मत्ती 20 - नोयरी नोवलू नियम

द्राक्षा वाडीई मजदूरो दृष्टांत

¹ होर्गाराज एखु कोओ मालक्याआ होस होय जो वेगरूऊ निकल्यु का आपाआ द्राक्षाआ मोलामेहे मोजर्या हा लागाडनारू.

² अने तिये कामकोणारा रोज पोशाआ ठेरवीत तियाहा आपाआ द्राक्ष मोलाम मोकल्ये.

³ फासाडी ते तिसऱ्या तासा सुमारास बारथे गोल्यो अने तिये बाजारोम केताहा बेकार उभे रोहीत्ले पहीले,

⁴ तो तियाहा कोयु, तुमुबीही द्राक्षा मोलाम जा, जे योग्यते आय तुमाहा आपही; अने ते गोये.

⁵ फासी सहावू अने नवव्या तासा सुमारास तिये बारथे जात तेहलूज कोल्यु.

⁶ फासाडी अकरावे तासा सुमारास तो बारथे गोल्यो तेहलाम फासी केतेहे उभे रोहीत्ले तियाहा आडल्योत्याहा तिये कोयु, तुमु सारा दीही इंही बेकार काहा उभे रोला होय?

⁷ ते तियाहा कोयु आमाहा कोडु का मापो लेधलो नाहाकोईत तिये तियाहा कोयु तुमुबीही द्राक्षा मोलाम जा.

⁸ फासाडी हांजेपो उवेताहा द्राक्षमोलाआ मालक आपाआ कारभाऱ्याआ कोयु, कामकोनारा गोगीलो अने पासोल्यापोरोत आरंभ कोईत पाल्या पर्यंत तियाहा मोजरी आप.

⁹ तेहलाम ते अकरावे तासा सुमारास लागाड्ये ओते ते आवेताहा तियाहा पोशाआ मिल्यू.

¹⁰ फासाडी जे पहीले आव्ये तियाहा आपाहा जाखा जोडयेहे एहलो तियाहा वाटेम तेबी तियाअहाई पोशाआ रुपयाआ मिल्यू.

¹¹ तो तिये लेदलापो घर धन्या विरुद्ध कुरकुर कोईत कोयु,

¹² याआ आखरी वालाहा एकुच तास काम कोल्यु, आमाहा दिही पोईत उन्हातान्हात मेहनत कोल्यु अने आमाहा अने तियाहा आपु सारखो लेखिलो?

¹³ तेहलाम तिये तीयाम एकाहा उत्तर आप्लु, गाड्या, आयताआ अन्याय कोईत नाहा; तू माआरी रुप्याआ ठेराव कोअयु का नाहा?

¹⁴ तू आपाआ पोशाआ घेऊन चालुला कोअता लाग; जेहलो ताहु तेहलूज याआ आखरी वालाहाभी आपलो एह्ली माआ इच्छा होय;

¹⁵ जे माआ होय तियाआ आय आपाआ मर्जीवाही कोईलाकाजे मुखत्यार नाहा नाहाकोत? अथवा आय हाजो होय ओ ताआ डोआम सतले नाहाकोत?

¹⁶ ह्याप्रमाणे शेवटयो ते पहीले अने पहीले ते शेवटयो होय.

तियाआ मोअलो अने पुनरुस्थानो विषय मेहे इजी भविष्यवाणी

¹⁷ येशु उपो यरुशलेमे होस जाला बेतुम ओतलू तिये बारा शिष्यांआ वाटेहे एकीकडे लेतजात कोयु,

¹⁸ पाला, आपु उपो येरुशलेमेस जात आहो अने माअहा पोऱ्याहा मुख्य याजकांच्या अने शास्त्री याहा आथे तोईत आपलो आवे; ते तियाहा मोहि दंड ठेरवे,

¹⁹ अने थट्टा कोईलाकाजे, फटके माईलाकाजे अने वधस्तभावर खिलीलाकाजे तियाहा अन्यजाति होपित कोआ; अने तिसऱ्या तेदीही तो फासी उठाडीते जाइअलो.

एक याह्हीई तियिई सोआ कोअता आग्रह

²⁰ तेहलाम जब्दीच्या पोऱ्याआ याह्ही आपाआ पोऱ्याहा तियाआ जागे आविलो तियाआ गुडू पोडीत त्याजागे किबी माग्ये.

²¹ तिये तीही कोयु, ताहु कि जोवे? ती तियाहा तेकोहे, तुमाआ राज्याम माआ याआ बेनु पोऱ्यामरोत एकाने तुमाआ हाजावोगे अने एकाने डावासाईटोहो बोहजी एह्ली आज्ञा को.

²² येशु कोयु, तुमु नाहाकोत मागतेहे ओ तुमाहा होमजाडीत नाहा; जो पिदो आय पीही होय तो तुमामे बाह्हू आवे कि? ते तियाहा कोयु बाह्हू आवे.

²³ तिये तियाहा कोयु माआ पिदो तुमु पिणारे खोरो, पण माआ हाजावोगे अने माआ डावासाईटोहो बोहीलाआ अधिकार आपलो मांही नाहा, जर ज्याआ याकोअता माआ बाह्हाही ओ सिद्ध कोअयु त्याकोआता तो होय.

²⁴ ए गोठी होम्लाडित दहा शिष्यांआ तियाअ बेनु पाही खोत आवयू.

²⁵ पण येशु तियाहा गोगीत कोयु, अन्यजाति तियाआ अधिकारी प्रभुत्व चालाडहे अने वोडो माहाआ अधिकार कोत्ले, ओ तुमाहा मालूमे होय

²⁶ तेहलूज तुमाहामे नाहा; ताहा जो कोडु तुमाहामे श्रेष्ठ ओवुहू पालत्लू तो तुमाआ सेवक उवे,

²⁷ अने जो कोडु तुमाहामे पेल्ल्लु ओवुहू पालत्लू तो तुमाआ दास उवे,

²⁸ ह्याप्रमाणे माअहा पोऱ्या सेवा कोईत लेअलाकाजे नाहा, ताहा सेवा कोईलाकाजे अने ईस्ताज जोआ छुटकारा कोअता तिया जीव आपे.

बेन आन्दलाहा दृष्टिदान

²⁹ फासाडी ते यरीहो शहर रोत जात ओयताहा वोडू लोकसमुदाय तिया फासाडी रोत जातलू.

³⁰ तेहलाम, पाला वाटेपो बोहितरोलो बेन आंदले येशु जागेरोत जात होय ओ होमलित आयडीत कोयु, ओ प्रभू, दाविदाआ पुत्रा, आमाहा दया को.

³¹ तिये उगे रोअलो कोईत माहु त्यांहा धमकाव्यो; तेबी ते जाहाकोज आयडीत कोयु; प्रभू, दाविदाआ पुत्र आमाहा दया को.

³² येशु उभे रोत, तियाहा गोगीत कोयु, आय तुमाकोता नाहाकोत कोहू? तुमाआ कि इच्छा होय?

³³ ते तियाहा कोयु, प्रभुजी, आमाहा डोआं उगाडे.

³⁴ येशुहू त्यापोओ तरस आवी तिये तियाआ डोआहा स्पर्श कोअयु; ताहा तियाहा तत्काळ देखा लाग्यो अने ते तियाआ फासाडी सालुहू लागे.