प्रकाशितवाक्य 15 - नोयरी नोवलू नियम

क्रोध सी पुआले सात हुनाआ कोटारा

¹ फासाडी आय होर्गोम एक फासी वोडू अने अदभुत चिन्ह पालील्यो अर्थात सात स्वर्गदूत ज्याआ जागे सात फासाडी पीडा ओती, काहकी तियाआ समाप्त उवनारा उवेताहा परमेश्वरोओ क्रोधाआ अंत होय.

² तेहलाम आय आग जडल्यो एक खाचो सार्खू एक दर्या पाल्यू; अने जे मांहे तियाअ श्वापद अने तिया मूर्तीपो अने तियाआ नावाआ अंकावर जयवंत उवे ओते, तियाहा तियाअ खासोओ समुद्राआ जागे परमेश्वरोओ विना लेदलो उभे पालील्यो.

³ ते परमेश्वरोओ दास मोशेय तियाआ गीत, अने कोकऱ्याआ गीत गावित कोयु ओते, “ओ आखे सर्वशक्तीमान प्रभू परमेश्वर, ताआ काम महान होय अदभुत होय ओ पिडीपिडी राजा, ताआ चाल ठीक अने खोरी होय;

⁴ ओ प्रभू, कोड़ो ताहु नाहा बित अने ताआ नावाआ गौरव नि कोए काहाके का फक्त तांहुज पवित्र होय आखे जाती आवीत ताआ आगाडी नमन कोअही, काहाके का ताआ न्यायाआ काम प्रगट उवे होय.”

⁵ याआ फासाडी आय पालील्यो का होर्गाम साक्षीआ तंबू मंदिर उगड्यो गोये;

⁶ अने ते हेगांति स्वर्गदूत ज्याआ जागे सात पीडा कोयु, तागामी शुद्ध अने चंमकीनारो कापडे कालीला अने सातीपो होना पट्टू बांधले मंदिराम मायरोत निकलीलू.

⁷ तेहलाम तिया चारू जोनावारोह मायरोत एकाने तियाअ सात स्वर्गदूतो परमेश्वर जो कायम जीवित होय, तियाआ कोपाने बोल्या सोन्या आरी सात वाटकी आप्या,

⁸ अने परमेश्वरोओ गौरव अने तियाआ सामर्थ्याआ काहाके मन्दिर तुमाडामे पोईत गोये, अने जाहा बी तिया हेगांति स्वर्गदूताचे हेगांति पीडा समाप्त नाहा उवी तो पर्यंत कोडु मंदिराम माय नाहा जाहू शकत.