मत्ती 22 - नोयरी नोवलू नियम

वेहवालो जेवनोओ दृष्टांत

¹ येशु फाशु तियाहा दृष्टांतमेहे कोहू लाग्यु

² स्वर्गाचे राज्य तिया राजा होस होय, जोओ तिया सुआआ वेहवाल कोल्यु.

³ अने राजा आपाआ दासाहा मोकल्ये का निमंत्रीत माहुंहु वेहवाल खाअलाकाजे हादाडा, परंतु ते आवीत निमिले.

⁴ फासाडी तिये पावरोहो ओ कोत मोकल्ये, निमंत्रीत माहुंहु कोआ पाला आय रोटू तीयार कोल्यु होय, माआ बैल अने पालीलो जनावरे माअये गोये होय, अने आखोज तीयार होय; वेहवाल खाअलाकाजे आव.

⁵ परंतु ते मनापो न घेता निहित गोये कोडु आपाआ खेतुम, कोडु आपाआ व्यापाऱ्याहा.

⁶ दिहरा माहुंमे जे उरलो ओते तियाआ पावरोहो तोईत तियाहा अनादर कोल्यु अने माईत टाक्ये.

⁷ तेहलाम राजाहा खोत आवयू, अने तिये आपाआ सेना मोकलित हत्याररोहो माईत टाक्ये, अने तियाआ नगराहा पेटाडीत टाक्ये.

⁸ तोये तो तियाआ पावरोहो कोयु, वेहेवला रोटू तीयार होय परंतु निमंत्रीत मांहे योग्य नाहा ठरव्येहे.

⁹ याआ याकोअता चवाठ्या उपो जा अने जेवडे मांहे तुमामे जोडीत, तेताहाज वेहवाल खाअलाकाजे हादीत लावा.

¹⁰ फासाडी तियाअ पावरोवही सडकावर जात कोडू हाजो, कोडू वाईट, आपारी जोडयेहे, आखाहा एकठे कोल्यु; अने वेहेवला को पावूना पोईत गोये.

¹¹ फासाडी राजा पावणांहा पाल्यू विसमे आवयू, तेहलाम तिये होमला मांहाहा पालील्यो जो वेहेवला कापडे नि पेअयु ओतु.

¹² राजा तियाहा फ़ुस्ल्याआ ओ दोस्ता तू वेहवालो कापडे न पोवल्यो इंही काहा आवयू? तियाआ सोब बंद होतगोयो.

¹³ तेहलाम राजा लेतजा सेवकांआ कोयु, याआ आथे गुडू बांधीत तियाहा बारथे आंदाराम टाकीत आपा, तीइही रोडीलो अने दात खायलो ओते.

¹⁴ काहाके हादल्ये जाअखो होय परंतु निवड्येहे थोडेज होय.

कैसरोहो फालू आपलो ओ

¹⁵ तेहलाम परुश्यांहि जात आपसामेहे विचार कोअयु तियाहा कोडला प्रकारे गोठीमे ढोगुहू.

¹⁶ फासाडी तिये आपाआ शिष्याआ हेरोदाहा आरी तियाआ जागे ओ कोहू मोक्ल्यीत ओ गुरु, आमाहा जानिलो होये का तू खोरो होय, अने परमेश्वरोओ मार्ग खोरो हिकाडत्लू, अने कोडाआज फिकीर की, काहाके तू मांहाआ सोब पालीत गोठी नाहाकोईत.

¹⁷ याकोअता तू आमाहा कोअलो तू कि विचार कोईत होय? कैसराहा कर आपलो हाजो होय का नाहा.

¹⁸ येशु तियाआ दुष्टता होमजीत कोयु, ऐ कपटी, माहु काहा पारखिता?

¹⁹ कराराआ हिकिलो माहु देखाव तेहलाम ते तियाआ जागे एक पोशाआ लेत आव्ये.

²⁰ तिये तियाहा फुसिअलो, ओ छापे अने नाव कोडाआ होय?

²¹ तिये तियाहा कोयु, कैसराचा तेहलाम तिये तियाहा कोयु, जे कैसराआ होय ते कैसराहा आप; अने जे परमेश्वरोओ होय, ते परमेश्वरोओ आप.

²² ते होम्लाडित ते थक उवे, अने तियाहा सोडीत निहित गोये.

