प्रकाशितवाक्य 2 - नोयरी नोवलू नियम

इफिसुस-बिगुर प्रेमोओ कलीसिया

¹ इफिसुसच्या मंडली स्वर्गदूतोहो ओ लेखे जे सात तारू आपाआ हाजला आथोमेहे लेत मेकल्ये ओते अने बेनाआ हेगांति दीवटच्या मध्ये फिरीत ओतु, तोओ कोत्लू का

² आयताआ कामोहो, अने ताआ परिश्रम, अने ताआ धीराआ ओलखीत्लू; अने जे तू वाईट मांहोहो पाल्यू नाहा शकत, अने जो खुदोहो प्रेषित कोत्ले, अने होय नाहा, तियाहा तू ओलखीत खोटो पालील्यो.

³ तू धीर तोअत्लू अने माआ नावाकोअता दु:ख उठावी-उठावी थाकलू नाहा.

⁴ पण माहु ताआ विरूद्ध ओ कोओलो होय का तू आपाआ पहीले प्रेम सोडीत देदुहू.

⁵ याकोअता स्मरण को का तू किहीरोत पोडीत होय, अने मोन फिरव अने पेल्ला होस काम कोओ, जर तू पश्चताप कोअयु नाहा ताहा आय आविही अने ताआ दिवट तापोरोत काढीत लेही.

⁶ पोन होय, तांआम ए गोठी ताहा होय का तू निकुलीई कामोवाही घृना कोअत्लू, जीयासी आयबी घृणा कोअत्लू.

⁷ ज्याआ कान होय तो होमलित घेवो का आत्माआ मंडली कि कोत्लू जे जय मिलवीही, आय तियाहा जीवनाआ साडोमे रोत जे परमेश्वरोओ स्वर्ग लोकामेहे होय, फोल खाहुं आपही.

स्मुरना-सताव्ली कलीसिया

⁸ स्मुर्णाच्या मंडली स्वर्गदूतोहो ओ लेखे “जो पेल्लू अने अंत होय, जो मोईत गोल्यो ओतु अने ओमे जिवंत ओत गोल्यो होय, तोओ कोत्लू का?”

⁹ आयताआ त्रास अने गरिबिही ओलखीत्लू (परंतु तू मालक होय) अने जे मांहे खुदोहो यहुदी कोतेहे अने निमिले, पोन शैतानाआ मिटींग होय, तियाआ निंदाला पण ओलखीत्लू.

¹⁰ जे दु:ख माहु सेलीलो लागे, त्यापोरोते मा बिहिही काहाके का पाला शैतान तुमाआ मायरोत काहींना जेलीमा टाके याकोअता कि तुमु पारखिलु जावा; अने तुमामे दहा दिहे पर्यंत त्रास उठाव्लो पोडे. अने जीव आपता जाआ विश्वासीरो, ताहा आय ताहु जिवनाआ मुकुट आपही.

¹¹ ज्याआ कान होय तो होमलित ले का आत्माआ मंडळी की कोत्लू जो जय मिलवीही, तियाहा दिहरी मृत्यू सी नुकसान नि ओवे.

पिरगमुन-समजोवता कोअली कलीसिया

¹² पिरगमुनची मंडलीई स्वर्गदूतोहो लेख ज्याआ जागे दुधारी अने तेज तलवार होय, तोओ ओओ कोत्लू का

¹³ आय ओ ओलखीत्लू का तू तिही रोतलू जीही शैतानो सिहासन होय; तू माआ नावापो स्थिर रोतलू, अने मापो विश्वास कोअल्यानी तियाअ बेनुमे पण फासाडी नाहा ओवयू ज्याआ माय माआ विश्वासयोग्य साक्षी अंतीया, तुमाआ माय तियाआ स्थानापो घात कोअल्यो गोल्यो जीही शैतान रोतलू.

