लूका 12 - नोयरी नोवलू नियम

शास्री अने फरीसी सारखा मा बोनाहा

¹ एताम जांहा हजाराआ गोर्दी उवी ओती, इहिंजा का ते एक दिहरापो पोडीत जात ओते, ताहा आखाम पेल आपाआ शिष्यांआ कोहू लाग्यू, परूश्यांआ कपट विषयी खमीरा विषयी होंबाला.

² किबी टापित मेकल्ये नाहा, जे उघडीन्या नाहा जानारू; अने किबी निकायू नाहा, जे होमजुत्लू नाहा.

³ याकोअता जे किबी तुमु आंदाराम कोयु होय, ते उजाला मेहे होमल्यु जानारू; अने जे तुमु कोठडाम कानोम कोयु होय, ते कोअलापो प्रचार ओवनारु.

तियाहाज बिहा

⁴ आय तुमामे जो ताआ हेगांति ओवुहू शकतो का जो डीला घात कोअता पण तियाआ फासाडी फासी किबी नाहा कोहू शकत, तियाहा नाहा बित.

⁵ आय तुमामे सुचाविणारो का तुमु कोडाआ बितगोये जोवजे, घात कोईलानंतर ज्याहा नरकाआ टाकिलाआ अधिकार होय, तीयाहा बीआ.

⁶ नाहाकोत बेन पैसा पाच सीडे नाहा वेसातो? तेबी पण परमेश्वर त्यापैकी होमला ला पण विहीऱ्यो नाहा.

⁷ तुमाआ मुंडकाआ केहे पण गोणीतमेक्ल्यु आह, याकोअता बित नाहा, तुमु जास्तीज सीडे पेक्षा किमतिई होय.

येशुहु इन्कार कोअलो मतलब

⁸ आय तुमामे कोत्लू जो मांहाहा आगाडी माहु स्वीकारीही तियाहा माअहा पोऱ्या पण परमेश्वरोओ स्वर्गदूता आगाडी स्वीकारीत लेही.

⁹ पोन जो मांहाहा आगाडी माआ अस्वीकार कोअनारू तिया परमेश्वरोओ स्वर्गदूता आगाडी नकार कोअयु जानारू.

¹⁰ जो कोडु माअहा पोऱ्याच्या विरूधोम कोडु गोगनारू, तिया तो अपराध क्षमा नाहा कोअल्यो जानारू पोन पवित्र आत्मा निंदा कोआ नाराहां तियाआ अपराधाआ माफी ने जोड़े.

¹¹ जाहा मांहे तुमामे मंदिर सरकार अने अधिकारी याआ आगाडी लेतजाय, ताहा कालजी नाहा कोइलाआ का आमाहा कोडला प्रकारे अने नाहाकोत उत्तर आपी, अने नाहाकोत कोअही.

¹² काहाके पवित्र आत्माआ तियाआ टायमोमें तुमामे हिकाडीत आपी का नाहाकोत कोहू जोवे.

एक धनी मांहोओ दृष्टांत

¹³ फासाडी गर्दीमोरोत होमला जानोतांहि तियाहा कोयु, “ओ गुरुजी, माआ पाहीहो कोअलो का बाह्हाआ धनदौलत माआआरी वाटीत आप.”

¹⁴ तो तियाहा कोयु, “ओ मांहु कोडु माहु तुमाआ न्यायाधीश वाटीईलो कोअनारू नेमिहयू होय?”

¹⁵ तो तियाहा कोयु, “सावध रो, अने हर एक प्रकारोओ लालासापोरोत आपाआ खुद ला वासाडीत मेका; काहाके कोडाआ जीवोन तियाआ धन पोरोत रोत नाहा”

¹⁶ तिये तियाहा एक दृष्टान्त कोद्ल्यू कोडु होमला श्रीमंत माहाआ जोमिनीही जाअखो ओन आव्ये.

¹⁷ तेहलाम तो आपाआ मोनामे विचार कोहू लाग्यू, “आय नाहाकोत कोहू? काहाके माआ इही जागू नाहा जीही माआ ओन ओ मेकहु”

¹⁸ अने तो कोयु, “आय ओ कोअनारू आय आपाआ कोठारे तोडीत तियाआ त्यापोरोत वोडी बोनाडनारू; अने तीही आपाआ आखे ओनाज अने माल मेकही;

¹⁹ अने आपाआ जीवोहो कोअही का जीवू, ताआ जागे खूप धन मेकल्यी होय; मोज्या को, खा, पिवा, सुखोवाही रो.”

²⁰ पोन परमेश्वराने तियाहा कोयु, “ओ फोगु आज राती ताआ जीवताआ पोरोत लेदो जाइअलो; तेहलाम जे किबी तू एकठे कोल्यु होय कोडाआ उवे?”

