लूका 17 - नोयरी नोवलू नियम

चेतावनी

¹ फासाडी येशु आपाआ शिष्यांआ कोयु, “ओवुहू नाहा शकत का अडखळण नाहा उवे; परंतु हाय तियाअ मांहुंपो ज्या कारनोवाही ते आवत्ले.

² जो आव हनामोरोत पोरोत कोडा एकाहा अडखळण लाविले होय तियाआ याकोअता ओच हाजो होय का, कोअटी तेलो तियाआ गोलाम बांधीत तियाहा समुद्राम टाकीलो.

³ सावध रो; केधी ताआ पाही अपराध कोअही ताहा तियाहा होमाजळ, अने पस्तावू कोऐ ताहा तियाहा क्षमा को.

⁴ केधी दीही भरात तो सात अपराध कोअही अने हेगांति वेले ताआ जागे फासी आवीत कोअही, आय पस्ताव्यु होय; ताहा तियाहा क्षमा को.”

तुमाआ विश्वास केतु वोडू होय?

⁵ तेहलाम प्रेषिताई प्रभूहु कोयु, “आमाआ विश्वास वोडाव.”

⁶ प्रभूऊ कोयु, केधी तुमामे मोहरी दाना आरी पण विश्वास होय ताहा, तुमु आव तुतीई सोडोहो कोआ का मुलामोरोत उपटीत समुद्राम लागित जा, ताहा ते तुमाआ होमल्यु ओते.

उत्तम सेवक

⁷ तुमामेय एहेलू कोडू होय, ज्याचा दास ओल जुपत्लु अने मेडांहा सारत्लू, अने जांहा तो खेतामेरोत आवयू, ताहा तियाहा कोआ, वेगु आवीत रोटू कोअला बोह?

⁸ अने ओ कोहू नाहा, माआ रोटू तीयार को, अने तोपोरोत आय खाय पीय तोपोरोत कोमोर बाधित माआ सेवा को; याआ फासाडी तू पण खात पित कोईत ले?

⁹ नाहाकोत तो तियाअ सेवकाआ उपकाराआ मानीही का तिये तोज काम कोल्यु ज्याआ आज्ञा आप्यी गोयी ओती?

¹⁰ आव रीतीवाही तुमुभी आखे कामोहो कोईत टाका ज्याआ आज्ञा तुमामे आप्यी गोयी ओती; तेहलाम कोआ, आमाहा खाली दास होय; जे आमाहा कोअला जोवे ओते आमाहा फक्त तोज कोल्यु होय.

एक कोड़ीई आभार

¹¹ एहलो उवे का ते यरुशलेम जागे जात ओयताहा शमरोनाम गालीला मायरोत जात ओतु

¹² कोडला होमला गावून प्रवेश कोइलाआ टायमोमें दहा कुष्ठ माद्वाड्यो मिल्ये.

¹³ तेहलाम सेठुज उभे रोत उचो शब्दाम कोयु, ओ येशु, “ओ स्वामी आमापो दया को.”

¹⁴ तिये तियाहा कोयु, जा, अने माह याजकाहा देखाव. अने जाता-जाता ते शुद्ध उवे.

¹⁵ तेहलाम तियामेहे एकओ पालीत आय हाजू ओवयू होय उचो शब्दा माय परमेश्वरोओ गौरव कोईत फासी आवयू;

¹⁶ अने येशु च्या गुडापो उबडू पोडीत तियाआ आभार महांआ; अने तो सामरी ओतु.

¹⁷ याकोयईत येशु कोयु, “नाहाकोत दहा शुद्ध उवे नाहा, फासाडी ते नऊ का होय?

¹⁸ कि याआ दिहरापोरोत फाशी कोडूच निघाल्यू नाहा जो परमेश्वरोओ गौरव कोअही?”

¹⁹ तेहलाम तिये तियाहा कोयु, “उठित निहित जा; ताआ विश्वास ताहु हाजो कोल्यु होय.”

परमेश्वरो राज्यो प्रगट ओवलोओ

²⁰ तेहलाम परुश्यांहि तियाहा फ़ुस्ल्याआ का परमेश्वरोओ राज्य कोयो आवे, ताहा तिये तियाहा उत्तर आप्लु, “परमेश्वरोओ राज्य दृश्य रुपात आवीत नाहा.”

²¹ अने मांहे ओ नाहा कोअही, “पाला, इही होय, नहाते तीइही होय; काहाके पाला, परमेश्वरोओ राज्य तुमाआ माय होय.”

²² फासाडी तिये शिष्यांनी तियाहा कोयु, “तो दीही आवे, ज्याम तुमु माअहा पोऱ्याच्या दिहोमे एक दिह्याहा पाल्हू इच्छिता, अने नाहा पाल्हू सेकेहे.”

²³ मांहे तुमामे कोय, पाला तीइही होय नहाते, पाला तीही होय परंतु तुमु निहित जाऊ नाहा अने तियाआ फासाडी जाऊ नाहा.

²⁴ काहाके जीही विग जुगाहा होमला जागेरोत निहित दिहरा सेटे सोमकीनारी, तेह्लुज माअहा पोऱ्या पण आपाआ दिहोम प्रकट उवे.

²⁵ पोन पहीले आवश्यक होय का तो जाअखो दु:ख वीसही अने तियाअ कालोओ मांहे तियाहा तुच्छ माने.

²⁶ जेहलो नोहाआ दिहोम उवे ओते, तेहलूज माअहा पोऱ्याच्या दिहोमेभी उवे.

²⁷ ज्या दिहे पर्यंत नोहा जहाजोमे सोढयू नाहा, तियाअ दिहे पर्यंत मांहे खायलो पीत ओते, अने ते वेहवाल कोईत ओते तेहलाम पाई पोअयोजोर आविलो तियाअ आखाहा नष्ट कोल्यु.

²⁸ अने जेहलो लोट च्या दिहोम उवे ओते अने मांहे खायलो पीत ओते, लेआलो आपही कोईत साडे लागाडीत ओते को बांधित ओते;

²⁹ पोन तिया तेदीही लोट सदोम मायरोत निघाल्यू, तियाअ तेदीही आग अने गंधक जुगोमोरत पोड्यी अने आखाहा नष्ट कोईत आप्लु.

³⁰ माअहा पोऱ्याच्या आविलाआ तेदीही पण ऐहलेच उवे.

³¹ तिया तेदीही जो कोअलापो होय अने तियाआ एकहरको कोअमे होय तो तियाहा घेण्यासाठी जाऊ कायना; अने ऐहलेच जे खेतोमे ओये ते फासी जाऊ कायना.

³² तिया लोटाआ लाडीही स्मरण मेका.

³³ तिया जो कोडु आपाआ जीव वाचाआडयो पालत्लू तो तियाहा वासाड़े, अने जो कोडु तियाहा वासाड़े तो तियाहा जिवंत मेके.

³⁴ आय तुमामे कोत्लू, तियाअ राती बेन मांहु एकाच खाटलापो होय; एक लेदो जाइअलो अने दिहरू सोडीत आप्यू जाइअलो.

³⁵ बेन बोई एक आरी जात्यावर दोईत होय, एक लेदिओलो जाइअलो अने दिहरी सोडीत आप्या जाइअलो.

³⁶ बेन जोओ खेतोम होय एक विसात जाय अने दिहरू रोतजाय.

³⁷ ओ होमलित तिये तियाहा फ़ुस्ल्याआ, “ओ प्रभू ओ का उवे,” तिये तियाहा कोयु, “जीही प्रेत होय तीइही गरुड जोमुहू.”