मरकुस 16 - नोयरी नोवलू नियम

खाली कब्र

¹ 26 जाहा शब्बाथ दीह जातु गोयु ते मरियम मग्दलिनी अने याकूबोओ आय ही मरियम अने सलोमी ऐ मोम मोंग सुगन्धित वस्तु वेस्ती लेदी का आवित त्यापोओ चोले.

² हाफ्ताआ पाल्या तेदीही वोडो वेगरयुज जांहा दिह निहयुज ओतु, ती कब्राआ उपो आवयी,

³ अने आपसामेहे कोअला, “आमा कोअता कब्राआ बायनापोरोत कोडु डोणो ठेपलीत आपे?”

⁴ जाहा तिये डोआं उगड्यो, तेहलाम पालील्यो ताहा डोणो ठेपल्या गोल्यो होयतो जाखो वोडू ओतु.

⁵ कब्राआ जागे जात तिये जुवानाहा उजले कापडे कालीला हुदिवोल बोहीतरोल्यु पाल्यू, अने जाखो चकित उवे.

⁶ तिये तियाहा कोयु, “चकित उवहू नाहा, तुमु येशु नासरीही, जो क्रूसापोओ सोडल्या गोल्यो ओतु तियाहा होदित होय तो मोईलामरोत जीवतो उठ्यू होय, इही नाहा होय, पाला ओ ओच स्थान होय, ईहि तिये तियाहा मेक्ल्ये ओते.

⁷ पोन तुमु जा, तियाआ शिष्यांनी अने पेत्राहा कोआ तो तुमाआ आगाडी गालीला मेहे जाहुजेहे का तिये तुमामे कोयु ओते, तुमु तिहीज तियाहा पालिलो.”

⁸ अने ते निहित कब्राआ मायरोत निहित गोयी; काहाके थर अने बीइलाहोस तियापो होतगोयो गोये; तिये तियाहा किबी कोयु नाहा, ती काहाके बितगोयी ओती.

मरियम मग्दलनी येशुहू देखत्ली

⁹ हाफ्ताआ पाल्या तेदीही वेगीई ओतुज तो जीवतो ओवयू पाल्या भोला वेगीई मरियम मग्दलिनी ज्याआ मायरोत तिये सात दुष्टात्मा काढ्ये ओते, तीही येशु देखायू.

¹⁰ तीही जात येशुउ हातीदारोओ शोकात बुडोलो ओते अने रडीत ओते, वर्तमान आप्यू.

¹¹ ते ओ होम्लाडित का तो जीवतो होय अने तीही तियाहा पालील्यो, विश्वास नाहा कोअयु.

बेन चेलाहा देखालोओ

¹² तियाआ फासाडी तो दिहरा रुपात त्यांमेरया बेनुहू जांहा ते गावोही जात होतदिसले

¹³ तिये पोन जात दिहराहा खोबोर आप्यू, परंतु तिये तियापो पोन विश्वास कोअयु नाहा.

महान आदेश

¹⁴ फासाडी तियाहा तिया आकरा जनाहा पण जांहा ते रोटू कोअला बोह्ये ओते देखायू ओतु, अने त्याआं ज्या अविश्वासहातो अने मोनाआ कोठरता उपो दोष लागाड्यू, काहाके जिये तियाआ मोईलामरोत जीवतो उठेताहा तियाहा पालील्यो, तिये तियापो विश्वास मेकलू ने ओतू.

¹⁵ अने तिये तियाहा कोयु, “तुमु आखे जगात जात आखे धरतीई माहुंहु सुसमाचाराआ संदेश को.

¹⁶ जो विश्वास कोअत्लू अने बाप्तिस्मे लेहो तीयाआज उद्धार उवे, परंतु जो विश्वास नाहा कोअनारू तो दोषी ठरविल्यो जाइअलो;

¹⁷ विश्वास कोवनारापो ओ चिन्ह होय का ते माआ नावामेहे दुष्टात्मा काढे, नवो भाषा गोगे,

¹⁸ हापोहे विसित लेणारे, अने केधी ते प्राणनाशक वस्तू पण पित कोईत लेधोतेबी तियाआ नुकसान उवे नाहा; मादवाड्यापो आथे मेकीत, अने ते हाजो होय”.

येशुउ होरगाम जाअलो

¹⁹ प्रभू येशु त्याआरी गोठी कोईलानंतर होर्गाम लेदो गोल्यो अने परमेश्वरोओ हुदिवोल बोहित गोल्यो.

²⁰ अने ते निहित हर एक जागापो प्रचार कोअयु, अने प्रभू आरी काम कोईत रोला, अने तियाअ चिन्हद्वारे जे जागे-जागे उवनारा वचनोमे दृढ कोईत गोल्यो आमेन.