लूका 10 - नोयरी नोवलू नियम

सत्तर चेलाहा मुकलिलोओ

¹ आव गोठीफासाडी येशु सोत्तर अने मांहु नेमित आप्लु, अने ज्या-ज्या नगरोत अने जागापो तो स्वता जानारू ओतु, तीइही तियाहा दोन-दोन कोईत आपाआ आगाडी मोक्ल्यीत.

² तो तियाहा कोयु, पाकल्ये खेत जाखो होय, पण काम कोअनारे थोडो होय; याकोअता ओनोओ धन्यावाहित आपाआ खेतोमे ओन वाडीलाकाजे काम कोअनारे मोकलित कोईत तियाआ प्रार्थना को.

³ जा; पाला, आय तुमाहा मेंडा सारखो लांडगामेहे आय मोकलित.

⁴ कोईत नाहा खोतली मेहे नाहा खोली नाहा खाअडे ल्या; अने नाहा सोडकोपो कोडाआ नमस्कार को.

⁵ ज्या कोडला कोआत जावा, पहीले कोआ, “आव कोअमे शांती होय”

⁶ जर तीइही कोडु शांती लायकी होय, ताहा तुमाआ शांती तियापो रोही, नाहा ताहा तुमाआ जागे आविलो.

⁷ तियाआ कोअमे रो, अने जे किबी त्यापोरोत मिले, तोज खा-प्या, काहाके मोजऱ्याहा आपाआ मोजरी जोडीहो जोवे; घरी-घरी नाहा फिरूहु.

⁸ कोडला पण नगरोत गोल्यू, अने तिहीज मांहे तुमामे मानोहो ताहा जे किबी तुमाआ आगाडी मेक्ल्ये जानारू तोज खा.

⁹ तीहीई माआद्वाड्याआ हाजो को अने तियाहा कोआ, “देवोओ राज्य तुमाआ जागे आव्ये होय.”

¹⁰ पण कोडनीबि नगरोत जा, अने तीहीई माहु तुमाआ ग्रहण नाहा कोअनारू, ताहा तियाआ वाटेपो जात कोआ,

¹¹ तुमाआ नगराआ धूळ पण, जी आमा गुडाहा लागीई होय, आमाहा तुमाआ आगाडी फोकडीत आपोहो; ताहा पण ओ होमजीत ल्या का देवोओ राज्य तुमाआ जागे आव्ये होय.

¹² आय तुमामे कोत्लू का ज्या तेदीही तियाअ नगराआ हालतवाही सदोम ची हालत जाखो सहन कोअलाआ हाजी उवे.

मन नि फिरावनारा पोओ हाय

¹³ हाय खोराजीना हाय बेथसैदा, सामर्थ्याचे काम तुमामे कोल्यु होय, जर ते सोर अने सिदोन मेहे कोल्यु जाहो ताहा तरह ओतगोयु अने खाओम बोहित अने पश्चाताप कोईत.

¹⁴ पण न्यायाआ तेदीही तुमाआ पेक्षा सोर अने सीदोन पेक्षा जाखो सहन कोअलाआ हाजो उवे.

¹⁵ अने ओ कफरनहूम, नाहाकोत तू जुगापरोत उचो कोअल्यो जानारू? तू ताहा अधोलोकाआ पर्यंत निसे जानारू.

¹⁶ “जे तुमाअच स्विकारेहे, तो माहु मानत्लू; अने जो तुमामे तुच्छ मोनोहो, तो माहु तुच्छ मोनोहो; अने जो माहु तुच्छ मोनोहो, तो माआ मोकलीनाराहा तुच्छ मोनोहो”.

सत्तर चेला वापस आवया

¹⁷ तेऐ सत्तर आनंद कोईत आव्ये अने कोहू लागाडीत, “ओ प्रभुजी, ताआ नावाआ दुष्टात्मा पण वंश माय होय.”

¹⁸ तिये तियाहा कोयु, “आय शैतानोहो विजोहोस होर्गामरोत पोडे तेहलाम देखित ओतु.

¹⁹ पाला, आय तीही हाप अने विसीई याहा तुडविलाआ, अने दुश्मनो आखे शक्तीपो अधिकार आप्यू होय; अने कोडला वस्तुआरी तुमामे किबी त्रास उवे नाहा.

²⁰ तेबी पण यापो आनंदाम नाहा ओवुहू का आत्माआ तुमाआ वंश माय होय, पण यापोरोत आनंदाम रो का तुमाआ नाव होर्गांम लेखिलो होय.”

बेटुह्हू बाह्हाहा प्रगट कोअयु

²¹ त्या टायमोहो तो पवित्र आत्मा मेहे पोईत आनंदाम ओवयू, अने मनाहे, “ओ ओबा, होर्गा अने धोरती प्रभू, आयताआ उपकाराआ मोनोहो का तू आव गोठीकोता समजूत बअणापोरोत निकाडीत मेक्ल्ये, अने पोऱ्याहा कोयु होय ओ ओबा, काहाके ताहु एज हाजो लागी.

