मरकुस 10 - नोयरी नोवलू नियम

वेहवाल अने तलाको विषय मेहे सिक्षा

¹ फाशु येशु तीहीरोत उठीत कोईत यहूदीयाआ सीमा मेहे अने यरदोनो पार आव्यू गोर्दी फाशी तियाआ आरी एखठी ओत गोई अने आपाज रीतीवाही तियाहा फाशु हीकाडूहु लाग्यु.

² तेहलाम किबी परुसी तियाआ परीक्षा कोअला तियाआ जागे आव्ये अने तियाहा फुसिलो लागाडीत का; के कोडा मांहांकोअता आपाआ लाडीई सोडीत आपलो योग्य होय?

³ तिये तियाहा कोयु, “मोशेई तुमामे कि आज्ञा आप्यी होय?”

⁴ तिये कोयु, “मोशेई माहुंहु आज्ञा आप्यी होय का तो सूटपत्र लेखित बुई बारथे काडीत आप.”

⁵ पोन येशु तियाहा कोयु, “तिये ए आज्ञा तुमाआ मोनोमेहे कोठरता वाही लेखिलो.”

⁶ पोन जग च्या पेलेरोत परमेश्वराने तियाहा बुई अने माहु बोनाडहि

⁷ त्यापोत मांहु आपाआ याह्ही बाह्हाआ सोडीत आपाआ लाडीई आरी रोय.

⁸ अने ओ बेन होमला डीलोओ उवे कोईत ते ओमे बेन नाहा पण एक डील होय.

⁹ त्यापोत ज्याहा परमेश्वराने जोडीत होय तियाहा कोडु मांहु अलग कोअनारू नाहा.

¹⁰ अने शिष्य कोअमे आविलो आव विषयी तियाहा फासी फुसुहू लागाडीत.

¹¹ तिये तियाहा कोयु जो कोडु आपाआ लाडीई सूटपत्र आपित दिहरा बुई आरी वेहवाल कोअनारू ताहा तो तिच्याविरुद्ध व्यभिचार कोअत्लू,

¹² अने बुई पोन आपाआ डोहाहा सूटपत्र आपित दिहरा मांहाआरी वेहवाल कोअते ताहा ती व्यभिचार कोईत ओते.

सोऐ अने होरगा राज्यो

¹³ फासाडी मांहे पोऱ्याहा त्याजागे घेऊन आवहू लागाडीत का तो तियाहा स्पष्ट कोईओलो पण शिष्यांनी तियाहा धमकाव्यो.

¹⁴ येशु जांहा ओ पालील्यो, तेहलाम क्रोधावाही तियाहा कोयु, “पोऱ्याहा मा आहने आवहू दया तियाहा नाहा कोहू विनाकारण परमेश्वरोओ राज्य तियाआ हारखोच होय.

¹⁵ आय तुमामे खोरोज कोत्लू जो कोडु देवोओ राज्य हानू पोऱ्याहोस ग्रहण कोईत नाहा ताहा तो तीयाम खोरोज प्रवेश कोहू सेकेहे नाहा.”

¹⁶ तेहलाम तो तियाहा आपाआ गोदमध्ये घेऊन अने तियाआ उपो आथे मेकीत आशिर्वाद आपुहू लाग्यू.

धनी जवान अने परमेश्वरोओ राज्यो

¹⁷ अने जाहा तो प्रवासाम जाणारच ओतु तेहलाम एक माहुहू गुगदीत तियाआ जागे आवयू अने गुडू पोडीत फुसिलो लाग्यू, ओ हाजो गुरुजी, तू हाजूहोय अने अनंत जिवनाआ अधिकारी उविला कोअता आय की कोओ?

¹⁸ येशु तियाहा कोयु तू माहु उत्तम काहा कोहे? परमेश्वरोप रोत कोडूच हाजो नाहा

¹⁹ ताहु आज्ञा ताहा मालुमुज होय, हत्या कोहू नाहा, व्यभिचार कोहू नाहा, चोरी कोहू नाहा, झुटी साक्ष आपुहू नाहा, निंदा कोहू नाहा, आपाआ याह्ही अने बाह्हाआ सन्मान को.

