मत्ती 21 - नोयरी नोवलू नियम

येशुउ यरूशलेम मेहे विजय प्रवेश

¹ जाहा येशु अने शिष्य येरुशालेमेओ आहाने पोचे अने जैतून डोगाआ पोओ बैतफगे ऐ आहाने आवे ते येशु बेन चेलाहा एहे कोईत मोकल्या,

² अने तियाहा कोयु आपाआ आगाडी गावून जा तीइही पोहचताच तुमामे एक गोदडीआरी एक गोदडा पिलो बांधीत मेकल्ये जोडीत तियाहा सोडीत मा आहने घेऊन आव.

³ जर कोडु तुमामे कोडु किबी कोअही ताहा कोओलो प्रभूहु याआ गोरोज होय अने लागेज तियाहा तो मोकलित आपी.

⁴ ओ यकोअता उवे काजे वचन संदेष्टा त्यापोरत कोयु ओते ते पुरो उवे ते एहलो का,

⁵ सियोनाहा पोरीहा कोआ पाला ताआ राजा तापो आवीत होय तो नम्र होय अने तो गोदडीइ गोदडापिलापो नाहा पण रक्ताआ बोसापो बोहयु होय.

⁶ शिष्यांनी जेहलो येशु तियाहा कोयु तेहलूज कोल्यु.

⁷ तिये गोदडीइ पिलाहा म्हणजे गोदडापिला घेऊन आव्ये तियापो आपाआ कापडे अने प्रवासाहा निकलीलू.

⁸ गर्दीमेहे केते माहुहु आपाआ कापडे वाटेपो पोस्राव्यी अने दिहराआ साडोपो डाली तोडीत वातेम पोसराव्या.

⁹ जी गोर्दी त्याआगाडी जात ओती आयडीत-आयडीत कोअला, दाविदा सुआ होसान्ना, धन्य होय जो प्रभूउ नावामेहे आवत्लू आकाश मेहे होसान्ना.

¹⁰ जांहा तिये यरुशलेमेत प्रवेश कोल्यु ताहा आखे शहरामे गोधळ फैलावीत गोयी अने आखे कोलाकोता लागाडीत ओ कोडू होय?

¹¹ अने गर्दीमेऱ्ये मांहे कोयु ओते ओ गालीलामे नसरेथ चा संदेष्टा येशु होय.

मंदिरोम रोत बेपारीही काडलोओ

¹² येशु मंदिरोम प्रवेश कोईत तियाअ आखाहा जे मंदिरोम लेनदेन कोईत ओते तियाहा बारथे काढीत आप्लु सराफाअ चौरंग अने कबूतर वेचणारा टेबाल, पिंजरु पोटाळीत आप्लु.

¹³ अने तियाहा तिये कोयु लेखिलो होय का, माआ को प्रार्थनाआ कोअ कोवाय पण तुमु ताहा लुटणाराआ गुफा बोनाडी होय.

¹⁴ तेहलाम आंदले अने लेगडे त्याजागे मंदिरोम आव्ये अने तिये तियाहा हाजो कोल्यु.

¹⁵ पण मुख्य याजक अने शास्त्री इये तियाअ आश्चर्य कामोवांही जे तिये कोल्यु ओते तिये पाल्लये अने पोऱ्याहा ओ कोयु ओते दाविदाआ पोऱ्याहा मंदिर होसान्ना, तेबी ते क्रोधीत ओतगोयु गोये.

¹⁶ अने तिये तियाहा कोयु नाहाकोत तू होमलित होय काहा का ओ नाहाकोत कोयु होय येशु तियाहा कोयु ओ पण नाहाकोत तुमु ओ वाचले नाहा काहा? हानू पोऱ्यो अने पोऱ्यापोरोत तू स्तुती पुरो कोअयी होय.

¹⁷ तेहलाम तो तियाहा सदोन शहराआ बारथे बैथानिया निहित गोल्यो अने तिहीज रोला.

अंजीरो साड़ोसी सिक्षा

¹⁸ फासाडी होमला टायमोमें तो फासी शहरामे आविलावेले भूक लागीई,

¹⁹ तेहलाम तो होमला अंजिराआ सोडोहो पालहु त्याजागे गोल्यो पण तियापो पानोहो सोडीत किबी जोडल्यो नाहा तेहलाम तियाहा कोयु, ओमोरोत तांआम खोरोज फोल लागे नाहा अंजिराआ साड तियाआ टायमोमें उगाईत गोये.

²⁰ ओ चेले पालीत चक्कित ओतगोयु कोहू लागाडीत अंजिराआ साड केहलो उगाईत गोये?

²¹ येशु कोयु आय तुमामे खोरोज कोत्लू जर तुमु विश्वास मेकही अने शंका कोअनारू नाहा ताहा तुमु एवडोज कोअनारू नाहा जे अंजिरो साडांआरी कोल्यु नाहा पण आव डोगोहो पण कोअही तू उपटीत जा अने समुद्रामेहे जात गुगदेए ताहा ते ओतगोयु जानारू.

²² अने जे किबी तुमु प्रार्थनाम विश्वासा मागोईला ते तुमामे जोडीत.

यहूदी पुडारीही येशुउ अधिकार पोओ संदेह

²³ जांहा येशु मंदिरोम आविलो हिकाडतो ओतु तेहलाम मुख्य याजक अने आंबहाही इये आविलो कोयु, तू कोडला अधिकाराआ ओ काम कोअतलो अने कोडु ओ अधिकार आप्यू होय.

