लूका 20 - नोयरी नोवलू नियम

यहूदी द्वारा येशुहू प्रश्न

¹ एक दीही एहलो उवे का जांहा येशु मंदिरोम माहुंहु उपदेश आपित अने सुवार्ता होम्लाड़तू ओतु, तेहलाम मुख्य याजक अने शास्त्री, परुशियाही आरी जागे आवीत उभे रोल्या;

² अने कोहू लागाडीत, “आमाहा कोअलो, तू आव कामोहो कोडला अधिकाराआ कोअत्लू, अने तो कोडू होय तिये ताहु ओ अधिकार आप्यू होय?”

³ तिये तियाहा उत्तर आप्लु, “आय पण तुमामे एक गोठी फुसल्यू; माहु कोआ

⁴ यूहन्नाआ बाप्तीस्मा होर्गापोरोत ओतु काहा महांआ त्यापोरोत ओतु?”

⁵ तेहलाम ते आपसामेहे कोहू लागाडीत, “केधी आमाहा कोयु, होर्गा त्यापोरोत, ताहा तो कोअही, फासाडी तुमु तियापो विश्वास काहा कोअयु नाहा?

⁶ अने केधी आमाहा कोयु, महांआ त्यापोरोत, ताहा आखे मांहे आमापो डोणो माआदे कोआ, काहाके ते खरोखरेज मानीत ओते का योहान भविष्यवक्ता ओतु.”

⁷ आखरी तिये उत्तर आप्लु, “आमाहा नाहा मालुम का तो कोडापरोत ओतु.”

⁸ येशु तियाहा कोयु, “ताहा आय पण तुमामे नाहा कोयु का आय ओ काम कोडला अधिकाराआ कोईत होय.”

दुष्ट शेतकरीई दृष्टांत

⁹ तेहलाम तो तियाअ माहुंहु ओ दृष्टांतमे कोहू लाग्यू “कोडु होमला माहाआ द्राक्षा चा मोलू लागाड्यू, अने खेतीवालाहा तिया ठेका आपित आप्यू अने जाअखो दिहे याकोअता दिहरादेसुम निहित गोल्यो.

¹⁰ जांहा वेल आवयी तेहलाम तिये खेतीवाला जागे एक दासाहा मोकल्ये का ते द्राक्षाआ मोलामेऱ्यू किबी फोलोओ भाग तियाहा आपे, पण खेतीवाले तियाहा माआदे आपित खाली आथे मोकलित आप्लु.

¹¹ फासाडी तिये होमला फासी दासाहा मोकल्ये, अने तिये तियाहा पण जखमी कोईत काढीत टाक्ये,

¹² फासी तिये तिसराहा मोक्ल्यीत तीयाहाभी तिये जखमी कोईत बारथे काढीत आप्लु.

¹³ तेहलाम द्राक्षाच्या मोलाआ मालक्योहो कोयु, आय नाहाकोत कोहू? आय माआ प्रिय पोऱ्याहा मुकलिही, होतजाई होय ते तिया आदर कोआ,

¹⁴ तेहलाम खेतीवाले तियाहा पालील्यो ताहा आपसामेहे विचार कोअला लागाडीत, तो ताहा वारीस होय; आपु तियाहा माईत टाकुहू का मोलू आमाआ होतगोयो जाय.

¹⁵ अने तिये तियाहा मोलमरोत बारथे काडीत माईत टाक्ये याआ याकोअता द्राक्षाच्या मोलाआ मालक तियाआ याकोअता नाहाकोत कोअही?

¹⁶ तो आवीत तियाअ खेतीवालाहा नष्ट कोअही, अने द्राक्षा चा मोलू दिहराहा होपीही” ओ होमलित तियाहा कोयु “परमेश्वर कोआ एहलो न ओवो.”

¹⁷ तिये तिया जागे पालीत कोयु, फासाडी ओ नाहाकोत लेखिलो होय, ज्या दोणोहो राज्य शास्त्रीयांवांही बेकार ठेरव्यू ओतु; तो कोनशीला ओवयू होय.

¹⁸ जो कोडु तियाअ दोणोपो पोडी तियाआ तुकडे-तुकडे होय, अने ज्यापो तो पोडी, तिया भुगो-भुगो कोईत टाकही.

शास्त्री अने प्रधान याजको चाल

¹⁹ तियाआ वेले शास्त्री अने मुख्य याजकांवाही तियाहा तोईला विचारोम ओते, काहाके ते होमजीत गोये ओते तिये आमा वरून ओ दृष्टांतमे कोयू, परंतु ते माहुंहु बितगोये.

²⁰ अने ते तियाआ पातळीपो रोल्या अने गोगण्याम घाबरील्यो तियाआ कोडली-कोडली गोठी तोईत तियाहा सुभेदाराआ आथे अधिकारी होफहोपिन आप्लु.

²¹ तिये तियाहा फ़ुस्ल्याआ, “ओ गुरु आमाहा होमजाडीत होय का तू खोरो कोयु होय अने हिकाडत्लू पण, अने कोडाआ पक्ष घात नाहाकोईत, नाहा ताहा परमेश्वरोओ मार्ग आरी आरीज देखाडत्लू.

