लूका 22 - नोयरी नोवलू नियम

येशुहू माअलो योजना

¹ बेखमीर रोटाहा तीवारे ज्याहा वल्हाडन तिवार कोतेहे जागे ओतु,

² अने मुख्य याजक अने शास्त्री आव गोठीइ होदित ओते का तियाहा केहलो माईत टाकिलो पोन तेए मांहोहो बिहता ओता.

यहूदा इस्कोरियोतीई विश्वासघात

³ तेहलाम शैतान यहूदा मेहे आवयू ज्याहा इस्करियोती कोयु जाहो अने बारा शिक्षामेहे मोजीलो जात ओतु.

⁴ तिये जात मुख्य याजक अने सिपायडाआ सरदाराआरी गोठी कोअयी का तियाहा कोडला प्रकारे तियाआ आथोमेहे तोईत आपलो.

⁵ ते आनंदाम उवे अने तियाहा पोशा आपलो वचन आप्लु.

⁶ तिये माजित लेधलो अने संधी होदहू लाग्यू का जांहा गोर्दी नेशेय तेहलाम तियाआ आथोमेहे तोईत आपलो.

फसहो तियारि

⁷ तेहलाम बेखमीर रोटाहा तीवारे आवयू ज्याम वल्हांडन च्या कोकऱ्याआ बलिदान कोईओलो आवश्यक ओते.

⁸ येशु पेत्र अने योहानाआ ओ कोत मोकलित का जात आमा खाअलाकाजे वल्हांडन तीयार को.

⁹ तिये तियाहा फ़ुस्ल्याआ, ताहु का लागेहे का ओ का तीयार कोहू?

¹⁰ तिये तियाहा कोयु, पाला, नगरोत प्रवेश कोअताज एक माहुहू पाअयोओ वोटलू उसो कोअल्यु तुमामे जोडीत; ज्या कोअमे तो जानारू तुमु तियाआ फासाडी जायलो

¹¹ अने तिया कोओओ मालकोहू कोओलो स्वामी ताहु कोत्लू का ती खायलाकाजे जागू का होय जीमेहे आय आपाआ शिष्याआरी भाकर खाऊ?

¹² तो तुमामे एक होबाडीलो वोडी माळी देखाडनारू तीही तीयारी कोइलाआ.

¹³ तिये जात जेहलो तियाहा कोयु ओते, तेहलूज पाल्लये, अने वल्हांडण तीयार कोल्यु.

प्रभुउ आखरी भोज

¹⁴ जाहा खाअलो टाईम आविलो ताहा तो प्रेषिताआरी रोटू खाअहू कोअता बोहयु.

¹⁵ अने तिये तियाहा कोयु, माहु वोडी आशा ओती का दुख सहन कोइलाआ आगाडी ओ तिवार तुमाआरी कोहू.

¹⁶ जाहा आय तुमामे कोत्लू का जो पर्यंत परमेश्वरोओ राज्याम पुरो उवनारा नाहा तोपोरोत आय तियाहा खोरोज खाही नाहा.

¹⁷ तेहलाम तिये पिदो घेऊन आभार महांआ अने कोयु, ओ ल्या अने आपसामेहे वाटीत ल्या.

¹⁸ काहाके आय तुमामे कोत्लू का जोपोरोत परमेश्वरोओ राज्य आविलो नाहा तोपोरोत आय द्राक्षरस ओमोरोत पीही नाहा.

¹⁹ फासाडी तिये भाकर लेदि अने आभार मानीत ती तोडीअते अने तियाहा ओ कोयु आप्लु ओ माआ डील होय जे तुमा कोअता आप्लु जात होय माआ ओर कोइला कोता ओ कोईत रो.

²⁰ याजहोस तिये रोटाफासाडी पिदो पण ओ कोयु आप्यू ओ पिदो तियाअ रक्ताम जो तुमा कोअता वोहाड्यू जात होय नवो करार होय.

²¹ पोन पाला, माहु तोईत आपनाराआ आथे माआ मेज माय होय

²² काहाके माअहा पोऱ्या ताहा जेहलो त्यांकोअता ठेरव्यो जाहो पण हाय तियाअ माहुंपो ज्यावाही तो तोईत आप्यू जात होय.

²³ तेहलाम ते आपसामेहे विसारपूस कोअहू लागाडीत का आमा माय कोडू होय तोओ कोअनारू.

कोडो वोडू ओवे?

²⁴ तीयाम ओ वादविवाद पण ओवयू का तीयाम कोडू वोडू होमाज्या जात्लू.

²⁵ येशु तियाहा कोयु, अन्यजाति राजा तियापो राज कोअत्लू; अने जे तियापो अधिकार मेकात्ले तियाहा उपकार विहरीनारू कोतेहे.

