लूका 13 - नोयरी नोवलू नियम

पच्चाताप कोआ निते नाश ओवा

¹ तिया टायमोमें तियाअ जागापो उपस्थित किबी माहु येशुहू तियाअ गलालीलाबद्दल कोयु, तियाआ रक्त पिलातुसो वांही तियाआ बलिदानो आरी मिलवीत आप्लु ओते.

² तेहलाम येशु तियाहा कोयु, तुमु नाहाकोत विचार कोअता, का ओ गलाली दिहरा आखे गलाली पेक्षा खराब पापी ओते तियाहा याआ गोठी भोगिला लाग्या?

³ नाहा, आय तुमामे कोयु होय जर तुमु आपाआ मोन बोदालीत गोयो नाहा ताहा तुमु पण ऐहलेच मोअहा, जेहलो ते मोऱ्यू ओते.

⁴ अने तियाअ अठरा व्यक्तीई विषयी तुमु नाहाकोत विचार कोअता शिलोहामेऱ्यो बुरुज पोडीत तियाहा माअये नाहाकोत विचार कोअता, ते यरुशलेमो रोणाआरा दिहरा आखे माहुपेक्षा जाखा अपराधी ओते?

⁵ नाहा आय तुमामे कोत्लू का जर तुमु मोन बोदालीत गोयो ताहा तुमु आखे पण तेहलूज मोअहा.

बिगर फलवाआ अंजीरो साड

⁶ फासाडी तिये ओ दृष्टान्त कोयू, “कोडा होमला आपाआ द्राक्षमोलम एक अंजिराआ साड लागाडले ओते तो तियापो फोल होदित आवयू ओतु परंतु तियाहा मिल्ये नाहा.

⁷ यापो तिये मालीम फ़ुस्ल्याआ, ओमे पाला आय तीन सालपोईत अंजिराआ सोडोहो फोल होदित आवयू होय परंतु माहु एकपण फोल जोडयेहे नाहा याकोअता याहा तोलीत टाक ओ धरतीपो व्यर्थ एकाहा होय?

⁸ मालीमे तियाहा उत्तर आप्लु, ओ गुरु याहा याआ वोऱ्ही सोडीत आप, ताअहुजा आय याआ आगाडी फासाडी खाडू खोदित खत कालीही.

⁹ फासाडी आगाडी वोऱ्ही फोल आपी ताहा हाजो होय जर फोल आप्लु नाहा ताहा तू याहा तोडीत टाकुहू शकतो.”

कुबड़ी बुईही हाजु कोअयु

¹⁰ एक दिह प्रार्थना सभाम शब्बाथ तेदीही येशु जांहा संदेश आपित ओतु.

¹¹ तेहलाम त्याजागे एक एह्ली बुई ओती तीयीय खराब आत्माआ वास कोयु ओते तीही अठरा वर्ष आजाराम एक बुई ओती ती टूगुवोलीत टूगली उवी ओती अने ती थोडोज पण हीदू उवनारा नाहाओती.

¹² येशु तीही जांहा पहीले तेहलाम जागे हादाडये अने कोयु, ओ बुई ताहु आपाआ रोगोपोरोत मुक्त उवी एहलो कोत्लू.

¹³ तिया मुंडकापो आथे मेक्ल्ये अने ती लागेज हीदू उबी रोली, ती परमेश्वरोओ स्तुती कोहू लागीई.

¹⁴ येशु लेतजा शब्बाथ तेदीही तीही हाजो कोल्यु याकोअता का प्रार्थना सभामेहे मत्र्याआ आअडित कोईत माहुंहु कोयु काम कोअला सहा दीही रोतेहे ताहा तियाअ दिहोम आव अने आपाआ रोग सेटे को परंतु शब्बाथ तेदीही माद्वाड्यो हाजो कोहू कायना.

¹⁵ प्रभू लेतजा उत्तर आपित तियाहा कोयु, “ओ कपटी मोनाआ” नाहाकोत तुमामेरयु हर एक शब्बाथ तेदीही आपाआ बोलोद अने आपाआ गोदडाहा गोड्यावरून सोडीत तियाहा पाई पिअलाआकाजे घेऊन जात नाहा नाहाकोत?

¹⁶ ओमे ए बुई अब्राहमोओ पोऱ्यी होय अने तीही शैतान अठरा वर्ष बिमारूम ओती नाहाकोत यीही शब्बाथ तेदीही तिया बांधित मेकल्यामरोत तीही सोडवुई नाहा नाहाकोत?

¹⁷ जांहा तिये ओ कोयु, तेहलाम तियाहा विरोध कोअनारे आखे मांहे लाजीत ठोगायु उवे त्याजागे आखे गोर्दी तियाआ महिमा कामामुळे जे तिये कोल्यु ओते खुश उवे ओते.

