प्रकाशितवाक्य 12 - नोयरी नोवलू नियम

बुई अने विशालकार अजगर

¹ फासाडी होर्गाम एक वोडू चिन्ह देखायू, अर्थात एक बुई जी सूर्य फांगरीत ओति, अने चंद्र तिया गुडानिसे ओतु, अने तिया मुंडकापो बारा ताराआ मुगुट ओतु.

² ती गर्भवती उवी, अने आअडित ओती काहाके ती प्रसवच्या पिढामेह ओती.

³ एक फाशी चिन्ह होर्गाम देखायो; अने पाला, एक वोडू लाल अजगर ओतु, सात मुंडको अने दहा हिगे ओते, अने तियाआ मुंडकापो सात राज मुगुट ओते.

⁴ तियाआ शेपटीवाही जुगोमेरयो ताऱ्याची एक तृतीवंश ला उडीते धोरतीपो टाकीत आप्यू तो अजगर तियी बुई च्या आगाडी जो तिया आगाडी उबु रोला का जांहा ती पोऱ्यो हुदरीयोहो ताहा तियाअ पोऱ्याहा गीइत लेय.

⁵ ती पोऱ्या खाली पोडली जो लोखंडाचा राजदंड लेत आखे जाती त्यापो राज्य कोईलापो ओतु, अने ते पोऱ्यो एकाएक परमेश्वरा जागे अने तियाआ सिहासना जागे विसित पुगाड्या;

⁶ अने ती बुई जंगलूम नाहीत गोयी जीही परमेश्वरराच्या त्यापोरोत तिया याकोअता एक जागू तीयार कोअयी गोयी ओती का तिही एक हजार बेनहोव साठ दिहे पर्यंत बगविलो जाय.

अजगरोहो स्वर्ग मेहेरोत बारथे टाक्यु

⁷ फासाडी होर्गोम लोढाई उवी, मिखाएल अने तियाआ स्वर्गदूत अजगर आरी लोढाई ला निकलीलू अने अजगर अने तियाआ दूत त्याआरी सुलाइलो,

⁸ पोन प्रबळ नाहा उवे, अने होर्गाम त्याकोअता फाशी जागू नाहा रोली.

⁹ तेहलाम तो वोडू अजगर, अर्थात तोज जुनो हाप जो दिव्याबल अने शैतान कोयु जात्लू अने आखा जगाआ ठोगणारू होय, धोरतीपो पोडीत टाकिला आवयू, अने तियाआ दूत तियाआ आरी पोडीत टाकिला आव्ये.

¹⁰ फासाडी आय होर्गामरोत ओ वोडू शब्द आविलावेले होम्लालू, ओमे आमा परमेश्वरोओ उद्धार अने सामर्थ्य अने राज्य अने तियाआ ख्रिस्ताआ अधिकार प्रगट ओवयू होय, काहाके का आमा पायहोप दोष लागाळणारू जो रातदीही आमा परमेश्वरा आगाडी तियापो दोष लागाडीत ओतु, पोडीत टाकिला आवयू.

¹¹ ते कोकऱ्याच्या रक्ताआ अने आपाआ साक्षच्या वचनाआ कोईत तियाआ उपो जयवंत उवे, अने तिये आपाआ जीवोहो प्रिय नाहा जाअये, इही पर्यंत का मोईतगोल्यू पण सहन कोअयु.

¹² आव कामा वाहे ओ स्वर्ग अने तीयाम रोणारे, मगन रो; ओ धोरती, अने दर्या, तुमापो हाय काहाके का शैतान खोताल्यू आरी तुमाआ जागे उतरित आवयू होय, काहाके का तो ओलखीत्लू का तिया थोडाच वेल फाशी बाकी होय.

बुईई सताव ओवयु

¹³ तोये अजगरो पालील्यो का आय धोरतीपो पाडलेलो गोल्यो होय, ताहा तियाअ बुईही ज्या पोऱ्याहा खाली पोडली ओती, त्रास आप्यू.

¹⁴ पोन तिया बुईही वोडा गरुडाचे बेन पंख आप्या गोये का हापाहा आगला रोत उडीति जंगलूम तियाअ जागापो पूगी जाय, जीही तो एक वेल अने टाईमोम, अने आर्दी टायमोआ पर्यंत पालीत पोषणाआ कोल्यु जाय.

¹⁵ अने हापोओ तीयी बुई फासाडी आपाआ सोबिमेहे खाडी होस वोहयो का तियाहा तियाअ खाडीई सी माईत टाकही.

¹⁶ पोन पृथ्वीने तीयी बुईही मदत कोअयी अने आपाआ सोब उगाडीत तियाअ खाडी जी अजगरो वाहीली ओती पित्कोईत टाक्ये.

¹⁷ तोये अजगर स्त्रीवर क्रोधीत ओवयू अने तीआ शेष सोए, जे परमेश्वरोओ आज्ञाहा मानत्लू अने येशु ची साक्ष आपलो स्थिर होय,

¹⁸ सुलाईलो गोल्यो अने तो समुद्राआ वालू उपो जात उबु रोला.