²⁰ तिये तियाहा कोयु, गुरुजी, आय जन्मापोरोत आव आखे गोठीई पालीत कोईत आवयू होय.

²¹ ओ पालीत येशुहू प्रेम आवयी अने तिये कोयु, तांआम फासी होमला गोठीई कोम होय, जा जे किबी ताआ होय अने गोरब्योम वाटीत आप अने होर्गाम ताहु धन जोडीत आविलो तू माआ फासाडी आव.

²² ओ वचन होमलित तियाआ सोब उतरीलो अने तो दुखित ओतगोयु तिहीरोत निहित गोल्यो काहाके तो जाखो श्रीमंत ओतु.

²³ येशु चारही सेटे पालीत आपाआ शिष्यांआ कोयु, धनवानो कोअता परमेश्वरोओ राज्याकोअता प्रवेश कोअला केतो कठीण होय

²⁴ शिष्य तियाआ शब्दापोरोत जास्तीज आश्चर्य उवे पण येशु फासाडी कोयु, “ऐ पोऱ्या, परमेश्वरोओ राज्याम प्रवेश मिलविलो केहलो कठीण होय,

²⁵ परमेश्वरोओ राज्याम एगदा श्रीमताआ प्रवेश कोईलापेक्षा उटडाहा हुयीइ नाकामेरोत निहित जाअलो सोपो होय.”

²⁶ ते फासी जाखो आश्चर्यावांही फुसिलो लागाडीत फासाडी कोडाआ तारण ओवुहू सेकोहो?

²⁷ येशु त्याआरोत पालहु कोयु माआहुकोअता ओ कठिन होय पण परमेश्वरोओ कठिन नाहा काहाके परमेश्वरा कोअता आखे किबी शक्य होय.

²⁸ पेत्र तियाहा कोल्यु लाग्यू, पाला, आमाहा आखे सोडीत ताआ फासाडी लाग्यू होय.

²⁹ येशु कोयु, आय ताहु खोरोज कोत्लू, का एहलो जीआ माआ अने सुवार्ता कोअता को, पाही, बोईही अने याह्ही-बाप अने पोऱ्ये अने खेतीहो सोडये होय,

³⁰ अने तो ओमे योपो वर्तमान समयी कोओहो पाही बोईही, याह्ही बाह्हाहा अने पोऱ्ये अने खेतीहो होव पट्ट जाखो मेलवूहु नाहा पण सर्वकाळी रोणाआरा आरी अने आवनाराआ जुगोम अनंत जीवोन जोडे तांहुअजा रोही नाहा.

³¹ पोन केते जोओ जे पहीले होय, आखरी होय अने जे आखिर होय ते पहीले होय.

येशु तियाआ मृत्यु विषय मेहे तीसरी कावा कोयु

³² अने ते यरुशलेमेत जाआत्लू वातेम ओते अने येशु तियाआ आगाडी-आगाडी जात ओतू एन ते चक्कित उवनारा ओते अने जे मागित आवीत ओते ते बितगोये ओते अने फासी तो तियाअ बाराणा अलग घेऊन गोल्यो, अने जे किबी तियाआ आरी उवे ओते ते तियाहा कोयु ओतु,

³³ पाला, आपु यरुशलेमेत जात रोल्या होय अने माअहा पोऱ्या मुख्य याजक अने शास्त्रीच्या आथोमेहे तोईत आप्यू जानारू अने ते तियाहा मरण दंड योग्य ठेरवीत अन्यजाति आथे होफहोपिन आपी.

³⁴ ते तियाआ थट्टा कोअनारू, तियापो थुंकीलो, तियाहा चापके देही अने माईत टाकही अने तो तीन दिहीआ तो फासी जिवंत उठनारू.