राई दाना अने खमिरो दृष्टांत

¹⁸ त्याजागे येशु कोयु, परमेश्वरोओ राज्य केहलो होय अने आय तियाआ तुलना काहयो आरी कोहू?

¹⁹ ते मोहरी दाणाहोस होय ज्याहा कोडु घेऊन आपाआ जंगलूम पेहे ते वोडो उवे अने एक साड बोन्यो फासाडी जुगोमेरयो सिडे आविलो तियाआ डालीपो खोटो बोनाडल्ये

²⁰ तिये फासी कोयु परमेश्वरोओ राज्याआ तुलना आय केहला आरी कोहू?

²¹ ते खामिरासारखे होय, ज्याहा होमला स्त्रीने घेऊन तीन माप लोटोमेहे मिले अने ते आखे पीठ खमीर सारखू ओवयू.

हाकड़ो बाअणों

²² येशु जांहा नगरामे अने गावोहीरोत संदेश आपित यरुशलेम जात ओतु,

²³ तेहलाम तियाहा कोडु फ़ुस्ल्याआ, “प्रभू नाहाकोत थोडोज माहुऊ तारण उवे?” तिये तियाहा कोयु,

²⁴ हाकडी बाअणामोरोत जाअलाकाजे शक्यतो हर एक माहू प्रयत्न को, काहाके आय तुमाहा कोत्लू का जागे जाण्याआ प्रयत्न जास्तीज कोआ पोन ने जाता आवे.

²⁵ जांहा कोआआ मालिक एकवा उठित दरवाजू बंद कोईत आपोहो ताहा तुमु बारथे उभे रोत दरवाजू ठोकीत कोअही, “ओ मालिक आमा कोअता दरवाजू उगाडीत आप”, परंतु तो तुमामे उत्तर आपही, आय तुमामे उलखित्लू नाहा, तुमु कारोत आव्ये होय?

²⁶ तेहलाम तुमु कोअही, आमाहा ताआरी रोटूखादू, ताआरी पिदलू, तू आमाहा आमा गोल्लीमे शिक्षण आप्लु.

²⁷ परंतु तो तुमामे कोअही, आय तुमामे उलखित्लू नाहा तुमु कारोत होय ते? ऐ खराब काम कोअनारा माआ त्यापोरोत नाहीत जा,

²⁸ तुमु अब्राहम, इसहाक, याकोब, तेहलूज आखे संदेष्टाहा परमेश्वरोओ राज्याम पालनारू परंतु तुमामे बारथे ढेपलीत आपलो आवे, त्याजागे फक्त रोडीलो अने दात साविलो रोय,

²⁹ फासाडी पूर्व अने पश्चिम, उत्तर अने दक्षिण त्यापोरोत मांहे परमेश्वरोओ राज्याम आविलो रोटाआ भागी उवे.

³⁰ लक्षाम रोहू दया का त्याजागे जे आखरी होय, पहीले उवे अने जे पहीले होय ते आखरी उवे.

हेरोदेसो दुश्मनी

³¹ तिया टायमोमें येशुआरी किबी परुसी आव्ये अने तियाहा कोयु, “हेरोद ताहु माआहि इच्छितो याकोअता ईहिरोत एगदा जागापो निहित जा”

³² तेहलाम तिये तियाहा कोयु, जा अने तियाअ कुल्याहा कोअलो, होमले आय माहुमेरोत दुष्टात्मा काडनारू, आय आज पण हाजो कोअनारू.

³³ अने उजाला फासाडी तिसऱ्या तेदीही आय आपाआ काम पुरो कोअनारू भविष्यद्वक्ता यरूशलेमो बारथे माअलोम आवे.

यरूशलेमो कोअता विलाप

³⁴ ऐ यरुशलेमो मांहे, ओ यरुशलेम मांहे, तू संदेष्टाआ जीव लेत होय अने परमेश्वराने जीआ तापो मोकल्ये होय, तियापो डोणो टाकीत होय आय केतीवा ताआ माहुंहु एकठे कोईत ओते जेहलो एक कुकडी आपाआ पिलांहा आपाआ फाकडाआ निसे एकठे कोईत ओते परंतु तुमामे गोमे नाहा.

³⁵ पाला, ता कोअता ताआ को परमेश्वरोओ त्यापोरत आप्लु होय आय ताहु कोयु होय, तू कोअही, धन्यवादित होय तो जो प्रभूउ नावामेहे आवीत होय तू माहु तियाअ टायमोपो रोत फासी पालनारू नाहा जोपोरोत वेल आवयी ने ओय.