मरकुस 9 - नोयरी नोवलू नियम

येशुउ रूपांतरण

¹ तो तियाहा कोयु तुमाहा खोरोज कोहो का जो ईही ऊबे होय तीयामरोत एखु ऐहलू होय का जाहा देवोओ राज्य सामर्थ्य आवल्यु ने देखीत लेय ताआ हु जाआ मोइलाआ होवाद कोदाचीत ने चाखे.

² सहा दिहे फासाडी येशु लेतजा पेत्र अने याकोब अने योहान याहा आरी लेधलो, अने एखालाम कोडला होमला डोगोपो लेत गोल्युतीही तियाआ आगाडी त्याआं रूप बोद्लीत गोये,

³ अने तियाआ कापडे एहलो सोमकूहु लागाडीत का इही पर्यंत उजालो आवयू, का पृथ्वीपो एगदू थोबी पण एहलो उज्वल नाहा कोहू शकत.

⁴ अने तियाहा मोशेआरी एलिया देखायू; ते येशुआरी गोठी कोहू लेहे;

⁵ आव याकोअता पेत्रने येशु ला कोयु, “ओ रब्बी, आमाहा इही रोहिलो हाजो होय यकोअता आमाहा तीन मंडप बोनावुहू; एक ताआ याकोअता, एक मोशे याकोअता अने एक एलिया याकोअता.”

⁶ कोईत का तो नाहा होमजाडीत ओतु का कि उत्तर आपे, याकोअता का ते घाबरील्यो गोये ओते.

⁷ ताहा होमला वादलावाही तियाहा घेरले, अने तियाअ वादलामरोत ओ शब्द निघाल्यू, “ओ माआ प्रिय पुत्र होय, तियाआ होमला.”

⁸ तेहलाम तिये होमला चारू सेटे नजर कोअयी, अने येशुहू सोडीत आपाआ आरी अने कोडोबी पालील्यो नाहा.

⁹ डोगोपोरोत उतरीलावेले तिये तियाहा आज्ञा कोअयी का जो पर्यंत माअहा पोऱ्या मोईला मायरोत जीवतो न उवे जो पर्यंत तुमु जे किबी पालील्यो होय ते कोडोबी कोओलो नाहा.

¹⁰ तिये आव गोठीकोता स्मरण मेक्ल्ये; अने आपु आपसामेहे वाद-वाद कोहू लागाडीत, “मोआल्या मायरोत जीवतो उठलो नाहाकोत आर्द होय?”

¹¹ अने तिये तियाहा फ़ुस्ल्याआ, “शास्त्री काहा का एलीयाचे पही कोअते आविला गरजेए होय?”

¹² तिये तियाहा उत्तर आप्लु, “एलिया खरोज पहीले आवीत आखे किबी हुदारे पण माअहा पोऱ्याच्या विषया माय ओ काहा लेखिलो होय तो जाअखो दु:ख वीसही, अने मारीलो जाइअलो?”

¹³ पोन आय तुमामे कोत्लू, का एलिया ताहा आवयू होय, अने जेहलो तियाआ विषयी लेखिलो होय, तियाहा जे जोवे तियाआ आरी कोल्यु.

दुष्टआत्मा सी छुटकारा

¹⁴ अने तो शिष्याआरी आवयू, ताहा पहीले का तियाआ आरी एक वोडी गोर्दी जोम्यी होय अने शास्त्री तियाआ आरी वादविवाद कोईत होय,

¹⁵ तियाहा पालताज आखे जाखो आश्चर्य कोअला लागाडीत, “अने तियाआ जागे गुगदिलो आवीत तियाहा नमस्कार कोअयु.”

¹⁶ तिये तियाहा फ़ुस्ल्याआ, “तुमु यांआरी नाहाकोत वाद-वाद कोईत होय?”

¹⁷ गोर्दी मायरोत एकाने उत्तर आप्लु, “ओ गुरु, आय आपाआ पोऱ्याहा, यामे मुको आत्माआ फोह्यू होय, ताआ जागे लेतआवये उवनारा.”

