लूका 6 - नोयरी नोवलू नियम

येशु सब्तओ प्रभु

¹ फासाडी शब्बाथआ तेदीही तो गोवोओ खेतामेरोत जात ओतु अने तियाआ शिष्य कोंहे तोडीत-तोडीत अने आथो कोईत सोलीन खात जात ओते.

² तेहलाम पारुश्यामरोत केते जोओ कोहू लागाडीत, “तुमु ते काम काहा कोअता जे शब्बाथाआ तेदीही कोअला योग्य नाहा?”

³ येशु तियाहा उत्तर आप्लु कि तुमु ओ वाचले नाहा काहा दाविद जांहा तो अने तियाआ हेगांति पुखल्ये ओते ताहा कि कोल्यु?

⁴ तो केहलु परमेश्वरोओ कोअमे गोल्यो अने भेटीई रोटा खाद्योओ ज्याहा खाअलाकोता याजकाहा सोडीत दिहीराहा खाअला योग्य निमिले अने आपाआ दोस्ताहा पण आप्लु?

⁵ अने तिये तियाहा कोयु, माअहा पोऱ्या शब्बाथ दिहिओ प्रभू होय.

सब्त दिह रोगिही हाजु कोअयु

⁶ एहलो उवे का कोडला दिहरा शब्बाथ च्या तेदीही तो मंदिरोम जात हिकुहू लाग्यू अने तीइही एक माहुहू ओतु अने तिया आथे उगात गोल्यू ओतु.

⁷ शास्त्री अने परुसी तियापो दोष लागाडिया योग्य वेल जोडोन्याहा नदोम ओते का पाल्हू शब्बाथआ तेदीही हाजो कोअत्लू का नाहा.

⁸ पण तो तियाआ विचार होमजाडीत ओतु; त्यापोत तिये उगालू आथाआ माहुंहु कोयु, “उठ मायज उबु रो”, तो उठित उबु रोला.

⁹ येशु तियाहा कोयु, आय तुमामे ओ फुसल्यू का शब्बाथ च्या तेदीही काहा योग्य होय हाजो कोअला का वाईट कोअला जीवोहो वासाडीतो का नाश कोईओलो?

¹⁰ तेहलाम तिये चारही सेटे तियाअ आखाहा पालहु तिया माहुंहु कोयु, ताआ आथे सेटू को, तिये तेहलूज कोल्यु अने तिया आथे हाजू ओतगोयु गोल्यो.

¹¹ पोन ते आअडित कोईत आअडीन एक दुसऱ्याला कोहू लाग्यू का आपु येशुआरी नाहाकोत कोईओलो?

बारा प्रेरित

¹² तिया दिहोमे तो प्रार्थना कोइला कोअता गोल्यो, अने परमेश्वरोओ प्रार्थना कोअलाआ आखे रात काढीत टाक्यी.

¹³ फासाडी दीही उग्यु तेहलाम तिये शिष्यांआ हादीत तीयामरोत बाराजोहो निवडीत लेधलो, अने तियाहा प्रेषित कोयु,

¹⁴ अने ते ओ होय शिमोन तियाआ नाव तिये पेत्र पण मेक्ल्ये, अने तिया पाही आंद्रिया अने याकूब अने योहान अने फिलीप्प अने बरतुल्मै,

¹⁵ अने मतय अने थोमा अने अल्फीई पोऱ्या याकोब अने शिमोन जो जीलोत कोयू जात ओतु,

¹⁶ अने याकोबाआ पोऱ्या यहुदा अने यहुदा इस्करियोती जो तियाहा तोईत आपणारो बोल्यू.

येशु मांहोहो उपदेश आप्यु अने हाजु कोअयु

¹⁷ तेहलाम तो तियाआ आरी उतरित हारको जागापो उबु रोला अने तियाआ शिष्याआ वोडा टोला अने आखे यहुदा अने यरुशलेम अने सोर अने सीदोन समुद्राआ मेरेरोत जास्तीज मांहे,

¹⁸ जे त्याआं होमल्ये अने आपाआ बिमारीही हाजो उविला कोअता त्याजागे आव्ये ओते अने अशुद्ध आत्मावांहि पिडलेले मांहे पण हाजो कोल्यु जात ओते.

