मत्ती 11 - नोयरी नोवलू नियम

युहन्ना बाप्तिस्मा आपनाराआ प्रश्न

¹ एहलो उवे का जांहा बारा शिष्यांआ नियम ओलीते उवेताहा तो तिहीरोत निहित गोयु ताहा नगरामे जात संदेश आपुहू लाग्यू.

² जांहा जेलूम योहानाई ख्रिस्तमाआ कामाविषयी होमल्यु ताहा आपाआ शिष्यांआ त्याजागे ओ फुसुहू मोक्ल्यीत,

³ कि आवनारु ओतु तो तुज होय का आमाहा फासी दिहराहा वाट पालीलो

⁴ येशु तियाहा उत्तर आप्लु जे होमलिताहा अने पालताहा ओ आखे योहानाआ जात कोवा,

⁵ का आंदले पालतेहे, लेंगडे सालतेहे, कोढी शुद्ध ओये, बोयरे होमलित, मोल्या जिवंत ओये अने गोरब्योहो सुवार्ता कोल्यी जात होय.

⁶ जो माविषयी अळखळत नाहा तो धन्य.

येशुउ द्वारा युहन्नाआ आदर

⁷ योहानाआ शिष्य जात ओयताहा येशु माहुगोदीही योहाना बद्द्ल कोहू लाग्यू, तुमु जंगलूम की पालाहू गोये ओते? वाराआ सी आलनारा बोरूहू के?

⁸ फासाडी तुमु की पालाहू गोये ओते? तलम कापडे पेआडील्यो माहुंहु? पाला, तलम कापडे पेअनारे राजभवन मेहे रोत्ले.

⁹ फासाडी तुमु काहा गोये ओते? कोडा संदेष्ट्याला पालुहू? होव, अने आय तुमामे कोत्लू संदेष्ट्यहा वोडो माहुंहु,

¹⁰ ओ तोज होय ज्या बाराम लेखाल्या होय, आय आपाआ दूत ताआ आगाडी मोकलित होय जो ता आगाडी ताआ वाट तियार कोए.

¹¹ आय तुमामे खोरोज कोत्लू का, बोंयीपोरोत जोल्मो लेद्याल्यामोरोत योहान बाप्तिस्मे आपणारो यांपोरोत वोडू कोडूच निमिले नाहा, तेबी पण होर्ग्याआ राज्याम जो लाहानापो हानू होय तो त्यापोरोत श्रेष्ठ होय.

¹² योहान बाप्तिस्मे आपलो दिहेरोत ओमेजा होर्ग्याआ राज्याम सामर्थ्यावाही प्रवेश ओवुहू रोला होय आक्रमण मांहे तियापो सामर्थ्यावाही अधिकार प्रयत्न कोअता.

¹³ काहाके आखे संदेष्टे अने नियामशास्त्र योहानाआ आवेतांहजा भविष्यवाणी कोईत रोल्या.

¹⁴ जर तुमु याआ गोठीकोता मानणारु ताहा ओच एलीया होय जो आविलो ओतु.

¹⁵ ज्याहा कान होय तिये होमलित लेदलेए.

¹⁶ आय यी पिढीई लोकांची तुलना कोडाआरी कोहू? ओ मांहे बाजारामे बोहोल्यो पोर्याहोस होय, जे आपाआ दोस्ताहा आअडित कोतेहे,

¹⁷ आमू तुमा कोअता पावी वाजाडीते तेबी तुमु नाशे नाहा, आमाहा तुमा कोअता दुखो गीत गावले तेबी तुमु दु:ख कोल्यु नाहा.

¹⁸ काहाके योहान खातु अने पितु आवयू नाहा, पण ते कोत्ले तियाहा दुष्ट आत्मा लाग्यू होय.

¹⁹ माअहा पोऱ्या खायलो अने पीत आवयू अने ते कोत्ले, पाला, ओ ओडख्यू अने होराल्यू अने जकातदार अने पाप्यांआ हेगांति परंतु ज्ञान आपाआ कामाहापो न्याय कोअनारा ठरतलो.

मन नि फिरावनारापो हाय

²⁰ फासाडी ज्या नगरामे जाखो आश्चर्यकामे उवे ओते तियाहा दोष आपुहू लाग्यू काहाके तिये पश्चाताप कोअयु ने ओतू.

²¹ हाय खोराजीन, ताआ केवडी दुर्दशा उवे हाय बेथसैदा, ताआ केवडी दुर्दशा उवे काहाके तुमामे जी पराक्रमाआ सामर्थ्य काम घोडीही, ती जर सोर अने सिदोन यामे घोडीही ओते ताहा जास्तीज पालील्यो गोणताट अने खा डीलोपो घेऊन पश्चताप कोअते.

²² तेबी आय तुमामे कोत्लू का, न्यायाआ तेदीही सोर अने सीदोन ची स्थिती तुमापेक्षा हाजी रोही.

²³ अने ओ कफर्णहुमा, नाहाकोत तू स्वर्गापोरोत उसे विशिलो जाही? तू अधोलोकाहिज उतरीही, काहाके जे आश्चर्यकामे तांआम उवे होय ते जर सोदोमात कोल्यु ओते ताहा ते ओमेजा बोनीत रोल्या ओते,

²⁴ तेबी पण आय तुमामे कोत्लू का, न्यायाआ तेदीही ताआ स्थितीपेक्षा सदोम स्थिती सहन कोईला एतो रोही.

येशुउ जागे आराम

²⁵ तियाआ समयी येशु कोयु, ओ ओबा, होर्गा अने धोरती प्रभू, आयताआ स्तुती कोअत्लू का, तू याआ गोठी ज्ञानवान अने बुद्धिमान माहापरोत निकाडीत पोऱ्या पोओ प्रकट कोअल्यो होय.

²⁶ ओ ओबा, काहाके ओच ताहु योग्य देखायो.

²⁷ माआ बाह्हाआ त्यापोरत माहु आखे किबी आप्लु होय, अने बाह्हाप रोत पोऱ्याहा कोडु उलखित्लू नाहा अने पोऱ्यावाचून अने ज्या कोटास तियाहा प्रकट कोअलाआ पोऱ्या इच्छा होय त्याच्यावाचून बाह्हाहा कोडु उलखित्लू नाहा

²⁸ ऐ, थाकले अने पारावाही दोबाले मांहे, तुमु आखे मा आहने आवा, आय तुमाहा आराम आपीही.

²⁹ माआ जुवालो आपापो विसित ल्या अने मापोरोत हिकिलो काहाके आय नम्र अने मोनाकोईत गरीब होय अने तुमाहा तुमा मोनामे आराम जोडे.

³⁰ काहाके माआ जू हीदू अने माआ वोझो ओलको होय.