मत्ती 7 - नोयरी नोवलू नियम

दोष मा लागाडाहा

¹ तुमाआ दोष काढण्याम आवहू कायना कोईत तुमु कोडाआ दोष काढहु नाहा;

² काहाके ज्यपोरोत तुमु दिहराहा दोष काडीलो तेह्लाम तियाआ प्रकारे तुमाआ पण दोष लागाडे अने ज्या मापोवांही तुमु मापीत आपी, तियाआ मापोवांही तुमा कोअता मापाय.

³ तू काहा आपाआ पायहोओ डोआम कोसरू पालत्लू, अने आपाआ डोआमेऱ्यूं कोसरू होमजाडीत नाहा.

⁴ किंवा तू आपाआ पायहोहो केहलु कोहू सेकेहे का, लेतआव, आयताआ डोआमेऱ्यूं कोसरू काढीत आपोहो तेबी पाला, कोसरू ताहा स्वतःआ डोआम होय?

⁵ ओ ढोंगी, पहीले ताआ डोआमेऱ्यूं कोसरू काढीत ले, तेहलाम ताहु आपाआ पायहोओ डोआमेऱ्यूं कोसरू काडीला साफ देखाईलो.

⁶ पवित्र वस्तु कुत्राहा आपुहू नाहा अने आपाआ मोती डुकरांपुढे मा टाकाहा नाहा, का एहलो उवूंहू नाहा का ते तियाहा गुडानिसे तुडवितील अने फिरीत तुमाहाजे फाडीत टाकीदेय.

परमेश्वर पोरोत मांगलोओ

⁷ मांगा म्हणजे तुमाहा आपे, हुदा म्हणजे तुमाहा जोडे, ठोका म्हणजे उगाड्ये जाइअलो.

⁸ काहाके जो कोडु मांगत्लू तियाहा जोळे जो कोडु होदत्ले तियाहा जोडत्लो, जो कोडु ठोकीलो त्यांकोअता उगाड्ये जाइअलो.

⁹ तुमामे एहेलू कोडू होय जो आपाआ सुआहा जांहा तो भाकर मांगनारू तेहलाम दगडू आपी?

¹⁰ किंवा मासे मागेहे ताहा तियाहा हाप आपे?

¹¹ जर तुमु वाईट ओत कायनाहा आपाआ पोऱ्याहा हाजा वस्तु आपलो होमजतोलो ताहा तुमाआ बाह्हू जो होर्गाम होय तो आपाआ हाजा वस्तु जाखा काहा आपी नाहा?

¹² त्यापोत जेहेलो तुमामे वाटिलो का मांहे तुमाहा वागीलो तेहलूज तुमु बीही त्याआरी वागा. काहाके नियमशास्त्र अने संदेष्टे ओच हिकाडतो होय.

सरल अने कठिन मार्ग

¹³ हाकडी बाअनामरोत विसमे प्रवेश को काहाके वोडू मार्ग होय तो विनाश मेहे लेत जात्लू, अने जास्तीज मांहे तीयावाही विसमे प्रवेश कोअता.

¹⁴ पण हानू अने रुंद होय तो मार्ग जीवनापो घेऊन जात्लू अने कोम मांहे तीयावाही विसमे जातेहे.

फलोसी साड उल्खाय

¹⁵ खोटो संदेष्टयापासून सावध रोजे मेंढरांहा वेहोमेहे तुमाआ आहने आवत्ले होय पोन मायरोत फाडनारा भेडीया होय.

¹⁶ तियाआ फलापोरोत तियाहा तुमु ओलखीत लेहा, किबी काटाआ झाडाउपो द्राक्षे किंवा रीगनाई साडोपोरोत अंजीर काडीलो तेह्लाम नाहाकोत?

¹⁷ यावाही हर एक हाजो साड हाजो फोल आपोहो, पण वाईट साड वाईट फोल आपोहो.

¹⁸ हाजो साड वाईट फोल आपुहू सेकेहे नाहा, अने वाईट साड हाजो फोल आपुहू सेकेहे नाहा.

¹⁹ हर एक साड जे हाजो फोल आपित नाहा आगीम टाकिला आवे.

²⁰ याकोअता तुमु तियाआ फलापोरोत ओलखीत लेहां.

²¹ हर एक जोओ जो माहु ओ प्रभू, ओ प्रभू कोत्लू, तिया होर्ग्याआ राज्याम प्रवेश उवे नाहा, पण जो माआ होर्गाआ बाह्हाआ इच्छेवाही चालीलो तोज होर्ग्याआ राज्याम प्रवेश उवे.

²² न्यायो दीही जास्तीज मांहे माहु कोत, ओ प्रभू, ओ प्रभू, आमाहा ताआ नावामेहे भविष्यवाणी कोल्यु, ताआ नावामेहे दुष्टात्मा काढीलो, अने ताआ नावामेहे केतो आश्चर्यकर्म कोल्यु नाहा?

²³ तेहलाम आय तियाहा हीदू कोही, आय तुमाहा केधीज ओलख्यु नाहा. ओ पाप कोअनारावाही मापोरोत सेटे ओ.

बुद्धिमान अने मुर्ख मांहो

²⁴ त्यापोत जो कोडु माआ याआ वचनाआ होम्लाडित तेहलो चालीलो, तो तियाअ बुद्धिमान मांहो होच होय, जीआ आपाआ कोअ खोडकापो बानदल्यो होय.

²⁵ अने पाई पोडीत, खाडी आवयी, वारू ए आवयू तेबी तियाअ कोओहो लाग्यू तेबी ते कोअ पोडये नाहा, काहाके तिया पायु खोडकापो टाक्यू ओतु.

²⁶ पोन जो कोडु माआ वचनांमे मानत्लू, अने तियाआ पालीत कोईत नाहा, तो तियाअ गांडाहोस होय जीआ आपाआ कोअ रेटापो बानदल्यो होय.

²⁷ अने पाई पोडीत, खाडी आवयी, वारू ए सुलटोया तिया कोओहो लाग्यू, तेहलाम ते पोडीत गोये अने आखो सत्यानाश ओत गोयो.

²⁸ याआ परिणाम ओ ओवयू का, जांहा येशु याआ गोठी कोत ओवल्यु तेहलाम एखठी उवली गोर्दी तियाआ शिक्षणापोरोत आश्चर्यचकित उवी.

²⁹ काहाके तो तियाआ शास्त्रीहोस नाहा ताहा अधिकाराआ होस हिकाडतो ओतु.