प्रकाशितवाक्य 21 - नोयरी नोवलू नियम

नवली सृष्टि

¹ ताहरू आय नवो जुग अने नवो जुगे पालील्यो, काहाके का पहीले जुग अने पेल्ली धोरती नाहा रोली अने समुद्रही नाहा रोला.

² फासाडी आय पवित्र नगर नवो नोवो यरुशलेम स्वर्गला परमेश्वरा आरी उतरीलावेले पालील्यो ते तियाअ लाडी सारखी ओती अने आपाआ डोहाकाजे होबाडलेली ओती.

³ फासाडी आय सिहासना मायरोत कोडु एकाहा उचो शब्दावाईही ओ कोत्ले ताहा होमल्यु, पाला परमेश्वरोओ मंडप महांआ माय होय तो तियाआ जागे डेरा कोअही अने ते तियाआ मांहे ओये, अने परमेश्वर खुद तियाआ आरी रोही अने तियाआ परमेश्वर उवे.

⁴ तो तियाआ डोआ मेर्यए आखे आहवे नुसित टाकही; अने तियाआ फासाडी मरण नाहा रोही, अने नाहा शोक, नाहा वेल, नाहा पीडा रोही; पेल्ली गोठी जात गोयी.

⁵ जो सिहासनापो बोहयु ओतु, तिये कोयु पाला, “आय आखे किबी नवो कोईत आपोहो.” फासाडी तिये कोयु, “लेखित ले, काहाके का ते वचन विश्वासाआ योग्य अने खोरो होय.”

⁶ ताहरू तिये माहु कोयु, आव गोठी पुरो उवनारा गोयी होय आय अल्फा अने ओमेगा, प्रारंभ अने आखिर होय आय तोरहालाहा जीवन पाअयोंआ झऱ्या मायरोत फुकट पिवाडीही.

⁷ जो जय मिलवीही तो तिया वस्तूंइऊ वारीस उवे, अने आय तिया परमेश्वर उवे अने तो माआ पुत्र उवे.

⁸ परंतु बिनारू, अने विश्वास न कोअनारु अने अमंगल, अने खुनी अने जारकर्मी, अने जादू टोना, अने मूर्ती पुजारो, अने आखे ठोगोओ भाग तियाअ झील मेहे जोडीत जी आग अने गंधकाने पेटीत रोनारे ते दूसरी मरण होय.

मेंडाआ दुल्हन

⁹ फासाडी तिया सात स्वर्गदूताआ जागे सात आखरी पिढ्यांनी पोअल्ये सात कोटोरा ओता, तीयामरोत एक माआ जागे आवयू; अने माआआरी गोठी कोईत कोयु, “अही आव, आय ताहु नव्लाडी अर्थात कोकऱ्याची लाडी देखाडोहो.”

नवलो यरूशलेम

¹⁰ तेहलाम तो माहु आत्माआ माय एक वोडू फासी उचो डोगोपो लेत गोल्यो अने पवित्र नगर यरुशलेमाहा होर्गामरोत परमेश्वरोओ जागेरोत उत्तर तांना देखाये.

¹¹ परमेश्वरोओ गौरव तियाआ माय ओते अने तियाआ प्रकाश-भरपूर डोने किमतीइ रत्ने यास्के हारखी साप ओती.

¹² तिया तट पण वोडू उचो ओतु, अने तिया बारा फाटक अने फाटकापो बारा स्वर्गदूत ओते अने तिया फाटकापो इस्राएलो बारा वंशामेह नाव लेखिलो ओते.

¹³ पूर्वीच्या जागे फाशी तीन फाटक, दक्षिण जागे फाशी तीन फाटक, अने पश्चीमी जागे तीन फाटक ओते.

¹⁴ नगराआ तटाला बारा डोगडो ओते, अने तियापो कोकऱ्याच्या बारा प्रेषितचे बारा नाव लेखिलो ओते.

¹⁵ जो माआआरी गोठी कोईत ओतु तियाआ जागे नगर अने तियाआ फाटक अने तियाआ तट ला मोजीलो कोता होनो बोरुचे माप ओते.

¹⁶ ते नगर चारीवोग उपो वसलेले ओते अने तियाआ लांबी आकडू अने उचु आरी ओती अने तिये तियाअ बोरुच्या मापोमेहे नगराहा मोजला ताहा साडे सातशे कोसचा निघाल्यू तियाआ लांबी अने आकडू उचु च्या आरी ओती.

¹⁷ तिये तियाआ तटीला मांहाहा अर्थात स्वर्गदूत च्या नावामे मापिलो ताहा एकशे चौरेचाळीस निकलीलू.

¹⁸ तियाआ तट यास्पे रत्नाचा बोल्यू ओतु, अने नगर एहला शुद्ध हुनो ओतु जे साफ काचे सारखो ओते.

¹⁹ तिया नगराआ प्रत्येक प्रकारे बहुमुल्य डोन्वाही स्वार उवे ओते; पेल्लु गुडू यास्फे, दिहरु नीळ तिसरू शिवधातू, चौथा मरकतोओ,

²⁰ पाचवा गोमेद्चा, सहावू सार्दी, आथे लासना, ओर वैदुर्य तियाआ, नोवो फुले राज तियाआ दहावू सोन लसणी, अकरावा याकिंथ तियाआ, अने बारावो पझराग एहलो ओते.

²¹ बाराहि फाटक बारथे मोत्यांचे ओते; एक-एक फाटक एक-एक मोतीचे ओते नोगरोमेहे सोडक साप काचे सारखू शुद्ध हुनाआ ओतु.

नवलो यरूशलेमोओ महिमा

²² आय नि तीयाकाही मंदिर नाहा पालील्यो, काहाके का आखे सर्वशक्तीमान प्रभू परमेश्वर अने कोकरा तिया मंदिर होय.

²³ तिया नगरा माय दिह अने चादाआ उजडोओ गोरोज नाहा, काहाके का परमेश्वरोओ तेज आय तीयाम उजालो उवनारा होय, अने कोकरा तिया प्रकाश होय.

²⁴ जाती-जातीही माहू माय साले फिरे, अने धोरतीई राजा आपाआ-आपाआ तेजाच्या सारखो तियामेहे लेतावे

²⁵ ज्याआ फाटक दिहे केधीज बंद नाहा उवे, अने रात तिही नाहा उवे.

²⁶ मांहे जाती जतिमेहे तियाआ तेज अने गौरव काहा एकहरको तियामेहे लेतावी.

²⁷ पोन तियामेहे कोडु अपवित्र वस्तू, नेते अशुद्ध काम कोअनारे, नेते असत्य आचारनारा कोडलाज रीतीवाही प्रवेश नाहा कोअनारू, पोन फक्त ते मांहे ज्याआ नाव कोकऱ्याच्या जीवनाआ पुस्तकाम लेखिलो होय.