लूका 4 - नोयरी नोवलू नियम

येशुउ परीक्षा

¹ येशु पवित्र आत्मावांहि पुरो ओतगोयु यार्देन खाडीरोत फासि आवयु तियाहा आत्माआ जंगलूम घेऊन गोल्यो.

² जागापो शैतान तियाहा सालीह दीही पर्यंत परीक्षा लेदि तियाअ दिहोम येशु किबी खादे नाहा फासाडी दिह पुरो उवलानंतर येशुहू जाखो भूक लागीई.

³ तेहलाम शैतान तियाहा कोयु, “जर तू परमेश्वरोओ पोऱ्या होय ताहा आव दोणाहा भाकर बोनीलाकाजे कोअलो”

⁴ तेहलाम येशु उत्तर आप्लु, “शास्त्रात लेखिलो होय, मांहु फक्त रोटावांईच जीवे एहलो नाहा”

⁵ फासाडी शैतान तियाहा जाखो उसापो घेऊन गोल्यो, अने होमला क्षणोम आखे जगतो राज्य देखाडीत,

⁶ शैतान तियाहा कोयु, “आय याआ राज्याआ अधिकार अने वैभव ताहु आपी काहाके ओ माहु आप्लु होय अने आय याहा ज्याहा गोमे तियाहा आपुहू शकतो”

⁷ कोईत तू माहु नमन कोअही ताहा ओ आखे ताआ उवे

⁸ येशु तियाहा उत्तर आपित कोयु, “शास्त्रात लेखिलो होय का, तू फक्त आपाआ प्रभू परमेश्वर याहाज नमन को अने तीयाआज सेवा को.”

⁹ तेहलाम तो तियाहा यरुशलेम मेहे लेत गोल्यो अने तियाअ जागापो मंदिराआ उचो जागापो लेत उभे कोल्यु अने तियाहा कोयु, “जर तू परमेश्वरोओ पुत्र होय, ताहा याआ ती जागेरोत निसे उडी टाक.

¹⁰ काहाके शास्त्रात लेखिलो होय तो आपाआ स्वर्गदूतोहो आज्ञा आपीत ते ताहु रक्षा कोए,

¹¹ अने लेखिलो होय ते ताहु अने आपाआ खोआ मेहे एहलो विसित लेणारे का ताआ गुडाहा डोणु ने वाजे नाहा”

¹² येशु तियाहा उत्तर आपित कोयु, “शास्त्रात एहलो पण लेखिलो होय का, तू आपाआ प्रभू परमेश्वरोओ परीक्षा मेहे पाडहु कायना.”

¹³ जाहा शैतान तियाआ आखे प्रकाराआ परीक्षा लेदलापो संधी जोडताहुजा तियाहा सोडीत गोल्यो.

गलील मेहे सेवा कार्य

¹⁴ फासी येशु आत्माआ शक्तीवांही पुरो ओतगोयु गालीला मेहे फासी आवयू अने तियाअ आखे भागुम येशुउ चर्चा ओवुहू लागीई.

¹⁵ येशु तियाआ सभास्थान जात संदेश आपुहू लाग्यू अने तियाआ आखे गौरव कोईत ओते.

नासरत मेहे येशुउ इन्कार

¹⁶ फाशु तो नासरेथ मेहे आवयू, जीही तो हानाआ वोडू ओयु ओतु अने आपाआ नियमाप्रमाणे शब्बाथ तेदीही यहुदी प्रार्थना सभाम गोल्यो.

¹⁷ जाहा तो शास्त्र डीले बासिलाकाजे उबु रोला तेहलाम तियाहा यशायाह संदेष्टाआ पुस्तक आपलो आवयू तिये जांहा पुस्तक उगड्यो तेहलाम तियाहा ओ स्थान जोडयेहे तीयाम लेखिलो ओते,

¹⁸ प्रभूआ आत्माआ मामेहे वास कोईत होय तिये माहु अभिषेक कोल्यु होय त्याकोता का आय गोरब्योहो सुवार्ता कोईली तिये माहु तोईत मेकलेल्याआ सुटीत अने आंदलाहा फासी पालता आवे घोषणा कोईली, दाबल्यो जात होय तियाहा सोडवीत मोकलित.

¹⁹ देवाची कृपाआ घोषणा कोईली.

²⁰ फासी तिये पुस्तक बंद कोईत आपाआ पावरोहो फासी आप्यी अने तो निसे बोहयु प्रार्थना सभामे आखाआ नजर तियापो टिपाईत रोली ओती.

²¹ तेहलाम तिये कोहू सुरवात कोअयी आज तुमु होमल्या शास्त्राआ वचन पुरो उवे.

²² हर एक मांहे तियाआ वाहवा कोईत ओते तियाआ सोबिमरोत जे हाजी वचन आवीत ओते, त्यापो आखे चक्कित उवे ओते ते कोयु, नाहाकोत ओ योसेफाआ पोऱ्या नाहा होय?

²³ फासी येशु तियाहा कोयु, खरोज तुमु माहु कहावत, ओ वैदया तू माअकोता हाजो को कफर्णहुमात ज्या गोठी आमाहा तोहबारामे होमल्या होय त इंही ए को.

