लूका 18 - नोयरी नोवलू नियम

विधवा अने अधर्मी न्यायधीश

¹ तेहलाम येशु तियाआ विषयामे हमेशा प्रार्थना कोईली अने खचू कायना ओ दृष्टांतमे कोयू.

² कोडु होमला नगरामेहे न्यायधीश रोत ओतु, तो परमेश्वरोओ बित ने ओतू अने कोडलाज माहांआ पोरोधीही कोईत ने ओतू.

³ तिया नगरामेहे एक रोंडाली रोत ओती, जी तियाआ जागे आवीत-आवीत कोयु ओती, माआ न्याय सुकाडीत माहु माआ कर्जदाराप रोत वासाडा.

⁴ किबी वेल पर्यंत तो ते मान्यु नाहा परंतु आखरी मोनामे विचार कोईत कोयु, जर आय परमेश्वरोओ बित नाहा, अने माहांआ फिकीर न कोअता;

⁵ तेबी ए रोंडाली माहु त्रास आपित रोनारे, याआ याकोअता आयतीई न्याय कोअही, केधी एहलो न ओवो का घडी-घडी आवीत माहु त्रास आपे.

⁶ प्रभूऊ कोयु, होमला ओ अधर्मी न्याय कोअनारा नाहाकोत कोत्लू?

⁷ याआ याकोअता नाहाकोत परमेश्वर आपाआ निवाडीत मेकल्या न्याय तो कोअनारू नाहा काहा, जो रातदीही तिया गुगदा कोअता? नाहाकोत तो आपाआ विषया माय वेल लागाडे?

⁸ आय तुमामे कोत्लू, तो लागेज तिया न्याय कोआ तेबी पण माअहा पोऱ्या धोरती उपो आवे तेहलाम तियाहा धोरतीपो विश्वास रोही नाहाकोत.

कोडू धर्मी ओवे?

⁹ तिये तियाआ त्यापोरोत जे तियापो विश्वास मेकीत ओते, का आमाहा धोर्मी होय अने दिहराहा तुच्छ मानीत ओते, ओच दृष्टांतमे कोयू.

¹⁰ बेन मांहु मंदिरोम प्रार्थना कोइला कोअता गोये; एक परुसी अने दिहरू जाकात लेणारू.

¹¹ परुसी उबुरोत तियाआ मोनामे प्रार्थना कोहू लाग्यू, ओ परमेश्वर आयताआ धन्यवाद कोअत्लू का आय याआ महांआ सारखु ठोगनारू जारकर्म कोअनारो, अने व्यभिचारी नाहा अने नाहा जकात बाअनो सारखु होय.

¹² आय हाप्तामरोत बेनवा उपास मेकोहो आय आपाआ कोमायाई दहावू भाग पण आपोहो.

¹³ परंतु जकात लेणारू सेठुज उबुरोत होर्गो जागे पाल्हू इच्छा ला नाहा ताहा आपाआ छाती ठोकीत-ठोकीत कोयु, ओ परमेश्वरा मा पापी पों दया कों.

¹⁴ आय तुमामे कोत्लू का, तो दिहरू मांहु परंतु तोज मांहु धोर्मी ठेरविल्या जात आपाआ कोआ गोल्यो; काहाके का जो कोडु आपाआ माह वोडू बोनाविही, तो हानू कोअल्यो जाय; अने जो आपाआ माह हानू बोनाविही तियाहा वोडो कोल्यु जाय.

परमेश्वरो राज्यो सोआ होस

¹⁵ फासाडी मांहे आपाआ पोऱ्याहा पण तियाआ जागे लेतआवुहु लागाडीत काहाके तो तियापो आथे मेकीही; परंतु शिष्यांनी पालीत तियाहा धमकाव्यो.

¹⁶ येशु पोऱ्याहा जागे हादीत कोयु, “पोऱ्याहा माआ जागे आवी आपा, अने तियाहा नाहा कोहू नाहा; काहाके परमेश्वरोओ राज्य तियाआ हारको त्याच होय.

¹⁷ आय तुमामे खोरो कोत्लू का जो कोडु देवोओ राज्य पोर्याआ एकहरको ग्रहण कोअनारू नाहा तो तीयाम केधीज प्रवेश कोहू सेकेहे नाहा.”

एक धनीई येशुहू प्रश्न

¹⁸ कोडु होमला अधिकारावाही तियाहा फ़ुस्ल्याआ, “ओ उत्तम गुरु, सार्वकालिक जिवनाआ अधिकारी उविला याकोअता आय नाहाकोत कोहू?”

¹⁹ येशु लेतजा तियाहा कोयु, “तू माहु उत्तम काहा कोत्लू? कोडूच उत्तम नाहा फक्त एक, अर्थात परमेश्वर.