¹⁹ आखे तियाहा स्पर्श कोअला इच्छा कोईत ओते काहाके तीयामरोत सामर्थ्य निहित आखाहा हाजो कोईत ओते.

आशीर्वादो वचन

²⁰ तेहलाम तो आपाआ चेलाही पालहु कोयु, धन्य होय तुमु जे नम्र होय, काहाके परमेश्वरोओ राज्य तुमाआ होय.

²¹ धन्य होय तुमु जे फुकल्यु होय काहाके ते तृप्त कोल्यु जानारू होय, धन्य होय तुमु जे ओमे रोडतले काहाके ओहीही.

²² धन्य होय तुमु जांहा माअहा पोऱ्याकोता तुमाआरी मांहे तुमाआ द्वेष कोअनारू अने तुमामे काढीत आपी अने तुमाआ निंदा कोअनारू अने तुमाआ नाव वाईट होमजीत काढीत टाकही,

²³ तियाअ तेदीही आनंदावाही उडीत माईलाआ काहाके पाला, तुमा कोअता होर्गाम वोडो फोल होय; तियाआ आगला डायाहा आरी पण भविष्यवक्ता आरी पण ऐहलेच कोईओलो.

शोक वचन

²⁴ पोन हाय तुमापो जे ओमे श्रीमंत होय काहाके तुमु आपाआ सांत्वन मिलवीत लेधलो होय.

²⁵ हाय तुमापो जे ओमे तृप्त होय काहाके फुकले ओवाहा हाय तुमापो जे ओमे ओहीत होय काहाके दुख कोअनारू अने रोडे.

²⁶ हाय तुमापो जांहा आखे मांहे तुमामे हाजो कोअही काहाके त्याआं आगाडी डाये पण खोटो संदेष्टाआरी ऐहलेच कोईत ओतु.

शत्रु पोओ भी प्रेम कोअलोओ

²⁷ पोन आय तुम्हाआ होमलिनाराहा कोत्लू का आपाआ दुष्मनापो प्रेम को; जो तुमाआ दुश्मन होय तियाआ हाजो को.

²⁸ जो तुमामे शाप आपी तियाहा आशीर्वाद दया, जो तुमामे बदनाम कोअत्लू, त्याकोता प्रार्थना को.

²⁹ जो ताआ एक गालोपो थापोड देही आगाडी दिहरू गाल पण आगाडी को; अने जो ताआ डोगलो सांडाडत्लू तियाहा बनियन ए घेऊन जाहु विरोध कोहू नाहा.

³⁰ जो कोडु ताअही मांगनारू तियाहा आप; अने जो ताआ वस्तु मागित लेही त्यापोरोत मागहु नाहा.

³¹ जेहलो तुमामे लागेहे का मांहे तुमाआरी कोअनारू तुमु पण त्याआरी तेहलूज को.

³² जर तुमु आपाआ प्रेम कोअनारापोज प्रेम कोअनारू ताहा तुमाआ नाहाकोत जाखो? काहाके पापी पण आपाआ प्रेम कोअनारापो प्रेम कोअता

³³ जर तुमु आपाआ हाजो कोअनाऱ्या उपऱ्यो हाजो कोअता तीयाम तुमाआ नाहाकोत जाखो? काहाके पापी पण ऐहलेच कोअता.

³⁴ जर तुमु उद्धार आपी त्याआरोत फासी लेअला आशा तेहित होय ताहा तुमाआ नाहाकोत जाखो? काहाके पापी पाप्याहा उद्धार आपोहो का तो तेवडोग फासी मेलविनारू.

³⁵ पोन आपाआ दुष्मनापो प्रेम को अने हाजो को अने फासी जोडीला आशा तोहुं नाहा, अने उध्दार दया; अने तुमा कोअता वोडो फोल होय अने तुमु परमप्रधानो पोऱ्ये ठराविलो काहाके तो तियापो जे तियाआ आभार मानणारु नाहा अने वाईटापो पण दयालु होय

³⁶ जेहलो तुमाआ बाह्हू दयालु होय तेहलूज तुमु पण दयालु व्हा.

