मरकुस 5 - नोयरी नोवलू नियम

दुष्टत्मा पीडीत मांहोहो हाजु कोअलोओ

¹ येशु अने शिष्य खाड़ीई पार कोईत गिरासेनिकराआ देशमेहे पोचीत गोये,

² येशु जाहा नावामोरोत उतरीलो अने बारथे आवीत ओतलू एक अशुद्ध आत्माआ लागल्यो मांहो कब्रोम रोत निकलित तियाहा मिल्यू.

³ तो कबराम रोत ओतु अने तियाहा हाकलदंड तीयाहाभी बांधीत मेकिलो शक्य निमिले

⁴ काहाके तियाहा खूप टायमोआ बेडीवाही अने हाकलदंड बानदल्यो ओतलू ए तिये हाकुलदंड तोडीत टाक्ये ओते, अने बेड्याआ तुकडे-तुकडे कोल्यु ओते तियाहा कोडु ए बाधीअलो शकत निमिले.

⁵ तो कायम रातदीही कबरोमे अने डोंगामोरोत आअडित एहलो अने डोणो डोनोवांही आपाआ डील खेचीत लेत एहलो.

⁶ येशु ला सेटेरोत पालताज तो धावून आवयू, अने तियाआ नमन पोडीत,

⁷ अने जोरेज आयडीत कोयु, ओ येशु महान देवाच्या पोऱ्या, तू माय काहा पोडत्लू? आय ताहु देवाची शपथ घेऊन कोत्लू, माहु छळू नाहा.

⁸ काहाके तो तियाहा कोयु, अरे, अशुद्ध आत्मा आव माअहोमारोत निह

⁹ अने येशु तियाहा फुशु, ताआ नाव कि होय? तिये उत्तर आप्लु माआ नाव सैन्य, काहाके आमाहा खूप होये;

¹⁰ अने आमाहा आव देशोमेरोत कालीत नाहा एहली तो आग्रहावाही तियाहा विनंती कोहू लाग्यू.

¹¹ तीही डोगोओ किनारोपे डुकरांआ एक वोडू टोलु चारते ओते.

¹² तेहलाम दुष्टात्मा येशुहू विनंती कोअयी का आमाहा तियाअ डुकराम फोइलो कोईत आमाहा आज्ञा आप.

¹³ फासाडी तिये तियाहा परवानगी आप्यी; तेहलाम ते अशुद्ध आत्मा निहित डुकराम रीग्ये अने तो सुमारे बेन हजार डुकरांआ गोठाआ गुगदीत जात काटोपोरोत समुद्रामेहे पोडीत बुडीत मोइत गोयी.

¹⁴ हूवरे चारनारे नाह्ये नगर अने गावोमेहे जात ओ वर्तमान कोयु तेहलाम नाहाकोत उवे ओ मांहे पालीला कोअता आव्ये.

¹⁵ ते येशुआरी आव्ये अने पालील्यो का जो माहुहू ज्यापो दुष्टात्मा लागल्यो ओतु कापडे कालीत शुद्धीपो आवल्यु देखायू अने तियाहा बिक लागी.

¹⁶ जिये ए घटना पेल्ली तिये दुष्टात्मा ओती अने उवे ते अने डुकरा बद्दल आखे माहिती कोल्यी.

¹⁷ अने ते तियाहा विनंती कोअयी का तू इहीरोत निहित जा.

¹⁸ अने फासी जांहा येशु नावेपो चोडिलो ओतु तेहलाम ज्या व्यक्तीम दुष्टात्मा ओतु तो माहहू येशुहू कोयु, अने विनंती कोहू लाग्योकी माहु तुमाआरी आवहू दे.

¹⁹ फासी येशु तियाहा आपाआरी घेऊन जॉहु नाहाकोत कोअयी तियाहा कोयु, आपाहाज माहुंमे कोआ जा, अने तियाहा आखे कोअलो जे देवूही ता कोअता कोल्यु होय अने तियाहा ओ पोन कोअलो का देवूही तापो दया केहली कोअयी.

²⁰ तेहलाम तो निघाल्यू अने येशु जे वोडी काम त्यांकोअता कोअयी ओती ती दकापलीस भागुम उपदेश कोहू लाग्यू; तेहलाम आख्येज आश्चर्य वाटेम.

