मत्ती 26 - नोयरी नोवलू नियम

येशुहू माअलो योजना

¹ जाहा येशु ऐ आखी गोठ कोत देदु ते तियाआ चेलाहा कोहू लाग्यु.

² तुमामे मालुम होय का बेन दिहायापासाडी वल्हांडन तिवार आवीत होय अने माअहा पोऱ्या क्रूसापोओ सोडविला कोअता तोईत आप्यू जानारू.

³ तेहलाम मुख्य याजक अने माहा बाह्हू प्रमुख याजकाआ खोलीम एकटा, महायाजकाअ नाव कायफा ओते.

⁴ अने तिये आपसामेहे येशुहू गुपचुप तोईत माईत टाकिलाआ कट रर्च्योहो.

⁵ पण ते कोओलो आखाआ टायमोमें नाहा का एहलो उवूंहू नाहा का माहुंमे गडबड ओतगोयु जाइअलो.

येशुपोओ बहुमूल्य इत्रोओ छिडकाव

⁶ जांहा येशु बैथानिया शिमोन कोढी च्या कोअमे ओतु.

⁷ तेहलाम एक बाय संगम खोराआ बासनाम बहुमूल्य तेल घेऊन येशुआरी आवयी अने जांहा ते रोटू कोईलाकाजे बोह्ये, तेहलाम तियाआ मुंडकापो तीही ओतीत आप्लु.

⁸ पण शिष्यांनी ओ पालीत रागावीत गोये कोहू लागाडीत, ओ काहा नाश कोल्यु?

⁹ आव तेलुहू जाखो किमती वेसेत गोरब्योहो रुपये आपुहू शकत ओते.

¹⁰ ओ होमजीत येशु तियाहा कोयु, तुमु आव बोयिंही काहा त्रास आपत्ले? नाहाकोत आव याकोअता का तीही माकोअता हाजो कोल्यु होय?

¹¹ गरीब ताहा तुमाआरी कायम रोत्ले, पण आय तुमाआरी हमेशा रोही नाहा.

¹² जांहा तीही माआ डीलोपो ओ सुंगधीत तेल ओतिला ओ याकोअता ओतिला का माआ जुना टाईमोपो तीयारी तीही कोअयी.

¹³ आय तुमामे खोरोज कोत्लू, आखे जगात जीही का ओ सुसमाचार आपलो आवे तीइही आव बोहीही कामाला वर्णन पण ओर कोअलाआ आवे.

यहूदा ईस्कोरियोतीई विश्वासघात

¹⁴ तेहलाम बारा मायरोत एक ज्याआ नाव यहुदा इस्करियोती ओते मुख्य याजका आहाने गोल्यो.

¹⁵ अने तिये कोयु, जर आय येशुहू तुमाआ आथे तोईत आपी ताहा माहु नाहाकोत आपी? ने तिये तियाहा सांदीई तीस सिक्के तोलीत आप्लु.

¹⁶ तेहलाम त्यापोरोत तो तियाहा तोईत आपलो कोअता योग्यवेळ होदहू लाग्यू.

चेलारी फसहोओ आखरी खाणों

¹⁷ फासाडी शिष्य बेखमीर रोटाहा तिवाराआ पाल्या तेदीही कोईली, येशु जागे आविलो फुसुहू लागाडीत, ताहु का बेखमीर भाकर खालो तिवार पालीलाकोता तीयारी कोईली एहलो लागेहे?

¹⁸ तिये कोयु नगरोत तियाअ व्यक्तीई जागे जात तियाहा कोआ गुरु कोयु होय माआ वेल जागे होय माहु माआ शिष्याआरी बेखमीराआ तिवार पडिलो होय.

¹⁹ तेहलाम येशुउ आज्ञेनुसार शिष्यांनी होणाहा तिवारो तीयारी कोअयी.

²⁰ जांहा हांजेपो उवी तेहलाम ते बारा शिष्य येशुआरी रोटूखाहू बोह्ये.

²¹ जांहा ते रोटू खाता ओता तेहलाम तिये कोयु आय खोरोज कोत्लू का तुमा मेहेरोत एक माहु तोईत आपी.