दोष मा लागाड़ाहा

³⁷ दोष लागाडहु नाहा, काहाके तुमापो पण दोष लागाड्यू जानारू नाहा दोषी ठेरवूहू नाहा, म्हणजे तुमामे पण दोषी ठेरव्यो जानारू नाहा दिहराहा क्षमा को म्हणजे तुमामे पण क्षमा कोअयी जाइअलो.

³⁸ आपा म्हणजे तुमामे पण आपलोम आवे मांहे माप दाबीन-दाबीन अने आलाडीत अने हिग पोईत तुमाआ पोदर कालतेहे काहाके ज्या मापोवांही तुमु आपाहा तियाआ मापोवांही तुमामे पण आप्लु जाइअलो.

³⁹ फासाडी तिये तियाहा एक दृष्टान्त कोयु, कि आंदलू आन्दालाहा वात कोहू शकतो नाहाकोत? नाहाकोत ते बेन खाडामेहे पोअनारू नाहा?

⁴⁰ शिष्य आपाआ गुरुपोरोत वोडू नाहा पण जो पुरो हिकीही तो आपाआ गूरुहोस उवे.

⁴¹ तू आपाआ पायहोओ डोआमेऱ्यूं कोचाराहा काहा पालत्लू? अने आपाआ डोआमेऱ्यूं कोसरू होमजाडीत नाहा?

⁴² तू आपाहाज डोआमेऱ्यो कोचाराहा पालीत नाहा ताहा आपाआ पायहोहो केहलो कोहू शकतो, ओ पाही थोबिलो जा ताआ डोआमेऱ्यूं कोसरू काढीत आपुहू काहा? ऐ कपटी पहीले ताआ डोआमेऱ्यूं कोसरू काड, फासाडी जो कोसरू ताआ डोआम होय तियाहा हाजा प्रकारे पालहु काढहु सेकेहे.

साड़ोओ उल्खात फलवासी

⁴³ कोडलो हाजो साड नाहा, जो बेन कामोओ फोल लेतावणारू एन कोडलो बेन कामोओ साड नाहा जे हाजो फोल लेतआविही.

⁴⁴ हर एक साड आपाआ फलोपारोत ओलख जाहो काहाके मांहे काटाआ साडोपरोत अंजीर तोडीत नाहा अने बोराआ साडोपरोत द्राक्ष तोडीत नाहा.

⁴⁵ हाजू माहुहू आपाआ मोनोमेहे हाजा भांडारामोरोत हाजा गोठी काडत्लू अने वाईट माहुहू आपाआ मोनोमेहे वाईट भांडारामोरोत वाईट गोठी काडत्लू काहाके जे मोनामे पाअये होय तोज सोबिम येत.

कोअ बोनावनारा बेन प्रकारो मांहे

⁴⁶ जाहा तुमु माआ कोअलो मानीत नाहा ताहा माहु ओ प्रभू, ओ प्रभू काहा कोतले?

⁴⁷ जो कोडु मा आहने आवत्लू अने माआ गोठी होमलित्लू तियाहा मानीत होय आय तुमामे कोत्लू तो कोडाहोस होय.

⁴⁸ तो तिया माहुहुहोस होय जीआ को बोनाविलावेले जमीन उंडो खोदित खोडकापो पायू टाक्यू अने जांहा खाड आवयू ताहा पाअयोंआ धारा तियाहा लाग्या पण तियाहा आलाडहु शकल्या नाहा काहाके ते पक्को बोन्यो ओते.

⁴⁹ पोन जो होमलित मानीत नाहा तो तियाअ माहुहुहोस होय जीआ धरतीपो बिना पाया कोअ बोनाडल्ये जांहा तियाहा धारा लाग्या ताहा ते लागेज पोडीत गोये अने निसे पोडीत तिया नाश ओतगोयु.