मरकुस 15 - नोयरी नोवलू नियम

पिलातुस येशुहू प्रश्न कोअयु

¹ फाशो वेगीई उवताच डाये अने शास्त्री याजकाआरी मुख्य याजक अने आखी न्याय कोअनारी सभा ऐ होमच्यु कोईत येशुहू बंधित कोईत पिलातुस आथोमेहे होपित देहु.

² पिलातुसो वांही तियाहा फ़ुस्ल्याआ, कि तू यहुद्याआ राजा होय? तिये तियाहा उत्तर आपित कोयु, तू स्वतः कोयु होय.

³ अने मुख्य याजक तियापो जास्तीज दोष लागाडीत ओते.

⁴ पिलातुसो वांही तियाहा ओ कोयु फासी फ़ुस्ल्याआ, नाहाकोत तू उत्तर आपित नाहा? पालते ताआ बद्दल केतो दोष लागाडीत होय?

⁵ पोन येशु किबी उत्तर आप्लु नाहा ओ पालीत पिलातला आश्चर्य लाग्यो.

येशुहू मृत्यु दण्डोओ आज्ञा

⁶ तिवाराआ टायमोमें ते तियाआ मागणीवाही कोडनीबि होमला माहुंहु (कैदी) सोडीत आपित ओतु.

⁷ अने तिया ठोग मांहाआरी जीआ खून कोल्यु ओते तीयाम बरब्बा नावाआ एक माहुहू कैद ओतु.

⁸ अने गोर्दी तियाहा उसे जात विनंती कोहू लागीई का जेहलो तू कोईत आवयू होय तेहेज आमा आरी को

⁹ अने पिलातुसो वांही तियाहा उत्तर आप्लु, कि तुमामे लागेहे का आय यहुद्यांआ राजाहा तुमा कोअता सोडीत आपुहू?

¹⁰ काहाके तो होमजाडीत ओतु का मुख्य याजकावाही तियाहा इर्ष्यावांही तोईत आप्लु ओते

¹¹ पोन मुख्य याजकाने गोर्दी एहलो कोइला कोअता उत्साहोम कोल्यु ओते का आमाहा याआ बद्द्लोम बरब्बाहा सोडीत आपलो.

¹² पिलातुसो वांही फासी उत्तर आप्लु, “ज्याहा तुमु यहुद्याआ राजा कोतेहे तियाआ आय नाहाकोत कोहू?”

¹³ ते फासी आअडीलो, तियाहा क्रूसापोओ सोडवा.

¹⁴ पिलातुसो वांही तियाहा कोयु, काहा? तिये कि वाईट कोल्यु होय? पोन ते फासी जोरे आअडीलो याहा क्रूसापोओ सोडवा.

¹⁵ ते पिलाताहा गोर्दी संतुष्ट कोइलाआ इच्छावाहि बरब्बाहा त्याकोअता सोडीत आप्लु अने येशुहू साबकावाही माईत क्रूसापोओ सोडविला कोअता तियाहा आपित टाक्ये.

येशुउ अपमान

¹⁶ फासाडी शिपाई तियाहा कचेरी खोलीम घेऊन गोये अने तीही तिये रोमी हिपायांहा हादीत एकठे कोल्यु

¹⁷ तिये तियाहा जाबलो कापडे काटाआ अने काटाआ मुकुट गुंतुवून तियाआ मुंडकापो मेक्ल्ये.

¹⁸ तेहलाम ते तियाहा नमन कोहू लागाडीत “ओ यहुदांआ राजा ताआ जयजयकार होय.”

¹⁹ ते तियाआ मुंडकापो बोरु देत अने तियापो थुकीत रोल्या, अने टोसणे टेक्यू तियाहा प्रणाम कोईत रोल्या

²⁰ जांहा ते तियाआ मजाक कोईत चुक्यो तेहलाम जांभलो कापडे काढीत घेऊन फासाडी तीयाआज कापडे कालीत आप्लु अने ते तियाहा क्रूसापोओ सोडविला कोअता बारथे घेऊन गोये.

येशुहू क्रूस पोओ टांग्या

²¹ तिये सिकन्दर अने रुफुसाचे बाह्हू शिमोन कुरेनी कोजे गावोमेरोत आवीत ओते बेन कामोको तियाहा तोओईलो याकोअता का ते येशुउ क्रूस विसित घेऊन जानारू.

²² ते तियाहा, “गुलगुथा” नावोओ जागे घेऊन आव्ये, ज्याचा अर्थ होय, “कवटीइ ठिकाण”,

²³ अने तिये तियाहा बल मिल्वीत लेले द्राक्ष रोह आपलो प्रयत्न कोअयु पण तिये लेदो नाहा.

²⁴ अने तिये तियाहा क्रूसापोओ चोढावीत अने तियाआ कापडाआ कोडाआ नाहाकोत मिलीलो एहलो चिठ्या मेकल्या अने वाटीत लेधलो.

