मत्ती 13 - नोयरी नोवलू नियम

फ़क्त हाजा जागामेहे फलवा उत्पादनों दृष्टांत

¹ तेदिहिज येशु कोअ रोत निहित गलीलो समुद्र मेरे जात बोहयु.

² अने तियाआ जागे एह्ली वोडी गोर्दी जमा उवी का तो नावे उपो सोडित गोल्यो अने आखी गोर्दी किनारावपो उबी रोली.

³ अने तिये दृष्टान्त माय जाअखो गोठी कोयु एक बी पेअनारू बीज पेंहु निघाल्यू.

⁴ बीज पेरत्लू काहि बी वाटेए किनारावपो पोडये अने सिडे आवीत तियाहा खात गोये

⁵ थोड़ेबीज खोडका जोमनिपो पोडये तीही तियाहा कादु नाहा जोड्यु कोईत ते वेगु उगीते आव्ये.

⁶ तेबी दिह निकलीलो पोओ ते बोलीते गोये अने मुळ न तोअया मुळे ते उगाईत गोये.

⁷ थोड़ेबीज झाडापे पोडये साडे वोडो होतगोयो तियाहा दाबीन टाक्ये.

⁸ थोड़ेबीज हाजा जोमनिपो पोडये अने फोल आप्लु कोडू होव पट, कोडू साठ पट, अने कोडू तीस पट.

⁹ ज्याआ कान होय तिये होमले.

दृष्टांतोओ उद्देश

¹⁰ अने शिष्यांनी जागे आवीत तियाहा कोयु, तू माहुआरी दृष्टांत मेहे काहा गोठी कोईत होय?

¹¹ तो तियाहा कोयु परमेश्वरोओ होर्ग्याआ राज्याआ गूढ भेदोओ समज तुमाहा आप्युहू पण तियाहा नाहा.

¹² काहाके जियाप होय तियाहा आपे अने तियाप जाअखो उवनारा जाय पोन जियाप किबी नाहा तियाआ जागेरोत जे होय ते पण लेधलो जाय.

¹³ आय त्याआरी दृष्टांत मेहे याकोअता गोठी कोअत्लू का ते पालीत नि पालत्ले नाहा अने होमलित ओमे नि होमलीत्ले अने नाहा होमजाडीत.

¹⁴ तियाआ विषया माया यशायाह ची ए भविष्यवाणी पुरो उवनारा होय तुमु कानाकी ताहा ऐकाल-पण होमजुत्लू नाहा अने डोआवाही पाल्हा तेबी नाहा होमजुत्लू.

¹⁵ काहाके तियाअ माहा मोन कठोर होतगोयो अने ते कानामे जूरे होमलित्ले तिये आपाआ डोआं बंद कोल्यु होय केधी एहलो न ओवो का ते डोआवाही पालीही अने कानाकी होमले अने मोनामोरोत होमजीहो अने फाशी जाहू तियाहा अने आय तियाहा हाजो कोहू.

¹⁶ पण धन्य होय तुमाआ डोआं जे पालल्ते अने तुमाआ कान होमलिताहा.

¹⁷ काहाके आय तुमामे खोरो कोत्लू का जाअखो भविष्यवक्ता अने धार्मीकांनी जान्ये का जी गोठी तुमु पालीत होय पालीत न देखल्यी अने जी गोठी तुमु होमलित होय होमलित नि होमले.

हाजा जागाआ दृष्टान्तो व्याख्या

¹⁸ ओमे तुमु उरणारा दृष्टांतो अर्थ होमला,

¹⁹ जो कोडू राज्याआ वचन होमलितु नाहा होमजाडीत तियाआ मोनामे जे उरालो होय तियाहा तो शैतान आवीत सांडाडित लेत जात्लू ते ओच होय जे वाटेपो पेहे गोये ओते.

²⁰ अने जे डोळा जोमनिपो पेहे गोये होय जो वचन होमलित वेगु आनंदाआ भरात मानीत लेहो.

²¹ पण आपाआ माय मुळ न मोकिलाज कारनोवाही तो थोडो दिहोकोअता होय अने वचनाआ त्रस अने उपद्रव ओतू तो तात्काळ ठोकर खाहोव.

