मत्ती 12 - नोयरी नोवलू नियम

येशु सब्तओ प्रभु

¹ तेहलाम येशु शब्बाथाआ तेदीही खेतोमेरोत निघाल्यू, तेहलाम तियाआ शिष्यांआ भूक लागीई, अने ते कोंहे तोडीत खाऊ लागाडीत.

² पण जांहा पारुश्यानी ओ पाल्लये तेहलाम तियाहा कोयु, पाला, ताआ शिष्य जे काम कोईत होय ते शब्बाथाआ तेदीही कोअला हाजो नाहा.

³ त्यापो तिये तियाहा कोयु, कि तुमु वाचले नाहा का जांहा राजा दाविद अने तियाआ हेगांति यांहा भूक लागीई ओती, तेहलाम तिये कि कोल्यु?

⁴ राजा दाविद ताहा परमेश्वरोओ मंदिरोम जात अर्पण कोईओलो रोटा खाद्या. त्याकोअता अने तियाआ मित्राकोता पण नाहा परंतु याजकां कोअता हाजो ओते.

⁵ आव तुमु नियम शास्त्रात वाचले नाहा का शब्बाथाआ तेदीही मंदिरोम शब्बथाआ विधीला तोडतेहे तेबी पण याजक निर्दोष रोतेहे.

⁶ पण आय तुमामे कोयु होय का, जे ओ होय ते मंदिर रोत पण वोडो होय.

⁷ जर तुमु याआ अर्थ होमज्ये ओते, माहु दया जोवे अर्पण नाहा ताहा निर्दोषाला दोषी ठेरव्यो कायना ओतो.

⁸ काहाके माअहा पोऱ्या शब्बाथआ दिहिओ पण प्रभु होय.

उगालू आथोवालो मांहो

⁹ तिहीरोत निहित फासाडी तो तियाआ मंदिरोम गोल्यो.

¹⁰ पाला, तीइही एक उगालू आथाहा एक माहुहू ओतु. तिये येशुपो दोष लागाडीलो विचाराआ ओ प्रश्न कोअयु नाहाकोत शब्बाथआ तेदीही हाजो कोअला आरी होय?

¹¹ तिये तियाहा कोयु तुमा मेहेरोत एहेलू कोडू होय ज्याचा एक मेंढो होय अने ते शब्बाथाआ तेदीही खाडाम पोडीत गोये ताहा तियाहा बारथे काडनारू नाहा कि?

¹² ताहा एक माहाआ किमोत होमला मेंढरापोरोत केतो जाखो होय त्यापोत शब्बाथआ तेदीही हाजो कोअला आरी होय.

¹³ तेहलाम येशु तियाअ मांहाहा कोयु ताआ आथे वोडाव तिये वोदाडयु अने तो दिहरा आथोहोस हाजू ओवयू.

¹⁴ तेहलाम परुसी बारथे निकलीलू अने तिये तियाआ विरूध योजना बोनाडी का तियाहा केहकोइत नाश कोईओलो.

परमेश्वरो निवडीलू सेवक

¹⁵ परंतु येशु ओ होमजीत तिहीरोत निहित गोल्यो जास्तीज मांहे तियाआ फासाडी जाने वोल्ये, अने तिये तियाअ आखाहा हाजो कोल्यु,

¹⁶ अने तिये तियाहा आज्ञा कोअयी का माहु प्रकट कोईओलो नाहा,

¹⁷ ज्यायाकोलो जे यशायाह संदेष्टाआ त्यापोरत कोयु ओते ते पुरो उवे

¹⁸ पाला, माआ सेवक ज्याहा आय निवडिले होय माआ परम प्रिय होय ज्यापोरोत माआ मोन अति प्रसन्न होय आय तियापो आपाआ आत्माआ टाकही अने तो दिहरी जातीपो उपो योग्य न्यायाआ सुवार्ता कोआ.

¹⁹ तो लोढात नाहा अने आअडीही पण नाहा अने तिया आवाज गोल्लीमे पण होमला आविलो नाहा.

²⁰ तो सिपडील्या बोरुला तोडहि नाहा अने मिणमिणती बत्तीलाहा उलीवणार नाहा जो पर्यंत न्यायाहा विजय बोडाविही नाहा तोपोरोत एहलो उवे.

²¹ अने तियाच नावामें अन्यजाति आशा तोणार.

येशु अने दुष्ट आत्माआ शासक

²² येशुआरी एक दुष्टात्मा सी माहुंहु लाविले जो आदोलो अने मुकु ओतु तिये तियाहा हाजो कोल्यु अने तो मुकु माहुहू गोगुहू अने पालाहू लाग्यू.

²³ योपो आरन्यो लोकसमुदाय चक्कित ओत कोने वोल्ये ओ माहुहू दाविदाआ पुत्र ओवुहू शकतो?

²⁴ पण परुसी माहु ओ होमल्यु ताहा कोयु ओ माहुहू दुष्ट आत्माहा फक्त तिया सरदार शैतानांआ सहायाने दुष्ट आत्माहा काडतलु.

²⁵ तो त्याआं मोनामेरी गोठ होमजीत तिये कोयु, ज्या राज्याआ फुट पोडतली होय ते तो नाश ओतगोयु होय अने तो उजाड ओतजात्लो होय नगरामे किंवा कोअमे फुट पोडले ते स्थिर रोही नाहा.

²⁶ अने जर शैतानच शैतानाला काडनारू ताहा आपाज विरोद्धी ओतगोयु जात्लू ताहा तियाआ राज्य एहलो टिकणार?

²⁷ फासाडी आय जर शैतानाचा सहायाने दुष्टात्मा काडत्लू होय ताहा तुमाआ मांहे कोडाआ सहायाने काडीलो तेह्लाम? त्यापोत तोज तुमाआ न्याय कोअनारू.

