फिलिप्पी 1 - नोयरी नोवलू नियम

अभिवादन

¹ मसीह येशुउ दास पौलुस अने तीमुथियुसो वोलरोत आखे पवित्र माहाआ नावामेहे जे मसीह येशुमेहे फिलिप्पी मेहे रोतेहे अध्यक्ष अने सेवको आरी.

² आमाआ बाह्हू परमेश्वर अने आमा प्रभू येशु ख्रिस्तामेहे तुमामे कृपा, शांती जोडती रोय.

धन्यवाद अने कलीसिया कोअता प्रार्थना

³ आय जाहा तुमामे ओर कोअत्लू तेहलाम-तेहलाम परमेश्वरोओ धन्यवाद आपित रोतो,

⁴ माआ हर एक प्रार्थनाम आय आनंदावाही तुमा कोअता प्रार्थना कोअत्लू.

⁵ काहाके पेल्ला दिवसापोरोत ओमेजा सुवार्ता प्रचारा मेहे तुमु माआ सहभागीता रोल्या होय.

⁶ माहु याआ गोठीपो पुरो भोरुसो होय का ज्या परमेश्वराने तुमामे एहलो जे उत्तम का माहा सुरवात कोअयी होय ते तिया दिहेजा राखीत मेकिलो, जाहा येशु ख्रिस्त आवे ते पुरो कोअही.

⁷ तुमु आखाज माकोअता एहेलू विचार ठीक होय काहाके तुमु आखे माआ मोनामे होय अने फक्त तियाआ वेले नाहा का आय जेलूम ओतू पोन तेहलाज मेहे बी ज्या वेळेस आय सुवार्ता राखिलो कोईत रोतो, तुमु आखे यामे विशेष अधिकारी रुपोमे माआ कृपा वाईहि सहभागी उवे होय.

⁸ परमेश्वर माआ साक्षीदार होय का आय तुमा कोअता लालसा कोअत्लु.

⁹ आय ओच प्रार्थना कोईत रोतो का तुमाआ प्रेमोओ नजरोम अने ज्ञानाने तुमु वोडता जावा,

¹⁰ ऐ गुण मिलवीत हाजू-खाराब यामेहे अंतर कोईत कायम जे हाजो होय ते लेधलो ह्याप्रमाणे तुमु पवित्र बोनणारू, जांहा येशु ख्रिस्त आविलो होय,

¹¹ येशु ख्रिस्ताआ धर्म मेलविनारू तेहलाम तुमु उत्तम काम कोअनारू ज्याआपोरोत देवोहो गौरव मिल्यो होय ऐ तियाआ महिमा उवे.

केय्दी रूपमेहे सेवा

¹² ऐ पाही, आय तुमामे कोहू इच्छितो का माआरी जे किबी उवे होय तीयावाही सुवार्तेला बोड़ती उवे.

¹³ परिणामी संसाराआ आखे सुरक्षा दल तेहलूज दिहरे आखे मांहे यांहा मालूमे उवे का माहु ख्रिस्ताआ अनुयायी एहला कारनोवाही कैदी बोनाडल्ये होय,

¹⁴ अने प्रभू मेहे जो पाही, तीयामरोत अधिकतर माआ कैद मेहे होय कोईत धीरावाही परमेश्वरो सुवार्ता निर्भयतावाही कोयु ओते.

¹⁵ ऐ खोरो का तीयामरोत किबी हेवाकोइत वैर्भावाने सुवार्ता कोयु होय परंतु थोडे मांहे सद्भावनेने ख्रिस्ताआ सुवार्ता कोयु रोतेहे.

¹⁶ ऐ मांहे प्रेमोवाही एहलो कोअता काहाके तियाहा मालूमे होय का परमेश्वराने सुवार्ता वसाडिलोकाजे माहु इंही मेकल्ये होय.