²² योपो ते जास्तीज दुखित ओतगोयु एक-एक जण तियाहा फुसिलो लागाडीत, प्रभू आयताहा नाहा ने?

²³ तिये कोयु तो जीआ माआरी ताटमेहे आथे टाक्यू होय तोज माहु तोईत आपी.

²⁴ माअहा सुआहा ताहा जेहलो त्याविषयी लेखिलो होय तेहलूज ऊवणारोज होय पण तिया धिक्कार होय ज्यावाही माअहा पोऱ्या तोईत आपलो आवे, तियाअ मांहाकोअता हाजो ओते जर तिये जन्मो लेधलो कायना ओतो.

²⁵ तेहलाम तियाहा तोईत आपणारो म्हणजे यहुदाने कोयु रब्बी नाहाकोत आय होय तो? तिये कोयु तू स्वताआ कोत आप्लु.

प्रभु भोज

²⁶ जांहा ते रोटू कोईत ओते येशु भाकर लेदि अने आशीर्वाद मागीत्ल्यो भाकर तोडीत शिष्यांआ आपित कोयु, ल्या अने खा ओ माआ डील होय.

²⁷ फासाडी तिये पिदो लेदो आभार महांआ अने तियाहा आपित कोयु तुमु आखे यामेरोते पिवा.

²⁸ काहाके ओ माआ कराराआ रक्त होय जे माहा कोअता पापाआ माफीकोता ओतिला जानारू होय.

²⁹ पण आय तुमामे कोत्लू का द्राक्षरस ओमोरोत तियाअ दिहेजा पीही नाहा तोपोरोत आय आपाआ बाह्हाआ राज्याम नवो द्राक्षरस पीही नाहा.

³⁰ फासाडी ते गीत गावित जैतुनाआ डोगोपो सोडवीत गोये.

पतरसो इन्कारोओ भविष्यवाणी

³¹ तेहलाम येशु तियाहा कोयु, आज राती आखे तुमु माविषयी अडखळाल, एहेलू शास्त्रलेख होय का आय. मेंढवालो देही अने कडपाम्रोत मेंढे तितर बितर ओतगोयु जानारू.

³² पोन जिवंत उवेताहा आय तुमापेले गालील मेहे जानारू.

³³ यापो पेत्राई कोयु जेबी आखे तापोजेसे अडखळीत जानारू पण आय केधीज अडखळनार नाहीत.

³⁴ येशु तियाहा कोयु आय खोरोज कोत्लू का आजुजे राती कुकडाआ वाहलो पेल तू माहु तीन टायमोआ नाहाकोही.

³⁵ पेत्राई तियाहा कोयु जर माहु ताआरी मोईला पण लागे तेबी आयताआ नकार कोअनारू नाहीत, आखे शिष्यांनी पण एज गोठी कोल्यी.

गतसमनी बगीचा मेहे प्रार्थना

³⁶ तेहलाम येशु त्याआरी गेथशेमाने नावोओ जागापो आवयू अने आपाआ शिष्यांआ कोयु, जोपोरोत आय जीहीजानारो प्रार्थना कोअत्लू तुमु इहीजा बोहीलो.

³⁷ तिये आपाआरी पेत्र अने जब्दिई बेन पोऱ्या लेधलो अने दुखित अने मेहनती ओवुहू लाग्यू.

³⁸ फासाडी तिये तियाहा कोइतलु माआ मोन खिन्न होय आय मोअनारू, एवडोज खिन्न होय इहीजा थोबा अने माआरी जागतू रो.

³⁹ फासाडी तो थोडू आगाडी गोल्यो पाया पोडीत प्रार्थना कोहू लाग्यू, ओ माआ ओबा, जर होतजाई होय ताहा ओ पिदो मापोरोत निहित जाऊ आप तेबी पण माआ नाहा ताआ इच्छा पुरो ओवुहू आप.

⁴⁰ तेहलाम तो शिष्याआरी आवयू अने तियाहा हुवतले पालीत पेत्राहा कोयु नाहाकोत तुमु माआरी थोडूटायम पण जगू सेकेले नाहा?

