मरकुस 4 - नोयरी नोवलू नियम

बीज उरनाराआ दृष्टांत

¹ तोअ फाशु खाड़ीई मेरे हीकाडूहु लाग्यु अने एहली वोडी गोर्दी तियाआ आहने टोलवात गोई का तो खाड़ी मेहे एक नावीपोओ चोढीत बोहीत गोयू अने आखी गोर्दी पुईपोओ खाड़ीई मेरे उबी रोई.

² फासाडी तो तियाहा दृष्टान्त आपित खूप गोठी हिकवीही लागीलाएने हिकालीआ तियाहा कोयु,

³ होमला, पाला, एक पेअनारू पेईलो कोईलाकाजे निघाल्यू.

⁴ अने तो उरलो ओतलू किबी बी वाटेपो पोडये अने सिडे आविलो ती बी खात गोयी,

⁵ थोड़े बी वातडो धरतीपो पोड्यी एहलो जाग्तली का काडूव जाखो नाहाओती ती बी वेगु उगविह्यी,

⁶ अने जाहा दिह उगीअलो तेहलाम पाअया न तोअल्यावांही ती कोंब वेगु उगाईत गोयी.

⁷ थोड़े बी काट्यामेहे पोडये ती उगविह्यी परंतु काट्यांमुळे तियाआ वोद खुटयी कोईत तियाहा ओन आव्ये नाहा.

⁸ थोड़े बी हाजा धरतीपो पोडये तियाआ हाजी वोद उवी तियाआ ओन आव्ये तियाआ तीस गुणा, साठ गुणा अने होव गुणा फोल आव्ये

⁹ फाशो येशु कोयु, “ज्यापो कान होय तो होमले.”

दृष्टांतोओ अभिप्राय

¹⁰ ताहा जांहा येशु एखल्यू ओतु ताहा ती जागापो त्याजागे बारा शिष्यानी जे मांहे ओते तिये याआ दृष्टान्त विषयी फ़ुस्या.

¹¹ येशु तियाहा कोयु, तुमामे ताहा परमेश्वरोओ राज्याआ निकाडीत सांगण्यात तुमामे आप्लु होय; तांहु बारथेए माहुंहु दृष्टान्त आपित सांगण्यात येत;

¹² याकोअता का तिये पालीत लेदलेए पण देखालो कायना अने होमलित लेदलेए पण कोडवो कायना तियाआ मोनाआ पालट ओवुहू कायना अने तिये क्षमा मिलू कायना.

बीज उरनाराआ दृष्टांतो व्याख्या

¹³ तो तियाहा कोयु, “जर तुमु आव दाखलाहा होमजाडीत नाहा ताहा फासाडी कोडनीबि दृष्टान्त विषयी केहलो होमजुत्लू?”

¹⁴ खेती कोअनारू जो बी पेअत्लू ते म्हणजे वचन पेअत्लू

¹⁵ वाटेपो वचन पेहे जाहो तीही मांहे ओ होय काजे वचन होमलित लत्ले पण लागेज शैतान आविलो तियामेहे वचन बुअसित लेहो.

¹⁶ अने किबी मांहे एहलो होय का ते खोडकावलो धरतीपो पेअल्ये वचनाहोस, जांहा ते वचन होमलित रोतेहे अने लागेज आनंद लत्ले.

¹⁷ पोन तीयाम पाअया नाहा होलकोइते ते किबी वेल वचनोम स्थिर रोत्ले अने तियाआ फासाडी जाहा वचनावांही तियापो संकट येत अने त्रास उवनारा रोतो तेहलाम लागेज ते आपाआ विश्वास सोडीत आपत्ले.

¹⁸ अने दिहरे मांहे एहलो होय काजे काट्यामेहे पोडल्ये बी सारखो ते ओ मांहे होय का ते वचन होमलित लत्ले,

¹⁹ पोन संसारो चिंता धन, पोशा याआ लालुस पणावाही अने दिहरि वस्तु जोडयो कोअला इच्छा यामे ओते अने ते वचनाआ दाबीन टाकत्ले त्यापोत वाचनामे फोल आवीत नाहा.

²⁰ अने किबी मांहे तियाअ बी प्रमाणोओ होय जेबी हाजा धरतीपो पोडत्ल्ये, ते ओ मांहे होय का वचन होमलित अने मनन कोअता तीयाम फोल येत ते तीस पट्ट साठ पट्ट अने होव पट्ट पेक्षा ए जाखा येत.

