लूका 7 - नोयरी नोवलू नियम

सुबेदारो विश्वास पोओ येशु अचंभित ओवयु

¹ जाहा ते माहुंहु ए आखे गोठी कोत आप्यी ओती, तेहलाम कफरनहूम मेहे आयु ताहा.

² तीइही कोडू होमला सुबेदाराआ एक दास जो तिया गोमनारू ओतु, बिमारीम मोअनारू ओतु.

³ तिये येशुउ चर्चा होमलित यहुदीआ कोयु मुख्य याजक ए विनंती कोअला तियाआ जागे उबडो का आवीत माआ दासाहा हाजो कोअही.

⁴ ते येशु जागे आव्ये, अने तियाहा विनती कोईत कोहू लागाडीत, “तो याआ योग्य होय का तू याआ याकोअता ओच कोअही.”

⁵ काहाके तो आमा जातीपो प्रेम कोअत्लू, “अने तीयेज आमा प्रार्थना कोओहो बोनाडहि होय.”

⁶ येशु तियाआ आरी गोल्यो, पण तेहलाम तो कोअ रोत सेटे नाहा ओतु, ताहा सुबेदाराही तियाआ जागे जाखो दोस्तापोरोत कोत मोकल्योहो, ओ प्रभू, दु:ख विसीत नाहा, काहाके आय याआ लायक नाहा का तू माआ छता निसे आवजी.

⁷ याज कारनोवाही माहु ताआ योग्य होमाज्या का आयताआ जागे आवी, पण वचन पण कोयूताहा माआ सेवक हाजू ओत जाय.

⁸ आयताहा ताबेदार माहुहू होय, अने शिपाई माआ आथोमेहे होय; एक जांहा एकाहा कोय, जा; ताहा तो जात्लू; अने दिहराहा कोत्लू, “आव” तो आवत्लू, अने आपाआ कोडल्या होमला दासाहा का ओच, “को; ताहा तो तीयाहा कोअत्लू”

⁹ ओ दिहराहा येशुहू आश्चर्य उवे अने तिये सोब फेरवित तिया गोर्दी जी तियाआ फासाडीच आवीत ओती, कोयु, “आय तुमामे खोरोज कोत्लू का माहू इस्रायला मेहे बी एहेलू विश्वास पाल्यु नाहा.”

¹⁰ अने मोकलील्या माहुहु कोआ जात तियाअ दासाहा हाजो कोल्यु.

मोअलाहा जीवनदान

¹¹ थोडो दिहो नंतर ते नाईन नावोओ होमला गोये तियाआ शिष्य एक वोडी गोर्दी तियाआ आरी जात ओती.

¹² जाहा तो नगराआ फाटलो जागे पुग्यु, तेहलाम पाला, मांहे होमला मोअलाहा लेतजात ओते; तो तिया याह्हीइ एकुच पोऱ्या ओतु, अने तेऐ रोंडाली ओती; अने नगराहा जाअखो मांहे तियाआ आरी ओते.

¹³ तीही पालीत प्रभूहु दया आवयी, अने तिये कोयु, “रोडा नाहा”

¹⁴ तेहलाम तो जागे आवीत तिरडीला स्पर्श कोअयु अने विसनारे थोबिलो गोये तेहलाम तिये कोयु, “ओ जुवाने आय ताहु कोयु होय, उठ.”

¹⁵ तेहलाम तो मोल्यू उठित बोहयु, अने गोगीला लाग्यू तिये तियाहा तियाआ याह्ही जागे होफहोपिन आप्लु.

¹⁶ याआ मुळे आखे बितकोईत उवे, अने ते परमेश्वरोओ गौरव कोईत कोहू लागाडीत, “आमा माय एक वोडू भविष्यवक्ता उत्पन्न ओवयू होय अने परमेश्वराई आपाआ माहाहूपो कृपा नजर कोअयी.”

¹⁷ अने तियाआ विषयी ए गोठी आखो यहूदिया होय आजू बाजुऊ आखे तियाहा पसरीत गोयी.

