लूका 8 - नोयरी नोवलू नियम

येशुउ शिष्या

¹ तिया फासाडी एहलो उवे का येशु देवोओ राज्य विषयी सुवार्ता कोत्ले ताहा नगर-नगर अने गाव-गाव फिरीत ओतु तियाआ शिष्य पण तियाआ आरी रोत ओते,

² तियाआ आरी किबी बोई पण रोत कोयु तिये माद्वाड्यो अने दुष्टात्मा त्यापोरोत सोडव्ये ओते यामेहे मरिया मग्दलिनी नावाआ एक बुई ओती तीही सात दुष्टात्मा त्यापोरोत सोडव्ये ओते,

³ हेरोदाआ कारभारी खोजा याहा लाडी योअन्ना तेहलूज सुस्सना अने दिहरी खूप बोई कोयु याआ बोई आपाहाज वस्तुवाही येशु अने तियाआ शिष्य याआ सेवासाकरी कोईत कोयु.

बीज उरनाराआ दृष्टांत

⁴ जाहा नगर-नगर मायरोत लोकांची गोर्दी तिया जागे आवीत ओती तेहलाम तिये तियाहा एक दृष्टान्त कोयू,

⁵ एक खेती कोअनारू आपाआ आकाश बी पेईलाकाजे गोल्यो तिये जांहा बी पेहे तेहलाम किबी बी वाटेपो पोडये अने ते सिडे विसित खात गोये.

⁶ थोड़े खोडकावलो धरतीपो पोडये ते पिगलो नाहा होलकोइते उगविताज वोलीत गोये.

⁷ थोड़े बी काटामेहे पोडये ते वोद्येहे परंतु काट्यांमुळे दाबल्यो गोये.

⁸ थोड़े बी हाजा जमीनोम पोडये ते उग्येहे अने होव पट्ट पेक्षा जाखा फोल आव्ये याआ गोठी कोयु ओतलू वोडो आवाजोवाही कोयु, ज्याआ जागे ऐकावयास कान होय तिये होमले.

दृष्टांतोओ उद्देश

⁹ तियाआ शिष्यांनी तियाहा फ़ुस्ल्याआ आव दृष्टान्त अर्थ नाहाकोत होय?

¹⁰ तो तियाहा कोयु, परमेश्वरआ राज्याविषयी गूढ जाईत लेअले तुमामे आप्लु होय परंतु दिहराहा दृष्टान्त वेले आप्लु होय याकोअता का तियाहा देखाहे ओतलू पाल्हू कायना अने होमलित कोईत होमज्यू कायना.

बीज उरनाराआ दृष्टांतोओ अर्थ

¹¹ आव दृष्टान्त अर्थ एहेलू होय बी परमेश्वरोओ वचन होय.

¹² जेबी वाटेपो पोडये ओते ते ओ माहहू होय का वचन होमलित तेहलाम शैतान आविलो तियाआ मोनोमरोत वचन काढीत लेहो यकोअता का ते विश्वास कोहू कायना अने त्याआं तारण ओवुहू कायना.

¹³ जेबी खोडकावलो जमिनोम पोडये याआ अर्थ ओ होय जे माहहू जांहा वचन होमलित अने आनंदावाही ग्रहण कोअता परंतु तियाआ विश्वास मजबुते नाहाकोईत ते किबी टायमोपोजा विश्वास कोअता अने परीक्षा आवयी का विश्वास मेकीत नाहा.

¹⁴ अने जेबी काट्यामेहे पोडये होय तियाआ अर्थ ओ होय काजे माहहू वचन होम्लाडित परंतु जांहा ते आपाआ वाटी जातेहे, तेहलाम चिंता धन अने जीवनोमे हुख दुख यामेहे दाबीन जातलेत्याआ उपो पक्को फोल आवीत नाहा.

¹⁵ अने हाजा धरतीपो पोडल्ये बी याआ अर्थ ओ जे माहहू जे हाजा अने खोरो मोनाकोईत वचन होमलित तियाहा ते ग्रहण पण कोअता फासी ते आपाआ धीरावाही फोल आपत्ले.

दिवाआ दृष्टांत

¹⁶ कोडोबी दिवू बासनाआ नीसे ने मेकतलु होय अने ने खाटलाआ नीसे मेकतलु पोन तियाहा दिवठणीपो मेकतलू म्हणजे जे जागे आवत्ले तियाहा उजालो आपुहू गोयो

¹⁷ प्रकट उवे नाहा एहलो किबी टापित मेकल्ये नाहा, अने किबी उघडकीस आविलो एहलो किबी गुप्त नाहा

¹⁸ याकोअता लक्ष्य आपित होमला काहाके ज्यापो होय तियाहा जाखा आपलो आवे ज्यापोओ नाहा त्याआरोत जे देखाहे होय ते पण मागित लेधलो जाइअलो.