⁴¹ जागतू रो अने प्रार्थना कोईत रो का तुमु परीक्षेमेहे पोडहू कायना आत्माआ ताहा तीयार होय पण डील दुर्बल होय.

⁴² फासाडी तिये दिहरीवेले जात एह्ली प्रार्थना कोअयी, ओ माआ बाह्हू, जर ओ पिदो पिलाशिवाय टोलोंत जात ने ओयताहा ताआ इच्छा ओवुहू आप.

⁴³ तिये फाशी फासाडी आविलो हुवतले पाल्लये काहाके तियाआ डोआं हुवितो पाअया उवे ओते.

⁴⁴ तो तियाहा फासी सोडीत निहित गोल्यो अने तेज गोठी कोत तिसरीवेले प्रार्थना कोहू लाग्यू.

⁴⁵ फासी फासाडी तो शिष्याआरी आविलो तियाहा कोयु काहा तुमु ओमेजा आराकोईत हुवीत रोल्या होय? पाला वेल आविलो गोयी होय माअहा पोऱ्या पापी मांहाहा आथे तोईत आप्यू जात होय.

⁴⁶ उठा, चाला अने पाला तोईत आपणारो जागे आवयू होय.

येशुहू बंदी बोनावलोओ

⁴⁷ जांहा तोओ कोयु ओतु, ताहा पाला यहुदा बारातून एक ओतु आविलो गोल्यो अने त्याआरी तलवार अने डेगाऱ्या लेद्लो एक वोडू टोळां ओतु ज्याहा मुख्य याजक अने बाह्हू इये मोक्ल्यीत ओते.

⁴⁸ तोईत आप्नारावाही तियाहा ए निशाणी आप्यी ओती, ज्याचा आय चुंबन कोअनारू तोज रोही तियाहा तोईत लेअलो.

⁴⁹ तो लागेज येशुआरी आविलो बोलतुल्यो ओ स्वामी नमस्कार अने तियाआ चुंबन लेधलो.

⁵⁰ येशु तियाहा कोयु दोस्ता ज्या कामा कोअता तू आवयू होय तियाहा को, तेहलाम तिये येशुउ जागे आविलो तियाहा तोईत लेधलो.

⁵¹ अने फासाडी पाला येशुउ होगात्याम्रोत एकाने आथे वाढवून तलवार खेचेहे अने महायाजाकाच्या नोकरापो तिया कान वाडी टाक्यू.

⁵² ताहरू तेहलाम येशु तियाहा कोयु आपाआ तलवार म्यानोमे मेका काहाके ते आखे जे तलवार ईविशीत ते तलवारीवाही नाश ओये.

⁵³ किंवा नाहाकोत तुमु विचार कोअता नाहाकोत का आय आपाआ बाह्हाहा विनंती कोहू शकत नाहा अने तो लागेज स्वर्गदूतो बारा सैन्याचा दलोमरोत सैन्यदल माआ अधीकारोम कोईत आपी.

⁵⁴ पण तेहलाम पवित्रशास्त्र केहलु पुरो उवे का ऐहलेच उविलो जरुरी होय?

⁵⁵ तेहलाम येशु गोर्दी कोयु नाहाकोत तुमु तलवार अने डेगाऱ्या घेऊन माहु तोहू आवीत होय जेहलो नाहाकोत आय कोडु डाकू होय? आय दाडीअ मंदिरोम बोहित हिकाडतो ओतू, अने तुमु माहु तोअल्यो नाहा?

⁵⁶ पण ओ आखे याकोअता उवे का संदेष्टाआ वचन पुरो उवे तेहलाम आखे शिष्य तियाहा सोडीत निहित गोये.

केय्फा सामने येशु

⁵⁷ जिंये येशुहू तोअल्यो ओते ते तियाहा कैफा महायाजका आगाडी घेऊन गोये, तीही शास्त्री अने बाह्हू एकठे ओते.