²⁰ तू आज्ञाहा जाआत्लू व्यभिचार नाहा कोईओलो, हत्या कोहू नाहा, अने चोरी कोइलाआ नाहा, झुटी साक्ष आपुहू नाहा, आपाआ बाह्हू अने आपाआ याह्हीई चा आदर कोअला.”

²¹ तिये कोयु, “आयताहा आव आखाआ जुवान पणापोरोत पालीत आवयू होय.”

²² ओ येशु लेतजा तियाहा कोयु, “तांआम ओमे पण एक गोठी ची कोम होय आपाआ आखे किबी वेसेत गोरब्योहो आपित टाक; अने ताहु होर्गाम धन जोडीत, अने आव साल माआ फासाडी आव.”

²³ ओ होमलित तो खुप उदास ओवयू, काहाके तो जाखो श्रीमंत ओतु.

²⁴ येशु तियाहा पालहु कोयु “पोस्यावालो परमेश्वरोओ राज्य माय प्रवेश करन केतो कठीण होय.

²⁵ परमेश्वरोओ राज्याम धनवान याकोअता प्रवेश कोईलापेक्षा उटडाआ हुयीइ नाकामेरोत जाअलो सोपो होय.”

²⁶ आव वरून होमलिनारे कोयु, “ताहा फासाडी कोडाआ तारण ओवुहू शकतो?”

²⁷ तिये कोयु, “जे महांआ त्यापोरोत नाहा ओवुहू शकत, ते परमेश्वरा त्यापोरोत ओवुहू सेकोहो.”

²⁸ पेत्राई कोयु, “पाला आमाहा ताहा कोअबा सोडीत ताआ फासाडी आव्ये होय.”

²⁹ तिये तियाहा कोयु, “आय तुमामे खोरो कोत्लू का एहेलू कोडोनाहा जो परमेश्वरोओ राज्य याकोअता को नेते लाडी, नेते पाही, नेते याह्ही-वडील, नेते पोऱ्ये पोर्याहा सोडीत आप्लु होय.”

³⁰ अने आव टायमोमें खूप पटावाही जोडयेहे नाहा अने आवनाराआ जुगोम अनंत जीवोन.

पुनरुस्थानो भविष्यवाणी

³¹ फासाडी तो बाराजोहो आरी लेतजात तियाहा कोयु, “पाला, आमाहा यरुअशलेमाहा जात आहो, अने जेतेहे गोठी माअहा पोऱ्या कोअता भविष्यवक्ता त्यापोरत लेखाल्यो गोयी होय, ते आखे पुरो उवे होय.

³² काहाके तो अन्यजाति आथोमेहे होपल्या जाइअलो, अने ते तियाआ चेष्टा कोआ अने त्यापोओ थुपे,

³³ काहाके अने तियाहा फटके माये, अने घात कोआ; अने तो तिसऱ्या तेदीही फासी जिवंत उवे.”

³⁴ पोन ते आव गोठी मायरोत कोड्लीस गोठी होमज्ये नाहा; अने ती गोठी तिये निकाईत मेकल्यीअने जे कोयु गोये ओते ते तियाआ लक्षाम आव्ये निमिले.

आन्दला भिकारिही देखाड्यु

³⁵ जाहा तो यरीहो जागे पुगीतगोयू, ताहा एक आन्दले वाटेए किनारावपो बोहित भिक मागित ओतु.

³⁶ ते गर्दीइ जात ओतल्या आवाज होमलित फुसुहूं लाग्यू, “सोण नाहाकोत उवनारा होय?”

³⁷ तिये तियाहा कोयु, “येशु नासरेथला जात होय.”

³⁸ तेहलाम तो आयडीत कोयु, “ओ येशु दाविदाआ पोऱ्ये, माआ उपो दया को”

³⁹ जे आगाडी-आगाडी जात ओते, ते तियाहा धमकाव्यो लागाडीत का ठावकू बोह; परंतु तो जास्तीज आअडू लाग्यू, “ओ दाविदाआ पोऱ्ये, दया को.

⁴⁰ तेहलाम येशु उबुरोत आज्ञा आप्यी का तियाहा माआ जागे लेतआव, अने तेहलाम तो जागे आवयू तेहलाम तिये तियाहा फ़ुस्ल्याआ,

⁴¹ ताहु नाहाकोत जोवे का आयताआ याकोअता नाहाकोत कोहू?” तिये कोयु, “ओ प्रभू ओ को का आय पाल्हू गोयो.”

⁴² येशु तियाहा कोयु, “पाल्हू लाग ताआ विश्वास ताहु हाजो कोल्यु होय.”

⁴³ तेहलाम लागेज तो पालुहु लाग्यू, अने परमेश्वरोओ गौरव कोईत तियाआ फासाडी निहित गोल्यो अने आखे माहु पालहु परमेश्वरोओ स्तुती कोअयी.