सेवकायीई महानता

³⁵ तेहलाम जब्दिई बेन पोऱ्ये याकोब अने योहान तियाआ जागे आविलो कोहू लागाडीत, ओ गुरु, आमाहा लागेहे जे किबी आमाहा तापो मागहु ते तू आमा कोअता को.

³⁶ अने तिये तियाहा कोयु तुमामे कि लागेहे आय तुमा कोअता कोहू?

³⁷ तिये तियाहा कोयु, ताआ वैभवाआ आमामेरोत एक हाजावोगे अने दिहरू डावासाईटोहो बोहजी.

³⁸ पोन येशु तियाहा कोयु, तुमामे मालुम नाहा का तुमु नाहाकोत मागित होय जो पिदो आय पीही होय कि तो तुमु पीईअलो शकहू? किंवा जो बाप्तिस्मे आय लेही होय तो तुमु लेऊ सेकेहे नाहाकोत?

³⁹ अने तिये तियाहा कोयु, “आमाहा कोहू शकतो.” अने येशु तियाहा कोयु, तो पिदो आय पीही होय तुमु पीईअलो सेकतेहे अने तो बाप्तिस्मे जो आय लेही होय तुमु लेऊ सेकतेहे

⁴⁰ पोन आपाआ हाजाडी किंवा डावासाईटोहो बोअहाळीलो माआ काम नाहा पण त्यांकोअता होय याकोअता तीयार कोल्यु होय.

⁴¹ एके ऐ होमलित दहा शिष्य याकोब अने योहानापो रागावीत गोये.

⁴² कोईत येशु तियाहा जागे हादीत कोयु, तुमामे मालुम होय का जो अन्यजाति अधिकारी होमाज्या जात्लू ते तियापो राज्य कोअता अने तीयाम जे वोडो होय ते तियापो राज्य कोअता.

⁴³ पोन तुमामे एहलो नाहा जो कोडु तुमामे वोडू ओवुहू इच्छितो तिये तुमामे सेवक उवे,

⁴⁴ अने जो तुमामे अधिकारी बोनिलो मांगत्लू तिये आखाआ दास बोनिलो जोवे.

⁴⁵ काहाके माअहा पोऱ्या पण आपाआ सेवा कोईलाकाजे नाहा पण सेवा कोअला अने कोअता जो वेसातो घेण्यासाठी आपाआ छुटकारा जीव आपुहू आवयू होय.

आंदलू बरतिमाई हाजु ओवयु

⁴⁶ ते यरीहो शहर पुग्या अने जांहा तो आपाआ शिष्य अने होमला वोडो गर्दीआरी यरीहोमरोत बारथे जात ओते ताहा बर्तीमय नावाआ एक आंदलू भिकारी जो तिमय चा पोऱ्या ओतु वाटेए किनारावपो बोहयु ओतु.

⁴⁷ जाहा तिये होमल्यु का ओ नासरी येशु होय ताहा तो आळीही लाग्यू, ओ येशु दाविदाआ पुत्रा, मापो दया को.

⁴⁸ केत्येकोजो धमकाव्यो आपित कोयु का तो ठावकू रोंहु जोवे, पण तो फासी जोरे आअडीला लाग्यू दाविदाआ पुत्रा, मापो दया को,

⁴⁹ ताहा येशु थोबिलो कोयु, तियाहा हादाडा अने माहुहु तियाहा ओ कोयु हादाडये, धीरज तो, अने उठ तो ताहु हादीत होय.

⁵⁰ अने तो आपाआ कापडो होमला सेटे टाकी आप्यू अने कुदित उठ्यू अने येशुआरी आवयू.

⁵¹ येशु उत्तर आपित कोयु, ताहु नाहाकोत लागेहे का आय ता कोअता कोहू? अने आदलाही तियाहा कोयु, माआ गुरु, माहु पालीलो होय

⁵² येशु तियाहा कोयु, निहित जा ताआ विश्वास ताहु हाजो कोल्यु होय तो लागेज पालाहू लाग्यू अने वातेम तियाआ फासाडी जाऊ लाग्यू.