लूका 21 - नोयरी नोवलू नियम

गरीब विधवाआ खरु दान

¹ अने येशु डोआं उगाडीत धनवान मांहे याहा आपाआ दान भंडाराम टाकत्ले पहीले.

² तिये एक गरीब विधवाहा पण तीयाम बेन दमड्या ताकीलावेले पहीले.

³ तेहलाम तो कोयु, आय तुमामे खरोज कोत्लू का आव गरीब विधवेने आखाम जाखो टाक्यो होय.

⁴ काहाके ते आखे आपाआ-आपाआ कोमाय मायरोत दानुमे किबी टाक्ये होय, परंतु इयेज आपाआ कमाईमे रोत आपाआ आखे उपजीविका टाकीत आप्यी होय.

युगोंओ अंतोओ लक्षण

⁵ तेहलाम किबी मांहे मंदिराम विषयी कोयु ओते का ते केहलो हाजी ते डोणे अने भेटाआ वस्तुवाही होबाडीलो होय, तेहलाम तो कोयु,

⁶ “तेदीही आवे, तीयाम ओ आखे जे तुमु पालीत होय, त्यामेरयू इही किबी दोणोपो डोणो पण नाहा सुटे जो पाड्यू जानारू नाहा”

⁷ तिये तियाहा फ़ुस्ल्याआ, “ओ गुरुजी, ओ आखे केधी उवे? अने ओ आखे गोठी उविलापो उवे, ताहा तियाअ वेले नाहाकोत चिन्ह उवे?”

⁸ तो कोयु, “सावध रो का ठोगीत न जानारू, काहाके जाअखो माआ नावामेहे आविलो कोअही, आय तोज होय, अने ओ पण का, वेल जागे आवयी होय, तुमु तियाआ फासाडी नाहा निहित जाऊ.

⁹ जाहा तुमु लढाया अने दंगू याविषयी होमलीनारू ताहा घाबरील्यो जाऊ नाहा, काहाके ओ उवे आवश्य होय; पण तियाअ टायमोमें एतांम आखिर उवे नाहा”

¹⁰ तेहलाम तो तियाहा कोयु, “जाती पोओ जाती अने राजपो राज्य उठी”

¹¹ अने वोडो-वोडो भूकंप उवे, अने जोगो जाग्तली दुष्काळ अने मऱ्या उवे, अने जुगोमरोत भिवाडनारू गोठी अने वोडू वोडी चिन्ह प्रगट उवे.

¹² पण आव आखे गोठीई पहीले ते माआ नावोवाही तुमामे तोअणारू अने त्रास आपी, अने सभास्थानाम होपित कोअनारू, अने बंदिकोअमे टाकही, अने राज्य आगाडी अने अधिकाऱ्याआ आगाडी घेऊन आवे.

¹³ पण ओ तुमाआ याकोअता साक्ष आपलो संधी ओतगोयु जानारू.

¹⁴ यकोअता आपाआ-आपाआ मोनामे निर्धार मेका का आमाहा पाल्या उत्तर आपलो चिंता नाहा कोअनारू.

¹⁵ काहाके आय तुमामे एह्ली बल बुद्धी आपी का तुमाआ आखे दुश्मन आडवाडूहु अने त्याविरुध्द कोअनारू नाहा.

¹⁶ तुमाआ याह्ही-वडील, पाही, अने होगवाड्ये, अने हेगांति पण तुमामे तोईत आपी; इहीजा का तुमाआ मायरोत किबी माईत टाकही.

¹⁷ माआ नावाकोता आखे मांहे तुमाआ तिरस्कार कोअनारू

¹⁸ परंतु तुमाआ मुंडकाआ एक केहो पण वाकडू उवे नाहा.

¹⁹ आपाआ धीरावाही तुमु आपाआ जीवोहो वासाडीत मेकही.

यरूशलेम मेहे नाश

²⁰ जाहा तुमु येरुश्लेमाहा सैन्यांवाही कोमेऱ्ये पाल्लये, तेहलाम होमजीत ल्या का तियाआ निवरील्यो जागे होय.

