लूका 24 - नोयरी नोवलू नियम

येशुउ जीवतो उठलोओ

¹ हाफ्ताआ पाल्या तेदीही वेग्र्ये तेऐ बोई कब्राजागे आपु तीयार कोयु सुंगधीत द्रव्य घेऊन आव्या.

² तियाहा कब्रो होय डोणो होरकील्यू देखायू,

³ तेहलाम तियाअ जागे गोयी परंतु त्याजागे प्रभू येशुउ डील जोडल्यो नाहा.

⁴ तेहलाम तियाअ यापो चिंताम पोड्यो का तियापो चमकणाऱ्या फडकाआ बेन माहहू उभे रोल्या.

⁵ बिकीई देअलावाही तिये धरतीपो आपाआ सोब लागाडले तियाअ बेन माअहु तियाहा कोयु, जो जिवंत होय तियाहा मोअल्या माय काहा होदीला?

⁶ तो आव जागापो नाहा तो जिवंत ओवयू होय ओर को जांहा तो ओमे गालीला मेहे ओतु तेहलाम तुमाहा नाहाकोत कोयु ओते,

⁷ तिये कोयु ओते का, माअहा पोऱ्या पापी मांहाहा आथे तोईत आपलो निच्छित होय फासाडी तो क्रूसापोओ सोडाव्यु गोल्यो अने तिसऱ्या तेदीही तियाहा फासी जिवंत कोअला निच्छित ओते.

⁸ तेहलाम तियाअ बोअयीही तियाआ शब्द ओरवयी,

⁹ तिया कब्रोम रोत वापसआव्या अने तिये ओ आखे आकरा शिष्यांआ अने दिहरे माहुंहु कोयु.

¹⁰ याआ बोई कोयु मरियम मग्दलिनी, योअन्ना अने याकूब ची याह्ही मारियाओ तेहलूज त्याआरी दिहरा बोई पण तियाअ प्रेषितांहा कोयु.

¹¹ पोन त्याआं शब्द तियाहा व्यर्थ वाटहु लागाडीत तिये तियाआ विश्वास कोअयु नाहा.

¹² पोन पेत्र उबु रोला अने कबरेही गुगदीत आवयू अने तिये निसे टूगुवोलीत पालील्यो परंतु तियाहा फक्त तागाचे कापडे देखायो तियाआ व्यतिरिक्त किबी देखायो नाहा.

इम्माउसो वाटे चेलाहा दर्शन

¹³ तियाआ तेदीही तियाआ शिष्यामेरोत बेन जण यरुशलेमारोत लगभग सात मैल सेटे होयतो अम्माऊस नावोओ गावी जात ओते.

¹⁴ जी घटना घोडीही ओती त्यापो ते गोगीत सालीतरोल्यो ओते

¹⁵ जाहा ते तियाअ विषयी चर्चा कोईत ओते अने विचार कोईत ओते तोयोज येशु त्याजागे उपस्थित ओवयू अने तियाआ आरी चालीलो लाग्यू

¹⁶ पोन तियाहा ओलखे जाऊ आप्लु नाहा.

¹⁷ येशु तिये कोयु, सालता-सालता एक दिहीराहा तुमु केहला विषयी चर्चा कोईत होय? ते सालता-सालता थोब्यो ते जाखो दुखी देखाहे ओते.

¹⁸ तीयामरोत क्लियुपास नावाआ होमला माहुई तियाहा कोयु, यरुशलेम माय रोणाआरा मायरोत तू एखल्यू एहेलू माहहू होय जे फासाडीई दिहोम घटना घोडीही ती मालुम नाहा?

¹⁹ येशु तिये फ़ुस्ल्याआ, कोडली गोठी? तिये तियाहा आखे नासरी येशु विषयी होय ओ एक एहेलू माहहू ओतु जीआ जे कोयु अने कोल्यु ज्याआपोरोत परमेश्वर अने आखे मांहे या आगाडी ओ देखाडीत आप्लु का तो एक महान संदेष्टा ओतु,

²⁰ पोन आय याआ विषयी गोगीत ओतू का आमाहा मुख्य याजक अने अधिकाऱ्यारीवाही केहलो मोईतगोल्यू दंड आपलो होपविल्यो गोल्यो अने तिये तियाहा क्रूसापोओ चोढावीत.

²¹ आमू आशा मेकतुल्यो का ओच ओतु इस्राएलाहा मुक्ती आपणारो अने आखे किबी याआ ऐहेलो ओवलो तिसरू दीही होय,

²² अने आमू टोलामेऱ्यु किबी बुईही आमाहा चिताम कोईत आप्लु होय आज वेगरया तियाअ कब्रो जागे गोयी,

²³ परंतु तियाहा येशुउ डील देखायो नाहा ते वापसआव्या अने आमाहा कोतल्या का तिये स्वर्गदूता कोअता दर्शन कोल्यु ओते का तो जिवंत होय.

²⁴ फासाडी आमामेरोत किबी कब्रो जागे गोये अने जेहलो तियाअ बुईही कोयु, तेहलूज तिये पालील्यो अने तिये तियाहा पालील्यो नाहा.

²⁵ तेहलाम येशु तियाहा कोयु, तुमु निर्बुद्धि होय अने भविष्यद्वक्ता जे किबी कोयु तियापो विश्वास कोईलाकाजे केतो बागे होय,

²⁶ नाहाकोत ख्रिस्तकोअता ओ आवश्यक निमिले का तो याहा तारासाहा भोगवित अने ह्याप्रमाणे आपाआ महिमामेहे प्रवेश कोआ?

