मत्ती 24 - नोयरी नोवलू नियम

येशुउ द्वारा मंदिरों विनाशोओ भविष्यवाणी

¹ जाहा येशु मंदिर मेहेरोत निहित जातु ओतु ते तियाआ चेले तियाहा मंदिरो रोचना देखा डूहु कोअता तियाआ जागे आवया.

² तिये तियाहा कोयु, तुमु ओ आखे पालीत होय ने आय तुमामे खोरो कोत्लू, ईहि दोणोपो डोणो सुधा उरिलो नाहा तो गाधल्या जानारू नाहा.

येशुउ ईजी वापस आवलो चिन्हों

³ जांहा तो जैतुनाआ डोगोपो बोहयु ओतु, तेहलाम शिष्य एखालाम तियाआ जागे आविलो गोग्या, आमाहा कोअलो का याआ गोठी कांहा उवे? ताआ आवीला अने जगोआ अंताचे कोठले चिन्ह होय?

⁴ येशु तियाहा उत्तर आप्लु, सावध रो कोडु तुमामे न ठोगीत गोयो,

⁵ काहाके जाअखो एहलो होय जो माआ नावामेहे आवीत कोअही, आय ख्रिस्त होय अने भरपुराना ठोग्यो.

⁶ तुमु युद्ध अने युद्धाची चर्चा होमले, ताहा घाबरील्यो जाहू नाहा काहाके याहा उवे होयुच, परंतु तियाअ वेले आखिर उवे नाहा.

⁷ काहाके जाती उपो जाती अने राज्य उपो राज्य उठी, अने जागू जाग्तली दुष्काळ पोडी, अने भूकंप उवे.

⁸ ए आखे गोठी पिठीनचा आरंभ उवे.

⁹ ताहा तुमामे त्रस आपलो कोअता तुमामे तोईत आपे, अने तुमामे माईत टाकही, अने माआ नावोओ काहाके लेतजा आखे जाती तियाआ मांहे तुमाआ द्वेष कोआ.

¹⁰ ताहा जाअखो जोओ ठोकर खाय, अने एक दिहीराहा तोईत आपे, अने एक दिहराहा द्वेष कोआ.

¹¹ जाअखो खोटो भविष्यवक्ता उठित उभे रोय अने ठोगीते.

¹² अधर्म वाढल्या मुळे जाअखो जणोपो प्रीती हेलाड्यो.

¹³ परंतु जो आखिर पर्यंत धीर तोईत मेकीही तिया उद्धार उवे.

¹⁴ अने राज्याआ ओ सुसमाचार आखा जगात प्रचार कोअयु जाय का आखे जातिई कोईता साक्ष उवे तेहलाम आखिर आवे.

महासंकोटोओ सुरवात

¹⁵ याकोअता जांहा तुमु तियाअ अशुद्ध घृणित वस्तूअ तियाआ चर्चा दानीएल भविष्यवक्ताच्या उवी ओती, पवित्र स्थानात उबु रोतगोल्यु पाला (जो वाचन कोअही तो होमजीत्ले),

¹⁶ तेहलाम जो यहुदियाम होय ते डोगोपो नाहीत जा.

¹⁷ जे कोअलापो होय तो आपाआ कोअमे रोत एकहरको लेला उतरीणारु नाहा.

¹⁸ अने जो खेतुम होय तो, आपाआ कापडे लेई मागित नाहा जानारू.

¹⁹ तिया दिहोम जी गर्भवती अने दुध पिवडणारी होय, तियाआ कोअता धिक्कार.

²⁰ प्रार्थना कोईत रो काहाके तुमामे हियालामे पोन शब्बाथाआ तेदीही दौवंदेहे लागे नाहा.

²¹ काहाके तिया समयी एहेलू पाअया त्रस उवे, जेहलो जुगाआ आरंभा पासून ओवयू नाहा.

²² अने तेदीही कोम कोल्यु कायना ओतो ताहा कोडु प्राणी नि वास्तु पोन निवाडल्या च्या कारनोवाही ओ दीही कोम कोल्यु जाय.

²³ तिया वेले कोडु तुमामे कोअही, पाला मसीहा इंही होय पेल्योओ तीही होय ताहा विश्वास कोहू नाहा.

²⁴ काहाके मसीहा अने खोटो भविष्यवक्ता उठित उभे रोय, वोडो चिंन्ह अने अदभुत कृत्य देखाडीते उवेताहा निवाडीत मेकल्या पण भटकाडे.

²⁵ पाला, आय पाल्या पोरोत ओ आखे किबी कोईत आप्लु होय.

²⁶ याआ याकोअता ते तुमामे कोय पाला तो जंगलूम होय ताहा बारथे निहित जायलो नाहा; पाला तो मायत्या खोलीम होय; ताहा देखू विश्वास कोअला नाहा.

²⁷ काहाके विग पूर्वे पोरोत पश्चीमे जागे जीही सोमकीत ओते, तेह्लुज माअहा पोऱ्याआ पण आविला उवे.