²⁶ पोन तुमु एहलो ओवुहू नाहा; पण जो तुमामे वोडू होय तो हनाहोस अने जो मुख्य होय तो सेवको होस बोना.

²⁷ काहाके वोडू कोडू होय? तो खाअलाकाजे बोहयु होय किंवा जो सेवा कोईत होय? नाहाकोत तो नाहा जो खाअलाकाजे बोहयु होय? पण आय तुमामे सेवको होस होय.

²⁸ तुमु ते होय जे माआ परीक्षेमेहे निरंतर माआरी रोल्या,

²⁹ अने जेहलो माआ बाह्हू माकोअता एक राज्य ठेरव्यो होय तेहलूज आय पण तुमा कोअता ठरवीही,

³⁰ म्हणजे तुमु माआ राज्याम माआ मेजापरे बोहित इस्रायल, पिणारे अने एवडोज नाहा ताहा सिहासनापो बोहित बारा वन्शाआ न्याय कोअनारू.

पतरसो ईन्कारोओ भविष्यवाणी

³¹ शिमोन, ओ शिमोन, पाला, शैतान तुमाहा मांह्हू मागित लेधलो होय का तुमामे गवोओहोस फटके,

³² पोन आय ता कोअता विनंती कोअयी का ताआ विश्वास जाहू नाहा; अने जांहा फिरीही ताहा आपाआ पायहोहो स्थिर कोईओलो.

³³ तिये तियाहा कोयु, ऐ प्रभू, आय ताआरी बंदिकोअमे जाहू एवडोज नाहा ताहा मोहुहू पण तीयार होय

³⁴ तिये कोयु, ओ पेत्रा, आय ताहु कोत्लू का आज कुकडू वाहे नाहा तोपोरोत तू माआ तीन टायमोआ नकार कोअनारू तू माहु उलखित्लू नाहा.

यातना सहन कोअहू तियार रोवा

³⁵ इहिजा तिये तियाहा कोयु, जांहा आय तुमामे खोतली अने खोली अने बिनखाडाआ मोकल्ये ओते ताहा नाहाकोत? तुमामे किबी वस्तूअ कोम उवी ओती? कोडलाज वस्तूअ नाहा.

³⁶ येशु तियाहा कोयु पण ओमे ज्याआ जागे खोतली होय तो तीही घेऊन ले, अने तेहलीज खोली पण अने ज्यापो नाहा तो आपाआ कापडे वेसेत एक वेसातो घेऊन आप.

³⁷ काहाके आय तुमामे कोत्लू का ओ जे लेखिलो होय तो अपराधी आरी मोजीलो गोल्यो ह्याआ मामेह पुरो उवे आवश्यक होय काहाके माआ विषयाम लेखल्यी गोठी पुरो उवे होय.

³⁸ तिये कोयु, ऐ प्रभू इही बेन तलवार होय तिये तियाहा कोयु, “जाखो होय.”

जेयतुनो टेंबा पोओ येशुउ प्रार्थना

³⁹ तेह्लाम तो बारथे निहित आपाआ रीतीवाही जैतुनाआ डोगोपो गोयु एने शिष्य तियाआ फासाडी चालीलो लागाडीत.

⁴⁰ तिया जागापो पुगित कोईत तिये तियाहा कोयु, “प्रार्थना को का तुमु परीक्षेमेहे पोडहू कायना”

⁴¹ अने तो स्वतः त्यापोरोत दोनोओ टप्पाएतो सेटू गोल्यो अने मांडे टेक्यू प्रार्थना कोहू लाग्यू,

⁴² “ओ ओबा, जर ताहु लागेहे ओ प्यालाहा मापोरोत काढीत ले, तेबी पण माआ नाहा ताहा ताआज इच्छा पुरो ओवुहू आप”

⁴³ तेहलाम होर्गामेऱ्ये एक दूत आवयू तो तियाहा सामर्थ्य आपित ओतु.

⁴⁴ तो अत्यंत संकटामे खिन्न ओतगोयु फासी पण दुखेहे प्रार्थना कोहू लाग्यू; अने याआ गोजारे जेहेकाय रक्ताआ वोडो-वोडो ठीबकाहोस धरतीपो पोडीत ओते.

⁴⁵ तेहलाम तो प्रार्थनामेरोत उठ्यू अने आपाआ शिष्याआरी आविलो तियाहा खेदामुळे तियाहा हुविलो पालील्यो.

⁴⁶ अने तियाहा कोयु, “काहा हुवीत होय? उठा, अने प्रार्थना को का परीक्षेमेहे पोडहू कायना.”

येशुहू बंदी कोअया

⁴⁷ तोओ कोयु ओतु अने एक गोर्दी आवयी ओती अने तियाअ बारा मायरोत एक जोओ ज्याचेव नाव यहुदा ओते तियाआ आगाडी-आगाडी आवीत ओतु तो येशुआरी आवयू तो तियाआ चुंबन लेही.