²⁵ जाहा तिये तियाहा क्रूसापोओ चोढावीत तेहलाम वेगर्यू नऊ वाज्यांआ ओते

²⁶ अने तियाआ दोष पत्रापो “यहुद्याआ राजा” एहलो लेखिलो ओते.

²⁷ तिये त्याआरी बेन बांडोहो पोन क्रूसापोओ चोढावीत, एकाहा हाजावोगे अने दिहीराहा डावासाईटोहो.

²⁸ ताहा पवित्रशास्त्र आ ओ वचनाआ पाप्या आरी गोणात गोयु पुरो उवो.

²⁹ अने तिहीरोत आवणारा जाणारे तियाआ निंदा कोईत अने मुंडको आलाडीत-आलाडीत कोहू लागाडीत, अरे मंदिराहा पोडीत आपणारो अने तीन दिहोम उभे कोअनारू,

³⁰ स्वतःहा वासाड अने क्रूस उतरित आव

³¹ यावाही मुख्य याजक पण शास्त्रीआरी मिलून तियाआ थट्टा उडाडीत कोयु ओते यामा दिहीराहा वासाडये पण स्वतःहा वाचाआडयो शकला नाहा.

³² ओमे ओ ख्रिस्त इस्राएलाआ राजा क्रूस निसे उतरित आविलो ओ आमाहा पाल्हू अने विश्वास कोहू अने ते पण जे कृसापो तियाआ आरी चोढावीत ओते ते पण थट्टा कोईत ओते.

येशुउ मृत्यु

³³ जाहा दिहे बारा वाजाडीता गोये तो आखे देश मेहे आंदारो फैलावीत गोल्यो अने तीन वाजेतांहुंजा रोला.

³⁴ अने तीन वाजेला येशु जोरेज आयडीत कोयु, एलोई, एलोई, लमा शबक्तनी? याआ अर्थ होय, “ओ माआ देवा, माआ देवा तू माहु काहा सोडीत आप्लु?”

³⁵ फासाडी जे जागे उभे ओते ते केते जोओ ओ होमलित कोहू लागाडीत पाला तो एलीयाहा आवाज देत होय.

³⁶ अने कोडु गुगदीत जात स्पंज आंबेने पाअये अने बोरुपो मेकीत चुसित्लो आप्लु अने कोहू लागाडीत, पाल्तू एलिया तियाहा निसे उतारीला कोता आवत्लू का नाहा.

³⁷ तेहलाम येशु जोरा आयडीत जीव सोडयु

³⁸ अने मंदिराआ पडदू वरून नीसेजा फाटीतबेन भाग ओतगोयु गोल्यो.

³⁹ तेहलाम सुभेदाराही जो तीही आगाडी उबु ओतु तिये यावाही जीव सोडीलावेल पालील्यो तेहलाम कोयु, “ओ माहुहू खरोज परमेश्वरोओ पुत्र ओतु.”

⁴⁰ किबी बोईही पण कोयु ज्या सेटेरोत ओ पालीलो कोयु तियाआ माय मरिया मग्दलिनी, हानू याकोब अने योसेसोओ याह्ही मरीया अने सलोमी ओती.

⁴¹ जाहा तो गालीला मेहे ओतु तेहलाम ती तियाआ फासाडी-फासाडी चालते रोअला अने तियाआ सेवा कोईत ओती फासी जास्तीज बोईही कोयु ज्या त्याआरी यरुशलेमोमे आव्या कोयु.

यूसुफो कब्रों मेहे येशुहू गाडलो

⁴² जाहा हांजेपो उवी तेहलाम तीयार उविला दीही एहलाकारनावाही म्हणजे शब्बाथाआ होमला दिहाआ पहीले,

⁴³ अरिमतियाआ रहिवासी युसुफ आवयू जो महासभेचा सदस्य होये स्वतः परमेश्वरोओ राज्याआ वात पालीत ओतु तिये हीमत कोईत पिलातुसो आगाडी जात येशुउ डील माग्ये.

⁴⁴ पिलातुसोहो आश्चर्य वाटेम का तियाआ मरण ओतो वेगु ओतगोयु गोये एने तिये सुभेदाराहा हादीत फ़ुस्ल्याआ, “नाहाकोत तो एतांम मोईत गोल्यो होय?”

⁴⁵ फासाडी तिये सुभेदारापोरोत मुंडूपोडेताहा युसुफाहा येशुउ डील आपित टाक्ये.

⁴⁶ तेहलाम योसेफाने तागाचे कापडे वेसातो घेऊन अने डीला निसे उतारीत तीयाम चोडाल्याएने खोड्काम खुइत्मेकल्या होमला कबरेम मेकीत आप्लु अने कबरेए बाअनापो एक वोडू दगडू मेक्या.

⁴⁷ मरिया मग्दलिनी अने योसेसोओ याह्ही पालीत ओती का तियाहा का मेक्ल्ये होय.