प्रकाशितवाक्य 13 - नोयरी नोवलू नियम

समुद्र मेहेरोत निकल्या बेन पशु

¹ तेहलाम आय एक पशु समुद्रामे रोत निकलीत्ले पालील्यो, ज्याआ दहा हिगे अने सात मुंडको ओते, तियाआ शिंगापो दहा मुगुट, अने तियाआ मुंडकापो देव निंदात्मक नावे लेखली ओती.

² जे पशु आय पालील्यो ते चित्या सारिखे ओते; अने तियाआ गुडू रीसडा सारखे ओते, अने सोब सिंहाआ सभिकोते ओते तियाअ अजगरोओ आपाआ शक्ती अने आपाआ सिहासन अने वोडो अधिकार तियाहा आप्लु.

³ आय तियाआ गुडामे रोत एकापो एहलो दुखालो लाग्यीही पालील्यो सोमजा तो मोयलो ओतु, फासाडी तियाआ प्राणघात दुखालो हाजू ओवयू, अने आखे पृथ्वीई मांहे तियाअ श्वापदाच्या फासाडी-फासाडी सहारू कोईत गोये.

⁴ माहु अजगरोओ पूजा कोअयी, काहाके तिये श्वापद आपाआ अधिकार आप्लु, अने ओ कोत पशुउ उपासना कोअयी, “या पशु सारखो कोडू होय? कोडू याआरी लडू शकतो?”

⁵ वोडो गोगीलोमेहे अने निंदा कोइला कोअता तियाहा एक सोब आप्या गोये, अने तियाहा बेचाळीस मोयना पर्यंत काम कोईत अधिकार आप्या गोये.

⁶ तिये देवाची निंदा कोइला कोअता सोब उगड्यो का तियाआ नाव अने तियाआ मंडप म्हणजे होर्गाम रोनाराअ निंदा कोअही.

⁷ तियाहा ओ पोन अधिकार आप्या गोये का पवित्र माहू आरी सुलाइलो अने तियापो जय मिलीजावू, अने तियाहा हर एक वंश अने मांहे अने भाषा अने जातीपो अधिकार आप्या गोये.

⁸ पृथ्वीई आखे रोणारे, ज्याआ नाव तिया कोकऱ्याच्या जिविलो पुस्तकाम लेख्यअ नाहा गोयी जी जुगाआ उत्पतीच्या टायमोमें घात उवी ओती, तियाअ श्वापदाचा उपासना कोअनारू.

⁹ ज्याहा कान होय ते होमला.

¹⁰ ज्याहा कैदेत जायलो होय, ते कैदेत जावा; जे तलवारीकी माए, अवश्य होय का ते तलवारीकी माअये जाइअलो पवित्र मांहोओ धीर अने विश्वास याज माय होय.

धरती मेहेरोत निकल्यु पशु

¹¹ फासाडी आय एक फासी पशुला जमीन तून उपो आविलावेले पाल्यू, तियाआ कोकऱ्या हारीखे बेन हिगों ओती, अने ते अजगराआ सारखे बुलत्ले ओते.

¹² तो तिया पेल्ला पशुउ आखे अधिकार तियाआ आगाडी कामोम लेताव्तू ओतु; अने पृथ्वी अने तियाआ रोणारे तियाअ पेल्ला पशुउ तियाआ प्राणघात दुखालो हाजो उवे ओते, उपासना कोईत ओते.

¹³ तो वोड़े-वोड़े चिंन्ह देखाडीत ओतु, इहिंजा का मांहो आगाडी होर्गामेहे धोरतीपो आग पालीलो ओतु.

¹⁴ तियाअ चिंन्हाच्या कारनो कोईत, ज्याहा तिया पशुउ आगाडी देखाडीलो अधिकार तियाहा आप्लु गोये ओते, तो धोरतीपो रोणाराहा ढगवत ओतु अने धोरतीपो रोणाराओ कोयु ओतु का ज्या पशुउ तलवार लागीई ओती तो जिवंत ओवयू होय, तियाआ मूर्ती बोनाडा.

¹⁵ तियाहा तिया पशु मूर्तीमेहे जीव टाकीलाआ अधिकार आप्या गोये का पशु मूर्ती गोगू लागे, अने जेवळे मांहे तियाअ पशुउ मूर्तीइ उपासना नाहा कोअनारु, तियाहा माईत टाकही.

¹⁶ तिये हानो वोडो, मालदारो-गोरिबे, हाजो दास आखाआ हाजाडी आथ पोन तियाआ निडोपो एक-एक खून कोईत आप्लु,

¹⁷ का तियाहा सोडीत ज्यापो खून म्हणजे तियाअ पशु नाव किंवा तियाआ नावाआ संख्याआ होय, त्याशिवाय कोडु आपलो मिकिलो न कोहू सेकेहे.

¹⁸ बुद्धी याजमेहे होय ज्याहा बुद्धी होय, तो आव पशु संख्याआ जोडीत लेदलेए, काहाके तियाअ मांहोओ संख्याआ होय, अने तियाआ संख्याआ सहाशे सासष्ट होय.