मत्ती 15 - नोयरी नोवलू नियम

परंपरा अने आज्ञाआ उल्लंघनो प्रश्नों

¹ ताहा यरुशालेमेहे काही परुशी अने शास्त्री येशुउ आहाने आवित कोहू लागे,

² ताआ शिष्य पूर्वजांआ परंपरेआ काहा उलघना काहा कोअता? ते भाकर खाआलावेले आथे तुवीत नाहा?

³ तिये उत्तर आप्लु, आपाआ परंपराकोता तुमु स्वतः परमेश्वरोओ आज्ञा उलघन काहा कोअता?

⁴ काहाके परमेश्वराने कोयु होय, आपाआ याह्ही बाह्हाआ सन्मान कोए जो कोडु बाह्हाहा अने मायला वाईट कोअही तियाहा माईत टाक्ये जाइअलो.

⁵ पण तुमु कोयु होय का जर आपाआ बाह्हू अने मायला कोअही तुमामे जो माआरी जे पण आपलो भाग होय आप देवोहो अर्पण कोल्यु होय,

⁶ ताहा तियाहा आपाआ बाह्हू माय चा सन्मान कोअला गोरोज नाहा अने याकोईत तुमु परंपराकोता परमेश्वरोओ आज्ञा व्यर्थ कोल्यु होय.

⁷ ओ ढोंग्याहोस, यशायाह तुमा बारामे ओ भविष्यवाणी आरीज कोल्यु होय,

⁸ ओ मांहे ओठेवाही ताहा माआ सन्मान कोअता, पण त्याआं मोनाहा मारोत सेटे होय.

⁹ ओ व्यर्थ माआ उपासना कोअत्ले ऐन माअहा शिक्षणाला धर्माआ आज्ञा बोनाडीत हिकत्ले.

अशुद्ध कोअनारी गुठ्या

¹⁰ अने येशु मांहोहो आपाआ जागे हादीत तियाहा कोयु, होमला अने सोमजा.

¹¹ जे सोबिम जाहो ते मांहोहो अशुद्ध कोईत नाहा पण जे सोबिमरोत निह्तले ते मांहोहो अशुद्ध कोअते.

¹² तेहलाम शिष्यांनी आविलो तियाहा कोयु, नाहाकोत ओतू मुदुह काहा? का ओ होमलिते परुसी रागाकोहे?

¹³ पण तिये उत्तर आप्लु, हर एक साड ज्याहा माआ होर्गाआ बाह्हू लागाडले नाहा उपटीत टाक्ये जाइअलो.

¹⁴ तियाहा रोहू दया ते आंदले मार्ग देखाड्यो होय, अने आदोलो आंदला मार्ग देखाडीही ताहा बेन खाडाम पोअनारू.

¹⁵ पेत्राई कोयु, ओ दृष्टान्त आमाहा होमजाडीत आप.

¹⁶ येशु कोयु, की तुमामे पण ओमेजा होमज्ये नाहा?

¹⁷ की तुमु होमजाडीत नाहा काहा का, जे सोबिम जाहो ते पोटाम जाहो अने शौचकुपात टाकिला येत?

¹⁸ पण जे सोबिमरोत बारथे निह्तले तोओ मोन सी निकलित्लो अने तोज माहुंहु अशुद्ध कोईत ओते.

¹⁹ काहाके मोनामेहे रोतुच वाईट विचार खून व्यभिचार, जारकर्मे, चोरी, झूठी साक्ष अने निंदा ए निह्तले.

²⁰ याआ तियाआ गोठी होय ज्या मांहोहो अशुद्ध कोअता, पण आथे तुवल्याशिवाय रोटू कोअला माहुंहु अशुद्ध कोईत नाहा.

कनानी जातीई बुई विश्वास

²¹ येशु तिहीरोत निहित सोर अने सिदोन प्रदेशाम निहित गोल्यो.

