मत्ती 9 - नोयरी नोवलू नियम

एक लखवा रोगिही हाजु कोअलोओ

¹ तो नावूमे बोहित तिवोल गोल्यो अने आपाआ नगरामे आवयू.

² अने पाला, मांहे एक लोखवू उवल्याहां मांहाहा खाटलापो हुवाडीत तियाआ ईही लेत आव्ये, येशु तियाआ विश्वास पालीत लोखवू उवल्या मांहाहा कोयु, माआ पोऱ्या, धीर तो, आय ताआ पाप क्षमा कोअयुहु.

³ अने पाला, केते शास्त्री आपाआ मोनामे कोयु, ओ ताहा परमेश्वरोओ निंदा कोअत्लू.

⁴ येशु तियाआ मोनामेऱ्या विचार होमजीत तियाहा कोयु, तुमु आपाआ मोनुमे काहा वाईट विचार कोईत होय?

⁵ सोपो की होय? ओ कोओलो का, ताआ पाप क्षमा उवे होय, का फासाडी उठ अने चालु लाग.

⁶ पोन याकोअता तुमु जांहु जोवे का माअहा पोऱ्याहा धोरतीपो पापापो माफी आपलो ओ अधिकार होय. तेहलाम तिये लाखवा उवल्यू पीडी ओयत्याहा कोयु, उठ, आपाआ खाटलो वीसे अने कोआ जा.

⁷ तो उठित आपाआ कोअ निहित गोल्यो.

⁸ जांहा ओ मांहे समुदायांनी पाल्लये, तेहलाम ते बितगोये अने चकित मांहे परमेश्वरोओ स्तुती कोहू लागाडीत. जीआ मांहाहा एहेलू अधिकार आप्यू होय.

येशु मत्तिही हाद्यू

⁹ जेहेलो येशु तिहीरोत आगाडी गोल्यो मतय नावाआ एक माहुहू वसुलीई नाकापो बोहीतरोल्यु पालीत तिये तियाहा कोयु, माफासाडी आव, तो उठ्यू अने तियाआ फासाडी चालीलो लाग्यू.

¹⁰ फासाडी एहलो उवे का जांहा तो कोअमे रोटूखाहू बोहयु ओतु, तेहलाम पाला, केते को लेनारा अने पापी आविलो येशु अने तियाआ शिष्याआरी रोटू कोहू लागाडीत.

¹¹ अने जांहा परुश्यांहि ओ पालील्यो तेहलाम ते येशुउ शिष्यांआ कोहू लागाडीत, तुमाआ स्वामी को लेनारे अने पापी मांहाआरी काहा रोटू खात्लू?

¹² फासाडी तिये होमल्यु तेहलाम तिये कोयु, हाजा मांहोहो वैदयाची गोरोज नाहा पण मांदवाड्यू मांहोहो होय.

¹³ याकोअता तुमु जा अने होमजीतल्या का शास्रामे आव वचनाचा अर्थ कि होय; माहु बलि नाहा पण दया जोवे काहाके आय नितीमानांहा नाहा पण पाप्यांहा हादिलाकाजे आवयू होय.

युहन्ना चेलाआ उपवासो प्रश्न

¹⁴ तेहलाम योहानाआ शिष्य त्याजागे आविलो कोहू लागीई, कि काहाके होय का आमाहा अने परुसी उपास कोअता पण ताआ शिष्य उपास कोईत नाहा?

¹⁵ येशु तियाहा कोयु, जोपोरोत उपो वोराडवालारी होय तोपोरोत ते शोक कोहू सेकेहे कि? पण तेदीही आविलो जांहा वोरोहो वोराडो वालापोरोत जुदो कोअयु जाइअलो, अने ते उपास कोअनारू.

¹⁶ जुनो कपडाहा कोडु नव्यो कापडा बोटकु लागाडीत नाहा काहाके तो बोटकु तियाअ आगला फाडते अने तो पेलरोत जाखो फटीत जात्लू.

¹⁷ नाहा कोडु जुनो बुधलाम नवो द्राक्षरस पोईत नाहा, काहाके एहलो कोलाकोता बुधले फुटीत जातेहे अने द्राक्षरस बारथे वोहीत जात्लू अने बुधले नष्ट ओते पण नवो द्राक्षरस नव्यो बुधलाम भरतात तेहलाम बुधले अने द्राक्षरस बेन हाजूहोय रोत्ले.