¹⁷ पोन थोडे मांहे सत्यांआ नाहा पोन स्वार्थी स्वभावो वाही ख्रिस्ताआ प्रचार कोईत रोतेहे काहाके ते विचार कोअता का ह्याआरी ते जेलूम तेमा कोअता मेहनत निर्माण कोहू सेकेहे.

¹⁸ पोन ह्याआरी किबी फरक उवनारा नाहा महत्वाओ ऐ होय का होमला सच्चाई होस अथवा दिहरा ठोगो होस तो हाजू संदेश होय किंवा वाईट होय तो ख्रिस्ताआ होय अने तीयावाही माहु आनंद मिलीलो रोही.

¹⁹ काहाके माहु मालूमे होय का तुमाआ प्रार्थने त्यापोरत अने तीयावाही जो येशु ख्रिस्ताआ आत्मावांहि जोडयो ओते परिणामी तीयावाही माहु उद्धार मिले.

जीवतो रोअलोओ मसीह होय

²⁰ माआ हीदू इच्छा अने आशा ए होय अने माहु यामे विश्वास होय का कोडनीबि गोठीपो नाराज उवे नाहा परंतु पुरो निर्भयतावाही माआ डीलपो रोत ख्रिस्ताआ गौरव कायम उवनारा रोअला आवे तेहलूज आवनाराआ दिहोम पोन उवनारा रोअला आवे यामे आय जीवो किंवा मोओ.

²¹ काहाके माआ जिवनाआ अर्थ ख्रिस्तात जीविलो अने मोईलो ओ लाभ होय.

²² जर माआ याआ डीलोवाही जिवंत रोही ताहा याआ अर्थ ओ उवे कोआ आय आपाआ कामोवांही आनंद कोआ पोन माहु होमजाडीत नाहा का आय याकोअता निवाडले.

²³ याआ बारामेह आय पेचात होय ईहिरोत हुटोत जात ख्रिस्ता आरी रोणारे माहु उत्कंठा होय काहाके देहामेहे रोहोलोकाजे ओ जाहाकोज हाजो होय

²⁴ पोन याआ डीलोम रोहिलो तुमा कोअता जाखा आवश्यक होय.

²⁵ अने काहाके ओ आय निच्छित ओलखील्तू का अध्यात्मिक उन्नति अने विश्वासा निर्माणे उवलो आनंदावाही तुमाआरी रोत होय

²⁶ याकोअता का तुमापोओ फासी आवता परिणामी स्वरूप माहु मसीह येशुमेहे स्थिर माआरी गर्व कोइला कोअता अने जाखा आधार आवे.

प्रयास अने मसीह कोअता दुःख उठावलोओ

²⁷ पोन हर एक प्रकारे एहलो को का तुमाआ वागणुक ख्रिस्त सुवार्ताच्या त्यावाईहि अनुकूल रोअलो ज्याआपोरोत जेबी आय ताआरी आविलो तुमामे पाल्हू किंवा जेबी आय तुमाहाहि रोते सेटेरोत तुमा बारामे ओच होमला का तुमु होमला आत्मा मेहे दृढताने स्थिर ओवुहू अने सुवर्ताआ मदतीवाही निर्माणे उवलो विश्वासा एक ओतगोयु संघर्ष कोईत होय,

²⁸ तेहलूज फासी ओबी होमला इच्छितो का तुमु आपाआ विरोध वाला बिक नाहा तुमाआ ओ विश्वास नाशाआ प्रमाण होय अने ओच प्रमाण होय का तुमाआ उद्धारो अने परमेश्वारापो रोत ऐहलोच कोयु जालो.

²⁹ काहाके ख्रिस्तापोरोत तुमामे न फक्त विश्वास कोइला कोअता पोन त्याकोअता सहन कोइला कोअता विशेष अधिकार आप्यू होय

³⁰ तुमामे मालूमे होय का तुमु तियाहा संघर्ष कोअलाआ एकजूट होय तीयाम आय संघर्ष कोईत होय जेहलो का तुमु होमलित ओमेजा आय मग्न होय.