²² जे झाडोपे उरालो गोये होय ते ओ होय जो वचनाआ मानत्लू तो आव संसाराआ चिंता अने धनोओ धोका वचनाआ दाबत्लू अने ते फोल आवीत नाहा.

²³ जे हाजा धरतीपो पेअल्यो गोये ते ओ होय जो वचनाआ होम्लाडित होमजीत लेहो अने फोल आपोहो कोडु होव पट, कोडू साठ पट, अने कोडु तीस पट.

गहू अने जंगली बीजो दृष्टांत

²⁴ येशु तियाहा एक फासी दृष्टान्त आप्यू स्वर्गाचे राज्य तियाअ मांहाहा सारखो होय तियाआ आपाआ खेतुम हाजो बी उरालो.

²⁵ पण जांहा मांहे हुविलो ओते तेहलाम दुश्मन आवीत गवोओ बी माय जंगली बी पेईत निहित जातलू गोल्यो.

²⁶ जांहा रोप आवयी पाले आवयी तेहलाम जंगली बी तियाआ पण रोपे पण देखिलो लागीई.

²⁷ तेहलाम को धन्यांनी आवीत तियाहा कोयु तेहलाम घरधन्याच्या पावरोवही आवीत कोयु ओ को धन्या तू आपाआ खेतुम हाजो बी नाहा काहा उरयू? ताहा जंगली बी तियाआ रोपे तीयाम किहीरोत आव्ये.

²⁸ तिये तियाहा कोयु ओ कोडले तेबी दुश्मन तियाआ काम होय पावरोवही तियाहा कोयु नाहाकोत ताआ इच्छा होय का, आमाहा जात ते जमाडीने लेदलेए?

²⁹ तिये कोयु का, नाहा न ओवो का जंगली बी तियाआ रोपे टोलुवालीलावेले तुमु तियाआ आरी गवोओ पण उपटीत टाकही.

³⁰ वाडीलो पर्यंत बी ला आरी वाईहु आपा अने काटीलो टायमोमें वाडीलो कोअनाराहा कोयु जंगली दाना तियाआ रोपे जमाडीने जडूकोता तियाआ पारू बाधित ल्या अने गवोओ माआ खोलामेहे जमाडीने ल्या.

राई दानाआ दृष्टांत

³¹ तिये तियाहा फाशी एक दृष्टांतमेहे आप्यू होर्गाराज होमला मोहरी दाणाहोस होय ज्याहा कोडु मांहु लेत आपाआ खेतुम पेअत्लू.

³² तो आखे बी पेक्षा हानू ताहा रोतो पण जांहा तो वोदित जात्लू तेहलाम आखे भाज्या पेक्षा वोडू होतगोयो जात्लू अने एहलो साड होतगोयो जाहो का, आकाशा मेहे सिडे आवीत तियाआ फांदीपो वस्ती कोत्ले.

खमीरोओ दृष्टांत

³³ तिये एक फाशी दृष्टांतमेहे तियाहा होमलावल्यो स्वर्गाचे राज्य खमिराहोस होय ज्याहा कोडु बुई लेतजा लेत तीन मापे पिठामेहे मिलवीत आप्लु अने मिल्यो-मिल्यो ते आखे खमीर होतगोयो.

दृष्टान्तो प्रयोग

³⁴ आव आखे गोठी येशु होपनाआ माय माहुंहु कोयु अने विना दृष्टांतो तियाहा तिये किबी कोयु नाहा,

³⁵ काजे वचन भविष्यवक्ताच्या त्यापोरत कोयु गोये ओते ते पुरो ओवो आय दृष्टान्त कोल्याकोता आपाआ सोब उगड्यो आय तियाअ गोठीही जे जगोआ उत्पत्ती पोरोत गुप्त रोली होय ती प्रगट कोअही.

जंगली बीजाआ दृष्टान्तो व्याख्या

³⁶ तेहलाम ते गोर्दी ला सोडीत कोअमे आवयू अने तियाआ शिष्यांनी तियाआ जागे आविलो कोयु, खेतुमेऱ्यो जंगली बी चा दृष्टांतमेहे आमाहा होमजीत आप.

³⁷ तिये तियाहा उत्तर आप्लु हाजो बी तियाआ पेईलो कोअनारू माअहा पोऱ्या होय.

