मरकुस 7 - नोयरी नोवलू नियम

परंपरा अने नियम

¹ ताहा परुसी अने काही शास्त्री जे यरूशलेमेहे रोत आये ओते तियाआ आहने टोलवात गोये,

² तिये पालील्यो का तियाआ किबी शिष्य अशुद्ध आथ न तुवता तेहलूज जेवण खात होय

³ काहाके परूसी अने यहुदी आखा डायाआ रीतीही अनुसरून आथे वारुई तुवल्याशिवाय रोटू कोईत नाहा,

⁴ ऐहलेच बाजारामेरे आवित नि उंगले तांहुजा खायलो नाहा याहारको अनेक रूढी परंपरा ओतु तियाआ ते पालीत कोईत एहलो जेहलो घागरी पितलेए बासने तुविलो.

⁵ याहोस फरीसी अने धर्म शास्त्री इये येशुहू फ़ुस्ल्याआ, तुमाआ शिष्य रीत पालीत काहा कोईत नाहा? परंतु आपाआ रोटू आथे न तुवता आविलो खातले?

⁶ येशु तियाहा कोयु, तुम्हाआ ढोंग कोणारो यशायाह हाजलीज भविष्यवाणी कोअयी होय जेहलो लेखिलो होय, ओ माआ सन्मान फक्त ओठेवाही कोअता परंतु तियाआ मने मापोरोत सेटे होय.

⁷ ते व्यर्थ माआ उपासना कोअता काहाके जे शास्त्र कोईत जे हिकत्ले ते रोतेहे मांहाआ आज्ञा.

⁸ तुमु परमेश्वरोओ आज्ञा सेटे मेकल्यी होय अने तुमु माहांआ परंपरा ची मदत लेदि होय.

⁹ तिये तियाहा कोयु, तुमु परमेश्वरोओ आज्ञा सेटे कोईलाकाज जास्तीज चतुर उवे होय यकोअता का तुमु आपाआ रूढी परंपरा स्थापना कोहू शकहू,

¹⁰ दाखलाकोजे मोशेई कोयु, आपाआ माय-बापाचा सन्मान को अने जे कोडु आपाआ माय-बापाचा सन्मान कोईत नाहा तियाहा डीलुम शिक्षाम कोईली.

¹¹ पोन तुमु कोआ जर एगदू आपाआ बाह्हाहा आपाआ याह्हीही कोयु काजे आय तुमामे पोषणाकोअता आपलो ते कुर्बान म्हणजे अर्पण कोल्यु होय.

¹² ताहा तुमु आपाआ बाह्हा कोआता किंवा याह्ही कोअंता आगाडी किबी कोहू आपित नाहा.

¹³ एहला प्रमाणे तुमु आपाआ रीती चालीलो मेकीत देवोओ वचन रद्द कोअता अने याहोस फासी खूप गोठी कोअता.

मांहोहो अशुद्ध कोअनारी गुठे

¹⁴ अने माहुगोदीही फासी हादीत कोयु, तुमु आखे जोओ माआ होमला अने होमजीत ल्या.

¹⁵ बारथेरोत माहुहु विसमे जात तियाहा भ्रष्ट कोईत एहलो नाहा ताहा माहुहु मायरोत जे निह्तले तोज तियाहा भ्रष्ट कोअत्लू.

¹⁶ जर एखाआ होमलीलो कान होय ते होमलीत लेय.

¹⁷ तो माहुंगोर्दी निहित कोआ गोयू ताहा तियाआ शिष्यांनी तियाहा तियाअ दृष्टान्त विषयी फ़ुस्ल्याआ.

¹⁸ तो तियाहा कोयु, तुमु तीयाहाभी एवडे आनजाड्यू होय का कि? जे किबी बारथेरोत माहुहु विसमे जाहो ते तियाहा अशुद्ध कोहू शकत नाहा ओ तुमामे होमजाडीत नाहा कि?