²² माआ बाह्हाही माहु आखे किबी होपिल्ये होय; अने कोडोबी मालुम का पुत्र कोडू होय फक्त बाह्हू, अने बाह्हू कोडू होय कोडोबी मालुम नाहा फक्त पोऱ्यानाहते अने तो ज्यापो तियाहा प्रगट कोअलाआ इच्छा होय”

²³ ताहा चेलाआ जागे वोलीत कोयु, “धन्य होय ज्याहा डोआं, जे आव गोठी जे तुमु पालतेहे पालीलो होय.

²⁴ काहाके आय तुमामे कोत्लू का जास्तीज संदेष्टा अने राजांई पालल्ये का ज्या गोठी तुमु पालतेहे न पाले, अने ज्या गोठी तुमु होमलिताहा होमलित न होमले.”

एक हाजा सामरीई दृष्टांत

²⁵ फासाडी पाला, एक शास्त्री उठ्यू अने कोत तियाआ परीक्षा लेऊ लाग्यू, “ओ प्रभुजी, सार्वकालिक जिवनाआ वारीस कोईलाकाजे आय नाहाकोत कोहू?”

²⁶ तो तियाहा कोयु, “नियमशास्त्राम नाहाकोत लेखिलो होय? तू तेहे वसत्लू?”

²⁷ तिये उत्तर आप्लु, “तू देव आपाआ परमेश्वरोओ आपाआ पुरो मोनोवाही अने आपाआ पुरो जीवाआ अने आपाआ पुरो शक्तीवांही अने आपाआ पुरो ओक्कल प्रेम को; अने आपाआ आरी कोरयापो आपाआ सारखो प्रीती को”

²⁸ तो तियाहा कोयु, “तू आरी उत्तर आप्लु; ओच कोताहा तू जीवनामे रोही.”

²⁹ पण तियाआ आपाआ खुद ला धोर्मी ठरविलं इच्छावाही येशुहू फ़ुस्ल्याआ, “ताहा माआ जागरयु कोडू होय?”

³⁰ येशु उत्तर आप्लु, एक मांहु यरूशलेमामेरोत यरीहाहा जात ओतु का चोरठ्याआ तोईत तियाआ कापडे काढीत लेधलो, अने माईत तियाहा आर्दूमोल्यू टाकीत निहित गोये.

³¹ अने एहलो उवे का तियाआ सोडकोपो एक याजक जात ओतु, पण तियाहा पालहु दिहरा सोडकोपो निहित गोल्यो.

³² याच प्रकारे एक लेवी तियाअ जागापो आवयू, तो पण तियाहा पालहु दिहरा सोडकोपो निहित गोल्यो.

³³ पण एक सामरी प्रवासी तीइही आवयू, अने तियाहा पालहु दया आवयी.

³⁴ ओतो तियाआ जागे आविलो तियाआ जखमूहु तेल अने द्राक्षरस लागाडीत पट्ट्या बाधल्यो, अने आपाआ जनावरापो बोहाडीत उतार शाळाम घेऊन गोल्यो, अने तियाआ सेवा कोअयी.

³⁵ दिहरा तेदीही तियाआ बेन दिनार काढीत उतार शाळाआ मालकोहू आप्लु, अने कोयु, “याआ होंबाल को, अने जे किबी ताहु फासी लागे, ते आय फासी आवेताहा पोईत आपी”

³⁶ ओमे ताआ ध्यानाम जो बांडोमे पोडीत ओतु, आव तीनु मायरोत तिया जागरयु कोडू ओतु?

³⁷ ओतो कोयु, “तोज जिये तियापो दया कोअयी” येशु तियाहा कोयु, “जा, तू पण ऐह्लोज को”.

मार्था अने मरियम

³⁸ जाहा ते जात ओते ताहा तो होमला गावून गोल्यो, अने मार्था नावोओ एक स्त्रीने तियाहा आपाआ कोआ हादाडये.

³⁹ मरिया नावोओ तीआ एक बोईहही ओती ती प्रभूउ गुडाही बोहित तियाआ वचन होमलित ओती.

⁴⁰ पोन मार्था सेवा कोअता-कोअता घाबरील्यो गोयी, अने तियाआ जागे आविलो कोअहू लागीई, “ओ प्रभुजी नाहाकोत तुमु किबी चिंता नाहा कोअयी का माआ बोईहींही माहु सेवा कोइला कोअता एखलीज मेकल्यी? यकोअता तीही कोआ का माआ मदत कोईली.”

⁴¹ येशुई तीही उत्तर आप्लु, “मार्था, ओ मार्था; तू जाखो गोठी याकोअता चिंता कोअते अने बितले.

⁴² पोन एक गोठी गरजेए होय, अने तो हाजू वाटा मरिया निवडीत लेदो होय तो तियापोरोत लेदो जानारू नाहा”.