⁹ जर कोडु आव भविष्यवाणीच्या पुस्तकामेहे वचनामधून किबी काडीत टाक्ये, ताहा परमेश्वर तियाअ जिवनाआ साड अने पवित्र नगरी पोरोत, ज्याआ वर्णन आव पुस्तकाम होय, तिया भाग काडीत टाकही.

²⁰ जो आव गोठीही साक्ष आपोहो तोओ कोत्लू, “ओ आय वेगु आविलो होय” आमेन. ओ प्रभू येशु आव.

²¹ प्रभू येशुउ कृपा पवित्र माअहारोत आरी राहो, आमेन.