¹⁹ काहाके ते तियाआ मोन नाहा ताहा ते पोटाम जाहो अने संडासोमे रोत बारथे पोडत्ल्ये एहलो रीतीवाही तिये आखे प्रकारोओ ओन शुद्ध ठेरव्यो.

²⁰ फासी तो तियाहा कोयु, जे माअहोम रोत बारथे निहतले तोज माहुंहु भ्रष्ट कोअते

²¹ काहाके मायरोत म्हणजे मांहुंहु मोनम रोत वाईट विचार निकले,

²² जारकर्मे, चोऱ्या, खून, व्यभिचार, लोभ, दुष्टपणा, कपट, कामातुरपणा, निंदा, गाई गाळी, अहंकार मूर्खपणा

²³ याआ आखे वाईट गोठी मायरोत बारथे निकले अने माहुंहु अशुद्ध कोअतली.

सुरु फिनिकी जातिई बुईई विश्वास

²⁴ फासी येशु ते स्थान सोडये अने सोर अने सिदोन प्रांतात गोल्यो तीही तो होमला कोअमे गोल्यो ओ कोडाआ कोडवो कायना एहलो तियाआ मोनामे ओते तेबी तियाहा गुप्त रोहिलो शक्य निमिले.

²⁵ पोन जिया हानू पोरीही अशुद्ध आत्माआ लागल्यो ओतु एहलो होमला स्त्रीने त्याविषयी लागेज होमल्यु अने तुव्या अने तियाआ गुडू पोड्यी.

²⁶ ती बुई यूनानी ओमेत सुरफुनुकी जातीइ ओती तीही तियाहा विनंती कोअयी का माआ पोऱ्यीमरोत दुष्टात्मा काढी दे.

²⁷ तो तीही कोयु, पोऱ्याहा तृप्त ओवुहू आप, काहाके पोऱ्याआ भाकर लेत कोओहो कुत्र्याआ टाकिलो ठीक नाहा.

²⁸ फासाडी तीही तियाहा उत्तर आप्लु, खोरो होय महाराज, तेबी कोओहु कुत्रेभी मेजाणीसे पोऱ्याआ आथे पोडीतरोल्यु चुरा खातले.

²⁹ तो तीही कोयु, ताआ कोईओलो गोमे, जा ताआ पोऱ्यीमरोत दुष्टात्मा निघाल्यू होय.

³⁰ फासाडी ती आपाआ कोआ गोयी, तेहलाम पोरीही खाटलापो टाक्ये होय अने दुष्टात्मा तीयीमोरोत निहित गोये होय एहलो तीही आढळून आव्ये.

येशु बोयरा अने हक्लू मांहोहो हाजु कोअयु

³¹ फासाडीनंतर तो सोर भागुम निघाल्यू अने सिदोनापोरेत दकापलीस प्रांतातून गालील समुद्राहि फासी आवयू.

³² तेहलाम माहु होमला बोयरा बोबड्या माहुंहु तिया जागे लेतआवीत आपु ह्यापो आथे मेका एह्ली तियाहा विनंती कोअयी.

³³ तेहलाम तिये तियाहा मांहुपोरोत एकीकडे लेतजात तियाआ कानोम आंगी लेदि अने थुंकीत तिये तियाआ जीभेहे स्पर्श कोअयु.

³⁴ अने उपो स्वर्गामेहे पालीत तिये श्वास लेदो अने कोयु, इफ्फाथाआ, म्हणजे खुली जा.

³⁵ तेहलाम तियाआ कान मोकले उवे अने तियाआ जीभी बंद लागीगोयो हुटोत तो स्पष्ट गोगू लाग्यू.

³⁶ तेहलाम ओ कोडाआ ओ कोडवो कायना एहलो तिये तियाहा निक्षून कोयु; परंतु तो तियाहा जेहलो कोयु गोल्यो तेहलूज ते जाहाकोज ओ उपदेश कोईत गोये.

³⁷ अने ते अतिशय थक्क ओतगोयु कोयु, तिये आखे किबी हाजो कोल्यु होय, ओ बोयराहा होमलाड्यू अने मुकाहा गोगीला शक्ती आपोहो.