प्रकाशितवाक्य 19 - नोयरी नोवलू नियम

स्वर्ग मेहे परमेश्वरोओ स्तुति

¹ तियाआ नंतर आय होर्गाम वोडी गोर्दीही उचो शब्दा वाइहि ओ कोत्ले ताहा होमल्यु, हालेलुया उद्धार अने गौरव अने सामर्थ्य आमा परमेश्वरोओ होय.

² काहाके का तियाआ निर्णय खोरो अने ठीक ओत तीया वोडा वेश्याच्या, जी आपाआ व्यभिचाराने पृथ्वीही भ्रष्ट कोईत ओते, न्याय कोअयु अने तियाहा आपाआ दासोओ रक्ताआ बदलू लेदो होय.

³ काहाके दिहरा वेळेला तिये कोयु, हालेलुया तिया जडलोओ सेटू कायम उठिलो रोही.

⁴ तेहलाम चोवीस प्राचीनानी अने चार प्राणी उब्ड़ा पोडित परमेश्वरोओ नमन कोअयु, जो सिहासनापो बोहयु होय, अने कोयु, “आमेन हालेलुया.”

⁵ तेहलाम सिहासना मधून एक शब्द निघाल्यू, “ओ आमू परमेश्वरहो बिहनारा आखा दास, की हानू, की वोडो; तुमु आखे तियाआ स्तुती को.”

⁶ फासाडी आय वोडा गर्दीइ सारखो अने जाअखो पाई सारखो शब्द, अने गर्जना सार्खू वोडू शब्द होम्लालू हालेलुया काहाके का प्रभू आमाआ परमेश्वर आखे सर्वशक्तीमान राज्य कोअत्लू.

⁷ आव, आमू आनंदाम अने मग्न ओवुहू, अने तियाआ स्तुती को काहाके का कोकऱ्याचा वेहवाल आविलो पुग्यु होय, अने तियाआ वधू खुदोहो तीयार कोईत लेधलो होय.

⁸ तियाहा शुद्ध अने चंमकीनारो तागाचे मलमल कापडे कालीलोओ अधिकार आप्यू गोल्यो, का तिया महान मलमलचा अर्थ पवित्र मांहोओ धार्मिक काम होय.

⁹ तेहलाम स्वर्गदूतांवाही माहु कोयु, “ओ लेख, का धन्य ते होय, जो कोकऱ्याच्या वेहवालो खानामेहे हादले गोये होय,” फासाडी तिये माहु कोयु, ओ वचन परमेश्वरोओ खोरो वाचन होय.

¹⁰ तेहलाम आय तियाहा नमन कोइला कोअता तियाआ गुडापो पोडीत गोइयु जागे माहु कोयु, पाला, “एहलो नाहा कोहू, आयताआ अने ताआ पाहीआरी दास होय जो येशुउ साक्ष आपलो कोअता स्थिर होय परमेश्वरोओ दंडवत को” काहाके का साक्ष संदेशाची आत्मा होय.

धोवला गोदडा पोओ सवार

¹¹ ताहरू आय स्वर्गाआ उगडीलो पहीले, अने पालत्लू का एक धवलू गोदडू होय; अने तियापो एक स्वर होय, जो विश्वासयोग्य अने खोरो कोयु जात्लू, अने तो धर्माच्या आरी न्याय कोअनारा अने शुद्ध रोतलू.

¹² तियाआ डोआं आगी आरी ज्वाला होय, अने तियाआ मुंडकापो जाअखो एहलो राज मुगुट होय तीयापो एक नाव लेखिलो होय, ज्याहा तियाहा सोडीत नि कोडूच नाहा उलखित्लू.

¹³ तो रक्तावहि शिंपडलेले कापडे पेअयुहु, अने तियाआ नाव परमेश्वरोओ वचन होय.

¹⁴ स्वर्गाची सेना धवला गोदडापो स्वर अने धवलो अने शुद्ध अने धवले मलमल कापडे पेइत तियाआ फासाडी-फासाडी आव्ये.

¹⁵ जाती जातीही माअहू याकोअता तियाआ सोबिमरोत एक धरती तीक्ष्ण तलावर निकलित्ली तो लोखंडाचा राजदंड घेऊन तियापो राज्य कोअही, अने आखे सर्वशक्तीमान परमेश्वराने भिवाडनारू राग कोअयो पेताडीलाआ मंदिराआ कुंडात द्राक्षरस तडावील्यु.

¹⁶ अने तियाआ कापड़े अने जांघ पोओ नाव लेखिलो होय, “राजांचा राजा अने प्रभूंचा प्रभू.”

पशु अने तियाआ सेनाआ पराजित ओवलोओ

¹⁷ फासाडी आय एक स्वर्गदूताला दिहीपो उबु रोतगोल्यु पाल्यू तिये वोडा शब्दामे आयडीत जुगोओ मायरोत उडणारे आखे सिडाहा कोयु, “आव, परमेश्वरोओ वोडा रोटा कोअता एकठे ओत जा,

¹⁸ ज्याआ त्यापोरोत तुमु राजांआ माउस अने दासांआ माउस अने आखे शक्तिमान हाना पोऱ्याआ माउस, अने गोदडाआ की हाजो अने की दास, की हानू, की वोडो, आखे मांहो माहा खावा.”

¹⁹ ताहरु आय तिया पशुहू, अने पृथ्वीई राजा अने तियाआ शैतान तियाअ गोदडा स्वरांनी अने तियाआ सेनांनी लोढाई कोइला याकोअता एकठे पहीले.

²⁰ तो जनावरे, अने तियाआ आरी तो ठोग संदेष्ट तोअया गोल्यो जिये तियाआ आगाडी एहलो चिन्ह देखाये गोये ओते तियाआ द्वारा तिये तियाहा ठोगाडीलो जे तियापो तिया पशुउ छाप ओती अने जो तियाआ मूर्तीइ उपासना कोईत ओते तो बेनु जीवेहे ओतुताहा तियाअ आगीई भंटीत, जो गंधकाणे पेटीत ओते, टाक्ये गोये.

²¹ रोयोहो मांहे अने गोदडा स्वारच्या तलवारीकी, जे तियाआ सोबेवाही निहित ओते माईत मेकल्या गोये, अने आखे सिडे तियाआ माहा खात तृप्त उवनारा गोये.