मत्ती 25 - नोयरी नोवलू नियम

वरोओ वाट जुवत्ली दस कुवारीई दृष्टांत

¹ ताहा होर्गाराज ती दोह कुवारीई होस होय ज्या आपाआ दिवु लेत वरोहो भेट कोअहु कोअता निकल्या.

² तीयाम पाच मूर्ख अने पाच हुशार ओत्या.

³ काहाके मूर्ख कुवारिनी दिव लेदो तेहलाम तिये आपाआरी तेल लेधलो नाहा

⁴ पण ज्या हुशार कोयु तिये आपाआ दिव्याआरी कुड्याम तेल पण लेधलो.

⁵ जांहा वरोओ आविलो वाअ ओवयू ओतु तेहलाम ते आखे हुवीत गोये.

⁶ पण आर्दी राती आवाज आवयु का पाला वर आवीत होय तियाहा मिलनेकोता साला.

⁷ तेहलाम तियाअ आखे कुवारी आविलो बोहोल्या अने आप आपाआ दिवे व्यवस्थित कोहू लाग्या.

⁸ अने मूर्ख कोयु तियाअ हुशार कोयु तियाहा कोतल्या आमाहाबी तुमाआ तेलोमेऱ्या थोडूज दया काहाके आमाहा दिवे ओमे उलवीत जानारू होय.

⁹ पण हुशार कोयु तिये उत्तर आप्लु नाहा ओ तुमा कोअता अने आमा कोअता उरीलो नाहाहोज उवे का तुमु दुकानदारापो जात तेल वेसातो लाविलो.

¹⁰ जांहा ते वेसातो लेई निहित गोये तेहलाम वर आविलो गोल्यो अने ज्या तीयारिमे कोयु तियाअ त्याआरी वेहवालोम निहित गोयी तेहलाम दरवाजू बंद कोईत आप्यू.

¹¹ वरोहो ते मूर्ख कुवारी आविलो कोहू लाग्या मालिक, आमाआ कोअता बी दरवाजू उगाडीत आप.

¹² पण तिये उत्तर आप्लु आय तुमाहा खोरोज कोत्लू आय तुमाहा ओलखीतू नाहा.

¹³ त्यापोत जागतू रो काहाके तुमामे तो दीही अने तो समय पण मालुम नाहा.

तीन दासो दृष्टांत

¹⁴ फासाडी ओ तिया मांहाहोस होय जो प्रवासाम जानारू ओतु अने जीआ आपाआ नोकराहा हादीत आपाआ धनदौलत होफहोपिन आप्यी.

¹⁵ तिये एकाहा पाच तोडा, दिहीराहा बेन तोडा अने तिसराहा एक तोडू म्हणजे प्रत्येकाआ सामर्थ आप्लु अने प्रवासाम निहित गोल्यो.

¹⁶ ज्याहा पाच तोडा आप्लु तिये लागेज जात व्यापार कोअयु अने तीयावाही पाच तोडा फासी जुळाविते.

¹⁷ ह्याप्रमाणे ज्याहा बेन तोडा आप्लु ओते तिये पण ऐहलेच बेन तोडा फासी कोमाविले.

¹⁸ पण ज्याहा एक तोडू जोडयेहे ओते तिये जात जमीन खोदिली अने आपाआ मालक्योहो आपलू पोशाआ तीयाम निकाडीत मेकलू.

¹⁹ जाखो दिहीआ फासाडी तिया पावरोओ मालक आवयू अने तियाआ हिशोब लेई लाग्यू.

²⁰ तेहलाम ज्याहा पाच तोडा जोडयेहे ओते तिये फासी पाच तोडा लेतआवीत आप्लु अने कोयु, मालिक, तू माहु पाच तोडा आप्लु ओते, देखू तीयावाही आय फासी पाच तोडा कामावोह्यो,

²¹ तियाआ मालक्योहो कोयु, शाब्बास, माआ हाजा, विश्वासु पावोरआ, तू जराक गोठीपो विश्वासयोग्य रोला, आय ताहु खूप वस्तुपो अधिकारी बोनवीही आपाआ मालकाहा आनंदाम सहभागी होय.

²² फासाडी ज्याहा बेन तोडा जोडयेहे ओते तो पावर आविलो कोयु, मालिक, तू माहु बेन तोडा आप्लु ओते, देखू आय तियापो फासी बेन तोडा कोमाविले.

²³ मालिक तियाहा कोयु, शाब्बास, हाजा अने विश्वासाजोगो पावोरआ, तू जराक गोठीपो विश्वासयोग्य रोला, आय ताहु खूप वस्तूंऊ अधिकारी बोडाविही आपाआ मालक्योओ आनंदाम सहभागी होय.

²⁴ फासाडी ज्याहा एक पोशाआ मिल्यू ओतु तो आपाआ मालकोहू आविलो कोयु, ओ मालिक, माहु मालुम ओते का, तू कडक माहुहू होय, जीही पेईलो कोईत नाहा तीही वाडीलो कोअता. अने जीही फैलीत नाहा तीइही एखटो कोअता

²⁵ आखरी आय बित गोल्यू अने ताआ रुपयाला आय जमीनोम निकाडीत आप्लु, पाला, जे ताआ होय ते घेऊन ले.

