प्रकाशितवाक्य 11 - नोयरी नोवलू नियम

बेन गवाह

¹ फासी माहु मोजीला कोअता एक बोरू आप्या गोल्यो, अने कोडु तेरी कोयु, उठ, देवोओ मंदिरो वेदी, अने तीयाम उपासना कोअनाराहा मापित ले.

² पण मंदिराआ बारथेए खोली सोडीत आप; तियाहा नाहा मोजोके काहाके ते अन्यजाति हि आप्युहू, अने ते पवित्र ओल बेचाळीस मोयना पर्यंत तुडवतील.

³ आय माआ बेन साक्षीही ओ अधिकार आपी का गुंठों फांगरीत एक हजार बेनहोव साठ दिहेजा भविष्यवाणी कोए.

⁴ ओते होय का जैतुनाआ ताहा बेन दीवट अने बेन समया होय, जे धरतीई प्रभूउ आगाडी उभे रोत्ले.

⁵ जर कोडु तियाहा नुकसान कोहू पालोहो, ताहा तियाआ सोबिमरोत आग निहित तियाआ शत्रू कोई देत्ली अने जर कोडु तियाहा नुकसान कोहू पालोहो, ताहा अवश्य यी रीतीवाही मोए.

⁶ तियाहा अधिकार होय का जुग बंद कोअही, का तियाआ भविष्यवाणीच्या दिहोम पाईनाहा पोअनारू; अने तियाहा आखे पाण्यापो अधिकार होय का तियाहा रक्त बोनाविलो, अने जांहा-जांहा जोवे तेहलाम-तेहलाम धोरतीपो हर एक प्रकाराआ विपत्ती लेत आवी.

⁷ जाहा ते आपाआ साक्ष आपित बोह्ये, तो पशु अथाह कुण्ड नीही, तियाआ आरी लोळाई कोईत तियाहा जिकीत लेही अने तियाहा माईत टाकही.

⁸ तियाआ मोअल्यो तर तियाअ डील नगराआ चौकामेहे पोडीत रोय, जे आत्मिक रूपांनी सदोम अने मिस्र कोयु जाहो, जीही तिया प्रभू पण वधस्तभांवर खिळल्या गोल्यो.

⁹ आखे मांहे अने तोड अने भाषा अने जातीही मांहे तियाआ डील साडेतीन दीही पालीत रोही, अने तियाआ शरीर कब्र मेहे नि मिके.

¹⁰ धोरतीपो रोणारे तियाआ मरनांनी खुशिमेहे अने उत्साह उवे, अने एक दिहरा जागे भेट मोकलीनाराहा, काहाके आव दिहोम संदेष्टाआ धोरतीपो रोणाराओ त्रास आप्लु ओते.

¹¹ पोन साडेतीन दिहे देवापो फासाडी परमेश्वरो वोलरोत जीवनो श्वास तियामेहे जातु रोयू, अने ते आपाआ गुडापो उभे रोल्या, अने तियाहा पालनाराहा वोडी बिक लागी.

¹² तेहलाम तियाहा होरगापोरोत एक वोडू शब्द होमलायू, “इही उसे आवा” ओ होमलीत ते वादलापो बोहित आपाआ वैऱ्यी पालता-पालता स्वर्गापो सोडवीत गोये.

¹³ फासाडी आव टायमोमें एक वोडो भूकंप आव्ये, अने नगराअ दहावू भाग पोडीत गोल्यो; अने तियाअ भुकंपामुळे सात हजार मांहु मोईत गोये, अने रोयोहो बितकोईत उवे अने स्वर्गाचे परमेश्वरोओ गौरव कोल्यु.

¹⁴ दिहरी विपत्ती निहित गोयी; पाला; तिसरी विपत्ती वेगु आविलो होय.

सातवी तुरही

¹⁵ जाहा सातवा स्वर्गदूताहावाही तुरही वाजाडीते तेहलाम होर्गांम आव विषयाहा वोडो-वोडो शब्द आवी लागाडीत जगोआ राज्य आमा प्रभूऊ अने तिया ख्रिस्ताचे होय अने ते कायम राज्य कोअनारू.

¹⁶ तेहलाम चोवीस डाये जे देवा आगाडी आपाआ-आपाआ राजासनापो बोह्ये ओते सुबीप भुरसे पोडीत देवोहो नमन कोईत

¹⁷ ओ आखू लागाडीत, “ओ सर्वशक्तीमान प्रभू परमेश्वर, जो होय अने जो ओतु आमाहा ताआ धन्यवाद कोअत्लू का तू आपाआ वोडी सामर्थ्याआ कामोम लेतआवीत राज्य कोल्यु होय.

¹⁸ जातीही खोत कोअयु, पोन ताआ राग आविलो गोये, अने ती वेल आविलो गोयी का मोल्याहा न्याय कोअयु जालो, अने ताआ दास संदेष्टाहा अने पवित्र मांहोहो अने तियाअ हानू वोडो जे ताआ नावोवांहि बित्ले बदलू लेय, अने पृथ्वीई खराब कोअनारे नष्ट कोल्यु जालो”

¹⁹ तेहलाम देवोओ जे मंदिर होर्गाम होय ते उघालिज गोये, अने तियाआ मंदीराम तियाआ वाचाआ सन्दुक देखायो; अने विजा अने शब्द अने गर्जना अने भूकंप उवे अने वोडो गारे पोड्ये.