मोअली सुई जीवति ओवयी

¹⁸ तोओ कोयु ओतु एवडाम पाला, यहुदी धर्म सभांआ एक अधिकारी तीही आवयू अने तियाहा नमन कोईत कोहू लाग्यू, माआ पोऱ्यी ओमेज मोयी होय, पण आपु साला अने तिया मुंडकापो आथे मेका, ती जिवंत ओत जाणारी.

¹⁹ येशु उठ्यू अने तिया फासाडी शिष्याआरी चालु लाग्यू.

²⁰ अने पाला, एक बुई जी बारा वर्षापोरोत रक्त वाहण्याच्या बिमाराहा पीडी ओती, तीही तियाआ फासाडी आवीत तियाआ कापड़ा गोंडाहा स्पर्श कोअयु.

²¹ काहाके ती आपाआ मोनामे कोयो ओती, जर आय तियाआ कापडाहा स्पर्श कोअहि तेबी आय हाजी उवीही.

²² ताहा येशु फासाडी फिरीत पालील्यो अने तीही कोयु, बेटी धीर तो, ताआ विश्वास ताहु हाजो कोल्यु होय, अने ती बुई तियाआ वेले हाजी उवी.

²³ जांहा येशु तियाअ अधिकाऱ्याआ कोआ पोचुज ताहा तिये पावी वाजीलो अने एकठे उवल्या गोर्दी शोक कोअत्लू तेहलाम पालील्यो,

²⁴ तिये तियाहा कोयु, निहित जा काहाके सुई मोयी नाहा ताहा हुवयी होय, यापो ते तियापो ओहुहू वोल्ये.

²⁵ पण जांहा मांहो गोर्दिही ही बारथे काढीत आप्लु, अने येशु कोअमे गोल्यो अने सुई आथे तोईत तीही उठविले अने सुई उठित बोही.

²⁶ ओ संदेश तियाअ आखे देश मेहे पसरला गोल्यो.

आंदलाआ विश्वास

²⁷ जांहा येशु तिहीरोत आगाडी गोल्यो तेहलाम तियाआ फासाडी बेन आंदले ओ आअडित अने गोगीत जातले, ओ दाविदाआ पोऱ्या, आमापो दया को,

²⁸ अने जांहा तो कोअमे निहित गोल्यो तोयो ते आंदले त्याजागे आव्ये, येशु तियाहा कोयु, नाहाकोत तुमु विश्वास कोअता काहा का आय ओ कोहू शकतो; होय प्रभू.

²⁹ ताहा ओ कोयु तियाआ डोआहां स्पर्श कोल्यु, तुमाआ विश्वासामेहे तुमाआरी उवे

³⁰ अने त्याआं डोआं उगाडीत गोये, तेहलाम येशु तियाहा चेतावणी आपित कोयु, ओ कोडोबी कोहां मा.

³¹ पण तिये जात तियाअ आखे भागुम याहा चर्चा कोअयी.

एक मुकाहा हाजु कोअयु

³² जाहा ते बारथे जात ओते, ताहा मांहे होमला मुक्यो माहुंहु जो दुष्टात्मा सी पीडीत ओतु, येशुआरी लाविले.

³³ अने ताहा दुष्ट आत्माआ काढीत टाक्ये गोये ताहा मुको गोगुहू लाग्यू योपो लोकसमुदाय आश्चर्य कोईत कोडु लागीई, इस्राएल मेहे एहलो केधीज पाल्लये नाहा.

³⁴ पण परुसी कोहू लागाडीत, ओ दुष्ट आत्माआ सरदारच्या मदतीवाही दुष्ट आत्माहा बारथे काडत्लू.

मजदुरोहो मुकलिलो विनती

³⁵ येशु आखे नगरांमे अने गावोमे जात तियाआ सभास्थानात जात हिकाडतो, राज्याआ सुसमाचार कोईत अने आखे प्रकारोओ रोग अने आखे प्रकाराआ दु:ख हाजो कोईत रोला.

³⁶ ताहा माहाआ गोर्दी पालीत माहाहूपो तरस आवयू काहाके ते तियाअ मेंढाहोस ते गांजलेले अने पाग्लेले ओते ज्या मेंढवालो नाहा.

³⁷ ताहा तिये आपाआ शिष्यांआ कोयु, पाकल्ये खेत जास्तीज होय, पण कामकरी कोम होय,

³⁸ याकोईत खेतोओ मालकोहो विनंती को का, ओन काटीलोकोता कामकरी मोकलित आपलो.