²¹ एहलो तो मांहु पण होय जो आपाआ याकोअता धन एकठे कोअत्लू, परंतु परमेश्वरोओ नजरो आगाडी मालक नाहा.

कोडनीज गुठीई चिंता मा कोअहा

²² तेहलाम तिये आपाआ शिष्यांआ कोयु, याआ कोअता आय तुमामे कोत्लू, आपाआ जिवोअ चिंता नाहा कोहू का आमाहा नाहाकोत खावा; नाहा आपाआ डीलाआ का नाहाकोत कालीलो.

²³ काहाके का आगीपेक्षा जीव, अने कापडा पेक्षा डील विशेष होय.

²⁴ कागड़ा पोओ लक्ष लागाडा; ते पेअते नाहा, नाहा वाडीलो कोईत; त्याआं कोठारे न त्याआं मोठी होय; तेबी परमेश्वर तियाहा वागवितोलु तुमाआ किमोत सिडा पेक्षा जाअखो जाखो होय.

²⁵ तुमाआ मेरये एहेलू कोडू होय जो चिंता कोअल्यावाही आपाआ आयुष्याम एक वेल पण हुकाडहु शकतो?

²⁶ यकोअता जर तुमु आखाम हानू काम तीयाहाभी नाहा कोहू शकत, तेहलाम फाशीई दिहरा गोठी याकोअता काहा चिंता कोईत रोतेहे?

²⁷ सोसन कोअनारा साडोपो लक्ष दया का ते केहलो वोदतो रोतेहे ते नाहा मेहनत कोईत, नाहा वाडिलो कोईत; तेबी पण आय तुमामे कोत्लू का सलमोन तीयाहाभी आपाआ आखा वैभवाआ, तियाआ कोडु होमला एक सारखे कापडे पेअल्यु ने ओतू.

²⁸ यकोअता जर परमेश्वर धरतीउपो खोडोहो, जे आज होय हादां आगीम मेकल्या जाइअलो, एहेलू काल्त्लू; ताहा ओ अल्प विश्वासी जनोहो, तो तुमामे काहा नाहा पेअही?

²⁹ अने तुमु ई गोठीई होदामेहे मा रोहा की खाहु की पीहू, अने ने शंका को.

³⁰ कोईत अन्यजाति ऐऐ आखे संसार वस्तुऊ होदिला मेहे रोत्ले अने तुमाआ बाह्हू ओलखीत्लू का तुमामे आव वस्तूची गरज ओतली होय.

³¹ पोन परमेश्वरोओ राज्या अने धार्मिकता होद कोआ तेऐ आखी वस्तू बी जोडीत जाय.

धन का एखठू कोअलोओ?

³² ऐ हाना झुंड, नाहा भिईलो; काहाके तुमाआ बाह्हाहा हाजो लागेहे, का तुमामे राज्य आपलो

³³ आपाआ धन वेसेत दान को; तेहलूज होर्गामेऱ्ये अक्षय धनोओ जीरल्यो न उवनारू खोतली आपाआ कोअता कोईत मेका तीही बांड आवीत नाहा अने किडु लागित नाहा.

³⁴ कोईत का जीही तुमाआ धन होय तीइही तुमाआ मोन तीयाहाभी लाग्यीही रोही.

कायम तियार रोवा

³⁵ तुमाआ कोमारे बांधीत मेकली ओये अने तुमाआ दिवे पेटाळलेल्या ओये,

³⁶ अने तुमु तियाअ मांहाहोस बन्यो, जे आपाआ मालकाआ वात पालीत रोतेहे का तो वेह्वालोमेरोत कोयो फासी आवे, अने जांहा तो आविलो बायणो टोकीही तेहलाम लागेज तियाआ याकोअता उगाड्या.

³⁷ धन्य होय ते दास जांहा मालक आविलो जागतू पालीही; आय तुमामे खरोज कोत्लू का तो कोमोर बाधित तियाहा रोटू कोइला याकोअता बोहाडे अने जागे आविलो तियाआ सेवा कोअही.

³⁸ जर तो रातीई दिहरा पहर पोन तिसऱ्या वेल आविलो जागतू पालीही, तेहलाम तो दास धन्य.

³⁹ पोन तुमु ओ होमजीत ल्या का जर कोआआ मालकोहू मालुम ओते का बांड कोडला टायमोमें आवे, तेहलाम जागतू रो अने आपाआ कोओहो फोडू आप्लु कायना ओतो

⁴⁰ तुमु तीयाहाभी तीयारिमे रो; काहाके का ज्या टायमोमें तुमु विचार तीयाहाभी कोईत नाहा, तियाअ टायमोमें माअहा पोऱ्या आवे.

