मत्ती 14 - नोयरी नोवलू नियम

हेरोदेस येशुउ बाराम होमल्यु

¹ त्या टाईमो पोओ चारू वुग्रया देशाआ राजा हेरोदेस बी येशुउ चर्चा कोअयु

² अने आपाआ सेवकांआ कोयु, ओ योहान बाप्तिस्मे कोअनारू होय; ओ मोल्यामरोत जिवंत उठ्यू होय, कोईत तिये सामर्थ्यचे काम प्रगट कोईत होय.

युहन्ना हत्या

³ काहाके का हेरोदावाही आपाआ पाही फिलीप्प याआ लाडी हेरीदिया यीइकोता, योहानाआ तोईत बानदल्यो अने जेलुमे टाकीत आप्लु ओते.

⁴ काहाके योहानाई तियाहा कोयु ओते का तीही मेकिलो ताआ याकोअता हाजो नाहा,

⁵ अने हेरोद तियाहा जीवे मोईलो ओती, परंतु माहुऊ बित ओती काहाके ते तियाहा संदेष्टा मानीत ओते.

⁶ फासाडी हेरोदेसो जन्म दिवसाआ आवयू, ताहा हेरीदियाआ पोर्या दरबारात नाचीला कृत्य देखाडीत खुश कोल्यु.

⁷ यापोरोत तिये शपथ लेत वचन कोयो जो किबी तू मागही, आय ताहु आपी.

⁸ तेबी आपाआ याह्ही कानोम गोगल्यी, योहान बाप्तिस्मे कोनाराआ मुंडको थालिमे ओच माहु मागित आप.

⁹ राजा हेरोद दु:खी ओवयू, परंतु आपाआ शपथ मुळे, अने आरी बोहोल्याअ काहाके, आज्ञा आपीली लागीई.

¹⁰ अने तिये जेलुमे माहुंहु मोकलित योहानाच मुंडको वाडीत टाक्ये;

¹¹ अने तियाआ मुंडको ताटूम लावल्या गोये अने पोरीही आप्या गोये, तियाहा तीही आपाआ याह्ही जागे लेत गोयी.

¹² ताहा योहानाआ शिष्य आव्ये अने तियाआ प्रेताला घेऊन जात गालीत आप्लु, अने जात येशुहू वर्तमान खोबोरकोयी.

पास हाजार मांहोहो खावडलोओ

¹³ जांहा येशु होमल्यु, ताहा तो नावापो बोहित तिहीरोत कोडना उजाड जागापो, एखकट्यात निहित गोल्यो मांहे ओ होमलिते देश-देशांत पायी तियाआ फासाडी निहित गोये.

¹⁴ येशु निहित एक वोडी गोर्दी देखल्यी अने तियापो दया कोअयी, अने तियाआ बिमारे हाजो कोल्यु.

¹⁵ जांहा हांजेपो उवी ताहा येशुउ शिष्यांनी तियाआ जागे आविलो कोयु, ए निवांत जागू होय अने वाअ उवनारा होय; माहुंहु कोअलो का ती गावोमेहे जात आपाआ याकोअता खाआलाकाजे वेसातो लेदलेए.

¹⁶ परंतु येशु तियाहा कोयु, त्याआं जाअलो माहा नाहा तुमुज तियाहा खाआलाकाजे दया

¹⁷ शिष्यांनी येशुहु कोयु, इही आमा जागे पांच रोटा अने बेन मासे सोडीत फासी किबी नाहा.

¹⁸ तिये कोयु, तियाहा इही माआ जागे घेऊन आव.

¹⁹ ताहा तिये माहुंहु चारापोओ बोहाडीत दया कोयु; अने स्वर्गामेहे पालहु आशीर्वाद आप्यू अने रोटा तोडीत शिष्याआ आप्लु, अने शिष्यांआ, माहुंहु.

²⁰ जाहा आखे खात तृप्त उवे, ताहा शिष्यांनी उरिलो तुकडा कोईत पोअल्यी बारा टोपल्या पोईत लेदिओलो.

²¹ अने खानारा बोई अने पोऱ्ये सोडीत, पांच हजार माहु ओते.

पाअयोपो येशुउ साललोओ

²² ताहा तिये लागेज आपाआ शिष्यांआ नावेपो चोडूहु कोयु का ते तियाआ पहीले तिवोल जालो, जो परंतु तियाहा माहुंहु मोकलित.

²³ तो माहुंहु मोकलित, प्रार्थना कोइला कोअता दिहरा डोगोपो निहित गोल्यो; अने राती तो होमजीत्लो एखल्यू ओतु.

²⁴ तियाअ टायमोमें नाव समुद्रामे लाटांनी हैरान उवी ओती, काहाके वारू सोमोरून ओती.

²⁵ अने येशु रातीई चौथो पहरी तलावापो चालीत तियाआ जागे आवयू.

²⁶ शिष्य तियाहा समुद्रापो चालते ओतु पालहु घाबरील्यो गोये अने कोआ लागाडीत, ओ पुत्डू होय अने भिईल्यो आअडू लागाडीत.

²⁷ तेहलाम येशुई लागेज त्याआरी भिईल्यो का अने कोयु, धीर तोआ आय होय, बित नाहा.

²⁸ पेत्राई येशुहु उत्तर आप्लु, ओ प्रभुजी, जर तुमु होय, ताहा माहु आपाआ जागे पाण्यापो चालीत आवजा आज्ञा को.

²⁹ तिये कोयु, आव तेहलाम पेत्र नावापो उतरित येशु जागे जाअलाकाजे पाण्यापो चालीलो लाग्यू.

³⁰ पोन जूरे हवाला पालहु बित गोल्यो, अने जांहा बुडहू लाग्यू ताहा आयडीत कोयु, ओ प्रभुजी, माहु वासाड,

³¹ येशुनी लागेज आथे आगाडी कोईत तियाहा तोईत लेधलो अने तियाहा कोयु, अरे अल्प विश्वासी, तू नि काहा संशय धोल्योओ?

³² जाहा ते नावापो सोडवीत गोये, ताहा वारू थोबित गोयी.

³³ आवा वरून तिये जो नावापो ओतु, तियाहा नमन कोअला कोयु, खरोज तू परमेश्वरोओ पोऱ्या होय.

येशुउ द्वारा गन्नेसरत मेहे इस्ताज रोगिही हाजु कोअयु

³⁴ ते तिवोल उतरित गन्नेसरतमध्ये पोत्य.

³⁵ तिहीवालेच माहुंहु तियाहा आयडीत लेधलो अने आस-पासच्या आखे तियाहा खोबोर मोकल्यु, अने आखे बिमारोत तियाआ जागे लाविले,

³⁶ अने तियाहा विनंती कराय लागाडीत का ते तियाहा आपाआ कापडा गोड्यास कोयु स्पर्श कोहू दया; अने जेतेहे तियाहा स्पर्श कोल्यु ते हाजो उवे.