मरकुस 13 - नोयरी नोवलू नियम

येशु द्वारा मंदिरों विनाशो भविष्यवाणी

¹ जाहा तो मंदिरोमेहे रोत नीहतु ओतुताहा तियाहा तियाआ चेलामेहेरोत एक जोंओ तियाहा कोयु ऐ गुरू पाल केहला वोडा दोणा अने केहलु वोडू बोंगलू होय.

² अने येशु तियाहा कोयु, तुमु आव वोडो मंदिराआ पालल्ते? एक डोणो पण सुटे नाहा जो पोडीत जानारू नाहा.

आखरी दिहोहो चिन्ह

³ जाहा तो मंदिराआ आगाडी जैतुनाआ डोगोपो बोहयु ओतु तेहलाम पेत्र याकोब योहान अने आंद्रिया लेतजा एकांत तियाहा फ़ुस्ल्याआ,

⁴ आमाहा कोआ का याआ गोठी कोयो उवे होय जांहा याआ आखे गोठी पुरो उवे होय ताहा याआ निशानी नाहाकोत रोही?

⁵ अने येशु तियाहा कोहू लाग्यू, सावध रो, कोडु तुमामे ठोगीत कायना.

⁶ केते माआ नावामेहे ते कोयु आविलो आय तोज होय अने ते कोअता जो ठोगील्यो.

⁷ स जाहा तुमु लढाया विषयी होम्लाहा किंवा बातम्या होमलीनारू ताहा बित नाहा याआ गोठीही उवे आवश्यक होय तेबी पण तियाअ समयी अंत उवे नाहा.

⁸ होमला जातीविरुद्ध दिहरि जात अने होमला राज्याविरुद्ध दिहरे राज्य उठित उभे रोही जास्तीज जाग्तली भूकंप उवे अने दुष्काळ पण पोडी याआ आखे गोठी वेदनांआ अने दुखोओ सुरवात उवे.

⁹ पोन तुमु सावध रो, काहाके मांहे तुमामे सभास्थानामेहे लेत जानारू, मंदिरोम चापके देही तुमु माआ वोजोसे अधिकाऱ्याआ अने राजाहा आगाडी साक्ष आपलो कोअता उभे रोही.

¹⁰ अने आवश्यक होय का पहीले आखे जातीमेहे सुसमाचार प्रचार कोअयी जोवे.

¹¹ जाहा ते तुमामे बंदी कोईत होफहोपिन आपी ताहा पेलरोत चिंता कोहू नाहा का आमाहा नाहाकोत कोअही पोन या तिया समयी तुमामे जे किबी आप्लु जाइअलो ते तुमु कोओलो होय काहाके गोगनारे तुमु नाहा पण पवित्र आत्माआ होय.

¹² पाही पायहोहो अने बाह्हू पोऱ्याहा च देउलाकोअता तोईत आपी अने पोऱ्ये आपाआ याह्ही बाह्हाआ विरोधाम उभे रोत तियाहा माईत टाकही.

¹³ अने माआ नावोवाही आखे तुमाआ द्वेष कोअनारू पण जो आखिर पर्यंत धीर तोईत रोही तीयाआज तारण उवे.

माहाकष्टो टाईम

¹⁴ पोन जाहा तुमु अशुद्ध कोईत टाकही, घृणित वस्तु पाल्हा, ताहा वासनारावाही होमजीत जानारू ताहा जे यहुदियाम होय तिये डोगोम नाहीत जायलो होय.

¹⁵ अने जे कोओओ छत्तावर होय तिये निसे उतरुहू कायना अने किबी लेई कोअमे सुद्धा जाऊ नाये.

¹⁶ अने जे खेतुम होय तिये आपाआ कापडे लेणेकोअता फासाडी वोलुहू कायना

¹⁷ पोन तिया धिक्कार होय जे तियाअ दिहोम गर्भवती रोही अने जे पोऱ्याहा दुध पिवाडीही.

¹⁸ प्रार्थना को का ओ हियालाम ओवुहू कायना.