²⁴ ताहा येशु तियाहा कोयु, “आय तुमामे खोरोज कोत्लू का कोडनीबि संदेष्टाहा आपाआ गावामेहे मान सम्मान ने जोडत्लू.”

²⁵ आय तुमामे खोरोज कोत्लू, इस्राएलोमे एलियाआ टायमोमें जांहा जुग बंद उवे ओते अने साडेतीन वर्ष पर्यंत आखे देशुम भिवाडनारू दुष्काळ पोडीत ओतु तेहलाम तियाअ जागापो मोजित आविलो नाहा ओतो रोंडाली कोयु.

²⁶ परंतु सिदोन भागोमेऱ्या सारफत इही एक विधवाहा सोडीत दिहरी रोंडाली जागे एलीयाहा मोक्ल्यीत निमिले.

²⁷ अने एलीशा संदेष्टाआ कालामे इस्राएल माय जाखो कुष्ठ मांहे ओते परंतु त्यामेरोत सिरीया माय रोणाआरा नमानाआ व्यतिरिक्त दिहराहा शुध्द कोल्यु निमिले.

²⁸ जाहा यहुदियाआ ओ होमल्यु मंदिर तियाहा जाखो खोत आवयू,

²⁹ ते उभे रोल्या अने तियाहा गावो बारथे मोकलित आप्लु ते तियाहा डोगोओ कडेवर घेऊन गोये ज्यापो त्याआं गाव ओते, याकोअता का तियाहा तियाअ काडापोरोत निसे टाकुहु पाल्ये.

³⁰ पोन तो तीयामरोत निहित आपाआ वाटी निहित जातलू गोल्यो.

अशुद्ध आत्माहा बारथे काडलोओ

³¹ फासी तो गलीलामे कफर्णहुम गावी निसे आवयू अने शब्बाथ तेदीही संदेश आपुहू लाग्यू.

³² मांहे तियाआ संदेशापोरोत आश्चर्यचकित उवे काहाके तियाआ संदेश अधिकाराआ कोयु ओतु.

³³ तियाआ जागापो प्रार्थना सभाम एक माहहू ओतु तीयाम अशुध्द आत्मा वास कोअल्यू ओतु तो आवाजोमें आअड्यू,

³⁴ ऐ, येशु नासरी, तू आमापोरोत नाहाकोत अपेक्षा कोअत्लू? नाहाकोत तू आमा कोअता नाश कोइला कोअता आवयू होय? आय ताहु उलखित्लू होय का तू परमेश्वरोओ पवित्र माहुहू होय.

³⁵ येशु तियाहा धमकाव्यो कोयु, ठावकू रो, यामेरोत बारथे निहा यापो दुष्टात्मा वाही तियाअ माअहुहू मांहाहा आगाडी तियाहा आसट्यु अने तियाहा किबी नुकसान न ओतु तीयामरोत बारथे निघाल्यू.

³⁶ आखे मांहे चकित ओते ते एक दिहीराआरी गोगीत ओते, ओ केहलो वचन होय? अधिकार अने सामर्थ्यावाही दुष्ट आत्माहा तीयाहाभी आज्ञा आपित होये आने तीयामरोत निहित जातेहे.

³⁷ तिया भागुम आसेपासे हर एक जागापो त्याविषयी सुवार्ता प्रचार उवी.

पतरसो हाविह्ही अने दिहरा मांहोहो हाजु कोअलोओ

³⁸ तेहलाम येशु प्रार्थना मिटीगीमेहे रोत उठीत शिमानाआ कोआ गोल्यु शिमानाआ हाविह्ही जाखो ताव आवयू ओतु तीयाहा येशुहू मदत कोअला विनंती कोअयी.

³⁹ तेहलामेहे तिये जागे जात कोईत तावोहो धमकावयू अने ताव जातु रोयु अने ती तियाआ सेवा कोहू लागीई.

⁴⁰ जाहा दिह बुडलो टायमोमें त्याआरोत अलग-अलग माद्वाड्यो ओते, ते आखे त्याजागे घेऊन आव्ये तिये आपाआ आथे तियापो मेकीत प्रत्येकाहा हाजो कोल्यु.

⁴¹ तीयाम व खूब जोआमरोन दुष्टात्मा आअडित बारथे पोडीत ओती, “तू परमेश्वरोओ पोऱ्या होय”, परंतु तिये तियाहा धमकावयू गोगुहू नाहा देदे काहाके ते उलखित्लू ओते, तो ख्रिस्त होय.

गलील मेहे प्रचार

⁴² फासाडी दीही उगीतकोईत तो निहित जंगलूम गोल्यो तेहलाम मांहे जमाव तियाआ होद कोईत तियाआ जागे आव्ये अने आपामे रोत जाऊ कायना कोईत तियाहा विनंती कोईत ओते.

⁴³ पोन तिये तियाहा कोयु परमेश्वरोओ राज्याआ सुवार्ता दिहरा गावोम पण कोअला होय काहाके माहु त्याकोता मोक्ल्यीत होय.

⁴⁴ अने याआ प्रकारे तो यहुदी प्रार्थना सभाम हमेशा संदेश आपित ओतु.