येशुउ खरु परिवार

¹⁹ तियाआ वेले येशुउ याह्ही अने तियाआ पाही तिया जागे आव्ये परंतु गर्दीवही ते त्याजागे जाऊ सेकेले नाहा.

²⁰ याकोअता येशुहू कोयु गोये का ताआ याह्ही अने पाही बारथे उभे होय ते ताहु मिलुहु इच्छिता.

²¹ परंतु येशु उत्तर आप्लु, माआ याह्ही अने माआ पाहीओ होय काजे परमेश्वरोओ वचन होमलित अने तेहलो सालतेहे.

वारु अने वादुऊ शांत कोअलो

²² फाशे होमला तेदीही एहलो उवे का तो आपाआ चेलाआरी नावूमे सोढयू अने तियाहा कोयु, चाला आपु समुद्राआ तिवोल जाऊ तेहलाम तियाआ नाव सोडीत.

²³ जाहा ते नाव चालती ओते येशु निंदेम गोल्यो समुद्राम वादोल उठ्यो अने नावीमेहे पाई पोअहू लाग्यो अने ते संकटाम पोडये.

²⁴ ते तियाआ जागे आव्ये तियाहा उठाडीत कोईत कोयु, “गुरुजी, आपु बुडूहु बाजीत रोल्या होय.” ताहा तो उठीत कोईत तिये वाराहा अने लाटांना धमकावयू अने ते थोब्यो अने तियाअ जागापो निवांत उवे.

²⁵ अने तिये तियाहा कोयो तुमाआ विश्वास किही ओतु पोन ते बितगोये ओते अने विहरीत गोये ओते ते आपसामेहे कोयु, आखिर ओ होय तेबी कोडू जो वारू अने पाई बेनुहू आज्ञा आपी अने ते तियाआ होमलित लेदे.

दुष्टत्माहा बारथे काड्यु

²⁶ फासी ते गिरासेनि गालिलाआ भागुम पुग्या जे गालील समुद्राआ तिवोल ओतु.

²⁷ जेहलो एतो किनारावपो उतरीलो नगरामेहे एक माहहू तियाहा मिल्यू तीयाम दुष्ट आत्माआ वास कोअयु ओतु जाखो समय पर्यंत तिये कापडे काल्ये निमिले, अने कोआत रोला ने ओतू परंतु कब्रामेहे रोत ओतु.

²⁸ जांहा येशुहू तिये पालील्यो तो आअडित तियाआ गूडाम आवयू अने उचो आवजावाही कोयु, ओ महान देवाच्या पोऱ्या, येशु ताहु मापोरोत नाहाकोत हवे? आय विनंती कोअत्लू का माहु पिडा आपुहू नाहा.

²⁹ तिये तियाअ दुष्टात्माहा तियाअ माहुमरोत बारथे निहालाकाजे आज्ञा आप्यू काहाके तियाअ अशुद्ध आत्मावांहि तियाअ माअहुहू जाखो टायमोआ तोअल्यो ओते एहलो टायमोमें तियाहा हाकलेवाही बांधीत राखावली कोईत ओते परंतु तो हमेशा ते हाकील तोडीत टोकीत एहलो अने दुष्टात्मा तियाहा जंगलूम घेऊन जात एहलो.

³⁰ तेहलाम येशु तियाहा फ़ुस्ल्याआ, “ताआ नाव नाहाकोत होय?” तिये कोयु, सैन्य, काहाके तीयाम खूप दुष्टात्मा ओते.

³¹ ते तियाहा विनंती कोहू लागाडीत का तियाहा अधोलोक कुण्ड मेहे जाऊ आज्ञा मा आपिही.

³² ओमे पाला, तोयोज तियाअ जागापो डोगोपो डुकरांआ एक वोडू टोलु चोरतू ओते खराब आत्माआ विनंती कोअयी का आमाहा तियाआ माय जाऊ आपलो तेहलाम तिये तियाहा आज्ञा कोअयी.

³³ तिया टायमोमें ती दुष्टात्मा तियाअ माहुमरोत निहित तियाअ डूकरामेहे फोहयी अने ती डुकरा धडक गुगदीत जात तियाअ काडापोरोत निसे समुद्रामेहे बुडीत मोइत गोयी.

³⁴ त्या हूवरे चारनारा ओ पालीत नाहित गोये अने नगर अने गोवोमेहे जात याविषयी कोयु.

³⁵ फासाडीनंतर तीही मांहे जे घोडये ते पालीलाकोता बारथे आव्ये ते येशुहू मिल्ये, अने ज्या माय दुष्टात्मा वास कोल्यु ओते तो माहहू येशुउ गूडाम बोहीतरोल्यु पेल्लु तियाअ माहुई कापडे काल्ये ओते अने तो शुद्धीपो आवल्यु देखायू अने ओ पालीत आखे बितकोईत उवे.