¹⁸ जीही कोठे ती तियाहा तोए, तिहीज सेलीत आपलो अने तो सुबीम फेस लेत आवलू अने दात पिसायला कोअता लागत्लू अने उगाईत जाहोआंय ताआ शिष्यांआ कोयु का ते तियाहा काढीत टाकीदेय, परंतु ते काड्हु सेकेले नाहा.

¹⁹ ओ होमलित तिये तियाहा उत्तर आपित कोयु, “ओ अविश्वासी मांहे, का केधी पर्यंत ताआ आरी रोही? तियाहा मांही लेतआव.”

²⁰ तेहलाम ते तियाहा तिया जागे लेत आव्ये अने तिये तियाहा पालील्यो, ताहा तियाअ आत्मावांहि लागेज तियाहा निपटी टाक्ये; अने तो धरतीपो पोडीत, अने सोबिमरोत फेस गोलिलावेल निहित गोल्यो.

²¹ तिये तियाआ बाह्हाहा फ़ुस्ल्याआ, “याआ ए हालत केधी पोरोत होय?” तिये कोयु, “हानू पणापोरोत.

²² तिये याहा नष्ट कोइला कोअता याहा केधी आगीम ताहा केधी पाअयोम पाडिलो; परंतु केधी किबी कोहू गोयो, ताहा आमापो दया कोईत उपकाराआ को.”

²³ येशु लेतजा तिया कोयु; केधी तू कोहू सेकेहे? “ए नाहाकोत गोठी होय विश्वास कोइला कोअता आखे किबी उवहू शकत.”

²⁴ पोऱ्याआ आंबहाही लागेज विनंती कोईत कोयु, “ओ प्रभू आय विश्वास कोअत्लू, माआ अविश्वासाआ उपाय को.”

²⁵ जाहा येशु पालील्यो का मांहे गुगदिलो आवीत गोर्दी कोईत होय, ताहा तिये अशुद्ध आत्माहा ओ कोत धमकाव्ये “ओ मुक्यो बोयरा आत्मा आय ताहु आज्ञा आपोहो, तियाआ मायरोत निहित जा अने तीयाम केधीज प्रवेश कोहू नाहा.”

²⁶ तेहलाम तो आयडीत अने तियाहा जाखो निपटी निहित गोल्यो; अने मोल्याहोस सारखू ओवयू, आव पर्यंत का जाअखो मांहे कोहू का तो मोईत गोल्यो.

²⁷ पोन येशु तिया आथे तोईत तियाहा उठविले, अने तो उबुरोत गोल्यो.

²⁸ 28 जाहा तो कोअमे आवयू, ताहा तिया शिष्यांनी एखालाम तियाहा फ़ुस्ल्याआ, “आमाहा तियाहा काहा काढहु शकलो नाहा?”

²⁹ तिये तियाहा कोयु, “ए जात बिना प्रार्थना वांही कोडला फासी उपास नाहा निहित जात.”

येशु तियाआ मृत्युउ विषय मेहे इजी कोअलोओ

³⁰ कोईत ते तिहीरोत निहित गोये, अने गालीला मधून जातले ओतोऱ्याआ इच्छा नाहाओती कोडाआ मालुम रोहू,

³¹ कोईत तो आपाआ शिष्यांआ संदेश आपोहो अने तियाहा कोयु ओतु, “माअहा पोऱ्या, मांहाहा ओतु कोईत तोईत जाइअलो, अने ते तियाहा माईत टाकही; अने तो मोईला तीन दिहो नंतर उठाडीलो जाइअलो.”

³² पण ए गोठी तियाआ लक्षाम नाहा आवयी, अने ते तियाहा फुसिला कोअता बित ओते.

चेला मेहे आखाप रोत वोडू कोड़ो होय

³³ फासाडीनंतर ते कफरनहूम माय आवये अने कोअमे आवीत तियाहा फुसल्ये, “वातेम तुमु कोडला गोठीपो वादविवाद कोअता ओते?”