²⁷ अने याआ प्रमाणोओ मुस्साने सुरवात कोईत संदेष्टाहिजा अने शास्त्रामेहे याआ विषयी जे कोयु ओते तिये तियाहा व्याख्या कोईत होमजाद्योहो ओते.

²⁸ ते जाहा तिया गावोजागे आव्ये, त्याजागे जात ओते येशु लेतजा एह्ली वागणुक कोअयी जेहलो नाहाकोत आगाडी जायलो होय.

²⁹ परंतु तियाआ तियाहा शक्तीवाही आग्रह कोईत कोयु, आमा आरी थोबिलो जा काहाके लगभग हांजेपो उवी होय अने ओमे दीही पण टाप्यु गोल्यो होय तो त्याआरी उबरोला काजे जागे आवयू.

³⁰ जाहा त्याआरी रोटूखाहू मेजोपे ओतु तेहलाम तिये भाकर विसली अने धन्यवाद आप्यी फासाडी ती तोडीत जांहा तो तियाहा आपित ओतु.

³¹ तेहलाम त्याआं डोआं उगड्यो गोये अने तिये तियाहा ओलखीत लेधलो परंतु तो त्याआगाडीरोत आरताईत ओवयू.

³² नंतर ते आपसामेहे गोगू लागाडीत, जांहा आपु त्याआरी गोगीत ओतू अने शास्त्र होमजाडीत ओतु तेहलाम नाहाकोत आपाआ ह्रद्याजागे उकली आवीत नाहाओती?

³³ नंतर ते लागेज उभे रोल्या अने फासी यरुशलेम माय निकलीलू तियाहा आकरा प्रेषित अने दिहरे मांहे ए एकठे जोडयेहे

³⁴ जे कोयु ओते का प्रभू खोरोज जिवंत ओवयू होय तिये शिमोनाहा दर्शन आप्लु होय.

³⁵ नंतर तिया बेनु वातेम जी घटना घोडीही ते आखे कोयु, अने तिये कोयु का रोटाआ तुकडे कोल्यु ओते तेहलाम येशुहू केहलो ओलखे ओते.

येशु चेलाहा देखायु

³⁶ ओमे ते तियाहा याआ गोठी कोताच ओते एतांम खुद आगाडी आविलो उबु रोला अने तियाहा कोयु, तुमामे शांती जोळे.

³⁷ पोन ते चक्कित ओतगोयु बितकोईत उवे तिये विचार कोअयु ते एगदू पुत्डू पालीत होय.

³⁸ पोन तो तियाहा कोयु, तुमु एहलो बितगोल्या सारखो काहा होय? तुमाआ मोनामे शंका काहा होय?

³⁹ माआ आथोहो अने माआ गुडाहा पाला माहु स्पर्श को अने पाला का कोडनीबि पुत्डाहा माहा अने आडे नातुताहा जेहलो तुमु पालीत होय ते माआ होय.

⁴⁰ ओ कोत तिये आथे अने गुडू देखाडीये.

⁴¹ पोन आपाआ आनंदाआ ओते ओमे पण ते तियापो विश्वास कोईत निमिले ते भौवचक्के ओते येशु लेतजा तिये कोयु, इही तुमाही किबी खाआलाकाजे होय नाहाकोत?

⁴² तिये पुजल्यो मोसेआ बोटकु तियाहा आप्यू.

⁴³ तिये तियाआ आगाडी घेऊन खादे.

⁴⁴ फासाडी तिये तियाहा कोयु, याआ गोठी होय ज्या आय तेहलाम तुमामे कोयु जांहा आय ओमे तुमाआरी ओतु हर एक गोठी जो माविषयी मुस्साआ व्यवस्थेमेहे संदे अने नियम याआ पुस्तकाम लेखिलो होय पुरो ऊवणारोज होय.

⁴⁵ फासाडी पवित्रशास्त्र होमजीलाकाजे तिये तियाआ डोआं उगाडीत आप्यी,

⁴⁶ अने तिये तियाहा कोयु, ओ तोज होय जे लेखिलो होय ख्रिस्त त्रास भोगीत अने तिसऱ्या तेदीही मोल्यामरोत जिवंत उवे,

⁴⁷ अने पापाआ माफी काजे मोन फिरवा संदेश यरुशलेम त्यापोरोत सुरवात कोईत आखे तियाहा प्रचार कोअयु जाइअलो.

⁴⁸ तुमु याआ गोठी तियाआ साक्षी होय.

⁴⁹ अने आखे माआ परम बाह्हू माआरी जी प्रतिज्ञा कोअयी होय तियाहा आय तुमा कोअता मोकलीही परंतु तुमु याआ नगरामेहे तियाअ टाईमापोजा थोबिलो रोजाहुजा तुमु होर्गा शक्तीवांही युक्त उवे.

येशु होर्गाम गोयु

⁵⁰ येशु फासाडी बेथानी पर्यंत घेऊन गोल्यो अने तिये आथे उपो कोईत आशीर्वाद आप्यू,

⁵¹ तियाहा आशीर्वाद आपित ओतलू तिये तियाहा सोडीत आप्लु अने फासाडी तो होर्गांम उपो लेदो गोल्यो.

⁵² तेहलाम तिये तिया दण्डवत कोअयु अने वोडू आनंद कोईत यरुशलेमोमे फासी गोये,

⁵³ अने मंदिरोम परमेश्वरोओ स्तुती कोईत ते आपाआ वेल कालीत लागाडीत.