⁴⁸ येशु तियाहा कोयु ऐ यहूदा नाहाकोत तू चुंबन घेऊन माअहा पोऱ्याहा तोईत आपी होय?

⁴⁹ तियाआ हेगातीही ओ पालील्यो का नाहाकोत उवे होय, ताहा कोयु, “ओ प्रभू नाहाकोत आमाहा तलवार सालाडहू?”

⁵⁰ अने त्यामोऱ्यो एकाने महायाजकाआ सेवकापो तलवार लाडीत हुदु कान उडाडीत आप्यू.

⁵¹ तियापो येशु कोयु, “ओमे बंद को”, अने तिया कान स्पर्श कोईत तियाहा हाजो कोल्यु.

⁵² तेहलाम येशु मुख्य याजक अने मंदिराआ रखणाराआ सरदार अने बाह्हाहा जे तियापो चोडिलो कोईत आव्ये ओते, कोयु, नाहाकोत तुमु माहु बांड होमजीत तलवार अने डेगाऱ्या घेऊन निकलीलू होय?

⁵³ जांहा आय मंदिरोम दाडीअ तुमाआरी ओतु, ताहा तुमु मापो आथे टाक्यू नाहा; पण ए तुमाआ वेल होय, अने आंदाराआ अधिकार होय.

पतरसो इन्कार

⁵⁴ फाशो ते तियाहा तोईत घेऊन जातले, अने महायाजकाआ कोओ आव्ये, पेत्र सेटेजरोत तियाआ फासाडी-फासाडी जात ओतु,

⁵⁵ अने जांहा खोलीम आगी पेटाडीत एकठे बोह्ये, तेहलाम पेत्र पण तीयाम बोहित गोल्यो.

⁵⁶ तेहलाम एक दासि आगीई उजवोळोमे बोहीतरोल्यु पालीत अने तियाआ जागे पालीत कोहू लागीई “ओ पण त्याआरी ओतु”

⁵⁷ पोन तिये ओ कोत नकार कोअयु, “ओ बाय, आय तियाहा उलखित्लू नाहा”

⁵⁸ थोडो टायमोमे कोडूबी पालहु कोयु, “तू पण ताहा त्यामेथुं होय, पेत्राई, कोयु,” “ओ मांहे, आय नाहा होय तो”

⁵⁹ केतो तेबी तासावाही फासी एक माहुहू खातरीकोईत कोहू लाग्यू, “खोरोज ओ पण त्याआरी ओतु, काहाके ओ गलाली होय”

⁶⁰ पेत्राई कोयु, “ओ मांहे, आय होमजाडीत नाहा का तू नाहाकोत कोतलु” तो कोताच ओतु एवडाम कुकडू वाहयू.

⁶¹ तेहलाम प्रभूऊ पेत्राई पालील्यो, अने पेत्राहा प्रभूऊ ती गोठी ओर आवयी जे तिये कोयु ओते आज कुकडू वाहलो आगाडी, तू तीन टायमोआ माआ नकार कोअनारू.

⁶² अने बारथे निहित मोठ-मोठयाने रोड्यू.

येशुउ उपहास

⁶³ जिया माहुंऊ येशुहू तोईत तोअये ओते ते तियाआ थट्टा कोहू लागीई,

⁶⁴ अने त्याआं डोआं टापीत तियाहा फुसिलो लागाडीत, “भविष्यवाणी कोईत कोअलो आमाहा का ताहु कोडु माअये”

⁶⁵ अने तिये जास्तीज यापोरोत जाखा निंदा गोठी तियाआ विरोधाम कोयु.

डाये अने येशु महासभा सामने

⁶⁶ जाहा दीही उगीतकोईत डाये, मुख्य याजक अने शास्त्री एकठे उवे अने तियाहा आपाआ महासभामे हादीत फ़ुस्ल्याआ,

⁶⁷ “जर तू ख्रिस्त होय, ताहा आमाहा कोत आप,” तिये तियाहा कोयु, “जर आय तुमामे कोअही, ताहा विश्वास कोअनारू नाहा”

⁶⁸ अने फुसनारू ताहा उत्तर आपी नाहा.

⁶⁹ पण ओमोरोत माअहा पोऱ्या परात्पर परमेश्वरोओ हुदिवोल बोहीतरोल्यु रोही

⁷⁰ योपो आखाहा कोयु, “नाहाकोत तू परमेश्वरोओ पोऱ्या होय?” तिये तियाहा कोयु, “तुमु स्वतः च कों ओतु, काहाके आय होय”

⁷¹ तेहलाम तिये कोयु, “ओमे आमाहा साक्ष आपलो नाहाकोत गोरोज होय काहाके आमाहा खुद तियाआ सोबिमरोत होमलित लेधलो होय.”