पुनरुस्थान अने वेहवाल

²³ तियाअ तेदीही सदुकी जे कोयु ओते का माआ मोल्याआ पुनरुत्थान होय का नाहा, तियाआ जागे आव्ये अने तियाहा फ़ुस्ल्याआ,

²⁴ ओ गुरु, मोशेवाही कोयु ओते केदीही एगदू मांहु एकभी पोऱ्ये आयना ओतु मोईत जाय, ताहा तिया पाही तियाआ लाडीआरी वेहवाल कोइत आपाआ पाहि कोअता वंश आप्यू.

²⁵ ओमे आमा इंही सात पाही ओते; पेल्लु वेहवाल कोइत मोईत गोल्यो, अने पोऱ्ये नेओते कारणावाही आपाआ लाडीही आपाआ पाहि कोअता सोडीत गोल्यो.

²⁶ आव प्रकारे दिहराआ अने तिसरु पण कोल्यु, अने सात पर्यत ओच उवे

²⁷ आखाम फासाडी ती बुई पोन मोईत गोयी.

²⁸ फासाडी ती मोईलामरोत उठेताहा कोडाआ लाडी उवे? कोईत ती आखाआ लाडी उवी ओती.

²⁹ येशु तियाहा उत्तर आप्लु, तुमु पवित्रशास्त्र अने परमेश्वरोओ सामर्थ नाहा जानिलो; आव कारनो कोईत विचारामेहे पोडये होय.

³⁰ काहाके मोईलामरोत उठेताहा ती वेहवाल कोअनारू नाहा अने नाहा राखाय परंतु होर्गाम परमेश्वरोओ दूताआ एकहरको रोही.

³¹ पोन मोल्य उठलो विषयी नाहाकोत तुमु ओ वचन नाहा वाचले जे परमेश्वराने तुमामे कोयु.

³² आय अब्राहमो परमेश्वरआ, अने इसहाकआ परमेश्वर; अने याकोबाआ परमेश्वर होय? तो मोल्याआ नाहा, परंतु जिवंताआ परमेश्वर होय.

³³ ओ होमलित मांहे तियाआ संदेशा त्यापोरत संचलीत उवे.

आखाप रोत वोडी आज्ञा

³⁴ तेहलाम परुशीनी होमल्या का येशु सदुकीयांआ सोब बंद कोईत आप्लु, तेहलाम ते एकठे उवे.

³⁵ तियामेहे एक व्यवस्थापकाने तियाहा पारखिलो याकोअता फ़ुस्ल्याआ,

³⁶ ओ गुरु व्यवस्थापनेत कोडली आज्ञा वोडी होय?

³⁷ तिये तियाहा कोयु, तू परमेश्वर आपाआ प्रभूपोरोत आपाआ पुरो मोन अने आपाआ पुरो जीव अने आपाआ आरी ओक्कल प्रेम को.

³⁸ वोडी अने मुख्य आज्ञा ती एज होय.

³⁹ अने तियाआ सारखो ए दिहरे पण होय का तू आपाआ आरी कोरयापो आपाआ सारखो प्रेम को.

⁴⁰ एज बेन आज्ञा आखी व्यवस्था अने भविष्यवक्ताआ आधार होय.

मसीह दवुदो सुउ के दावुदो प्रभु होय?

⁴¹ जोयों परुशी एकठे ओते, तेहलाम येशु तियाहा फ़ुस्ल्याआ,

⁴² मसीह विषयी तुमु कि विचार कोअता? तो कोडाआ पुत्र होय? तिये तियाहा कोयु, दाविदाआ.

⁴³ तिये तियाहा फ़ुस्ल्याआ, ताहा दाविद आत्माम आवीत तियाहा प्रभू काहा कोत्लू?

⁴⁴ प्रभू, माआ प्रभू ला कोयु, माआ हुदीवोल बोह, तेहलाम फासी का आयताआ वैऱ्यी ताआ गुडाआ निसे कोईत आपे.

⁴⁵ फासाडी, जांहा दाविद तियाहा प्रभू कोत्लू, ताहा तो तिया पुत्र केहलु कि बोनल्यो?

⁴⁶ तियाआ उत्तरात कोडूच एक गोठी न गोगू शकला तियाअ दिहे पोरोत कोडोबी ओ फुसिलो हिमत उवी नाहा.