युहन्ना बाप्तिस्मा आपनाराआ प्रश्न

¹⁸ योहानाआ तियाआ शिष्यांनी आव आखे गोठीई सुसमाचार आप्यू.

¹⁹ ताहा योहानावाही आपाआ शिष्या मायरोत बेनुहू हादीत प्रभू जागे ओ फुसुहू मोकल्ये, “नाहाकोत आवनारू तांहुज होय, नाहा ताहा आमाहा दिहरा वाट पालहू?”

²⁰ ते तियाआ जागे आवीत कोयु “योहान बाप्तिस्मे आपणारो आमाहा ओ फुसुहू मोकल्योहो होय नाहाकोत आवनारू तांहुज होय, का आमाहा दिहराआ वाट पाल्हू?”

²¹ तिया वेळेपू तिये जास्तीज जोह बीमारी मायरोत अने पिडा मायरोत, अने दुष्टात्मा मायरोत सोडव्यो; अने जास्तीज आंदलाहा हाजो कोल्यु,

²² अने तिये तियाहा कोयु, जे आखो तुमु पालील्यो अने होमल्येहे, जात योहानाआ कोत दया; आंदले पालल्ते अने लेगडे सालुहू कुष्ठ माद्वाड्यो शुद्ध कोअल्यो जातेहे बारथे उनाहू लागत्ले अने मोल्या उठाड्यो जातेहे अने गरीबोहो सुवार्ता होम्लाडी जाहो.

²³ धन्य होय ते मांहे माआ विषयी अळखळत नाहा.

²⁴ जाहा योहानाआ मोकलील्ये मांहे जातल्या गोयी फासाडी येशु योहानाआ विषयी माहुंहु कोहू लाग्यू, “तुमु जंगलूम की पालुहू गोये ओते? की तिही हालत ओते तियाअ बोरूला?”

²⁵ ताहा फासाडी तुमु नाहाकोत पालुहू गोये ओते? की कोमल कापडे पेआडील्यो माहुंहु? पाला? जो भडक कापडे पेअत्लु अने हुख, चैन माय रोत्ले, ते राज वाडामे रोत्ले.

²⁶ ताहा की पालुहु गोये ओते? की कोड्ल्या भविष्य वक्त्या? ओ, आय तुमाहा कोत्लू, नहाते भविष्यवक्ताआ पण वोडाहा.

²⁷ ओ तोज होय, ज्याआ विषयी लेखाल्या होय, “पाला आय आपाआ दूतोहो ताआ आगाडी-आगाडी मोकलितलु, जो ताआ आगाडी ताआ मार्ग हीदू कोअही.”

²⁸ आय तुमामे कोत्लू काजे बोई पोरोत जनम्यो होय, तियाआ मायरोत योहानाआ पेक्षा वोडू कोडूच नाहा पण जो परमेश्वरोओ राज्याम आयताम आयतु होय, तो तियाआ पेक्षा पण वोडू होय.

²⁹ अने आखे साधारण माहु होमलित को वसूल कोआनाराहा जकात बायणो हाथी पण योहानाआ बाप्तिस्मे आपित परमेश्वरोओ खोरो जाईत लेधलो.

³⁰ पोन परुसी अने शास्त्री यांहि तियाहा बाप्तिस्मे न आपित परमेश्वरोओ संकल्पाल व्यर्थ कोल्यु.

³¹ “आखरी आय आव युगाआ लोकांची उपमा कोडाआ आपुहू का ते कोडाहोस होय?”

³² ते तियाअ पोऱ्या सारखो होय जो बाजारामे बोहितरोलो एक दिहीराहा आयडीत कोतेहे, आमाहा तुमाआ याकोअता पावी वाजवली, अने तुमु नाशे नाहा; आमाहा आअडीलो कोअयु, “अने तुमु रोडीलो नाहा.”

³³ काहाके योहान बाप्तिस्मे आपणारो नाहा भाकर खायलो आवयू नाहा द्राक्ष रोह पीत आवयू अने तुमु फासाडी तीयाम दुष्ट आत्माआ होय;

³⁴ माअहा पोऱ्या खातपितो आवयू होय, अने तुमु सांगतात पाला ओ ओड्ख्यू अने होराड्यु मांहु जाकात दाराआ अने पाप्याआ हेगांति होय

³⁵ पण ज्ञान आपाआ आखे पोऱ्या त्यापोरत खोरो ठेरवीही गोये होय.

