मत्ती 23 - नोयरी नोवलू नियम

शास्त्री अने फरीसीई आलोचना

¹ ताहा येशु गोर्दिह अने तियाआ चेलाहा कोयो

² शास्त्री परुसी स्वतः मुसाहा गादिपो बोहित गोये होय.

³ त्यापोत जे किबी ते तुमामे कोअही अने ते तुमु कोईओलो अने कोत्लू पण त्याहाहोचे काम कोईओलो नाहा काहाके ते कोतले पण कोईत नाहा.

⁴ ते एक जास्तीज पाराहा ज्याहा वीसीलो कोठीण होय बांदीत तियाहा मांहाहा खानदापो मेकत्ले होय पोन तुमु तियाहा आपाआ आगाडी वाही होरकावुहू ने होदत्ले.

⁵ ते आपाआ आखे काम मांह्हू देखाडल्याकोता कोअता अने ते आपाआ मंत्र पत्रे हानू कोअता अने आपाआ कापड़ा झालर लांबी कोअता.

⁶ अने खाअलाआ जागापो मान योग्य ठिकाण अने मंदिरोम रोतेहे

⁷ अने बाजारामे सन्मान मिलविलो अने मांहुपोरोत गुरु कोईत लेअलो तियाहा प्रिय लागेहे.

⁸ पण तुमु गुरुजी कोडु नाहा काहाके तुमाआ एकाच गुरु होय अने तुमु आखे पाही होय.

⁹ धोरतीपो कोडाआ आपाआ बाह्हू कोहू नाहा काहाके तुमाआ एकुच बाह्हू होय तो होर्गाम होय.

¹⁰ तुमु गुरुजी कोडु नाहा काहाके तुमाआ एकुच गुरु होय म्हणजे ख्रिस्त.

¹¹ पण जो तुमाआ आखाम वोडू होय तो तुमाआ सेवक उवे.

¹² जो कोडु माह वोडू बोडाविही तो निसे कोअयु जाइअलो अने जो माह निसे कोअही तो वोडू कोअयु जाइअलो.

¹³ ओ झुटो, शास्त्री अने परुश्यांही तुमाआ धिक्कार होय काहाके तुमु मांहाकोअता होर्ग्याआ राज्याआ दरवाजू बंद कोईत आपलो तुमु स्वतः प्रवेश कोईत नाहा अने प्रवेश कोअनाराहा पण विसमे जाऊ आपित नाहा.

¹⁴ ऐ शास्त्री अने परुषि ऐ ढोंगी तुमा धिक्कार होय काहाके तुमु विदवा कोअ खात्जतले अने धोंगामेहे वोडी-वोडी प्रार्थना कोअतले तुमाहा जाखो दौड़जोड़े.

¹⁵ ओ खोटो शास्त्री अने परुश्यांही तुमाआ धिक्कार होय तुमु होमला माहुंहु लाविलोकोता अने धरतीपो फिरीवलो अने जांहा तो आविलो जात्लू तेहलाम खुदोप रोत दुप्पट नरकाआ पोऱ्या बोणाडीत आपत्ले.

¹⁶ ओ आन्दला वाट देखाडणारा तुमाआ धिक्कार होय जे कोतले जर कोडु मंदिराआ शपत लेदि ताहा ते किबी नाहा पण जर मंदिराआ बेनाआ शपथ लेदि ताहा तो तिया कर्जदार ओतगोयु जानारू.

¹⁷ ओ गांडाहोस अने अंधळ्यानो नाहाकोत महत्वाओ होय सोनो किंवा ते मंदिर जे सोन्याला पवित्र कोअत्लू?

¹⁸ फासाडी कोयु जर कोडु वेदी शपथ लेही ताहा ते किबी नाहा पण जे यापो चढविले भेट ची शपथ लेही ताहा तो कर्जदार ओतगोयु जानारू.

¹⁹ ओ आढला कि महत्वाओ होय भेट किंवा ती वेदी जी मिलुहूं पवित्र कोअत्लू?

²⁰ त्यापोत जो शपथ खाहे तो ती वेदी अने तीपो सोडविल्यी शपथ बेनुपोरोत शपथ खाहे.

²¹ जो मंदिराआ शपथ खाहे तो तियाअ मंदिरोम रोणाआरा परमेश्वरोओ पण शपथ खाहे

²² अने जो स्वर्गाची शपथ खाहे तो परमेश्वरोओ सिहांसनाची अने तियापो बोहोल्यो बेन जोआआ शपथ खाहे.

