मत्ती 10 - नोयरी नोवलू नियम

बारा प्रेरित

¹ ताहा येशु आपाआ बारा चेलाहा हादीत तियाहा अशुद्ध आत्मा पोओ अधिकार आप्यू का तियाहा काडे अने आखे भातिई बिमारीही अने आखे भातिई कोमजुरीही सेटे कोए.

² ओमे बारा प्रेषितो नाव ओ होय पेल्लु शिमोन जो पेत्र कोवात्लु अने तिया पाही आंद्रिया, जब्दिई सूऊ याकोब अने तिया पाही योहान,

³ फिलीप्प अने बरतुल्मै, थोमा, अने मतय जकातदार, अल्फीई सूऊ याकोब अने तद्दै,

⁴ शिमोन कनानी अने यहुदा इस्कर्योत जोओ तियाहा तोईत आप्लु.

चेलाहा सेवा कोअता मुकलिलोओ

⁵ या बारा जोआहा येशु ए आज्ञा आपित मुकल्यू अन्यजाति वोगे जाऊ नाहा अने शमरोनआ कोडनीबि नगरामे प्रवेश कोहू नाहा,

⁶ याआ उद्देश इस्राएल घरानाआ जे टाकावल्यो मेंढे होय त्याजागे जायलो.

⁷ अने सालता-सालता तुमु ओ संदेश कोजा स्वर्गाचे राज्य आरी आवयोहो.

⁸ बिमारोहो हाजो कोआ मोल्याहा जिवंत कोआ कुष्ठ रोगीही शुद्ध कोआ. दुष्टात्माहा काडा तुमामे फुकट्यो आप्लु होय फुकट्यो आपा.

⁹ आपाआ बटवा मेहे सोनो, चांदी किंवा तांबो लेऊ नाहा.

¹⁰ अने प्रवासाकोता थेय्ली, दिहरो कापड़ो अने चप्पल किंवा काठी लेऊ नाहा काहाके मोजरया आपाआ अन्नाचे हक्कदार होय.

¹¹ ज्या गावून किंवा शहरामे तुमु प्रवेश कोअहा ताहा विसारपूस को का योग्य माहुहू कोडू होय, अने जो पर्यंत आविलो तोपोरोत तिहीज रो.

¹² जांहा तुमु तिया कोअमे प्रवेश कोअनारू ताहा शांतीचा आशीर्वाद आपा.

¹³ जर ते को आशीर्वादाचे योग्य होय ताहा तुमाआ शांती तीइही बोणीत रोही पण योग्य नेशेय ताहा तुमाआ शांती फासी फिरीत आवे.

¹⁴ जो तुमाहा ग्रहण कोअनारू नाहा अने तुमाआ गोठीपो लक्ष्य आपी नाहा ताहा तियाअ कोअमे रोत अने तिया शहरामरोत जाआत्लू आपाआ पायावाले धूळ फोकडीत टाका.

¹⁵ आय तुमाहा खोरोज कोत्लू का येशु तेदीही तियाअ शहराआ किंवा गावोओ स्थिती सदोम अने गमोरा देशाआ स्थिती प्रमाणोओ उवे.

आवनारु कठिन टाईम

¹⁶ पाला आय तुमाहा मेंढरा प्रमाणोओ लांडगामध्ये मोकलित होय. त्यापोत हापाहोस चतुर अने कबुतरा होसे साफ निरुपद्रवी व्हा.

¹⁷ पण माहामोरोत सावधान रो काहाके ते तुमामे न्यायसभाम आधीन कोआ, आपाआ सभास्थानात तुमाहा फटके देय.

¹⁸ तुमु माआ वोजोसे देशधिकाराहा अने राजाहा आगाडी उपस्थित कोअनारू ज्यायाकोलो अन्यजाति तुमु साक्ष बोनाळीलो.

¹⁹ जाहा ते तुमाहा तोअणारू ताहा कालजी कोहू नाहा, का आमाहा की अने केहलो कोहू काहाके जे किबी तुमाहा कोओलो होय ते तियाआ टायमोमें तुमाहा कोयु जाइअलो.

²⁰ काहाके गोगनारे तुमु नाहा पण तुमाआ होर्गा बाह्हाआ आत्मा होय जो तुमाआरी होय बुले.

²¹ पाही आपाआ पायहोहो अने बाह्हू आपाआ सुआहा माईत टाकिला कोअता अने सोऐ आपाआ याह्ही बाह्हाआ विरूध उभे रोत तियाहा माईत टाकीदेय.

²² माआ नावोवाही आखे तुमामे तुच्छ मानणारु पण जो शेवटपोरोत धीर तोही तियाच तारण उवे.