शमोन फरीसी कोओ पापी बुईही माफी

³⁶ कोईत कोडु होमला परुश्याआ तियाहा विनती कोअयी का तो तियाआ आरी रोटू खाय, आखरी तो तियाअ परुशीई कोआआ माय जात रोटू खाअहु बोहयु.

³⁷ त्या नागरमेऱ्यो एक पापी बुई ओ होमजीत का तो परुशीई कोअमे रोटू कोअला बोहयु होय, संगमरमराआ बासनाम हजुबास तेल लाविले,

³⁸ अने तियाआ गुडाआ जागे, फासाडी उबी रोत, रडीत ओयताहा तियाआ गुडाहा आहावावाही पिगव्यी अने आपाआ मुडीई केहावाही नुसीलो लागाडीत, अने तियाआ गुडाहा घडी-घडी चुंबन लेत तियापो हाजलावास तेल लागाडले.

³⁹ ओ पालीत तो परुसी जिये तियाहा हादाडल्यो ओते, आपाआ मोनामे विचार कोहू लाग्यू, “केधी ओ भविष्यवक्ता ओयतर इये होमजीत लेदो रोतत्त्लो का जी ए तियाहा हिवीत होय ती, कोडू अने केहली बुई होय काहाके ती पापी होय.”

⁴⁰ येशु तियाहा उतरे माय कोयु, “ओ शिमोन, माहु ताहु किबी तेबी कोओलो होयतो बोलतुल्यो,” “ओ गुरु कोअलो.”

⁴¹ “कोडु होमला सावकाराआ बेन कर्जदार ओते, एक पाचहोव अने दिहरू पन्नास दिनारोंआ ओतु.

⁴² जाहा तियाआ जागे पोतादिलोकोअता किबी जोडयेहे नाहा तेहलाम तिये तियाहा क्षमा कोईत आप्यी, याआ याकोअता तीयाम कोडू त्याआरी जाखो प्रेम मेकीही?”

⁴³ शिमोनाआ उत्तर आप्लु, “माआ ध्यानाम ते ज्याहा तिये जाखो सोडीत आप्लु” तिये तियाहा कोयु, “तू हाजलुज विचार कोअयु होय.”

⁴⁴ अने तिया बोथिई जागे फिरीत तिये शिमोनाआ कोयु, “नाहाकोत तू आव बुईही पालीत होय? आयताआ कोअमे आवयू परंतु माआ गुडू तुवीलो याकोअता पाई आप्लु नाहा, पण तीही माआ गुडू आह्वावांही पिगव्यी अने आपाआ केहावाही नुसल्यो.

⁴⁵ तू माहु चुंबन आप्लु नाहा पण अने आय जोयरोत आवयू होय तोयोरोत तीही माआ पायाल चुंबन आपलो सोडये नाहा

⁴⁶ तू माआ मुंडकापो तेल लागाडले नाहा पण इयेज माआगुडापू हजुबास तेल लागाडले होय

⁴⁷ याआ याकोअता आय ताहु कोत्लू का यिई पाप जाअखो ओते ते क्षमा कोल्यु, काहाके इयेज जाखो प्रेम कोल्यु; पण ज्याआ थोडो क्षमा उवे तो थोडोज प्रेम कोअत्लू”

⁴⁸ अने तिये बुई ला कोयु, “ताआ पाप क्षमा उवे.”

⁴⁹ तेहलाम ते मांहे तियाआ आरी रोटू कोअला बोह्ये ओते, ते आपाआ-आपाआ मोनामे विचार कोअला लागाडीत “तो कोडू होय जो पापोओ पण क्षमा कोअत्लू?”

⁵⁰ पोन तिये बुई ला कोयु, “ताआ विश्वास ताहु वासाडीत लेधलो होय, शांतीई निहित जा.”