³⁶ जिये पालील्यो तियाअ माहु कोयु, दुष्टात्मा लागल्यो माहुहू केहलु हाजू ओवयू.

³⁷ यापो गिरासेनि भागोमेऱ्या आखे रेहेवाशाही विनंती कोअयी का तिये तियाअ ती जागेरोत निहित जालो काहाके आखे बितगोये ओते तेहलाम येशु नावूमे आवयू अने फासी गोल्यो.

³⁸ परंतु ज्या माहुमरोत दुष्टात्मा निघाल्यू ओतु तो येशुहू आपाआरी आविलाआ विनंती कोईत ओतु त्यापो येशु तियाहा कोयु का,

³⁹ कोआ जात जे परमेश्वराने ता कोअता कोल्यु ते आखे कोअलो, तेहलाम तो फासी गोल्यो येशु जे किबी त्यांकोअता कोल्यु ते आखे नगरोत उपदेश कोइत फिर्यु.

रोगी बुई अने मोअली सुईही जीवनदान

⁴⁰ ओमे पाला, जांहा येशु फासि आवयु, तेहलाम मांहे गोर्दीवाही तियाआ स्वागत कोल्यु काहाके ते तियाआ वात पालीत ओते.

⁴¹ तोयोज याईर नावाआ एक माहहू त्याजागे आवयू तो तियाअ मंदिरो धर्म सभांआ यहुदी अधिकारी ओतु तो येशुउ गूडाम आवयू तिये आपाआ कोआ आवे कोईत विनंती कोअयी.

⁴² काहाके तियाआ बारा वर्षाची पोऱ्यी मोअनारू ओती जाहा येशु जातु ओतु ते गोर्दीम त्यापो पोडीत जाहू कोअती ओती.

⁴³ तियाआ जागापो एक बुई ओती तीही बारा वर्षापोरोत रक्तस्राव उवनारा ओतु जे किबी तीयीआरी ओते तीही खोर्चू कोईत बोडवाहा आपित टाक्ये ओते परंतु ती हाजी उवी नाहाओती,

⁴⁴ ती तियाआ फासाडी आवयी अने तियाआ कापड़ाआ गोंडाहा स्पर्श कोअयु ताहाज तीई रक्त आविला बंद उव्यो.

⁴⁵ तेहलाम येशु कोयु, ते कोडू होय, जीआ माहु स्पर्श कोअयु होय जांहा आखे नाहाकोत कोईत ओते पेत्र कोयु, आखे माहु ताहु वेडिले होय अने आखे तापो पोडीत होय.

⁴⁶ पोन येशु कोयु, माहु कोडूबी स्पर्श कोअयु होय, काहाके होमज्यू होय मामेरोत शक्ती बारथे निहथी होय.

⁴⁷ तिया स्त्रीने जांहा पालील्यो का आय निकाहू शकली नाहा तेहलाम ती कापीत येशुउ गूडाम आवयी तीही आखे माअहाआ आगाडी कोयु का आय तियाहा स्पर्श कोअयु अने केहलो लागेज हाजी उवी.

⁴⁸ यापो येशु कोयु बेटी, ताहु ताआ विश्वास हाजो कोल्यु होय शांतीई जा.

⁴⁹ तो गोगीतीज ओतु एतांम यहुदी धर्म सभाआ मुख्य याआ कोअमे रोत कोडु आव्ये अने कोयु, ताआ पोऱ्यी मरण पाव्यी होय ओमे गुरुहू मेहनत आपुहू नाहा.

⁵⁰ येशु ओ होमलित, भिईलो नाहा, विश्वास तो, ती वासे.

⁵¹ जांहा येशु तिया कोअमे आवयू ताहा तिये आपाआरी पेत्र, योहान, याकोब अने पोरीइ याह्ही बाह्हू व्यतिरिक्त कोडाहीबी आपाआरी आवहू नाहा देदे.

⁵² आखे मांहे तियाअ सोहीकोअता रडीत ओते दुखी उवनारा ओते येशु तियाहा बोलतुल्यो, रोडीलो बंद को काहाके ती मोयी नाहा परंतु हुवयी होय

⁵³ यापो मांहे तियापो ओहल्ये काहाके तियाहा मालुम ओते का पोऱ्यी मोयी होय

⁵⁴ येशु तियाअ पोरी आथे तोअयू अने तीही आवाज आपित कोयु, “बेटी, उठ”

⁵⁵ अने तीई आत्माआ फासी आवयू अने लागेज उठित उबी रोली येशु आज्ञा कोअयी का यीही किबी खाहुं दया.

⁵⁶ यापो पोऱ्यीइ याह्ही बाह्हू जाखो थक्क उवे काहाके येशु तियाहा आज्ञा कोअयी का जी घटना घोडीही होय ओ कोडाआ कोहू नाहा.