²⁴ येशु उत्तर आप्लु आय पण तुमामे एक गोठी फुसल्यू जर तुमु तियाआ उत्तर आपी ताहा आय पण तुमामे कोअही का आय कोडला अधिकाराआ ओ काम कोअत्लू.

²⁵ योहानाआ बाप्तिस्मे कोडापरोत ओते होर्गापोरोत किंवा मांहुपोरोत? अने ते ओ कोत आपसामेहे चर्चा कोहू लागाडीत, जर आपु कोहू का होरगापोरोत ताहा तो कोअही ताहा तुमु तिया विश्वास काहा कोअयु नाहा?

²⁶ पण जर आमाहा कोहू का मांहुपोरोत ताहा आपाहा गर्दीई बित होय काहाके ते आखे योहानाआ संदेष्टा कोतेहे.

²⁷ तेहलाम तिये येशुहू उत्तर आप्लु आपाहा मालुम नाहा तेहलाम तिये तियाहा उत्तर आप्लु ताहा आय पण तुमामे कोअही नाहा का आय कोडला अधिकाराआ ओ काम कोअत्लू.

बेन सुआआ दृष्टांत

²⁸ पण तुमु की विचार कोईत होय? कोडु होमला मांहाआ बेन पोऱ्ये ओते अने तिये पेलापहाय जात कोयु पोऱ्या, जा आज द्राक्षावाडी काम को.

²⁹ अने तिये तियाहा उत्तर आप्लु ठीक होय आय जानारू पण तो गोल्यो नाहा.

³⁰ फासाडी बाह्हू दिहराआरी जात तेहलूज कोल्यु, पण तिये उत्तर आप्लु आय जानारू नाहा तेबी पण नंतर पश्चताप कोईत नंतर तो गोल्यो.

³¹ आव बेनुरोत कोडु आपाआ बाह्हाहा इच्छा पुरो कोअयी? तिये कोयु दिहरा येशु तियाहा कोयु तुमामे खोरोज कोत्लू का तुमाआ पेल्लु जकातदार अने वेश्या परमेश्वरोओ राज्याम प्रवेश कोअनारू.

³² काहाके योहान तुमापोओ धार्मिकाआ वाट देखाडल्याकोता आवयू पण तुमु तियापो विश्वास कोअयु नाहा पण जकातदार अने वैशावाही तियापो विश्वास कोअयु ओ पालीत सुद्धा तुमामे पश्चताप आवयू नाहा का तियापो विश्वास कोअयु ओतलू.

दुष्ट शेतकरीई दृष्टांत

³³ एक दृष्टान्त फासी होमला, एक मालिक ओतु, जीआ द्राक्षमोलु लागाड्यू अने वाडा कोल्यु अने तियाआ द्राक्षारसा कोअता कुंड खोअयु अने तिये मजुरा तीइही मेकीत प्रवासाम निहित गोल्यो.

³⁴ जाहा फडआ वेल आवयी तेहलाम तिये आपाआ पावरोहो तियाअ मोजऱ्याआ जागे मोक्ल्यीत उत्पन्न लेविलेओता.

³⁵ पोन तिया मजुराहा पावरोहो तोईत माअये, दिहीराहा माईत टाक्ये अने तिसराहा डोन्योमार कोअयी.

³⁶ फासी तिये आपाआ पावरोओ एक टोळी मोकलिली जो पेलापोरोत जाखो वोडू ओतु अने तिये त्याआरी पण तेहलूज कोल्यु.

³⁷ पण आखरी तिये आपाआ पोऱ्याहा आव आशेने मोक्ल्यीत ओ माआ पोऱ्याहा सन्मान कोअनारू.

³⁸ पोन मजुराहा जांहा पोऱ्याहा पाल्लये तेहलाम कोडु लागाडीत ओ ताहा वारीस होय साला आपु याहा माईत टाकुहू अने तियाआ वारीसपणा मागित लेऊ.

³⁹ आखरी तिये तियाहा तोअल्यो अने द्राक्षवाटीई बारथे काढीत माईत टाक्ये.

⁴⁰ कोईत जांहा द्राक्षवाटीकाआ मालिक आविलो ताहा त्याआरी नाहाकोत कोअनारू?

⁴¹ तिये तियाहा कोयु तो तियाअ दुष्टाआ वाईट आखिर कोअनारू अने द्राक्षवाटिका दिहरा मोजरयाहा आपित टाकही जे योग्य टायमोमें तियाहा उत्पन्न आपी.

⁴² येशु तियाहा कोयु नाहाकोत तुमु पवित्र शास्त्रात खोरोज वाचले नाहा काहा ज्या डोणुहु राजमिसऱ्यांनी बेकार सोमज्ये तोज कोडाआ (महत्वाचा) डोणो बोल्यू तोज प्रभूपोरोत उवे होय, अने आमा नजरोम आश्चर्यकारक होय?

⁴³ त्यापोत आय तुमामे कोत्लू का परमेश्वरोओ राज्य तुमापोरोत लेधलो जाइअलो, अने एहलो जातीही जो तियाआ फोल लेतआविही आपलो आवे.

⁴⁴ जो कोडु आव दोणोपो पोअनारू तो तुकडे-तुकडे ओतगोयु जानारू पण ज्यापोओ डोणो पोअनारू तियाहा चूर बोणाडीत आपी.

⁴⁵ जांहा मुख्य याजक अने परुश्यांहि येशुउ ओ दृष्टान्त होमल्या, तेहलाम होमजीत गोये का, तू आमाबोद्द्ल कोयु होय.

⁴⁶ अने जांहा तिये तियाहा तोओला कोता पाल्लये पण ते गोर्दी पालहु बितगोये, काहाके तियाहा मांहे संदेष्टा मानीत ओते.