²³ ओ खोटो शास्त्री अने परुसी तुमाआ धिक्कार होय तुमु पक्षना वोराली अने जिरे या दहावू भाग आपत्ले पण नियम शास्रामे महत्वाची गोठी म्हणजे न्याय, दया अने विश्वासाआ तुमु उल्लघन कोअता पण जोवे ओते का याआ गोठी कोअताजात दिहरी गोठी पण सुडुहू नाहा कोयु.

²⁴ ओ आन्दला, वाट देखाडनारा, तुमु सासड्याहा माईत टाकतले पण उटडाहा गीइत टाकतले.

²⁵ ओ खोटो, शास्त्री अने परुसी तुमाआ धिक्कार होय तुमु ताठ अने वाटीत आव्यु बारथेरोत साफ कोअता पण मायरोत ते आखे एह्लाम लुतेवांहि असयामांनी पोअल्ये होय.

²⁶ ओ आन्दला परुसी पालील्यो ताठ अने वाटीत आव्यु मायरोत गाह ज्यायाकोलो ते बारथेरोत पण साफ ओतगोयु जानारू.

²⁷ ओ खोटो शास्त्री अने फरीसी तुमाआ धिक्कार होय तुमु सुनो लागल्यो कब्रेहोस जे बारथेरोत हाजी देखात्ले पण विसमे मोलेतीयाहा आदोवांही अने आखे एह्लाम मलिनता पोअल्ये होय,

²⁸ त्याप्रमाणे तुमु पण मांह्हू धोर्मी देखात्ले पण विसमे खोटो अने अधर्माआ पोअल्ये होय.

²⁹ ओ खोटो शास्त्री अने परुसी तुमाआ धिक्कार होय संदेष्टाआ कबरे उपो बोनडत्ले अने धर्मिकेच्या ओर कोईला थडगे होवाडत्ले.

³⁰ अने कोत्ले जर आमाहा आपाआ पूर्वजाआ टाईमोम रोल्या ओते ताहा संदेष्टाआ खुनाहा सहभागी रोल्या कायना ओतो.

³¹ यापोरोत तुमु स्वतः विरूध साक्षी आपत्ले का संदेष्टाआ घात कोईल्योज पोऱ्ये होय.

³² कोईत तुमु आपाआ पूर्वजाआ पापाहा कर्ज पोईत दया.

³³ ओ हापाहा पिलाआ, तुमु नरकाआ दंड सी केहकोईत वासाहा?

³⁴ त्यापोत पाला आय तुमा कोअता संदेष्टाहा ज्ञानवानाआ अने शास्त्रीही मोकलित रोयोजे होय तुमु त्यामेरोत कोताज घात कोअनारू अने कोअता जो क्रूस चढविणारो फासाडी कोअता जो आपाआ मंदिरोम का देही अने शहरा गावामेहे सोनावाही कोईत फिरीही?

³⁵ का जांहा धर्मिकाआ रक्त धोरतीपो वोहाड्यू होय तो तुमाआ मुंडकापो पोडे म्हणजे धोर्मी हाबेलापोरोत बर्खेए पोऱ्या जखऱ्या पर्यंत ज्याहा तुमु अने मंदिरोम अने वेदीहीजा माईत टाक्यो ओते.

³⁶ आय तुमामे खोरोज कोत्लू आव आखे गोठी आव पिढीई मुंडकापो पोडी.

येशुउ यरूशलेम पोओ विलाप

³⁷ ओ यरुशलेमाआ, ओ यरुशलेमाआ, तू संदेष्टाहा माईत टाकतोलो अने जो ता कोअता मोकलीलामेहे आवयू होय तियापो डोणो जुगारीलो कोअता आय केते टायमोआ इच्छा कोअयी का जीही कुकडी आपाआ पिलांहा एकठे कोअते तेहलूज आय पण ताआ पोऱ्याहा एकठे कोहू पण ताआ इच्छा नाहाओती.

³⁸ पाला, ताआ कोता कोअता उजाड सोडये जाहो.

³⁹ काहाके आय तुमामे कोत्लू का ओमोरोत तुमु माहु तोपोरोत पालीलो नाहा जोपोरोत तुमु ओ कोअही नाहा, धन्य होय तो जो प्रभूउ नावामेहे आवीत होय.