²² नाहाकोत आमाहा कैसराहा को आपलो योग्य होय का नाहा?”

²³ तिये तियाआ तिया होमजीत तियाहा कोयु,

²⁴ एक दिनार मांहु देखाव तियापो कोडाआ ठासु अने नाव होय? तिये कोयु, “कैसराआ”

²⁵ तिये तियाहा कोयु, “ताहा जे कैसराओ होय, ते केसराहा आपा; अने जे परमेश्वरोओ होय, ते परमेश्वरोओ आपा.”

²⁶ तियाअ मांहाहा आगाडी तियाअ गोठीमेहे तियाहा तोहू गोयो नाहा, परंतु तियाआ उत्तरेमुळे आश्चर्यचकित ओतगोयु ठावकू रोत गोये.

पुनरुस्थान अने वेहवाल

²⁷ अने सदुकी ओ कोअता मोल्याहा जिवंत उठाव्योज जानारू नाहा, त्यामेरोत कोडु एक तियाआ जागे आविलो फ़ुस्ल्याआ,

²⁸ “ओ गुरु, मोशेवाही आमा कोअता ओच लेखिलो होय केधी कोडाआ पाही आपाआ लाडीई ओमेत सुद्धा ज्या पोऱ्यो नाहा मोईत गोल्यो, ताहा तियाआ बुईही आरी वेहवाल कोईत लेही, अने आपाआ पाहि कोअता वंश उत्पन्न कोअही.

²⁹ सात पाही ओते, पेल्लु पाही वेहवाल कोईत माईत गोल्यो.

³⁰ अने दिहरू, अने तिसरुजे पण तियाअ बुई आरी वेहवाल कोईत लेधलो

³¹ आवा रीतीवाही सात जोओ बिना पोऱ्ये मोईत गोल्यो.

³² आखरी ती बुई पण माईत गोयी

³³ याकोअता जिवंत उवेताहा ती तीयामरोत कोडाआ लाडी उवे काहाके ती सातही जणोपो लाडी बोनी ओती.”

³⁴ येशु तियाहा कोयु, आव युगाआ पोऱ्यामे वेहवाल ओये,

³⁵ पोन जे मांहे तियाअ योग्य ठेरती का ते जुगाहा अने मोल्यामेरोत जिवंत उविला पण जोडयो कोअही ते ताहा वेहवाल कोअनारू नाहा अने वेहपालोहो आप्लु जाहो.

³⁶ ते फासाडी मोअनारुज नाहा काहाके ते स्वर्गदूताआ एकहरको उवे, अने पुनरुस्थान पोऱ्ये उवेताहा पण परमेश्वरोओ पोऱ्ये उवे.

³⁷ पोन याआ गोठीकोता का मोल्येपोन जिवंत होय, मोशेई पण साडोओ गोठीमेहे प्रकट कोल्यु होय का तो प्रभूहु अब्राहमो परमेश्वर अने इसहाकआ परमेश्वर अने याकोबाआ परमेश्वर, कोत्लू

³⁸ परमेश्वर मोल्याआ नाहा ताहा जीवताहा होय परमेश्वर होय; काहाके तियाआ जागे जीवोन होय.

³⁹ तेहलाम ओ होमलित शास्त्रीयामेरोत तिये कोडु एकाने ओ कोयु, “ओ गुरु, तू हाजो कोयु.”

⁴⁰ अने तियाहा फासाडी फाशी फुसन्याआ हिंमत उवी नाहा.

मसीह दावुदो सुउ के दवुदो प्रभु होय?

⁴¹ फासाडी येशु तियाहा फ़ुस्ल्याआ, “ख्रिस्ताहा दाविदाआ पोऱ्ये केहलो कोडु लेहु?

⁴² दाविद स्तोत्रसहिताआ पुस्तका माय कोतले परमेश्वराने माआ प्रभूहु कोदलो,

⁴³ माआ हाजला सेटे बोह, जो पर्यंत आयताआ दुश्मनाहा ताआ गुडू निसे नाहा कोहू सेकेहे.

⁴⁴ दाविदा ताहा तियाहा प्रभू कोत्लू; फासाडी तो तिया पोऱ्ये केहलु नाहाकोत बोनल्यो?”

⁴⁵ जांहा सागडे मांहे होमलिते ओते, तेहलाम तिये आपाआ शिष्यांआ कोयु.

शास्री विरुद्ध येशुउ चेतावनी

⁴⁶ शास्त्रीयांना पोरोत सावध रो, तियाहा वोडो-वोडो झगे कालीत फिरुहू गोमतो, अने तियाहा बजारोमे नमस्कार कोअता, अने प्रार्थना कोआत मुख्य जागापो अने रोटू मुख्य बोहीलाआ जागू तियाहा प्रिय लागेहे.

⁴⁷ ते विधवाआ कोओहो खात टाकतले, अने देखाडीलाकोता जाखो वेल पर्यंत प्रार्थना कोअता तियाहा जाअखो दंड जोडीत.