²⁶ पण तियाआ मालक्योहो उत्तर आप्लु, ऐ दुष्ट अने आळशी पावोरआ, ताहु ओ मालूमे ओते का जीही आय पेईलो कोईत नाहा तीइही आय वाडतुलू अने जीही फैलावीत मेक्ल्ये नाहा तिहीरोत एखटो कोअत्लू.

²⁷ ताहा फासाडी माआ धन माहु सावकारापो मेकुहू जोवे ओते, म्हणजे आय आवेताहा माहु व्याजासकट फासी जोडयेहे ओते.

²⁸ ताहा यापोरोत ते एक तोडू ल्या अने ज्याआपो दहा तोडा होय तियाहा आपित दया.

²⁹ काहाके ज्याआपो होय तियाहा फाशी आपलो आवे अने तियाआ जागे जास्तीज ओतगोयु जाइअलो पण ज्याआ जागे नाहा तियाआ त्यापोरोत ते पण लेधलो जाइअलो जे तिया जागे होय.

³⁰ आवा बिनकामो नोकराहा बारथे आंदाराम टाकीत दयाजिहि रोडलो अने दात साविलो होय.

येशु संसारोओ न्याय कोऐ

³¹ पण माअहा पोऱ्या आपाआ गौरवात आविलो अने आखे स्वर्गदूत पण तियाआ आरी आविलो तेहलाम तो आपाआ महिमामय राजासनापो बोहोनारो.

³² अने आखे जाती तियाआ आगाडी एकठे कोअलाआ आवे अने तो तियाहा एक दिहरा त्यापोरोत जुदो कोआ जेहलो मेंढवालो बोकडाहा मेंढरापोरोत जुदो कोअत्लू.

³³ तो मेंढराना आपाआ हाजावोगे अने बकऱ्यांआ डावासाईटोहो कोअही.

³⁴ तेहलाम राजा आपाआ हाजला आथो वोगऱ्याहा कोय, ओ माआ बाह्हू धन्य माहुमे, आव, तियाअ राज्याआ अधिकारी बन्यो जो जुगाआ पेलेरोत तुमा कोअता बनविल्यो होय.

³⁵ काहाके आय बुख्यो ओतू अने तुमु माहु खाहुं आप्लु आय तीह ओतू अने तुमु माहु पाई पिवाल्यो आय बिहरादेशोआ ओतू अने तुमु माहु कोअमे राख्यो.

³⁶ आय उघडा ओतू तुमु माहु कापडे पेआडे आप्लु आय मांदवाड्यू ओतू तेहलाम माआ सेवा कोअयी आय बंदिकोअमे ओतू तेहलाम तुमु माहु मिलीला आव्ये.

³⁷ तेहलाम धोर्मी तियाहा उत्तर आपी, प्रभू आमाहा ताहु कोयो बुख्यो पालल्ये अने रोटू आप्लु? किंवा तोर्ह्यु पाल्यू अने पाई पिवाल्यो अने.

³⁸ आमू ताहु कोयो बिहरादेशोआ पाल्लये अने कोअमे मेकल्ये? किंवा उघडा पाल्यू अने कापडे काटाआ.

³⁹ आमू कोयो ताहु मांदवाड्यू किंवा बंदिकोअमे पाल्लये अने मिलीला आव्ये.

⁴⁰ यापो राजा तियाहा उत्तर आपी, आय तुमामे खोरोज कोत्लू काजे किबी तुमु माआ आव हाणाम हानू पाहीमोरोत एकाआरी कोल्यु ते माआरी कोल्यु होय.

⁴¹ तेहलाम तो बांगडू बाजूवाला कोअही ओ शापित माहुमे मापोरोत सेटे ओतगोयु तियाअ अनंत आगीम जात गुगदा जे शैतान अने तियाआ दूतांसाठी तीयार कोल्यु होय.

⁴² आय बुख्यो ओतू तेहलाम तुमु माहु किबी खाहुं आप्लु नाहा आय तीह ओतू तेहलाम माहु पाई पिहीलेपोत आप्लु नाहा.

⁴³ दिहरादेशोआ ओतू तेहलाम तुमु माहु आपाआ कोअमे मेकल्ये नाहा उघडा ओतू तुमु माहु कापडे कालीला आप्लु नाहा मांदवाड्यू ओतू अने बंदिकोअमे ओतू तेहलाम तुमु माहु मिलीला आव्ये नाहा

⁴⁴ आव उपो ते तियाहा फुसनारू प्रभू आमाहा कोयो ताहु बुखो, तोर्ह्यु, उघडा किंवा मांदवाड्यू किंवा बंदिलखानो पाल्यू ओतु अने ताआ सेवासाकरी कोअयी नाहा.

⁴⁵ तेहलाम तो तियाहा उत्तर आपी आय तुमामे खोरोज कोत्लू का जो तुमु याआ हाणाम हानू मायरोत एकाआरी कोल्यु नाहा ते माआरी कोल्यु नाहा,

⁴⁶ ओ मांहे अनंत कालिक दंड भोगणार पण धोर्मी अनंत जीवनामे प्रवेश कोअनारू.