¹⁹ काहाके तेदीही एहलो दुखामे होय जेहलो धरतीई पेलेरोत ओमेजा उवे नाहा अने फासाडी ए खोरोज देव नाहा.

²⁰ जर परमेश्वराने तियाअ दिहीहो कोम वचकोल्यु कायना ओतो ताहा कोडलो प्राणी बी नि वासते पण तियाअ निवडिल्या वांही तियाहा तिये निवडील्ये होय त्याकोअता ओ दीही कोम कोल्यु होय.

²¹ तेहलाम जर कोडु तुमामे कोअही, पाला, ख्रिस्त इंही होय किंवा पाला तो तीही होय ताहा विश्वास कोहू नाहा.

²² काहाके खोटो ख्रिस्त अने खोटो भविष्यवक्ता उठित उभे रोही अने जर शक्य उवेताहा जे निवडील्ये होय तियाहा पण ठोगीत सेकतेहे अने तियाहा अदभूत काम अने चिन्हे देखाडीही.

²³ पोन सावध रोयला, पाला आय पहिलुच तुमामे कोत आप्लु होय.

येशुउ इजी आवलोओ

²⁴ पोन तिया दिहोम तियाअ दुखोम, दिह काळा ओतगोयु जानारू अने चंद्र आपाआ उजालो आपी नाहा.

²⁵ अने जुगोमोरत तारे तुटीत रोही अने जुगाआ शक्ती आलाळीत जानारू.

²⁶ तेहलाम मांहे माअहा पोऱ्याहा वोडो सामर्थ अने गौरवासह जुगोम आविलावेले पालनारू.

²⁷ तिया टायमोमें ते आपाआ स्वर्गदूत ताहा मोकलित धरतीई आव तीवोगरोत जुगोओ तियाअ टोकापोजा चारू साइतटूमे आपाआ निवाडीत एकठे कोअही.

अंजीरो साड़ोओ दृष्टांत

²⁸ अंजिराआ साडोपोरोत ओ उदाहरण हिकिलो जांहा तियाआ डाली कोमल ओतगोयु जाहो अने तीयाम पाने फुटहू लागत्ले तेहलाम तुमु जाईत लत्ले का उनालू जागे आवयू होय.

²⁹ ह्याप्रमाणे तुमु पण याआ गोठी उवेताहा पालीलो ताहा होमजीत लेअलो का तो दीही जागे आवयू होय नहाते बाअणापो तो आवयू होय.

³⁰ आय तुमामे खोरोज कोत्लू का, जोपोरोत याआ आखे गोठी पुरो उवनारा नाहा तोपोरोत ए पिढी नष्ट उवे नाहा.

³¹ जुग अने धोरती नाहा एह्ली ओतगोयु जानारू पण माआ वचन रद्द उवे नाहा.

कायम जागते रोवा

³² पोन तो दीही किंवा वेलाआ विषयाम कोडोबी मालुम नाहा स्वर्गदूतो नाहा अने पोऱ्याहा पण नाहा फक्त बाह्हाहा मालुम होय.

³³ सावध ओतगोयु जा, जागतू रो अने प्रार्थना को काहाके तुमामे मालुम नाहा का तो ठराविक वेल कोयो आविलो.

³⁴ ओ आव मांहाहोस होय जो आपाआ को सोडीत प्रवासाम गोल्यो आपाआ नोकराहा अधिकार आपित तिये आखाहा आप आपाआ काम कोयु अने बाआणु रखवालाहा पण जागतू रोइला कोअता आज्ञा कोयु.

³⁵ त्यापोत जागतू रो काहाके तुमाआ कोओ मालिक अथवा आविलो होय हांजेपो, राती, कुकडू आअडिलो टायमोमें किंवा वेगीई.

³⁶ केधी एहलो उवूंहू नाहा का अचानक तो आविलो जानारू अने तुमामे हुवतले पालनारू.

³⁷ अने जे आय तुमामे कोत्लू तोज आखाज कोत्लू, “जागतू रो.”