²⁸ पोन आय जर परमेश्वरोओ आत्माआ त्यापोरत दुष्ट आत्माहा काडत्लू ताहा परमेश्वरोओ राज्य तुमामे आविलो गोये होय.

²⁹ किंवा कोडु ताकतवान माहुहु कोआत रीतीते कोडु तियाआ धनदौलत केहलु लेऊ शकतो? जोपोरोत तिये तियाअ ताकतवान माहुंहु बांधनारो अने फासाडी तो तियाआ को लुटीलो.

³⁰ जो माआरी नाहा तो माआ विरोधाम होय अने जो माआरी एखटो कोईत नाहा वेरित टाकोहो.

³¹ कोईत आय तुमामे कोत्लू मांहाआ हर एक पाप अने निंदा कोअल्याहा क्षमा कोअलाआ आवे पोन पवित्र आत्माआ नींदा कोओनाराहा माफी ने जोड़े.

³² अने जो कोडु माअहा पोऱ्याआ विरोद्धामे एखादी गोठी कोअही ताहा तिया अपराध क्षमा कोअलाआ आवे पण जो पवित्र आत्माआ विरूध किबी गोगनारू तिया तो अपराध याआ जुगोम पण नाहा अने आवनाराआ जुगोम पण क्षमा कोअनारू नाहा.

एक साड तिया फलवासी उलखात्लू

³³ साड हाजो अने तियाआ फोल पण हाजो कोआ अथवा साड वाईट अने तियाआ फोल वाईट एहलो कोला काहाके फलोपारोत साड ओलखीत्लू.

³⁴ ओ हापोओ पिलाआ, तुमु वाईट ओतलू हाजा गोठी केहलो आखू सेकतेहे, काहाके जे मोनामेहे पोअल्ये ओते तोज सुबीपो येत

³⁵ हाजू माहुहू आपाआ हाजा भांडारामोरोत हाजा गोठी काडत्लू अने वाईट माहुहू आपाआ वाईट भांडारामोरोत वाईट गोठीच काडत्लू.

³⁶ आय तुमामे कोत्लू का जो पण व्यर्थ शब्द बोबेल तियाहा न्यायाआ तेदीही तियाहा हिशोब आपा लागे.

³⁷ काहाके आपाआ शब्दाआ त्यापोरत तू निर्दोष अने शब्दाआ द्वारेच तू दोषी ठेरव्यो जानारू.

येशुपो चिन्हों मांग

³⁸ ताहा तीही शास्त्री अने परुशी यांहि तियाहा कोयु, मालिक, आमाहा ताआपोरोत किबी चिन्ह पालीलो होय

³⁹ पोन तोओ उत्तर आप्लु, ओ खराब अने व्यभिचारनी पिढी चिन्ह पालुहू मागेहे, तेबी पण याहा योना संदेष्टाआ चीन्हावाचून दिहरे चिन्ह आप्लु जानारू नाहा.

⁴⁰ काहाके जेहलो योना तीन दीही अने तीन रात मासाआ पोटाम रोला त्याप्रमाणे माअहा पोऱ्या पण तीन दीही अने तीन रात धरती पोटाम रोही.

⁴¹ न्यायाआ तेदीही निनवेचे मांहे आव पिढीई मांहाआरी उठित उभे रोही अने तियाहा दोषी ठरवीही, काहाके तिये योनाआ संदेश होम्लाडित पश्चताप कोअयु अने पाला, इंही जो होय तो योनाहुपोरोत वोडू होय.

⁴² न्यायाआ तेदीही दक्षिण हेरोन राणी याआ पिढीई मांहाआरी उठित उभे रोही अने याहा दोषी ठरवीही काहाके ते सलमोनाआ ज्ञान होम्लाड़लो कोअता धरतीई कोअहा आवयी ओती पाला, तो इंही होय जो शलमोनपेक्षा वोडू होय.

अशुद्ध आत्मा कोओ हूदत्ली

⁴³ जाहा दुष्ट आत्माआ कोडु महापोरोत निकलोलो तेहलाम विसावाकोता पाईनाहा ठीकानाम फिरीत रोतलू पण भटकोट नाहा.

⁴⁴ ताहा ते कोतली का ज्या कोअमे रोत आव्ये ओते आपाआ तियाआ कोअमे फासी फिरीत जानारू अने ते फिरीत येत ताहा तियाहा निसे ओवल्यु अने होबाडीलो पालत्ली.

⁴⁵ ताहा ते जात खुदोप रोत जाखा खराब सात आत्माहा लेत येत ते तीइही प्रवेश कोईत रोहू लागत्ले अने तियाअ माहाआ फासाडीई परिस्थिती पेक्षा जाखो वाईट ओतगोयु जाहो याआ खराब पिढीआरी पण ऐहलेच उवे.

येशुउ खरु परिवार

⁴⁶ तो तियाअ माहाआगोदिरं गोगीतीज ओतु तेहलाम तियाआ याह्ही अने पाही बारथे उभे ओते, अने त्यांआरी गोगीला ओते.

⁴⁷ अने कोडु येशुहू कोयु पाला, ताआ याह्ही अने पाही बारथे उभे होय, ते ताआरी गोगीला मागतले

⁴⁸ पोन तियाअ कोनारा उत्तर आपित तिये कोयु, कोडू होय माआ याह्ही अने कोडू होय माआ पाही?

⁴⁹ अने आपाआ चेलाही आथे देखाडीत तिये उत्तर आप्लु, पाला, माआ याह्ही अने पाही.

⁵⁰ काहाके जो कोडु माआ बाह्हाआ जो होर्गाम होय तो तियाआ इच्छापूर्ण कोअत्लू तोज माआ पाही माआ बोईही अने याह्ही होय.