याईरो मोअली सुई अने एक रोगी बुई

²¹ फासाडी येशु नावूमे बोहित फासी गोयू ताहा त्याजागे माहुहु वोडी गोर्दी आवयू तो समुद्राआरी ओतु

²² अने याईर नावाआ सभास्थानआ एक अधिकारी आवयू, अने तियाहा पालीत तिया गुडू पोडीत,

²³ तिये आग्रहावाही तियाहा विनंती कोअयी का माआ हानी पोऱ्यी मोईलाकाजे टेकाडयी होय तीही हाजो ओतगोयु जिविलो कोईत आपु आविलो तीपो आथे मेकीलू.

²⁴ ताहा येशु त्याआरी नीह्यू; अने खूप मांहे तिया फासाडी जातले ओते अने त्यापरोत गोर्दी एती का पोडीत जाय.

²⁵ अने तीही रक्तस्रावाने बारा वर्ष एक बुई ओती.

²⁶ तीही आख्याज वैद्याआ आथे खूप हाल सहित आपारी जे ओते निमिले ते आखे खर्चित टाक्ये ओते तेबी तीही हाजो लाग्यो नाहा पोन आजार वोदते रोयु ओतु.

²⁷ जाहा तीही येशूविषयी होमल्यु ताहा ती गर्दीमे तिया फासाडी आवयी अने तियाआ कापडाआ गोंडाहा स्पर्श कोअली,

²⁸ काहाके ती कोयो ओती, फक्त तियाआ कापडाहा स्पर्श कोअयु तेबी हाजी उवे.

²⁹ अने लागेज तिई रक्त वोहीलो बोंद ओत गोयो अने ती आपाआ डीलामेहे जाईत लेदी का आयती बीमारीमेहे रोत हाजी ओत गोई.

³⁰ आपापाय शक्ती निहथी होय ओ येशुई आपाआ तियाहा लागेज ओलखे अने गर्दीमे वोलीत कोयु, माआ कापडाआ कोडु हिविलो?

³¹ तियाआ शिष्य तियाहा कोयु, मांहे जमाव आपारी गोर्दी कोईत होय ओ आपु पालता तेबी आपु कोआ कोडू माहु हिविलो?

³² फासाडी जीयी ओ कोल्यु ओते तीही पालीला कोअता सभोवार पालील्यो,

³³ तेहलाम ती बुई आपाआ बाबतीम जे किबी घोडये ते जाईत बित अने कापीत तिया जागे आवयी अने तियाआ पाया पोडीत तीही तियाहा आखे खोरो-खोरो जे घोडये ते कोयु,

³⁴ तो तीही कोयु, बेटी, ताआ विश्वास ताहु हाजो कोल्यु होय; शांतीई जा ताआ पिडपोरोत मुक्त होय.

³⁵ तो बारथे ओतु एतांम यहुदी सभास्थानाच्या अधिकाऱ्याआ कोअही रोत किबी मांहे आवयी अने तियाहा कोयु, आपाआ पोऱ्यी मरण पाव्यी ओमे गुरुजींना त्रास काहा आपलो?

³⁶ पोन येशु तियाआ गोगीलाही लक्ष्य न आपलो सभास्थानाच्या अधिकाऱ्याआ कोयु, भिईलो नाहा विश्वास पोन तो.

³⁷ येशु पेत्र याकोब, याकोबाआ पाही योहान याआशिवाय कोडोबी आपाआरी आवहू आप्लु नाहा.

³⁸ फासाडी ते सभास्थानाच्या अधिकाऱ्याआ घराजवळ आवेताहा ओक्साबोक्शी रोडनारे अने आकांत कोअनारे यांआ गोधळ जानारू तिये पाल्यू.

³⁹ येशु विसमे जात तियाहा कोयु, तुमु काहा गोधळ कोअता अने रोडता? सुई मोअये नाहा निंदोम होय.

⁴⁰ तेहलाम ते ओहुहू लागाडीत; पण तिये तियाअ आखाहा बारथे मोकलित आप्लु अने पोऱ्यीइ याह्ही बाह्हू अने आपा आरीई मांहे घेऊन पोऱ्यी ओती तीइही ते गोये.

⁴¹ फासाडी पोऱ्यीइ आथ तोईत तो कोयु, तीलीमा कुम; याआ अर्थ पोयरयी आय ताहु कोत्लू उठ.

⁴² अने लागेज ती पोऱ्यी उठित चालीलो लागीई; काहाके ती बारा वर्षाची ओती तेहलाम ते लागेज आश्चर्य चक्कित उवे.

⁴³ ऐ कोडाआ मुंदुपोडता कामा कायना एह्ली तिये तियाहा निक्षून आज्ञा कोअयी फासाडी तियाहा कोयु का यीही खांहु किबी आपलो.