²⁸ जीही प्रेत होय गिधाडे जमा होय.

मांहो सुआआ इजी आवलोओ

²⁹ तियाअ दिहोम क्लेशा फासाडी दिह अंधाराहोस उवे, चंद्र प्रकाश आपी नाहा अने तारे जुगोमोरत पोडे, अने जुगोमेरयो शक्ती डगमगली जाय

³⁰ तेहलाम मांहाहा पोऱ्याआ चिन्ह जुगोम देखाईलो, अने तेहलाम धोरती उपो आखे जातीही मांहे छाती ठीकीते; अने माअहा पोऱ्याहा वोडा सामर्थ्याआ अने वैभवाणे जुगोमेरयो ढगावरून आवातल्या पालिलो

³¹ ते तुरही महानादाबाआरी आपाआ स्वर्गदूतो मुकलिही, अने आकाशामें आव तीवोगरोत तियाअ टोका पर्यंत चारू दिश्या पोरोत तियाआ निवाडीत मेकल्या एकठे कोआ.

अंजीरो साड़ोसी सिक्षा

³² अंजिराआ साडोपोरोत ओ उदाहरण हिकिलो जांहा तियाआ डाली कोमल होतगोयो जाहो अने पाने गळू लागत्ले, तेहलाम तुमु होमजीत लत्ले का उनालू जागे आवयू होय

³³ आव प्रमाणोओ जांहा तुमु आखे गोष्टी देखे ताहा होमजीत ल्या का तो जागे म्हणजे बाअणारी होय.

³⁴ आय तुमामे खोरो कोत्लू का जो पर्यंत आव आखे गोठी पुरो उवनारा नाहा, तो पर्यंत आव पिढीही आखिर उवे नाहा.

³⁵ जुग अने धोरती टोलीते जाय पण माआ वचने केधीज टोलणार नाहा.

जागते रोवा

³⁶ तिया तेदीही अने तियाअ घटकाआ विषयामे कोडोबी मालुम नाहा, न होर्गा दूतो न पोऱ्याहा फक्त बाह्हाहा.

³⁷ जेहलो नोहाचे दीही ओते, तेहलूज माअहा पोऱ्याआ आविला उवे.

³⁸ काहाके जेहलो पाई प्रल्याआ पूर्वीच्या दिहोम, ज्या दिहे पर्यंत नूह जहाज पोओ नाहा सोड्यू तांहू जाआ मांहे खायलो पीत ओते, अने तीयाम वेहवाल उवनारा ओते.

³⁹ अने जो पर्यंत पाई प्रलय आवीत तियाअ आखाहा वोहीत लेत नाहा गोल्यो तो पर्यंत तियाहा किबी मालुम पोडये नाहा; तेहलूज माअहा पोऱ्याआ आविला उवे

⁴⁰ तियाअ टायमोमें बेन जोओ खेतुम होय, एक लेदो जाइअलो.

⁴¹ बेन बोई कोअटीपोओ होय, एक लेदिओलो जाय अने दिहरी सोडीत आप्या जाय.

⁴² याकोअता जागतू रो, काहाके तुमामे मालुम नाहा, का तुमाआ प्रभू कोडला तेदीही आवे.

⁴³ परंतु ओ जाईत ल्या का केधी को मालक्येहो मालुम ओते का बांड कोडला पहर आवेताहा को मालक जागू रोला ओतलू, अने आपाआ को फोडू आप्लु कायना ओतो.

⁴⁴ याकोअता तुमुभी तीयारिमे रो, काहाके ज्या वेले विषयामे तुमु विचार पण कोअयु ने ओय, एहलो वेळेला माअहा पोऱ्या आवीत जाय.

विश्वासयोग्य सेवक अने दुष्ट सेवक

⁴⁵ तियाअ वेले विश्वासयोग्य अने बुद्धिमान दास कोडू होय, ज्याहा स्वामींनी आपाआ पावर चाकारापो नेमिलो का टायमोपो तियाहा रोटू आपे?

⁴⁶ धन्य होय ते दास, ज्याहा आपाआ स्वामींनी ऐहलेच अतांवाही पालीलो.

⁴⁷ आय तुमामे खोरो कोत्लू तो आपाआ धन उपो अधिकार आपे.

⁴⁸ परंतु तो खराब दास विचार कोअला लागे का माआ स्वामीला आविलो वेल होय,

⁴⁹ अने आपाआ होबतीई दासाहा मरेलो लागे अने झिंगलेल्या आरी खाहू पियलो लागे.

⁵⁰ ताहा तियाअ पावरोओ स्वामी एहलो वेले आवे तियाहा मालुम नाहा,

⁵¹ तेहलाम तो तियाहा हाजा शिक्षाम आपे अने तियाहा कपटीया आरी मोजीलो कोअही तीही रोडीलो अने दात खायलो होय.