²¹ तेहलाम जे यहुदियाम ओये ते डोगोम नाहीत जालो; अने जे यरुशलेमाम ओये ते बारथे निहित जालो; अने जे खेतुम ओये तीही नाहा जाऊ.

²² काहाके ओ बदलू लेअले एहलो दीही रोही, तीयाम लेखीतमेकली आखे गोठी पुरो ओतगोयु जानारू.

²³ तिया दिहोम पोटारी अने दुध पिवाळणाऱ्या ओये, त्याकोअता हायहाय काहाके का राष्ट्रातम वोडू त्रास अने आव माहाहूपो उवे.

²⁴ ते तलवारीई धारेवाही गुगदितबोले, अने आखे देशुमे माहुंमे बंदी ओतगोयु मोकल्या जानारू; अने जोपोरोत दिहरे देशोओ वेल पुरो नाहा उवे, तोपोरोत येरुश्लेम अन्य जाती गुडानिसे तुळविल्ये जाय.

परमेश्वरोओ राज्य आरी होय

²⁵ दिह, अने चंद्र, अने तारे या चिन्ह देखाय; अने धरतीपो राष्ट्र-राष्ट्रामध्ये माहाहूपो संकट आविलो, काहाके ते दर्या गरर्जनेअ अने लाटा लहारीवाही घाबरील्यो जानारू.

²⁶ पिकेवाही अने संसारपो आवणारी आपत्तीही वात पाहता-पाहाता मांहाहा जीवूणु जीवनाहा रोही, काहाके जुगाआ शक्ती आलाडी जानारू.

²⁷ तेहलाम ते माअहा पोऱ्याहा सामर्थवाही अने वोडा महिमा वादलापो आविलावेले पालीही.

²⁸ जाहा आव गोठी घळू लागे, ताहा हीदू ओतगोयु आपाआ मुदकाहा उपो विसिलो; काहाके तुमाआ छुटकारु जागे होय.

परमेश्वरोओ राज्य आरी होय

²⁹ येशु तियाहा एक दृष्टान्त पण कोयू “अंजिराआ सोडोहो अने आखे साडोहो पाला.”

³⁰ जे पोन तीयाम फुट काडीलो तेह्लाम, ताहा तुमु पालहु आमुज ओलखीत लेहो का उनालू जागे आवयू होय.

³¹ आवा प्रकारे आखे जांहा तुमु आव गोठी उवेताहा पालनारू, तेहलाम होमजीत ल्या का परमेश्वरोओ राज्य जागे आव्ये होय.

³² आय तुमामे आखे खोरो कोत्लू का जोपोरोत ए गोठी नाहा उवे, तोपोरोत आव पिढीही नाश नाहा उवे.

³³ जुग अने धोरती टोलीतजाय, पण माआ गोठी केधीज नाहा टोलणारो.

कायम तियार रोजा

³⁴ यकोअता होंबलीत रो, एहलो न होय का तुमाआ मोन नशाहा अने संसाराआ चिंता, अने आव जीवनोओ चिंताम सुस्त ओतगोयु जानारू, अने तेदीही तुमापो अचानक सारखो अचानक आवित पोडे.

³⁵ कोईत ते आखे धोरतीपो आखे रोणारापो ज्या प्रकारे आवित पोडे

³⁶ याकोता जागतू रो अने हर एक टायमोमें प्रार्थना कोईत रो का तुमु आव आखे आवनारा गोठीही वासिलो अने माअहा पोऱ्या आगाडी उभे रोण्याआ लायकी बोनहू.

³⁷ ओतो दिहोम मंदिरोम शिक्षण आपित ओतु, अने राती बारथे जात जैतून नावोओ डोगोपोरोत ओतु;

³⁸ अने वेगऱ्यू आखे मांहे तियाआ होमला याकोअता मंदिरोम तियाआ जागे आवीत ओते.