विश्वासयोग्य सेवक कोड़ो?

⁴¹ तेहलाम पेत्रसाई कोयु, “ओ प्रभू, नाहाकोत ओ दृष्टान्त तू आमाहा का आखाज कोयु आह.”

⁴² प्रभू कोयु, तो विश्वासाजोगो अने विचार शाली कोडू होय, ज्याचा मालक तियाहा पावर पावोरोपो कारभारी मेकनारू का तियाहा टायमोपो रोटू साधन आपी?

⁴³ धन्य होय जो दास, ज्याहा तिया मालक आविलो ऐह्लोज कोअत्लू तेहलाम पालनारू.

⁴⁴ आय तुमामे खरोज कोत्लू, तो तियाहा आपाआ आखे धन उपो अधिकार ठेरवीही.

⁴⁵ पोन तो जर सेवक विचार कोअनारू का माआ मालक आविला वाअ कोईत होय, अने दासे अने दासी याहा माआहि देई लाग्यू, अने खात पित अने मस्त उवे.

⁴⁶ ताहा तियाअ सेवको मालक एहला तेदीही, जांहा तो तियाआ वात पालीलो नाहा रोही अने एह्ली वेल ज्या तो होमजुत्लू नाहा, आविलो अने तियाहा वाडीत टाकही तियाहा विश्वास नाहा आरी मेकनारू.

⁴⁷ तो दास जो आपाआ मालकाआ इच्छा होमजाडीत ओतु, अने तीयार नाहा रोला अने तिया इच्छावाहि जातलू, जास्तीज माआदे खाही.

⁴⁸ पण जो नाहा होमजीत माआदे खाअलाकोता काम कोअही तो कोम माआदे खाही; अने ज्याहा जाखा होफहोपिन आप्लु होय, तियाआ त्यापोरोत जाखा लेदिओलो जानारू.

शान्ति नाहा फूट

⁴⁹ आय धोरतीपो आग लागळा याकोअता आवयू होय; अने नाहाकोत पालोहो फक्त ओ का ओमे पेटयी ओते.

⁵⁰ ताहु ताहा एक बाप्तिस्मे लेअला होय, अने जोपोरोत तो उवे नाहा तोपोरोत आय कोडला व्यवस्थाम रोही.

⁵¹ नाहाकोत तुमामे सोमजीतलो का आय धोरतीपो शांतता कोइला याकोअता आवयू होय? आय तुमामे कोयु; नाहा ताहा अलग कोइला याकोअता आवयू होय.

⁵² काहाके ओमे पोरोत होमला कोआत पाच जोओ आपामे विरोध कोअनारू, तीनुविरुद्ध बेन अने बेनुविरुद्ध तीनु.

⁵³ बाह्हू पुत्रा शी, अने पुत्र बाह्हारी विरोध कोअनारू; याह्ही पोऱ्यीरी अने पोऱ्यी याह्हीरी, हावोहो वोवडीआरी, अने वोवडीहही हवोहोरी विरोध मेकही.

टायमोहो उलखिलोओ

⁵⁴ तिये माहुऊ पण कोयु, जांहा तुमु वाढलाहा पश्चिमे त्यापोरोत आविलावेले पालल्ते तेहलाम लागेज कोतले का पाई पोडी, अने तेहलूज ओते.

⁵⁵ अने जांहा दक्षिणाआ वारू सुटल्लू तेहलाम का तेहलाम तुमु कोतले का गरम उवे अने तेहलूज उवनारा ओते.

⁵⁶ अरे ढोंग कोणारा तुमु धोरती अने जुगोमेरयो रुपरांगोमे भेद कोहू सेकतेहे, परंतु आव युगाआ विषयी काहा भेद कोहू शकत नाहा?

खुदोओ समश्यारी समजोवता

⁵⁷ तुमु स्वतः निर्णय काहा नाहाकोईत लेत का हाजो नाहाकोत होय?

⁵⁸ जांहा तू आपाआ वाद कोअनाऱ्या आरी अधिकारी जात होय ताहा वाटेम तियाआ पोरोत सोडीलाआ पर्यंत को, एहलो नाहा उवूंहू जोवजे का तो ताहु न्यायधीश जागे घेऊन जानारू, अने न्यायधीश ताहु शिपायाआ आथे होपीही अने शिपाई ताहु जेलुमे टाकही.

⁵⁹ आय तुमामे कोत्लू का जोपोरोत तू दमडी-दमडी पोईत नाहा आपी तोपोरोत तीहीरोत सुटे नाहा.