²³ जांहा तुमामे आव शहरामे तुमाआ छळ कोअनारू ताहा दिहरा शहरामे नाहीत जायलो, काहाके आय तुमामे खोरोज कोत्लू का या आगाडी तुमु इस्राएलो आखे शहरामे गावून फिरुहू संपाही नाहा, तोपोरोत माअहा पोऱ्या आविलो जानारू.

चेला ओवलोओ अर्थ

²⁴ शिष्य आपाआ गुरुपोरोत वोडू रोतू नाहा अने सेवक आपाआ मालकापेक्षा वोडू रोतू नाहा.

²⁵ शिष्यामे आपाआ गुरु अने नोकराहा आपाआ मालकाहा आरी रोहिलो एवडोज तियाहा जाअखो होय जर तिये कोओओ मालकोहू शैतान कोयु, ताहा कोओओ मांह्हू केतो तेबी जाखा कोय.

कोडाआ बिहुहू जुवे?

²⁶ त्यापोत तियाहा भिईलो नाहा काहाके किबी टापित मेकल्ये नाहा जे उघडीन्या जानारू नाहा अने नाहा किबी लीकाल्यो होय जे होमजे नाहा.

²⁷ जे आय तुमामे आंदाराम कोत्लू ते तुमु उजालाम कोआ, अने जे तुमु मनेज कानाकी होम्लाडित तियाहा कोअलापो सोडवीत संदेश दया.

²⁸ तियाहा भिईलो नाहा जे डीलाआ नाश कोअता पण आत्माहा नाश कोहू शकत नाहा पण तिया बिक माना जो आत्माआ अने डील बेनुहू नरकाआ नाश कोहू शकतो.

²⁹ होमला रुप्यामे बेन सीडे वासत्ले का नाहा तेबी पण तुमाआ बाह्हू इच्छेवही तियाआ मायरोत एकपण धरतीपो पोडहू शकत नाहा.

³⁰ तुमाआ मुंडकामेऱ्ये सिंज्ये पण गीणीत मेकल्यु होय

³¹ त्यापोत भिईलो नाहा तुमु जास्तीज सिडाप रोत पण किमती होय.

येशुहु ग्रहण कोअलो के इन्कार कोअलोओ

³² जो कोडु मांहो आगाडी माहु ग्रहण कोए आय पण तियाहा मा बाह्हा आगाडी जो होर्गाम होय ग्रहण कोअनारू.

³³ पोन मांहो आगाडी माहु जो ग्रहण कोअनारू नाहा तियाहा आय पोन आपाआ ओबापोरोत जो होर्गाम होय ग्रहण कोअनारू नाहा.

³⁴ एहलो सोमजीतलो नाहा का आय धोरतीपो एकठे कोइला कोअता आवयू होय आय ओ कोइला कोअता नाहा पण तलवार चालविलाकोता आवयू होय.

³⁵ आयताहा याकोअता आवयू होय का मांहोहो तियाआ बाह्हाआ अने पोरीही आपाआ याह्ही अने वोवड़ीह्ही हावेहेहए विरूध कोअला आवयू होय.

³⁶ अने माअहा दुश्मन तियाआ कोओज माहुहू रोही.

³⁷ जो मारोत जाखो आपाआ याह्ही किंवा बाहापो प्रेम कोअत्लू तो माआ लायकी नाहा. जो मांपोरोत जाखो आपाआ पोऱ्यापो किंवा पोरी पो प्रेम कोअत्लू तो माआ लायकी नाहा,

³⁸ अने जो आपाआ क्रूस विसित माआ फासाडी चालते नाहा तो माआ लायकी नाहा.

³⁹ जो आपाआ जीव वासाडे तोओ तियाहा गोमावीत आपी अने जो कोडु माआ वोजोसे आपाआ जीव आपे तो तियाहा वोसाड़े.

प्रतिफल

⁴⁰ जो तुमाहा ग्रहण कोअत्लू तो माहु ग्रहण कोअत्लू अने जो माहु ग्रहण कोअत्लू तो माहु मोकलीनाराहा ग्रहण कोअत्लू

⁴¹ जो संदेष्टाहा संदेष्टा कोईत ग्रहण कोअत्लू, तो संदेष्टाआ फोल मिलवे जो नितीमानाहा नीतिमान मांहु कोईत ग्रहण कोअत्लू तो सन्मानो प्रतिफोल मिलवे.

⁴² जो कोडु या हाणाम एकाहा शिष्य माजित एक गिलास हेलो पाई आपही ताहा आय तुमामे खोरोज कोत्लू, ताहा तो आपाआ फोल गमविणारच नाहा.