दिवाआ दृष्टांत

²¹ अने तो तियाहा कोयो दिवाही याकोअता लेत आवत्ले का तियाहा मापोनिसे का खाटलाआ नीसे नाहा ते उसे मेकीलाकोता लाविलो नाहा?

²² काहाके किबी एहलो किबी निकाडीत नाहा का ते उघडकीस आविलो नाहा अने किबी प्रसिद्ध ओवुहू कायना एहलो निकाडीत नाहा.

²³ कोडाआ कान होय ताहा होमला

²⁴ फासी तो तियाहा कोयु, जे किबी तुमु होमलित त्यापो तुमु ध्यानपूर्वक विचार कोआज्या मापोवांही तुमु दिहीराहा आपाहा तियाआ मापोवांही तुमामे आप्लु जाइअलो परंतु तुमामे जास्तीभी आपलो आवे.

²⁵ ज्यापो होय तियाहा आप्लु जाइअलो ज्यापो नाहा तिया जागे जे किबी होय ते तीयाहाभी मागित लेधलो जाइअलो.

उगनाराआ बीजो दृष्टांत

²⁶ फासी तो कोयु परमेश्वरोओ राज्य एहलो होय का जेहलो कोडु माहुहू आपाआ खेतुम बी पेअत्लू,

²⁷ राती हुव्यू अने दिहे उठ्यू अने तिये बी उपो कोंब आवल्या पालील्यो ते केहलो उवे ते तियाहा मालुम नाहा.

²⁸ जमीन आपोआप ओन आपोहो पेल्लो कोंब फासाडी कोहो फासाडी कोहमेऱ्या पोअल्ये दाने.

²⁹ ओन तीयार उवेताहा तो लागीगोयो दात्लू काल्त्लू, काहाके वाडीलाआ वेल आवयी होय.

राई दानाआ दृष्टांत

³⁰ फासी तो तियाहा कोयु, “आपु केहलो कोहू शकतो का देवोओ राज्य केहलो होय? अथवा ते कोडला दृष्टान्त मांडाजी?”

³¹ ते मोहरी दाणाहोस होय तो जमीनोम बापस आविलावेले पृथ्वीपो आखे दान्यापोरोत हानू एह्लू,

³² तेबी पेरल्यापो आकाश उगडीत आखे झाडापालामेहे वोडू ओतू अने तियाहा एहलो वोडवोडा डाली फुटत्ले का तियाआ सावलाम सिडे वस्ती कोअता येत.

³³ एहलो खूप दृष्टान्त आपित तो तियाहा वचन कोयु एहलो तो तियाहा तियाआ ग्रहण शक्तीवही कोयु एहलो,

³⁴ अने दृष्टान्त वाचून तो तियाहा किबी कोयु नाहा परंतु जांहा तो आपाआ शिष्याआरित रोतत्त्लो तेहलाम तियाहा आखे किबी होमजाडीत कोयु एहलो.

येशु वादुउ शांत कोअलोओ

³⁵ तियाआ तेदीही जांहा हांजेपो उवी येशु तियाहा कोयु चाला आपु तिवोल जाऊ.

³⁶ अने ते ती गोर्दी सोडीत ते नावीपो जेहलू तीही ओतु तेहलूज तियाहा लेत गोये अने बीहरयु नाव बी ओत्यु.

³⁷ ताहा वोडो वादोल उठ्यो अने लाटावाही नावीमेहे पाई पोअहू लाग्यो.

³⁸ फासाडी येशु नावेए फासाडीई भागुम उशास लेत निंदेम गोल्यो ओतु तेहलाम तियाहा ते जागतू कोईत कोयु, गुरुजी आपु बुडूहु बाजीत रोल्या होय अने आपाआ नाश उवनारू होय?

³⁹ तिये तियाहा कोयु उबु रोला तिये वाराहा धमकाव्यो अने लाटांना कोयु ठावकू रो, ठावकू रो तेहलाम वारू पोडीत अने अगदी निवांत उवे,

⁴⁰ फासी येशु तियाहा कोयु, “तुमु काहा बिकर्या? तुमामे ओमेजा विश्वास नाहा कि?”

⁴¹ अने ते जास्तीज बितगोये ओते अने आपसामेहे एका दिहराहा कोयु, “ओ होय तेबी कोडू का वारू अने पाई बी याआ होमलित लेतेहे?”