²² अने पाला, तियाअ प्रदेशाआ एक कनानी बाय आवयी, अने आयडीत कोडु लागीई ओ प्रभू दाविदाआ वंश, मापो दया को माआ पोऱ्यी वाईट प्रकारे दुष्टात्मा वेला पाडेहे.

²³ पण तिये तीही किबी उत्तर आप्लु नाहा शिष्य त्याजागे आविलो कोहू लागाडीत, यीही सेटे कोईत आप, काहाके ए आअडित आमा फासाडी लागीई होय.

²⁴ पोन तिये तीही उत्तर आप्लु, माहु फक्त इस्राएल गोमेर्योत ताकालाआ मेंढरापोरोत मोकोल्या होय.

²⁵ पोन कनानी बुई आवयी अने प्रणाम कोहू लागीई, प्रभू माहु मदत को.

²⁶ तिये तीही कोयु, पोऱ्याआ जेवण घेऊन कुत्र्यांपुढे टाकिलो योग्य नाहा.

²⁷ यापो तियाअ बाईने कोयु, होय, प्रभू, पण कोओहु कुत्रे भी मालकाहा टेबलापोरोत पोडल्ये चूर खातले.

²⁸ तेहलाम येशु कोयु, ओ बाय, ताआ विश्वास वोडू होय, जेहलो ताहु लागेहे तेहलूज ता कोअता ओवो, तीआ पोऱ्यी लागेज हाजी ओत गोयी.

इस्ताज रोगिही हाजु कोअलोओ

²⁹ तिहीरोत आगाडी येशु गलीलच्या समुद्र किनाऱ्यापो गोल्यो, तीही डोगोपो सोडवीत बोहित गोल्यो.

³⁰ अने वोडू लोकसमुदाय तियाआ जागे आव्ये अने ते आपाआ आरी लेगडे लुले, आंदले, मुक्कु, अने खूप दिहरू मांहुंहु घेऊन आव्ये अने तियाआ गुडाजागे मेकीत आप्लु, अने तिये तियाहा हाजो कोल्यु.

³¹ त्यापोत जांहा गोर्दी पालील्यो का मुक्कु गोगत्ले, लुले हाजो उवे, लेगडे सालतेहे, आंदले पालल्ते ओ पाल्हू मांहे आश्चर्यचक्कीत ओतगोयु गोये अने तिये इस्राएलाआ परमेश्वरोओ स्तुती कोअयी.

चार हाजार मांहोहो खावडलो

³² येशु आपाआ शिष्यांआ जागे हादीत कोयु, माहु आव माहाहूपो दया आवयी होय काहाके ओ मांहे तीन दिहीरोत माआरी होय अने यांआरी खाहुं किबी नाहा माहु तियाहा फुकल्यु मोकलीलो नाहा एहलो उवूंहू नाहा का ते वातीमेज कोमाईला होस ओतगोयु जानारू.

³³ शिष्यांनी तियाहा कोयु आमाहा आव जंगलूम एहलो वोडो माहुगोदीही तृप्त कोइला कोअता एवढया जाखो रोटा कोठे जोडनारू?

³⁴ येशु तियाहा कोयु, तुमापोओ केतो रोटा होय? तिये कोयु, सात रोटा अने थोडोज हानू मासे होय.

³⁵ ताहा येशु मांहोहो धरतीपो बोहीलाआ आज्ञा कोअयी.

³⁶ ताहा तिये सात रोटा अने थोडोज मासे ओते ते लेधलो अने धन्यवाद आपित ते तोड्या अने शिष्यांआ दयायआ सुरवात कोअयी अने शिष्यांनी मांहोहो दयायआ सुरवात कोअयी.

³⁷ ते आखे खात तृप्त उवे अने तिये उरील्योओ तुकडा कोईत सात टोपल्या बोल्या विश्या.

³⁸ अने ते आखे खादे, तीयाम बोईही अने पोऱ्याहा सोडीत च्यार हजार माहुहू ओते.

³⁹ ताहा गोर्दी खोबोर आप्यू अने मोकलित आपित तो नावूमे सोडवीत गोल्यो अने मगद्दनाहा भागुम आवयू.