⁵⁸ पेत्र पण थोडू सेटेरोत तियाआ फासाडी महायाजाकाच्या खोलीहीजा पुगीतगोयू, अने तीही माय नाहाकोत ओते ते पालाहू पहारे कऱ्याआरी बोहित गोल्यो.

⁵⁹ मुख्य याजक अने आखे न्यायसभा येशुउ विरूद्धाम झुटी साक्ष मीडवीहे प्रयत्न कोईत रोल्या याकोअता ते तियाहा माईत टाकही.

⁶⁰ साहा अने वारुज खोटो साक्षीदार आव्ये ओतो तेबी तो तियाहा मिल्यू नाहा तेबी आखरी बेन आविलो कोयु का,

⁶¹ साहा आव महुहू कोयु होय, आय परमेश्वरोओ मंदिराहा पोडीत तियाहा तीन दिहोम फासी बोनाडीत शकतो.

⁶² साहा तेहलाम महायाजाकावाही उभे रोत तियाहा कोयु, काहा तू उत्तर आपित कायनाहा, ओ मांहे ताआ बद्दल नाहाकोत साक्ष आपत्ले?

⁶³ साहा पण येशु ठावकू रोला योपो महायाजाकावाही तियाहा कोयु, आय जिवंत देवाची शपथ आपोहो. जर तू परमेश्वरोओ पुत्र ख्रिस्त होय ताहा आमाहा कोत आप.

⁶⁴ येशु तियाहा कोयु, तू स्वतः एहलो कोयु तेबी पण आय ताहु कोत्लू का या आगाडी तुमु माअहा पोऱ्याहा आखे सर्वशक्तीमानाच्या हुदिवोल बोहीतरोल्यु अने वादलामे आवातल्या पालीलो.

⁶⁵ यापो महायाजक आपाआ कापडे काढीत कोहू लाग्यू का, इये परमेश्वरोओ निंदा कोअयी होय, ओमे फासी आमाहा साक्षीदाराआ नाहाकोत गोरोज होय? पाला तुमु निंदा कोअयु होय.

⁶⁶ ओमे तुमाआ नाहाकोत विचार होय? तिये उत्तर आप्लु तो मोईतगोल्यू शिक्षाआ योग्य होय.

⁶⁷ तेहलाम तिये तियाआ सोबाडीपो थूप्ये, कोडु तियाहा मुठीवाही माअये, कोडु तियाहा चपडाक माईत कोयु,

⁶⁸ ऐ, ख्रिस्ता, भविष्यवाणी कोईत आमाहा कोअलो का ताहु कोडु माअये.

पतरसो द्वारा येशुहू नाकारलोओ

⁶⁹ पेत्र खोलीम बारथे बोहयु ओतु एवडाम होमला दासीने आविलो तियाहा कोयु, तू पण गालीली येशुआरी ओतु.

⁷⁰ पण तीही नाकारीत तियाअ आखे आगाडी तिये कोयु, माहु समाजैल नाहा का तू नाहाकोत कोयु होय.

⁷¹ तोयो तो बारथे जात आगी कोआता गोल्यो तेहलाम होमला बाईने तियाहा पालीत तीइही ओते तियाहा कोयु, ओ माहुहू पण नासरेथ येशुआरी ओतु.

⁷² तेहलाम तिये शपथ खात नकार आपित फासी कोयु, आय आव माहुंहु उलखित्लू नाहा.

⁷³ फासाडी टाईमोम जे तीही उभे ओते ते पेत्रांआरी आविलो तियाहा कोयु, खरोज तू पण त्यामेरोत होय काहाके, ताआ बुली ताहु प्रकट कोअते.

⁷⁴ तेहलाम शपथ खात धिक्कार कोअला लाग्यू, आय तियाअ माहुंहु उलखित्लू नाहा अने एतांम कुकडू वाहयू,

⁷⁵ तेहलाम पेत्राहा जी गोठी येशु कोल्यी ओती ती ओर आवयी का, कुकडू वाहलो आगाडी तू माहु तीन कावाआ नाकारिही, अने तो बारथे जात वोडू जोरेज रोडा लाग्यू.