प्रकाशितवाक्य 18 - नोयरी नोवलू नियम

बाबेलोओ विनाश

¹ तिया फासाडी आय एक स्वर्गदूताल होर्गामरोत उतरिता देख्यू, तियाहा वोडू अधिकार ओतु; अने धोरती तियाआ तेज सी प्रकाशाम उवी.

² तिये वोडो शब्दावाही आयडीत कोयु, “वोडू बाबेल पोड्यू, दुष्टात्मा वस्ती,” अने हरेक अशुद्ध दुष्टात्मा आश्रय, अने हर एक अशुद्ध अने घृणित सिडाआ आश्रय ओत गोयू.

³ काहाके तिया पापकोनारू भिवाडनारू मदिराआ कारनो कोईत आखे प्रकारो जाती पोडी गोयी, अने पृथ्वीई राजा तीयिरी व्याभिचार कोअया अने पृथ्वीई वेपारी तिया द्रव्य बळाने हिम्मतवालो उवे.

⁴ ताहरु आय होर्गामरोत एक शब्द ईजि होम्लालू, ऐ माआ मांहा, तीयामरोत निहित आव का तुमु तियाआ पापामेहे सहभागी नाहा ओवो, अने तियाआ पिडा मेहे कोडनिबी पीडा तुमापो पोडुहु नि जुवे.

⁵ काहाके तिया पापाआ ठीगलू स्वर्गापोरोत पुग्या होय, अने तिया अधर्म देवोहो ओर होय.

⁶ जेहलो तिये तुमामे आप्लु होय तेहलूज तियाहा दया, अने तियाआ का मापोरोत तियाहा आपा दुप्पट जाखो दया;

⁷ जेवडे तिये आपाआ महिमा कोअयी का अने सुख विलास कोल्यु, तेतोज तियाहा पीडा फासी शोक आपा काहाके ती मोनम कोत्ली, आय राणी घेऊन बोही होय, रोंडाली नाहा; अने दुखिलो त केधीज नाहा पोअनारू.

⁸ आव कारनो कोईत एकुच तेदीही तीपो पीडा आवयी, म्हणजे पोऱ्यो, अने दुख, अने दुष्काळ; अने ती आगीमे नष्ट कोल्यु जानारू, काहाके तीई न्याय कोअनारा प्रभू परमेश्वर जोरावार होय.

बाबेलो कोअता विलाप

⁹ “पृथ्वीई राजा जिये तियाआरी व्यभिचार अने हुख विलास कोअयु, जांहा तियाआ पेटालो तुमाडू देखाहा, ताहा तीयीकाजे रोडे अने छाती देणारे”

¹⁰ तीआ पीडयाच्या काबरात्लू ते जास्तीज सेटू उभे रोत कोअही, ओ मजबूत नगरी, बाबेलोन ऐ दृढ नगरी, हाय-हाय होमला क्षणोम ताहु न्याय दंड मिलून गोये होय.

¹¹ पृथ्वीई वेपारी तीयीकाजे रोडे अने शोक कोअनारू, काहाके ओमे कोडु तियाआ माल वेसातो नाहा घोणार;

¹² म्हणजे होनो, चांदी, किमतिई रत्ने, मोती, अने तलम, रेशमी कापडे अने हर एक प्रकारोओ सुंगधीत लाकडे, अने हस्तिदंतीची हर एक प्रकाराआ वस्तू, अने किमतिई लाकडे, अने पितळी अने लोखंड अने संगमरवरी पायाआरी पत्रे,

¹³ अने दालचिनी, सुंगधीत धूपद्रव्ये, सुगंधीत तेल, लोबान, द्राक्षारस, तेल, सपीठ, गवोओ, डोगरे मेंढे गोदडा, रथ, अने दास, अने मांहाआ जीव.

¹⁴ ओमे ताआ जीवोहो फल देलो ताआ जागेरोत जात रोही, अने चविक अने टाकाईत रोल्ये वस्तू ताहिरोते सेटे गोयुहू, अने ते फासी फासाडी कदाचित नाहा मिले.

¹⁵ आव बिढारा वेपारी जे तियाआ व्दारे धनवान उवनारा गोये ओते, तियाआ पिडाआ बीईलोअ कारनो कोईत सेटू उभे रोही, अने रडीत अने शोक कोईत कोय,

¹⁶ हाय-हाय वोडी नगरी जे तागामी कापडे, अने लाल रंगाचे कापडे काल्ये ओते, अने हुनो अने किमतिई रत्ने अने मोत्यें यांहि होबाडलेली ओती;

¹⁷ एक क्षणांतच तियाआ एहलो हाजा धन नष्ट उवी हर एक माझी अने प्रवासी अने खलाशी, अने आपारी समुद्रामे रोत कामावली, आखे सेटे उभे रोल्या,

¹⁸ अने तियाआ जईगोल्यो सेटू पालीत आयडीत कोनारू, कोडली नगरी आव वोडो नगरी हारखी होय?

¹⁹ अने आपाआ-आपाआ मुंडकापो धूळ टाकही, अने रडीत अने शोक कोईत आयडीत-आयडीत कोअही, हाय-हाय वोडी नगरी ज्याआ संपत्तीच्या व्दारे समुद्राचे आखे जहाज वालो श्रीमंत उवे ओते, होमला क्षणांत उजळून गोये.

²⁰ ओ स्वर्ग, अने ऐ पवित्र माहु, अने प्रेषितानो, अने संदेष्टानो, तियापो खुशीने को, काहाके परमेश्वर न्याय कोईत तियापो तुमाआ बोदलू लेय.

बाबेलोओ विनाशोओ आखरी स्थिति

²¹ ताहरू एक ताकदवान स्वर्गदूताहा कोअटीई वोडो साकारीई एक डोणो विशिलो, अने ओ कोत समुद्राम टाकीत आप्लु, वोडी नगरी बाबेलोन ऐहलेच वोडो बळाने पाडलेलो जानारू, अने फासी केधी तिया पत्ता नाहा लागे.

²² वीणा वाजावाले, अने गाणारे, अने पावा वाजावाले, अने तुतारी फुकिलोओ शब्द फासी केधी तांआम होमल्याहा जानारू नाहा, अने कोडनीबि उद्यम कोढलाभी कारागीर पोन फासी केधी तावासी नाहा जोडनारू; अने कोअटीई शब्द फासी केधी तांआम होमलावल्यो नाहा जानारू;

²³ अने दिवावाही उजालो फासी केधी तांआम नाहा चमकीणार, अने नोवलाडी अने डोहाआ शब्द फासी केधी तांआम होमलिलो नाहा आविलो; काहाके ताआ वेपारी पृथ्वीई प्रधान ओते, अने चेटकाने आखे जाती ठगवली गोयी ओती.

²⁴ संदेष्टाआ अने पवित्र मांहे अने धोरतीपो आखे घात ओव्ला रक्त तियाआ जोडल्यो.