³⁸ खेत संसार होय हाजो बी राज्याआ पोऱ्ये होय अने जंगली बीज वाईटाची पोऱ्ये होय

³⁹ ज्या शत्रू तियाहा उरुहू तोओ शैतान होय वाडलो जगतो आखरी होय अने वाडीलो कोअनारे स्वर्गदूत.

⁴⁰ आखरी जेहलो जंगली दाने जोमडीही जाहो अने बालते जाहो तेहलूज जुगाआ आखरी उवे होय.

⁴¹ माअहा पोऱ्या आपाआ स्वर्गदूत ताहा मुकलिही अने ते तिया राज्यामेरोज आखे ठोकेला कारनोवाही अने पाप कोअनारे एकठे कोअही,

⁴² अने तियाहा आगीम कुण्डणीत टाक्ये जेहेलो रोडीलो अने दात खायलो होय.

⁴³ त्या टायमोहो धोर्मी आपाआ बाह्हाआ राज्याम सूर्या सारखो पिपलीताआ कान होय तो होमलित ले.

गुप्त धन

⁴⁴ स्वर्गाचे राज्य खेतुम लागाडल्यी धना सारखो होय ज्याहा कोडु माहाआ मिलवी अने दोबावीन आप्लु अने आनंदाआ पाराम जात आपाआ आखे वेसेत टाक्ये अने तियाअ खेताहा वेसातो लेधलो.

अनमोल मोती

⁴⁵ फाशी स्वर्गाचे राज्य एक व्यापाऱ्या सारखो होय, जो हाजा मोतीइ होदिअलो ओतु.

⁴⁶ तेहलाम तियाहा एक बहुमुल्य मोती मिल्यू ताहा तिये जात आपाआ आखे वेसेत टाक्ये अने तियाहा वेसातो लेधलो.

जालाआ दृष्टांत

⁴⁷ फाशी स्वर्गाचे राज्य तियाअ वोडा जालो सारखो होय जो समुद्राम टाक्यू ओतु अने आखे प्रकारोओ मासे एकठे कोल्यु.

⁴⁸ अने जांहा जाळे पोईत गोये तेहलाम मासे तोअनारे किनारावपो लेत आव्ये अने बोहित चांगले-चांगले बासनाम एकठे कोल्यु अने खराब-खराब मासे टाकीत आप्लु.

⁴⁹ जुगाआ आखरी ऐहलेच उवे स्वर्गदूत आवीत दुष्टांहा धार्मीक जनोपोरोत अलग कोअही,

⁵⁰ अने तियाहा आग कुण्ड मेहे टाकही तीही रोडीलो अने दात खायलो होय.

नवली अने जुनली सिक्षाआ महत्व

⁵¹ नाहाकोत तुमु ए आखे गोठी नाहा होमजयोके? तिये तियाहा कोयु होय.

⁵² तिये तियाहा कोयु याकोअता सोण एक शास्त्री जो होर्ग्याआ राज्याआ शिष्य बोल्यू होय तियाअ गृहस्थ सारखू होय जो आपाआ भांडारामोरोत नवो अने जुनो वस्तू काडत्लू.

येशु नासरत मेहे इजी आवयु

⁵³ जाहा येशु ओ दृष्टान्त कोत तीहीरोत जातु रोयु

⁵⁴ आपाआ नगरामे आविलो तियाआ सभास्थानात तियाहा एहेलू संदेश आपुहू लाग्यू किते चकित ओतगोयु कोहू लागाडीत याहा ओ ज्ञान अने सामर्थ्याचे काम कीहीरोत जोडयेहे?

⁵⁵ काहा ओ हुतारोंअ पोऱ्या न? अने याआ याह्ही तियाआ नाव मारिया अने तियाआ पाही नाव याकोब, योसेफ, शिमोन अने यहुदाने?

⁵⁶ अने याआ आखे बोईही आपाआ आरी नाहा रोत ताहा याहा ओ आखे कोरात जोडयेहे?

⁵⁷ आव प्रकारे तिया तियाआ कारनोवाही ठोकर खादल्यी पण येशु तियाहा कोयु भविष्यवक्ताला आपाआ देश अने को सोडीत पोन सन्मान मिलीअलो नाहा.

⁵⁸ अने तिये तीही आपाआ अविश्वासाआ कारनोवाही जाअखो पुरो सामर्थ्याचे काम नाहा कोल्यु.