प्रकाशितवाक्य 16 - नोयरी नोवलू नियम

पेल्लूउ कोटोरू

¹ ताहरू आय मंदिराम माय कोडाआ उचो शब्दावाही तियाअ स्वर्गदूत ओ कोत्लू होमल्यू “जा परमेश्वरोओ क्रोधाचे सात कोटोरा धोरतीपो रेसवी देवा.”

² अने पेल्लूउ स्वर्गदूत जात तिया कोटोरू धोरतीपो रेसवी देदु तेहलाम तिया मांहाआ, ज्यापो पशुउ ठासु ओती जो तिया मूर्तीइ उपासना कोअत्लू, एक प्रकारोओ वाईट अने दु:ख आपी फोड निघाल्यू.

दुसरू कोटोरू

³ दिहरु स्वर्गदूत तिया कोटोरू समुद्रापो रेसवी देदु, अने ते मोल्या मांहाहा रक्त सारखो बोणीत गोये, अने समुद्रा मेरये प्रत्येक जीव जंतु मोईत गोये.

तिसरू कोटोरू

⁴ तिसरु स्वर्गदूत तिया कोटोरू खाडी अने पाअयोंआ झऱ्या उपो रेसव्यू, अने ते रक्त बोणीत गोये

⁵ तेहलाम आय पाअयोंआ स्वर्गदूतोओ कोत्ले ताहा होमल्यु, “ओ पवित्र, जो होय अने जो ओतु, तू न्याय कोअनारा होय अने तूच ओ न्याय कोअयु.

⁶ काहाके का तिये पवित्र माअहारोत उपो अने संदेष्ट्यांआ रक्त वोहयो ओते, का तू तियाहा रक्त पिवाड्यो; काहाके का ते याज योग्य होय.”

⁷ काहाके आय वेदी त्यापोरोत ओ शब्द होम्लालू, “होय, ओ आखे सर्वशक्तीमान प्रभू परमेश्वर, ताआ निर्णय ठीक अने खोरो होय.”

चोव्थू कोटोरू

⁸ चौथो स्वर्गदूत तिया कोटोरू सूर्योपो रेसव्यू, अने तियाहा मांहोहो आगीवाही करपवून आपलो अधिकार आप्यू ओतु.

⁹ मांहे जास्ती तोपोसी झावा गोये, अने परमेश्वरोओ नावाआ ज्याहा आव पीडीपोओ अधिकार होय, निंदा कोअयी पण तियाआ गौरव कोइला याकोअता पश्चताप नाहा कोअयु.

पाचवू कोटोरू

¹⁰ पाचवू स्वर्गदूत तिया कोटोरू तियाअ पशु सिहासनापो रेसव्यू, अने तियाआ राजपो आंदारो उवनारा गोल्यो मांहे पिढ्यांमेहे फासाडी आपाआ-आपाआ जीभ सवयहोय लागाडीत,

¹¹ अने आपाआ पिढांन अने फुड़ाआ कारण स्वर्गातल्या परमेश्वरोओ निंदा कोअयी; पोन आपाआ-आपाआ कामुमे रोतेहे पश्चताप नाहा कोअयु.

साहवू कोटोरू

¹² सहावू स्वर्गदूत तिया कोटोरू महानदी फरातापो रेसव्यू, अने तीई पाई उगाईत गोये का पूर्व दिशेच्या राजा कोअता मार्ग तीयार ओवयू.

¹³ ताहरु आय तिया अजगरो सोबिमरोत, अने तिया पशु सोबिमरोत, अने तिया झुटो संदेष्ट्याआ तोडून तीन अशुद्ध आत्माहा डेटकाआ रुपात निहीलावेले पालील्यो.

¹⁴ ओ चिन्ह पारीखानारा दुष्टात्मा होय, जे आखा जगोआ राजाआरी निहित याकोअता जातेहे का तियाहा आखे सर्वशक्तीमान परमेश्वरोओ तियाअ वोडा दिहाआ लोढाई याकोअता एकठे कोनारू

¹⁵ “पाला, आय सुरों सारखू आवत्लू; धन्य तो होय जो जागतू रोतलू, अने आपाआ कापडा चौकशी कोअत्लू का उघडा फिरीही अने मांहे तियाआ उगडे पण नाहा पाह.”

¹⁶ अने तिये तियाहा ज्या जागापो एकठे कोल्यु जो इब्री माय हर्मागीदोन कोयु जात्लू.

सातवू कोटोरू

¹⁷ सातवू स्वर्गदूत तिया कोटोरू हावापो रेसव्यू आप्यी, अने मंदिराआ सिहासनावरून ओ वोडू शब्द ओवयू, “पुरो उवे”

¹⁸ फासाडी विजा चमकिलो फासी शब्द फासी गर्जना उवी, अने एक एहेलू वोडू भूकंप ओवयू का जाहा पोरोत माहांआ उत्पत्ती धोरतीपो उवी, तेहलाम पोरोत एहेलू वोडू भूकंप खोरोज ओवयू ने ओतू.

¹⁹ याचयांनी तिया वोडा नगराहा तीन तुकडे उवनारा गोये, अने जाती-जाती तियाआ नगर बोणीत गोये; अने वोडा बाबेलोन तियाआ स्मरण परमेश्वरोओ ईहि उवे का तो आपाआ क्रोधाचे मदिरा पिदो तियाहा पिवडाव्यो.

²⁰ अने प्रत्येक टापू आपाआ जागापो पोडीत गोये अने डोगोओ मोलुम नाहा पोड्ये गायब ओवयू.

²¹ जुगोमोरत मांहुंपो एक मोन वजन वोडा हेलो पोड्यो अने याकोअता का ए पिढी जास्तीज दिहराआ कामा ओती, माहु गाराआ पिढीई कारनोवाही परमेश्वरोओ निंदा कोअयी.