मत्ती 4 - नोयरी नोवलू नियम

शैतान द्वारा येशु मसीह परीक्षा

¹ तेहलाम पवित्र आत्मा येशुहू जंगलूम घेऊन गोल्यो. ज्यायाकोलो शैतानाद्वारे तियाआ परीक्षा उवे.

² जांहा तिये सालीह दीही अने सालीह रात उपास कोअयु, तेहलाम तियाहा फुक लागीई.

³ तेहलाम शैतान परीक्षक त्याजागे आविलो कोयु, “जर तू परमेश्वरोओ पुत्र होय ताहा आज्ञा को का ओ दगडू रुटू बोणीत जाय.”

⁴ पण तिये उत्तर आप्लु का, “फक्त रोटावाही नाहा, ताहा परमेश्वरोओ मुखा मेहे निहीणारा हर एक वचनाने जीवे एहेलू शास्त्रलेख होय.”

⁵ तेहलाम शैतान तियाहा पवित्र नगरामे लेत गोल्यो अने मंदिराआ उसे टोकोपे उभे कोईत.

⁶ तिये तियाहा कोयु का, “जर तू परमेश्वरोओ पुत्र होय ताहा निसे कुदी जा, काहाके एहेलू शास्त्रलेख होय का तो आपाआ स्वर्गदूतोहो आज्ञा आपे अने ताआ गुडाहा दगडू ने वाजे कोईत ते ताहु आथोपो विसीत लेय.”

⁷ येशुई तियाहा कोयु, एहलो पण लेखिलो होय का, “तू आपाआ प्रभू परमेश्वरोओ परीक्षा कोहू नाहा.”

⁸ नंतर शैतान तियाहा उचो डोगोपो घेऊन गोल्यो अने जगामे आखे राज्य अने वैभव देखाडीला,

⁹ तिये कोयु, “जर तू पाया पोडीत माहु नमन कोअही ताहा ओ आखो ताहु आपिही.”

¹⁰ तेहलाम येशु तियाहा कोयु, अरे शैतान, सेटू ओव, काहाके एहेलू शास्त्रलेख होय का, परमेश्वर याहा तू नमन को, अने फक्त तीयाआज उपासना को

¹¹ फासाडी शैतान तियाहा सोडीत निहित गोल्यो अने पाला, स्वर्गदूत आवित तियाआ सेवा कोआ वोल्या.

येशुउ उपदेशो सुरवात

¹² जांहा येशु होमल्यु का, योहानाआ तोअल्यो होय तेहलाम तो गालील मेहे निहित गोल्यो.

¹³ अने तो नासरेथ सोडीत कफर्णहुम शहर जो समुद्र किनाऱ्यापो जबुलून अने नप्ताली तियाआ भाग होय त्याजागे रोअहू कोअता गोल्यो.

¹⁴ या कोअता यशायाह संदेष्टाद्वारे कोयु ओते ते पुरो उवे, ते एहलो की

¹⁵ जबुलून अने नपतालीह देश, जे समुद्राआ वाटीपोरोत यार्देन खाड़ी तिवोल अन्यजाति माहुहु गालील

¹⁶ जे मांहे आंदाराम बोह्ये ओते तिये वोडू उजालो देख्या. “जे मोईला भागम अने सावलाम बोह्ये ओते तियापो एक वोडू उजालो सोमक्यो”

¹⁷ तिया टायमापो रोत येशु ए सुवार्ता कोइत अने अओ कोहू सुरवात कोअयी, “पश्चताप को, काहाके स्वर्गाचे राज्य आरी आव्ये होय.”

पेल्ला चेलाहा हाद्लोओ

¹⁸ येशु गालीलआ समुद्र किनाऱ्यापो सालीलावेले बेन पायहोहो म्हणजे शिमोन ज्याहा पेत्र कोअला तो अने तिया पाही अंद्रियाआ समुद्राम जाळे टाकत्ले पालील्यो ते मासे तोनारो ओते

¹⁹ तिये तियाहा कोयु, माआ फासाडी आव आय तुमामे मांहे तोनारो बोडाविही.

²⁰ लागेज ते जालो सोडीत तियाआ फासाडी चालु लागाडीत

²¹ तिहीरोत आगाडी जात फासी बेन पायहोहो म्हणजे जब्दिई पोऱ्ये याकूब अने तिया पाही योहानाआ पालील्यो, जे आपाआ बाह्हू जब्दी ह्याच्या बरोबर नावीम जाली हुदारते ओते, तिये तियाहा हादाडये

²² ते लागेज आपाआ नाव अने आपाआ बाह्हू जब्दी सोडीत येशुउ फासाडी चालुहू लागे.

गलील मेहे रोगी मांहोहो हाजो कोअलोओ

²³ येशु आखे गालीला मेहे फिरीत अने तियाआ सभास्थानात प्रचार कोईत, अने होर्ग्याआ राज्याआ सुवार्ता घोषणा कोइत अने मांहो आखे रोग अने तियाआ कमीपणा सेटे कोईत फिरूहु लाग्यू

²⁴ अने तियाआ चर्चा आखे सिरीयामध्ये फेलितगोई अने मांहे आखे माद्वाड्यो माहुंहु जे जुदेजुदे बिमारीही अने दुखाहा पीडी ओते अने जीयामेहे दुष्टात्मा ओतु अने जे लखावांही पीडी अने फेफरेकरी ओते, आखाहा त्याजागे घेऊन आव्ये अने तिये तियाहा हाजो कोल्यु.

²⁵ गालील, दकापलीस, यरुशलेम, यहुदिया अने यार्देनेच्या तीवोल गयू प्रदेशाआ टोलान टोला तिया फासाडी आवहू लाग्यू.