³⁴ ते ठावकू रोल्या, काहाके रस्ताम तिये आपसामेहे ओ वाद-वाद कोअता ओते का आमा पेक्षा वोडू कोडू होय

³⁵ तेह्लाम तिये बोहित बाराजोंहू हादिलो अने तियाहा कोयु, “केधी कोडु वोडू उवूंहू पालत्लू, तो आखाम हानू अने आखाआ सेवक बोनल्यो.”

³⁶ अने तो एक पोऱ्याहा लेत तियाआ माय उबु कोईत आप्यू अने तियाहा मांडित लेत तियाहा कोयु,

³⁷ “जो कोडु माआ नावामेहे एहला पोऱ्यामरोत कोडाआ होमला पोऱ्याहा ग्रहण कोत्लू, तो माहु ग्रहण कोत्लू; अने जो कोडु माहु ग्रहण कोअत्लू तो माहु नाहा, पण माहु मोकलीनाराहा ग्रहण कोत्लू.”

³⁸ तेह्लाम योहानाई तियाहा कोयु, “ओ गुरु, आमाहा होमला मांहाहा ताआ नावामेहे दुष्टात्मा काडत्लू पालील्यो अने तियाहा.

³⁹ जेते नाहा कोअला लाग्यू, काहाके तियाअ आमा फासाडी सामर्थ्य आवयू ओतु.”

⁴⁰ येशुउ कोयु, तियाहा नाहा कोहू नाहा; काहाके एहेलू कोडूच नाहा जो माआ नावामेहे सामर्थ्याआ काम कोअही, अने वेगुज माहु वाईट कोडु गोयो,

⁴¹ काहाके जो कोडू एक वाटकी पाई याआ कोअता पीवाडे तो मसीही आय तुमाहा खोरोच कोहो का आपाआ प्रतीफोल केहला प्रकारे बी ने गोमावे.

येशुउ परीक्षा विषय मेहे चेतावनी

⁴² जो कोडु आव हठ्या मायरोत मापो विश्वास कोअता, कोडाआ ठोकायू पोचाळीओत ताहा तियाआ याकोअता ओच भलो होय का एक वोडो कोअटी पूड तियाआ गोलामेहे लोटकाड्यू जावा अने तियाहा समुद्राम टाक्ये जालो.

⁴³ केधी ताआ आथे माहु ठोकायू पोचाळीओत ताहा तियाहा वाडीत टाकव्यंग होतगोयो जीवनामे प्रवेश कोता कोअता याआरोत हाजो होय का बेन आथे ओमेत नरकाआ आगमेहे मेकल्या जाइअलो जी केधीज विजनार नाहा.

⁴⁴ जीही तियाआ किडू ने मोअत्लू अने आग ने उलात्ल्यी.

⁴⁵ केधी ताआ गुडू ताहु ठोकायू पोचाळीओत ताहा तियाहा काढीत टाकलगडा होतगोयो जीवनामे प्रवेश को ताआ याकोअता याआरोत भलो होय का बेन गुडू ओमेत नरकाआ टाक्ये जाय.

⁴⁶ जीही तियाआ किडू मोअत्ल्यु अने ने उलाल्यी.

⁴⁷ केधी ताआ डोउ ताहु ठोकायू पोचाळीओत ताहा तियाहा काढीत टाकचकणा होतगोयो परमेश्वरोओ राज्याम प्रवेश कोअला ताआ याकोअता याआरोत भलो होय का बेन डोआं ओमेत तू नरकाआ टाक्यू जाइअलो.

⁴⁸ जीही तियाआ किडा मोईत नाहा अने आगी उलवित नाहा

⁴⁹ काहाके हरएकजो आगीवाही खाराम जोड्या जाइअलो.

⁵⁰ खारो हाजो होय, पण खाराम चव जीत होय ताहा, तो तियाहा किहांवाही खाराम चव लावता आवे आपामे खारो मेका, “अने आपसामेहे मिलून मिलीलू रो.”