¹⁴ पोन माहु ताआ विरूध किबी गोठी कोअला होय, बली का ताआ ईहि किबी एहलो होय, बिलामच्या शिष्यांआ मानतेहे, जिये बालाक इस्राएलो आगाडी ठोकराचे काहाके मेकिलो हिकाडये का मूर्तीपो सोडावली वस्तु खा, अने व्यभिचार को.

¹⁵ तेहलूज ताआ ईहि किबी एहलो होय, जो निकुलीई शिक्षणाला मानतेहे.

¹⁶ अने मोन फिराव, नाहा ताहा आयताआ जागे मामार आवित आपाआ मुखाची तलवारवाही तियाआ आरी युद्ध कोअही.

¹⁷ ज्याआ कान होय तो होमलित घेवो का आत्माआ मंडळीही कि कोत्लू जे जय मिलवीही तिया आय गुप्त मन्ना मधून आपही, ओमे तियाहा एक धव्लू डोणो पण आपही; अने तियाअ डोणोपो एक नाव लेखाल्या होय, ज्याहा तियाआ मिलविनाराहा शिवाय अने कोडूच ओलखीही नाहा.

थुआतिरा-भ्रष्ट कलीसिया

¹⁸ “थुआतीरा मंडली स्वर्गदूतोहो ओ लेख” परमेश्वरोओ पुत्र ज्याआ डोआं आगीही ज्वालाच्या एकहरको अने ज्याआ गुडू उत्तम पितळीआ एकहरको होय, तोओ कोयु होय का

¹⁹ आयताआ कामोम, ताआ प्रेम अने विश्वास अने सेवा अने धीर, ला ओलखीत्लू अने ओ पण का ताआ फासाडी काम पेल्लाप रोत वोडीत होय.

²⁰ पण माहु ताआ विरूध ओ कोओलो होय का तू तेए बुई इजबेल ला रोहू देत्लू जे खुदोहो संदेष्टी कोहे का, अने माआ सेवकोहो व्यभिचार कोअला अने मूर्ती आगाडी बली कोअली वस्तू रोटू खायलो हिकाडीत भरमावत्ली.

²¹ आय तियाहा मोन फिर्विनारु याकोअता टाइम आप्यु, पोन तेए तीयीई व्यभिचाराने मोन नाहा फिरावयी.

²² पाला आय तीही आथ्रीलो खीळलेली एहली कोअही अने जो ताआ आरी व्यभिचार कोअता केधी ते पोन तियाआ काम कोईलो मोन नाहा फिरविले ताहा आय तियाहा वोडा क्लेशा मेहे टाकही.

²³ आय तिया पोऱ्याहा माईत टाकही; अने मंडली आखे जाईत लेणारे का हृद्य अने मनांआ पारखिनारु आयुज होय अने आय तुमाआ मायरोत आखाहाज तियाआ कामा नुसार फोल आपे.

²⁴ पोन तुमु थुआतीराच्या उरील्योओ माहुंहु आपारी आव शिक्षणाला नाहा मोनामे अने तियाअ गोठीहि ज्याहा शैतानाआ उंडो गोठी कोयु नाहा ओलखीत ओ कोत्लू का आय तुमापो फासी वोझो नाहा.

²⁵ पोन होय, जे तुमाआ जागे होय तियाहा माआ आवहू पर्यंत थोबाडीत मेका.

²⁶ जो जय मिलवीही माआ कामाआ नुसार आखिर पर्यंत कोईत रोही, आय तियाहा जाती जातीई माहाहूपो अधिकार आपही,

²⁷ अने तो लोखंडाचा राजदंड माग्ल्यू तियापो राज्य कोअही, ज्या प्रकारे डूसरे बनविनारु काद्वो बासणा चुरा-चुरा ओत जातेहे आय पण एहलो अधिकार आपाआ बाह्हासी मिलउत होय;

²⁸ अने आय तियाहा वेगीई तारू आपही.

²⁹ ज्याआ कान होय तो होमलित घेवो का आत्माआ मंडळीही कि कोत्लू.